(1791 – 1867) Məşhur ingilis alimi M.Faradey Londonda kasıb dəmirçi ailəsində anadan olmuşdur. Tam məktəb təhsili almayan M.Faradey cilidçəkmə emalatxanasında şagird vəzifəsində işləməklə özbaşına təhsilini artırmış və Kral İnstitutunda görkəmli fizik və kimyaçı H.Devinin məruzələrini dinləmişdir və sonra onun laboratoriyasında laborant vəzifəsində işləmişdir. M.Faradeyin ilk təcrübə işləri qaz hidratı ilə əlaqədar olaraq, eyni zamanda soyudulma və sıxılma üsullarından istifadə etməklə, qazların mayeləşdirilməsinə həsr edilmişdir. Sonralar M.Faradey həmin laboratoriyanın müdiri və institutun professoru vəzifəsinə seçilmişdir. M.Faradey tərəfindən elektrolit, elektromaqnit induksiyası, öz-özünə induksiya, elektromaqnit sahəsi, elektrik tutumu və dielektrik sabiti üzrə qanunauyğunluqlar müəyyən edilmiş, cisimlərin diamaqnetizm və paramaqnetizm xassələri, maqnit sahəsində polyarizasiya müstəvisinin fırlanma xassələri kəşf edilmişdir.
