Guliston davlat universiteti akvakultura fanidan amaliy mashg’ulotlar

Dars o’tish vositalari: o’quv va uslubiy qo’llanmalar, jadvallar, okunning ovqat hazm qilish va ayirish sistemasi sxemasi, qon aylanish sistemasi sxemasi, jabra tuzilishi va ishi sxemasi, qog’ozlar, qalam, ish daftari, o’lchagich, mikrokalkulyator.
Dars o’tish usullari: Dars savol-javob, takrorlash va suhbat, amaliy topshiriqni mustaqil bajarish hamda olingan natijalarni muhokama qilish tarzida olib boriladi. Bunda talabalarni mustaqil erkin fikrlash va fikrlarini bayon etishga o’rgatish uchun ularga mavzu bo’yicha savollar beriladi, talabalar guruh-guruh bo’lib amaliy ishni mustaqil bajaradilar va natijalarini bayon qiladilar, natijalar o’qituvchi bilan tahlil qilinadi.
Darsning mazmuni:
Baliqlar xilma-xil suv sharoitida yashaydi: dengizlarda, chuchuk suv havzalarida, daryolarda, ko’llarda, suv omborilarda suv yuzasiga yaqin va suv tubida, yuqori va past temperaturali suvlarda va hokazo. Yashash sharoiti, oziq tarkibi, konkurentlar, baliq tuzilishidagi va xulq-atvoridagi turli-tumanlik, ana shularga bog’liq. Suv qatlamlarida va suv yuzasida yashaydigan baliqlar tanasi, odatda, suyri shaklli bo’lib, dum suzgich qanoti kuchli rivojlangan. Bularga raqiblardan saqlanishda va o’lja ketidan quvishda tez suzishga imkon beradi (Komilov, 1983). Suv tubida yashaydigan baliqlar, odatda, sekin suzadi, ularning yassi gavdasi o’lja uchun ham, dushmanlar uchun ham uncha sezilmaydi. Ochiq chakalakzorlar ichida yashaydigan baliqlar chipor va yorqin rangli bo’ladi. G’orlardagi suv havzalarda, butunlay qorong’i sharoitda rangsiz baliqlar yashaydi. Chuqur suvlarda yashaydigan ba’zi baliqlar yorituvchi organlarga ega chunki, chuqurliklarga quyosh nuri tushmaydi. Baliqlarning umurtqa pog’onasining ostida tananing katta bo’shlig’i bo’lib, unda ichki organlar joylashadi (Buxovskiy va b. 1989).

2.1.Baliqlarning ichki organlari haqida nazariy ma’lumotlar.
Tana bõshlig’i. Baliqning tana bo’shlig’ida, umurtqa pog’onasining ostida tananing katta bo’shlig’i bo’lib, unda ichki organlar joylashadi.
Ovqat hazm qilish sistemasi. Okun - yirtqich baliq. U har xil suv hayvonlari, shu jumladan, boshqa tur baliqlar bilan oziqlanadi. Okun o’ljasini ushlab, jag’laridagi o’tkir tishlari bilan tishlab oladi. Ovqat yutilgandan keyin halqum va qizilo’ngachi orqali oshqozoniga boradi. Okun o’ljasini butunligicha yutadi, shuning uchun uning oshqazoni juda cho’ziluvchan bo’ladi. Oshqozoni devoridagi juda mayda bezlar oshqozon shi­rasi ajratib chiqaradi. Bu shira tasirida ovqat hazm bo’la boshlaydi. Qisman o’zgargan ovqat keyin ingichka ichakka o’tadi, bu yerda unga oshqozon osti bezining ovqat hazm qilish shirasi va jigardan keladigan o’t suyuqligi ta’sir etadi. O’t suyuqligi zapasi o’t pufagida to’planadi(1 rasm).
Oziq moddalar ichak devorlari orqali qonga o’tadi, hazm bo’lmagan qoldiqlar esa orqa ichakka keladi va tashqariga chiqarib tashlanadi (Bixovskiy va b. 1989).
Suzgich pufagi. Okunda ham, boshqa ko’pgina baliqlardagi singari, ichi gazlar aralashmasi bilan to’lgan yupqa devorli alohida o’simta - suzgich pufak bo’ladi. Voyaga yetgan okunning ichagi bilan pufagi bir-biriga tutashmagan, lekin uning lichinkasi va boshqa ba’zi baliqlar (masalan, chavoq baliq yoki karp) ichagi bilan pufagi butun umr kichik naycha yordamida tutashgan bo’ladi. Baliq chuqurlikka tushganda pufagining hajmi kichrayadi va baliqning tig’izligi ortadi. Bu esa suvga tez botishga yordam beradi (Buxovskiy va b. 1989).
Suv yuzasiga suzib chiqishida suzgich pufagining hajmi kattalashadi va baliq birmuncha yengillashadi. Agar baliq muayyan bir xil chuqurlikda bo’lsa, pufagining hajmi o’zgarmaydi. Bu esa baliq harakatsiz, suv qatlamida «osilib» qolgandek turishiga imkon beradi.
Nafas olish sistemasi. Baliqdar suvda erigan kislorod bilan nafas oladi.
Baliq doim suv yutami. Suv og’iz bo’shlig’idan jabra yoriqlari orqali o’tadi, bu yoriqlar halqum devorlaridan o’tgan bo’lib, nafas organlari - jabralarini yuvib o’tadi. Okunda ular jabra yoylaridan iborat, ulardan har qaysisining bir tomonida och qizil rangli jabra yaproqchalari, ikkinchi tomonida esa oqish jabra tichinkalari bor. Jabra tichinkalari suzish apparatdir: ular o’lja jabra yoriqlari orqali sirg’alib chiqib ketishiga yo’l qo’ymaydi. Jabra yaproqchalaridan juda mayda qon tomirlari - kapillyarlar o’tgan. Jabra yaproqchalarining yupqa devori orqali qonga suvda erigan kislorod o’tadi, qondan esa suga karbonat angidrit chiqariladi (Komilov, 1983).
Agar kislorod kam bo’lsa, baliqlar suv yuzasiga chiqib og’zi orqali havo ola boshlaydi. Agar ular kislorod kam bo’lgan suvda uzoq vaqt yashasa, nobut bo’ladi. Qishda suv havzalarida ba’zan muz ostida kislorod yetishmay qoladi. Bu vaqtda baliqlar qiynaladi. Buning oldini olish uchun har yer-har yerda muzni yorib teshik ochiladi.
Qurib qolgan jabra yaproqchalari kislarod va karbonat angidridni o’tkaza olmaydi. Shuning uchun suvdan chiqarib olingan baliq tezda nobud bo’ladi. Nozik jabralarining tashqi tomonida jabra qopqoqlari bo’ladi (V.Naumov,1985).
Baliqlarning qon aylanish sistemasi yopiq (tutash)dir. U yurak qon tomirlaridan iborat. Yurakdan chiqadigan tomirlar arteriya, yurakkga qon olib keladigan tomirlar vena deb ataladi. Baliqning yuragi ikki kamerali. U yurak bo’lmasi va qorinchasidan iborat, ularning muskuli devori navbat bilan qisqarib turadi. Yurak bo’lmasidan qon yurak qorinchasiga, undin esa yirik arteriyaga – qorin aortasiga itariladi. Qonning orqasiga qaytishiga klapanlar yo’l qo’ymaydi. Qorin aortasi jabralarga boradi, undan o’ngga va chapga juda mayda tomirlar ketadi. Ularda oqadigan qon to’q rangli, karbonat angidridda to’yingan bo’lib, vena qoni deb ataladi. Jabralarda tamirlar kapillyarlarga tarmoqlanadi. Ulardan oqadigan qon karbonat angidritdan tozalanib, kislorodga to’yinadi. Jabralardan chiqadigan tomirlardan, endi kislorodga to’yingan qip-qizil arteriya qoni oqadi. U umurtqa pog’onasi ostida tana bo’ylab joylashgan orqa aortaga yig’iladi. Orqa aorta dum bo’limida umurtqalarning pastgi yoyi ichidan o’tadi.
Orqa aortadan birmuncha mayda arteriyalar chiqadi, ular turli organlarda kapillyarlargacha tarmoqlanadi. Bu kapillyarlarning devori orqali tuximalarga kislorod va oziq moddalar, ulardan esa qonga karbonat angidrit va hayot faoliyatining boshqa mahsulotlari o’tadi.
Qip - qizil arteriya qoni asta - sekin to’q ranga kiradi va ya’ni tarkibida karbonat angidrid ko’p, kislorod kam bo’lgan vena qoniga aylanadi. Vena qoni venalarda to’planib, ulardan yurak bo’lmasiga tushadi. Qon bitta tutash qon aylanish doirasi bo’ylab ana shunday tinimsiz harakatlanib turadi.
Ayirish sistemasi: Tana bo’shlig’ining yuqori qismida qizg’ish-qo’ng’ir rangli lentasimon ikkita buyrak joylashgan. Buyraklar kapillyarlarida qonda moddalarning parchalanish mahsulotlari filtrlanadi. Ulardan siydik hosil bo’ladi. Ikkita siydik yo’li orqali u anal teshik orqasidan tashqariga ochiladigan siydik pufagiga o’tadi(Buxovskiy va b. 1989).
2.2.Baliqlarni ichki organlarini sxemadan o’rganish va aniqlash.
Ishni bajarish vaqtida rasmlarda keltirilgan okun balig’ining ovqat hazim qilish va ayirish sistemasi sxemasi, qon aylanish sistemasi sxemasi, jabralarining tuzilishi va ish sxemalaridan foydalaniladi.