Guliston davlat universiteti pedagogika va psixologiya kafedrasi oila pedagogikasi

1-jadval. Oila pedagogikasi” fanining rivojiga
bevosita ta’sir ko’rsatuvchi fanlarning guruhlari

№	Fanlar turkumi	Fanlar
1.	Pedagogik turkum fanlar	“Maktabgacha ta’lim pedagogikasi”, “Boshlang’ich ta’lim pedagogikasi”, “Pedagogika nazariyasi va amaliyoti”, “Ijtimoiy pedagogika”, “Pedagogik texnologiya”, “Pedagogik mahorat”, “Pedagogik konfliktologiya” hamda “Tarbiyaviy ishlar metodikasi”
2.	Psixologik fanlar	“Umumiy psixologiya”, “Ijtimoiy psixologiya”, “Yosh va pedagogik psixologiya”
3.	Gumanitar fanlar	“Milliy istiqlol g’oyasi va ma’naviyat asoslari”, “Etnografiya”, “Axloqshunoslik”, “Estetika asoslari”, “Oila huquqi”
4.	Tabiiy fanlar	“Yosh fiziologiyasi va gigiena”, “Iqtisodiyot asoslari”

Quyida “Oila pedagogikasi” fanining boshqa fanlar bilan o’zaro aloqadorligi va ularning asoslaridan foydalanish imkoniyatlari xususida so’z yuritiladi.

“Maktabgacha ta’lim pedagogikasi” – maktabgacha ta’lim yoshi bolalarini tarbiyalash, ularga boshlang’ich bilimlarni berish masalalarining tadqiqi bilan shug’ullanuvchi fan. U ota-onalarning maktabgacha ta’lim yoshidagi bolalarni to’g’ri tarbiyalash, mazkur yosh davrining o’ziga xos xususiyatlarga tayangan holda bolalarda muayyan ko’nikmalarni shakllantirish, ma’naviy-axloqiy sifatlarni tarbiyalashga yordam beradi. “Maktabgacha ta’lim pedagogikasi” fani shu yoshdagi bolalar nutqini boyitish, organizmni to’g’ri parvarishlar, salomatligini mustahkamlash hamda ularda ma’lum harakat ko’nikmalarini shakllantirishga xizmat qiladi. Shu blan birga ushbu fan maktabgacha ta’lim yoshi bolalarini maktab ta’limiga samarali tayyorlash yo’llari, shakl, metod hamda vositalari to’g’risida ma’lumotlarni berish imkoniyatiga ega. Maktabgacha ta’lim yoshida bolalar hayotida o’yin faoliyati etakchi o’rin tutadi. Shu sababli ota-onalar fanning imkoniyatlariga tayangan holda bolalarni o’yin faoliyati orqali ijtimoiy munosabatlarga samarali tayyorlash imkoniyatini qo’lga kiritadilar.
“Boshlang’ich ta’lim pedagogikasi” – boshlang’ich sinf o’quvchilarining yosh, psixologik xususiyatlarini inobatga olgan holda ularni o’qitish va tarbiyalash jarayonining mazmuni, qonuniyatlari, tamoyillari, tarkibiy tuzilmasi, shakl, metod va vositalarini o’rganadigan fan bo’lib, u oilada bolalar tarbiyasini tashkil etishda boshlang’ich ta’lim yoshidagi bolalarning yosh, psixologik xususiyatlariga tayanish imkoniyatini ta’minlaydi. Boshlang’ich sinf o’quvchilarini maktab ta’limiga samarali moslashishlarini ta’minlashda ona-onalarga yaqindan yordam beradi. Bu yosh davri bolalarini to’g’ri tarbiyalashda ularning qat’iy belgilangan kun tartibiga ega bo’lishlari, o’qish va o’yin faoliyatini uyg’unlashtira olish maqsadga muvofiqdir.
“Pedagogika nazariyasi va amaliyoti” – muayyan tizim asosida tashkil etiladigan pedagogik faoliyat, ta’lim-tarbiyaning mazmuni, shakli, metod va vositalari, shuningdek, pedagogik fikrlarning paydo bo’lish va rivojlanish tarixini, turli davrlarda bola tarbiyasini tashkil etishga oid bilimlarning shakllanishini tadqiq qiluvchi fan. Ushbu fan oilada farzandlar tarbiyasini tashkil etishda ota-onalarni insoniyat, xususan, o’zbek xalqi tomonidan to’plangan tarixiy tajriba bilan yaqindan tanishtirishga xizmat qiladi. Xususan, xalq pedagogikasining etakchi g’oyalari, bolalarda ijobiy sifatlarni tarbiyalash, ulardagi salbiy odatlarni bartaraf etishda qo’llaniladigan xalqona pedagogik faoliyatning samarali, shakl, metod hamda vositalar, oilada farzandlar tarbiyasini tashkil etishga nisbatan milliy yondashuvning o’ziga xos jihatlariga oid ma’lumotlar bilan ota-onalarni tanishtirishda “Pedagogika nazariyasi va amaliyoti” fani o’ziga xos o’rin tutadi.
“Ijtimoiy pedagogika” – shaxsni ijtimoiylashtirish qonuniyatlari, voyaga etmaganlar bilan bog’liq ijtimoiy muammolar (pedagogik qarovsizlik, bolalar ichkilikbozligi, voyaga etmaganlar, jinoyatchiligi, giyohvandligi va fohishabozligi kabilar)ni pedagogik nuqtai nazardan hal qilish, ijtimoiy pedagogik faoliyatni samarali tashkil etish texnologiyalarini yaratish masalalarini o’rganadigan fan. Oila tarbiyasini tashkil etishda ota-onalarning “o’tish davri” – o’smirlikning o’ziga xos xususiyatlari, bu davrda o’smirlar xulqida kuzatiladigan pedagogik og’ish, o’smirlarni to’g’ri tarbiyalash yo’llari, shakl, metod, vositalari, shuningdek, ularning shaxsida ko’zga tashlanadigan salbiy sifatlarni bartaraf etishga oqilona yondashuv, o’smir hamda o’spirinlarni ijtimoiy-foydali mehnatga jalb etishning pedagogik afzalligi kabilardan xabardor qilishda “Ijtimoiy pedagogika” fani muhim ahamiyatga ega. Qolaversa, mazkur fan ota-onalarni pedagogik qarovsizlik, bolalar ichkilikbozligi, voyaga etmaganlar, jinoyatchiligi, giyohvandligi va fohishabozligi kabi salbiy ijtimoiy illatlardan muhofaza qilish, voyaga etmaganlarda sog’lom turmush tarzi ko’nikmalarini muvaffaqiyatli shakllantirishga oid nazariy hamda amaliy bilimlar bilan qurollantiradi.
“Pedagogik mahorat” – bo’lajak pedagog (o’qituvchilar)da pedagogik jarayonni metodik jihatdan to’g’ri, samarali tashkil etish, o’qituvchi va o’quvchi munosabatlarini oqilona yo’lga qo’yish, bo’lajak mutaxassislarni kasbiy faoliyatni tashkil etishga tayyorlash masalalarini o’rganadigan fan. Ushbu fan asoslari ota-onalarning pedagogik bilimlarini boyitish bilan birga ularda shaxslararo, xususan, oila a’zolari o’rtasidagi munosabatlarni yuksak mahorat bilan tashkil etish ko’nikma hamda malakalarini rivojlantirishga yordam beradi. Ota-onalarning pedagogik mahorat asoslaridan xabardorliklari oila tarbiyasini tashkil etishda o’zlari bilan farzandlar o’rtasida ijtimoiy munosabatlarning mehr-muhabbatga, o’zaro yordamga asoslanishini ta’minlab, har qanday ziddiyatni bartaraf etadi. Fanning imkoniyatlaridan foydalanish ota-onalar tomonidan farzandlar bilan bo’ladigan munosabatlarda muloqot uslubi (avtoritar, liberal va demokratik uslubi)ning to’g’ri tanlanishiga olib keladi. Qolaversa, oila sharoitida farzandlarning bilim olishlari va muayyan ma’naviy-axloqiy sifatlarni o’zlashtirishlarida ota-onalarning pedagogik mahorat mohiyatini yorituvchi bilimdonlik, qobiliyat, muloqot, kommunikativ ta’sir ko’rsatish, pedagogik texnika, nutq texnikasi, refleksiya, relaksatsiya, shu bilan birga tashkilotchilik qobiliyatiga ega bo’lishlari oila tarbiyasining samaradorligini oshiradi.
“Pedagogik konfliktologiya” – pedagogik konfliktlarning kelib chiqish sabablarini o’rganish asosida ijobiy xususiyatga ega ziddiyatlarni boyitish, ulardan maqsadli foydalanish, salbiy xarakterdagi nizolarni bartaraf etish yo’llari, tamoyillari, shakl, metod, vosita va texnologiyasini ishlab chiqish va amaliyotga tadbiq etishni tadqiq etuvchi fan. Ota-onalar pedagogik konfliktlarning mohiyatidan xabardor bo’lar ekanlar, oila a’zolari o’rtasidagi yuzaga keladigan ziddiyatlarni to’g’ri baholash, ijobiy xarakterdagi ziddiyatlardan oila tarbiyasi samaradorligini oshirishda foydalanish, salbiy xarakterdagi nizolarni esa o’z vaqtida aniqlab, tezda bartaraf etish chora-tadbirlarini belgilash imkoniyatiga ega bo’ladi. Shu bilan birga “Pedagogik konfliktologiya” fani ota-onalarga oilaviy munosabatlarni salbiy nizolarsiz yo’lga qo’yishga yordam beradi. Ota-onalarning nizolar to’g’risidagi bilimlariga ega bo’lishlari farzandlarni bolalar jamoasida yuzaga keladigan nizolarga nisbatan to’g’ri yondashishga ham o’rgatishga xizmat qiladi. Shunday vaziyatlar bo’ladiki, farzandlar mustaqil ravishda bolalar jamoasda yuzaga kelgan nizolarni hal qila olmaydi. Ana shu holatlarda ota-onalar ularga amaliy yordam ko’rsatadi. Agarda ularning nizolarning mohiyatiga oid bilimlari etarli bo’lsa, u holda farzandlarga beradigan ko’rsatmalari ham ijobiy natijalarni kafolatlaydi.
“Tarbiyaviy ishlar metodikasi” – o’quvchilar jamoasida tashkil etiladigan ma’naviy-ma’rifiy ishlarning shakl, metod va vositalari, ularni tashkil etish, o’tkazish va natijalarini tahlil qilish masalalarini o’rganuvchi fan. Tarbiyasini tashkil etishda ota-onalarning tarbiyaviy ishlarni samarali tashkil etishga oid pedagogik, metodik bilimlarni puxta o’zlashtira olishlari nihoyatda muhim. Zero, oila pedagogikasining asosini oilada tarbiyaviy ishlarni to’g’ri, samarali tashkil etish etish tashkil qiladi. Shu sababli ota-onalar har bir xatti-harakatlarining tarbiyaviy mohiyatga, ta’sirga egaligini chuqur anglab etishlari zarur. Albatta, oilada tashkil etiladigan tarbiyaviy (ma’naviy-ma’rifiy) ishlar ta’lim muassasalarida bo’lgani kabi reja, dastur hamda maxsus tayyorgarlik asosida amalga oshirilmaydi. Oila tarbiyasining murakkabligi, qiyin jarayon ekanligi ham aynan shunda namoyon bo’ladi. Aksincha, ota-onaning yurish-turishi, o’zini tutishi, so’zlari, atrofdagilar bilan muomasi, oila xo’jaligi, hatto kasbiy faoliyatiga bo’lgan yondashuvi ham farzandlarning ko’z o’ngida yaqqol namoyon bo’ladi. Shu bois tarbiyaviy ishlar metodikasiga oid bilimlar ota-onaga o’zlarining yurish-turishi, o’zini tutishi, so’zlari, atrofdagilar bilan muomasi, oila xo’jaligi, hatto kasbiy faoliyatiga bo’lgan yondashuvini ijobiy mazmunga ega bo’lishini ta’minlashga yordam beradi. Oila davrasida tashkil etiladigan suhbat, ota-ona va farzandlar o’rtasidagi savol-javoblarda kutilgan natijaga erishish, oila xo’jaligini boshqarish, uni tashkil etishda yoki fanlarni o’zlashtirishda farzandlar o’rtasida o’zaro musobaqalarni uyushtirish, oila hayoti uchun muhim bo’lgan masalalarni muhokama qilish jarayoniga ularning jalb etish katta tarbiyaviy ta’sirga egaligini ota-ona etarli darajada anglay olishi zarur. Bunda, albatta, ota-onalarga “Tarbiyaviy ishlar metodikasi” fani yordamga keladi.
“Umumiy psixologiya” – psixologik hodisalarning umumiy qonuniyatlarini nazariy va amaliy jihatdan o’rgangan holda ruhiyat va shaxs xulq-atvori mohiyati yuzasidan eng umumiy tushunchalarni beruvchi fan. Ota-onalarning “Umumiy psixologiya” asoslari borasidagi bilimlarga ega bo’lishlari farzandlarning ruhiy holatlari, xulq-atvorlarini to’g’ri baholash, ularda ruhiyat salomatligini ta’minlash, ijobiy xulq-atvorni tarbiyalashga imkon yaratadi. Mazkur fan asoslariga oid bilimlarga ega bo’lish, shuningdek, ota-onalar tomonidan oilada sog’lom psixologik muhitning yaratilishi, oila a’zolari o’rtasida ijtimoiy munosabatlarni oqilona tashkil etilishiga zamin yaratadi. Qolaversa, ota-onalarning umumiy psixologik bilimlarga egaliklari farzandlarning komil inson bo’lib voyaga etishlarin ta’minlashga erishishda, shuningdek, farzandlarning ruhiyati va xulq-atvoriga ijobiy ta’sir etishda qo’l keladi.
“Ijtimoiy psixologiya” – ijtimoiy sub’ektlarning turli ijtimoiy guruhlardagi xulq-atvori va faoliyati qonuniyatlarini, shuningdek, ushbu guruhlarning psixologik xususiyatlari o’rganuvchi fan. Mazkur fan asoslari ota-onalarga ijtimoiy hamkorlikka asoslangan munosabatlar jarayonida sub’ektlarda yuzaga keladigan g’oya, tasavvur, kechinma, his-tuyg’u hamda kechinmalar, shakllanadigan xulq-atvor mohiyatini anglash imkoniyatini yaratadi. Mazkur bilimlarga tayangan holda ota-onalar oila a’zolari o’rtasidagi ijtimoiy munosabatlarning farzandlar ongi va xulq-atvoriga ta’sirini etarlicha baholay oladi. Har qanday ijtimoiy munosabatning bola shaxsiga ko’rsatadigan ta’siri yuqori ekanligini anglagan holda bu jarayonda imkon qadar oila a’zolari tomonidan salbiy hissiyotlarni ifodalanishining oldini olish tadbirlarini ko’radilar. Aksincha, ijobiy – o’zaro yordam, bir-birini qo’llab-quvvatlashga, hamdardlikka asoslangan munosabatlarni yanada rivojlantirish choralarini belgilashga urinadilar. Fan asoslarini o’rganish orqali ota-onalar oila muhitida namoyon bo’ladigan har bir munosabatning sabab va oqibatlari o’rtasidagi aloqani anglashni o’rganadilar. Bu boradagi bilimlarning takomillashib borishi esa oila hayotini, faoliyatini to’g’ri, oqilona tashkil etishga doir tajribaga ega bo’lishlarini ta’minlaydi.
“Yosh va pedagogik psixologiya” – individning tug’ilganidan boshlab to keksaligigacha bo’lgan ontogenetik rivojlanishi davomidagi shaxs psixologik taraqqiyoti hamda uning shaxsi shakllanishining qonuniyatlarini o’rganuvchi fan¹³. Fan asoslari ota-onalarga turli yoshdagi farzandlar bilan muloqotni tashkil etish, ularda muayyan ma’naviy-axloqiy, irodaviy sifatlarni, sog’lom ruhiyatni samarali shakllantirishda yordam beradi. Qolaversa, ota-onalar farzandlarni yosh, psixologik xususiyatlariga tayangan holda ularni turli mazmun, yo’nalish va ko’lamdagi ijtimoiy munosabatlarga jalb etish imkoniyatiga ega bo’ladilar. Xususan, maktabgacha ta’lim yoshidagi farzandlar bilan muloqotda ularni ko’proq atrof-muhit bilan tanishtirish, nutqini boyitishga e’tibor qaratsalar, boshlang’ich maktab yoshidagi farzandlarda faoliyat, xususan, o’qish faoliyatiga nisbatan mas’uliyatli yondashish, o’yin va mehnat faoliyati uyg’unligiga erishish orqali esa oddiy mehnat ko’nikmalarining asta-sekin shakllanishiga muvaffaq bo’ladilar. O’smirlarda esa shaxsini shakllantirish ustida ko’proq ishlash, nafaqat mehnat faoliyati, shu bilan birga sport turlari bilan faol shug’ullanishga oid malakalarning shakllanishiga erishsalar, o’spirinlarda kasbiy faoliyat yo’nalishini to’g’ri tanlash, qiziqish, xohish-istaklariga tayangan holda muayyan kasb yoki hunar yo’nalishlari bo’yicha mutaxassislik bilimlarini puxta o’zlashtirishga nisbatan mas’uliyat hissini tarbiyalanishining uddasidan chiqadilar. Shu bilan birga ota-onalarning yosh va pedagogik psixologiyaga oid bilimlari yoshlik, navqironlik va keksalik davrlarida kundalik, ijtimoiy va kasbiy faoliyatni, turli doiralarda kechadigan muloqotni eng maqbul shakllarda tashkil etish borasidagi tajribalarining farzandlarga samarali tarzda uzatilib boradi.
“Milliy istiqlol g’oyasi va ma’naviyat asoslari” – mamlakat mustaqilligini mustahkamlash, ozod va obod Vatan, erkin va farovon hayot barpo etish, har tomonlama etuk, komil insonni tarbiyalashga oid yaxlit, izchil ta’limot mohiyatini yorituvchi fan. Oila – jamiyatning kichik bo’g’ini. Boshqacha aytganda, oilaning o’zi bir kichik jamiyat. Shu sababli oilaning barqarorligi, undagi sog’lom muhit, uning farovonligi bevosita jamiyatning barqarorligi, ijtimoiy munosabatlarning sog’lomligi hamda mamlakat farovonligini ta’minlashga o’z ta’sirini ko’rsatadi. Ota-onalarning fan asoslaridan xabardorliklari oila va jamiyat manfaatlarini uyg’unlashtirish, oila istiqbolini mamlakat taraqqiyoti bilan bog’liq holda ko’rish imkoniyatini yaratadi. Shu bilan birga ota-onalar fan asoslari blan tanishish orqali fuqaro sifatida komil insonni tarbiyalashga mas’ul ekanliklarini anglab etadilar. Turli madaniyatlar qorishuvi, “ommaviy madaniyat” ta’siri, mafkuraviy kurash tobora kuchayib borayotgan mavjud sharoitda oilalarda milliy tarbiyani tashkil etish, farzandlarni turli yot, buzg’unchi g’oyalardan himoyalash, ularni asrlar davomida qadrlanib kelinayotgan an’analar ruhida tarbiyalash yo’llari, metod va vositalaridan xabardor bo’ladilar.
“Etnografiya” (“Xalqshunoslik”; “ethnos” – qabila, xalq Q “grapho” – yozaman) – jahondagi barcha xalqlarning, etnik birlikning turli tiplari, ularning kelib chiqishi (etnogenezi), turmush tarzi, urf-odatlari, moddiy va ma’naviy taraqqiyot darajasidan qatiy nazar, teng holda o’zaro tafovuti yoki umumiyligi va o’xshashligini, ular­ning o’ziga xos xususiyatlarini o’rganuvchi maxsus fan sohasi¹⁴. Ota-onalarning fan asoslari bilan tanishishlari ularning asrlar davomida oila tarbiyasida qo’llanib kelinayotgan milliy tarbiyaviy ta’sir shakllari, metod va vositalardan xabardor bo’lish, shaxsiy faoliyatda ulardan foydalanishlariga yordam beradi. Qolaversa, “Etnografiya” fani asoslari ota-onalarni farzandlarning yosh, psixologik xususiyatlari, jismoniy imkoniyatlariga tayangan holda milliy tarbiyaviy ta’sir metod va vositalarini o’rinli, maqsadli qo’llashga o’rgatadi. Natijada ular milliy tarbiyaviy ta’sir metod va vositalarining shaxs kamolotiga ta’sirini to’g’ri baholash, turli vaziyatlarda metod va vositalarni birga qo’llash, bir metod yoki vositani ikkinchisi bilan o’rinli almashtirishga doir ko’nikma, malakalarini o’zlashtiradilar.
“Axloqshunoslik” (“Etika”; lot. “ethica” < yun. “ethos” – urf-odat, xulq-atvor) – axloq va uning shaxs hamda jamiyat hayotidagi o’rnini¹⁵, axloqning shakllanish shart-sharoitlarini va shakllarini o’rganuvchi¹⁶ fan. Ota-onalar tomonidan “Axloqshunoslik” fani asoslarining o’zlashtirilishi ularda farzandlar shaxsida namoyon bo’ladigan ma’naviy-axloqiy sifatlar xususidagi tasavvurlarni, farzandning ma’naviy-axloqiy fazilatlari uning kamolotini belgilovchi asosiy mezonlar ekanligi to’g’risidagi tushunchalarni hosil qiladi. Farzandlarning muayyan ma’naviy-axloqiy sifatlarga ega bo’lishi ularning kamoloti darajasini belgilaydi. Shu sababli ota-onalar jamiyat, oila hamda bola mansub bo’lgan mikromuhitda shakllangan munosabatlarning unda ma’naviy-axloqiy fazilatlarni shakllantirishga ta’sirini bilishlari nihoyatda muhim. Qolaversa, farzandlarning shaxs sifatidagi ijtimoiy mavqei uning borliqqa bo’lgan munosabati bilan belgilanadi. Bolada o’z shaxsiga, atrofdagilarga, tabiatga nisbatan ijobiy munosabatni qaror toptirishda “Axloqshunoslik” fani asoslaridan ota-onalarning xabardorlik darajasi muhim ahamiyat kasb etadi.
“Estetika asoslari” (“Nafosatshunoslik”; yun. “aisthetikos” – his qilish, hissiy idrokka oid) – inson va olam o’rtasidagi qadriyatli munosabatning o’ziga xos jihatlarini, kishilarning badiiy faoliyati sohasini o’rganuvchi fan¹⁷. Shaxsning ijobiy his-tuyg’ularga, estetik didga ega bo’lishi unda ijtimoiy borliqqa nisbatan samimiy munosabatni shakllantiradi. Shu sababli bolalarda juda yoshlikdan ijobiy his-tuyg’ularni tarbiyalash, ularning estetik didini o’stirish maqsadga muvofiqdir. Ota-onalarning estetika bilimlaridan xabardor bo’lishlari ular tomonidan farzandlarni ijobiy his-tuyg’ularga boy qilib tarbiyalashda muhim ahamiyatga ega. Binobarin, shaxsning ijobiy his-tuyg’ularga ega bo’lmasligi, ularda ijtimoiy borliqqa, hatto o’z oilasiga nisbatan befarqlikni, e’tiborsizlikni qaror toptiradi. Borliqqa nisbatan befarq, e’tiborsiz shaxsda xudbinlik sifatlari shakllanadi. Bunday shaxsning hayotiy maqsadi –hech bir ijtimoiy majburiyatlarni zimmaga olmagan holda faqat o’zi uchun yashash, o’z ehtiyojlarini qondirishdan iboratdir. Bu esa insonning ijtimoiy maqomiga ziyon etkazadi. Zero, har bir shaxs shaxslararo munosabatlar jarayonida shakllanadi, ularning ta’sirida muayyan ijtimoiy ong va madaniyatga ega bo’ladi. Jamiyat, oilasi uchun qayg’urmaydigan shaxs ijtimoiy nuqtai nazardan hech bir qiymatga ega bo’lmaydi. Ota-onalarning vazifasi esa farzandlarni jamiyat, oilasi uchun kerakli, ularning manfaatlari uchun kurashadigan faol shaxsni tarbiyalab voyaga etkazishdan iborat. “Estetika asoslari” fani ota-onalarning pedagogik bilimlarini, hayotiy tajribalarini shu nuqtai nazardan boyitishga xizmat qiladi.
“Oila huquqi” – nikoh va oila munosabatlarining huquqiy asoslarini o’rganuvchi fan¹⁸. O’zbekiston Respublikasida huquqiy jamiyatni barpo etish jarayonida ota-onalar va farzandlar o’rtasidagi munosabatlarning huquqiy mohiyatidan xabardor bo’lish o’ziga xos ahamiyat kasb etadi. Eng avvalo, “Oila huquqi” fani asoslari borasidagi bilimlarni o’zlashtirish orqali ota-onalar farzandlar, ularning kamoloti va taqdiri oldidagi o’z majburiyatlarini chuqurroq anglaydilar. Ota-onalar, ayniqsa, voyaga etmagan farzandlar oldida burchli sanaladilar. Zero, hali dunyoqarashi to’la shakllanmagan, ijtimoiy munosabatlarda mustaqil ishtirok eta olmaydigan farzandlarni har tomonlama, eng avvalo, huquqiy jihatdan muhofazalash majburiyati ota-onalarni ularning tarbiyasiga jiddiy yondashishga undaydi. Qolaversa, ota-onalar oila muhitida ham farzandlarning huquqiy bilimlar bilan tanishtirib borish asosida ularni ijtimoiy-huquqiy munosabatlarga samarali tayyorlash maqsadga muvofiqdir. Ushbu holat huquqiy jamiyatni barpo etishning eng muhim talablaridan biri bo’lgan – huquqiy madaniyatga ega fuqaroni tarbiyalab voyaga etkazishda o’ziga xos dolzarblik kasb etadi.
Fan asoslaridan xabardorlik asosida ota-onalar, shuningdek, farzandlarni oila muhitida huquqiy mazmunga ega ijtimoiy munosabatlar – nikoh va oila munosabatlariga ham tayyorlab boradilar. Voyaga etayotgan yigit va qizning nikoh va oilaviy munosabatlarga fiziologik, jismoniy, ruhiy va ma’naviy-axloqiy jihatdan tayyor bo’lishida ham ota-onalarning zimmalariga mas’uliyatli vazifalar yuklatiladi. Bu boradagi vazifalarni anglashda ham ota-onalarning “Oila huquqi” asoslari borasidagi bilimlarga ega bo’lishlari muhimdir.
“Yosh fiziologiyasi va gigiena” – voyaga etmaganlarni fiziologik jihatdan to’g’ri o’sishlarini ta’minlash, ularda gigienik madaniyatni shakllantirish yo’llari, shakl, metod va vositalarini tadqiq etadigan fan. Globallashuv va texnikaning mislsiz rivojlanishi sharoitida inson salomatligini ta’minlash har qachongidan ham dolzarblik kasb etmoqda. Garchi tibbiyot zamonaviy yutuqlarga erishayotgan, ijtimoiy sub’ektlarning ishlab chiqarish qobiliyatiga egalik yoshi uzayib borayotgan bo’lsa-da, biroq, voyaga etmagan yigit yoki qizlarning fiziologik jihatdan to’g’ri tarbiyalanmasligi ularning organizmida muayyan qusurlarning yuzaga kelishiga sabab bo’lmoqda. Bu o’rinda zamonaviy taraqqiyot ta’sirida kelib chiqayotgan – kam jismoniy harakatsizlik, tana vaznining oshishi kabi kasalliklarning oldini olish shu kunning dolzarb vazifalaridan biri sanaladi. Ota-onalar “Yosh fiziologiyasi va gigienasi” fani asoslaridan xabardor bo’lar ekanlar, oila sharoitida farzandlarning gigienasiga alohida e’tibor qaratib, shaxsiy gigienik madaniyatni yoshlikdan shakllantira oladilar. Shu bilan birga o’g’il va qiz bolalarning fiziologik nuqtai nazardan to’g’ri kamolotga etishishlari, reproduktiv salomatlikka ega bo’lishlarini ta’minlashga muvaffaq bo’ladilar.
“Iqtisodiyot asoslari” – iqtisodiyot va iqtisodiy munosabatlarni samarali tashkil etish, shuningdek, oila xo’jaligini oqilona yuritish shartlari, qonuniyatlari, ustuvor tamoyillarini o’rganuvchi fan. Fan asoslarining puxta bilishi ota-onalarga oila iqtisodiyotini samarali boshqarish, oila byudjetini muvaffaqiyatli shakllantirish, uni to’g’ri taqsimlash bilan birga farzandlarni tejamkorlikka o’rgatishga xizmat qiladi. Bozor munosabatlari sharoitida, ayniqsa, farzandlarni yoshlikdan oila xo’jaligini tashkil etish va boshqarishga o’rgatib borish o’ziga xos ahamiyat kasb etadi. Farzandlarni yoshlikdan tejamkorlikka o’rgatib borish ularni mustaqil oilaviy hayotga muvaffaqiyatli tayyorlashga ham yordam beradi. Oila a’zolari o’rtasida mehnat taqsimotining to’g’ri yo’lga qo’yilishi, oilaviy munosabatlarning o’zaro yordam, hamjihatlilikka asoslanishi esa farzandlarni mehnatsevarlikka, oqibatga, tartib-intizomga, o’zgalar mehnatini qadrlashga, mehnat mahsuli bo’lgan ne’matlarni isrof qilmaslikka o’rgatadi. Bu esa oila tarbiyasini samarali tashkil etishda nihoyatda muhimdir.