Kuizlər - tapmaca xarakterli qısa testlər, yaxud açıq cavab tələb edən suallar. Kuizi ötürənlərə onları yenidən təşkil etmək mümkün deyil. Ötürülmüş bu cür testlər (0)-la qiymətləndirilir. Belə testlər dərs saatının istənilən vaxtında verilə bilər. Semest ərzində kuizlərə ayrılan bal 100%-in 20%-ni təşkil edir. Yəni semest ərzində təxminən 10 dəfə test və açıq cavab tələb edən suallarla kiçik imtahanlar keçirilir (aralıq və final imtahanlarından əlavə) və bunların hər birisi 0-2 balla qiymətləndirilir (0;0,1;0,2;0,5;0,8;1; 1, 5;1,8; 2).
Keyslər - Azərbaycan ərazisindəki dövlətlər, tarixi məskənlər, muzeylər, qalalar barədə qısa araşdırmalar; vətən tarixi, mədəniyyəti, tarixi şəxsiyyətləri, dövlətin xəritəsi barədə xarici qəzetlərdə və internetdə gedən təhriflərin və məlumatların tənqidi təhlilləri. Semestr ərzində hər bir tələbə Azərbaycanla bağlı xaricdə dərc olunan və yaxud internetə yerləşdirilən bir məqalənin tənqidi təhlilini hazırlamalıdır. Bu məqalələrin Azərbaycan əleyinə məqsədli və qərəzli yazılmış məqalələrin təhlilinə və tənqidinə həsr olunması daha məqsədəuyğundur. Bundan əlavə semestrin əvvəlində müəllim hər tələbəyə Azərbaycan ərazisində mövcud olan bir dövlət barədə araşdırma aparmaq tapşırıqları verir. Araşdırma hazır olanda təqdimat keçirilir. Hər tələbə qrup qarşısında 3 dəqiqəlik təqdimat edir. Təqdimatın verilmiş vaxt çərçivəsində tamamlanması layihə üzrə qiymətə təsir edən amil sayılır. Semestr ərzində hər tələbə təxminən 5 keys hazırlayır. Hər keys 0-2 balla qiymətləndirilir.
