Iqtisodiyot nazariyasi

NATURAL XO’JALIК - tarixan eng dastlab tarkib topgan xo’jalik shakli bo’lib, unda mahsulotlar bozorda sotish uchun emas, balki xo’jalikning o’zida uning xodimlari va yaratuvchilari iste’moli uchun yetishtiriladi. Ishlab chiqaruvchi kuchlar o’sib, ijtimoiy mehnat taqsimoti chuqurlashib borishi natijasida natural xo’jalik o’rnida tovar xo’jalik yuzaga keladi. Natural xo’jalikka patriarhal dehqon oilasi xo’jaligi, hozirgi oilalarning chorbog’ xo’jaligi, shuningdek, ayrim korxona (agarda yetishtirilgan mahsulot xodimlarga bepul ulashilsa) misol bo’la oladi.

MILLIY BOZOR - muayyan mamlakat doirasida ishlab chiqarilgan, tovarlar muomalasi sohasini ifodalovchi tushuncha. Milliy bozor subyektini shu mamlakat fuqarolari bo’lmish tovar egalari, korxonalar, firmalar, birlashmalar, davlat va jamoatchilik tashkilotlari va ayrim fuqarolar tashkil etadi. Milliy bozor hajmi muayyan mamlakatning katta yoki kichikligiga, uning iqtisodiy darajasiga, xalqaro savdodagi ishtirokiga bog’liq bo’ladi.