Verilənlərin çıxarılması prosesində məqsəd verilənlər mənbələrindən relevant verilənlərin periodik olaraq çıxarılmasından ibarətdir. Bu prosesi aşağıdakı vasitələrlə aparmaq olar:
SQL əmrlərinin icrasına əsaslanan proqramların köməyilə verilənlərin çıxarılması. Bu proqramlar verilənlər mənbələri daxil olan sistemlərin digər proqramları ilə birlikdə fəaliyyət göstərirlər.
Verilənlərin import/eksport edilməsi üçün VBİS-ə daxil edilən mexanizmlərin köməyilə verilənlərin çıxarılması. Bu cür mexanizmlərdən istifadə edilməsi verilənlərin çıxarılmasını sürətləndirir.
Xüsusi hazırlanmış proqramlar vasitəsilə verilənlərin çıxarılması. Bu variant nisbətən baha başa gəlir.
Verilənlərin çıxarılması prosesi gündə, həftədə və ya nadir hallarda ayda bir dəfə aparıla bilər. Bəzi sistemlərdə isə verilənlərin çıxarılmasının həqiqi zaman miqyasında aparılması tələb olunur: məsələn, birja əməliyyatlarını analiz edən sistemlərdə və ya telekommunikasiya sahəsindəki sistemlərdə.
