«маркетинг фаолиятини таҳлил қилиш ва истиқболлаш»

Aqılıy hújim metodı
Aqılıy hújim toparlar arasında qollanılatuǵın, kóplep ideyalardı islep shıǵıw múmkin bolǵan metod esaplanadı. Bul haqıyqattan da oqıwshılardıń oqıw procesinde belsene qatnasıwı, túrli ideyalardı bayan etiw payıtında basqalardı da sabaqqa qızıǵıwshılıq penen qatnasıwǵa, dóretiwshilik penen islewine imkaniyat beriwshi hám oǵan baǵdarlawshı metod bolıp esaplanadı. Aqılıy hújim sonıń ushında belsendiliktiń tiykarǵı usılı, onda jalǵız islew múmkin emes, bir ideya topardıń barlıq qatnasıwshıların bir waqıtta ózine tartıp aladı. Muǵallim tema yaki sorawdı ayırıp alıwı zárúr, keyin oqıw belsendiligi 5-10 minut aralıǵındaǵı waqıtta kórinedi.
Aqılıy hújim túrli formada qollanılıwı múmkin. Máselen, qandayda bir temanı bekkemlew ushın, jańa soraw qoyıw yamasa qandayda bir qálegen mashqalanı sheshiw ushın. Aqılıy hújim metodı tómendegishe ótkeriledi:
1. Topardıń barlıq qatnasıwshılarına bir tema hám bir soraw qoyıladı.
2. Oqıtıwshı oqıw procesinde bársheniń dıqqatın ózine qaratıwǵa háreket etedi. Sorawlar auditoriyadaǵı barlıq studentlerge qarata beriledi hám usı sorawlar boyınsha barlıq pikirlerin beriwdi soraydı.
3. Barlıq, hátte, nadurıs pikirler bolsa da aytıwǵa ruqsat beriledi. Aytılıp atırǵan pikirler ishinde bir ǵana tiykarǵı pikir saqlanıp qalıwı kerek.
4. Bir pikir de talqılanbaydı, qarsı pikir aytılmaydı, bahalanbaydı.
5. Tiykarǵı pikirdi muǵallim taxtaǵa jazadı yamasa ekranda kórsetedi.
6. Aqılıy hújim tamamlanǵannan keyin, barlıq ideyalar toplanıwı, toparlarǵa ajıratılıwı yamasa kategoriyalarǵa bóliniwi múmkin.
Mısalı: Ne ushın qospa sózler sóz jasalıw tarawında úyreniledi?
Qospa sózler sóz jasawǵa qatnasadı.
Birikken qospa sózlerden birikken atlıqlar, birikken kelbetlikler, birikken ráwishler jasaladı.
Jup sózler ulıwmalastırıwshı mánidegi, kúsheyttiriwshi manidegi hám idiomalıq mánidegi sózlerdi jasaydı.
Tákirar sózler kóplik, kúsheytiw, dawamlılıq mánilerindegi qospa sózlerdi jasaydı.
Qısqarǵan sózler bir neshe sózlerdiń qısqarıwı arqalı jasalıp aytılıwda hám jazılıwda qolaylılıq tuwdıradı.
Qısqarǵan qospa sózler – sostavlı sózlerdiń belgili bir tártipte qısqarıwınan payda boladı.
Sostavlı sózler keminde eki sózdiń óz ara baylanısınıń bir qansha gúńgirtlenip, turaqlı orınǵa iye bolǵan hám uluwma bir túsinikti ańlatatuǵın sózler bolıp tabıladı.
Sostavlı sózler neshe sózden turıwına qaramastan bir sóz shaqabına qatnaslı boladı hám gápte bir gáp aǵzanıń xızmetin atqaradı.
Pikirler usılay dawam ettirile beriwi múmkin.
Aqılıy hújim metodı qatnasıwshılardıń oylaw qábiletinen, bar bilimi hám imkaniyatlardan ónimli paydalanıwǵa qaratılǵan.