13.2.Trenerning huquqiy ta’limi. Jismoniy tarbiya va sportning aholi qatlamlari orasida keng tarqalishida, hamda davlatimizning yuqori saviyadagi sportchilar zahirasini tayyorlashda, trenerning huquqiy savodxonligi muhim ahamiyatga ega. Kadrlarni sifatli va tizimli tayyorlashda va umuman jismoniy tarbiya va sportni rivojlantirishda, trenerlarning jismoniy tarbiya va sport sohasidagi huquqiy me’yoriy hujjatlarni, xususan o‘z faoliyatining asosiy maqsadi, huquq va majburiyatlarini bilishi lozim.
Trenerlar faoliyatiga tegishli asosiy me’yorlarni ko‘rib chiqsak, “O‘zbekiston Respublikasining trenerlar to‘g‘risidagi Nizomi”ga binoan
Quyidagilar trenerlik faoliyatining asosiy maqsadi hisoblanadi:
jismoniy tarbiya va sportni targ‘ibot etish;
jismoniy tarbiya va sport vositalari yordamida aholini sog‘lomlashtirish;
-sportchi zahiralarini, hamda xalqaro sport maydonlarida O‘zbekiston Respublikasi sporti sha’nini munosib himoya qila oladigan malakali sportchilarni tayyorlash;
kelgusida sport mahoratlarini takomillashtirish maqsadida, istiqbolli va iqtidorli bolalar va o‘smirlarni saralab olish va sportda bo‘ladigan yo‘nalishlarini aniqlash.
Quyidagilar trenerlik faoliyatining asosiy vazifalari hisoblanadi:
sportchilarni turli sport musobaqalari va ommaviy jismoniy tarbiya tadbirlarida qatnashish uchun tayyorlash;
jismoniy tarbiya va sport bilan shug‘ullanuvchilarni, sport bo‘yicha tayyorlash va sog‘lomlashtirishda, o‘quv mashq mashg‘ulotlari jarayoniga ilg‘or ilmiy usullarni joriy qilish;
jismoniy tarbiya va sport bilan shug‘ullanuvchilarning bilim, qobiliyat va ko‘nikmasi sifatini, jismoniy rivojlanganligi va tayyorgarliklari darajasi ustidan nazoratni amalga oshirish;
olib borilayotgan mashg‘ulotlarning xavfsizligini ta’minlash va sanitariya normalari, qoidalari va gigiena normativlari talablariga rioya qilish;
jismoniy tarbiya va sport bilash shug‘ullanuvchilar tomonidan turli xil doping va taqiqlangan vositalarni qo‘llanilishiga yo‘l qo‘ymaslikka ko‘maklashish.
