Investitsiyalar – foyda olish hamda ijobiy iqtisodiy, ijtimoiy va boshqa ko‘rinishdagi samaraga erishish maqsadida tadbirkorlik obyektlariga va turli faoliyat sohalariga qo‘yiladigan pul mablag‘lari, banklarning maqsadli omonatlari, aksiyalar, boshqa qimmatbaho qog‘ozlar, texnologiyalar, mashinalar, uskunalar, litsenziyalar, kreditlar, har qanday boshqa mol-mulk yoki mulkiy huquqlar, intellektual boyliklar.
Investitsiya siyosati– investitsiya faoliyatini jonlantirish, iqtisodiyotni yuksaltirish, ishlab chiqarish samaradorligini oshirish va ijtimoiy muammolarni hal qilish maqsadida iqtisodiy subyektlar uchun qulay xo‘jalik yuritish sharoitlarini yaratishga qaratilgan maqsadli tadbirlar majmui.
Investitsiya dasturi– iqtisodiyotga sarflanayotgan kapital qo‘yilmalarning ustuvor yo‘nalishlari va ulardan samarali foydalanishni belgilab beruvchi ijtimoiy-iqtisodiy va xo‘jalik qarorlarining yig‘indisi.
Investitsiya muhiti – kapital qo‘yilmalardan samarali foydalanish imkoniyatlarini oldindan belgilaydigan iqtisodiy, siyosiy, yuridik va ijtimoiy omillar yig‘indisi.
Erkin iqtisodiy zonalar– shunday geografik hududki, ularda mamlakatda qabul qilingan normal xo‘jalik faoliyati tartibiga qaraganda imtiyozli soliq to‘lash tartibi joriy etiladi.
Asosiy kapitalga investitsiyalar – asosiy fondlarni yaratish, takror ishlab chiqarish va sotib olishga sarflangan biryo‘la xarajatlar.
Asosiy fondlar – bir necha takror ishlab chiqarish siklida qatnashib, o‘z qiymatini tayyor mahsulot qiymatiga asta-sekinlik bilan o‘tkazib boruvchi ishlab chiqarish vositalari.
Investitsiyalarning texnologik tarkibi– biron-bir obyektga sarflanayotgan kapital qo‘yilmalarning xarajatlar tarkibi va ularning umumiy smeta qiymatidagi ulushi. Texnologik tarkibi kapital qo‘yilmalarning qancha qismi qurilish-montaj ishlari, mashina va asbob-uskunalarni sotib olish, loyiha-tadqiqot ishlari va boshqa xarajatlarga yo‘naltirilganligini anglatadi.