Menejmentning tadqiqot usullari
Tadqiqotning texnologik sxemasi
Yüklə 5,01 Kb. Pdf görüntüsü
|
|
5.3.Tadqiqotning texnologik sxemasi
Har qanday tadqiqot muayyan, tadqiqot usullarining ketma-ketligi va kombinatsiyasini aks ettiruvchi texnologik sxemaga asoslangan tashkiliy jarayon hisoblanadi. Texnologiya – bu tadqiqotni oqilona tuzish variantidir. Masalan, uyni qurish avval poydevorni, so‘ngra uyning o‘zini, va nihoyat tomni barpo etishni nazarda tutadi. Bu ushbu faoliyat turining mazmuni va xususiyatlarini aks ettiruvchi qurilish jarayonidir. Biroq ushbu jarayon doirasida qurilish texnologiyasi turlicha bo‘lishi mumkin: avval poydevorning bir qismini barpo etish va ushbu qismi bo‘yicha devorlar qurishni boshlash; parallel ravishda tom elementlarini tayyorlash mumkin. Barcha narsa qurilish materiallarining mavjudligi va taqsimlanishiga hamda ulardan foydalanish variantlarini tanlashga bog‘liq. Jarayon doim ob’ektiv ishni bajarish bosqichlarini aks ettiradi, texnologiya – bu ishlarni oqilon bajarish varianti. Tadqiq etilayotgan muammoning tavsifiga, shuningdek aniq sharoitlarga (vaqt, resurslar, malaka, muammoning o‘tkirligi va h.k.) qarab, texnologik sxemalar turlicha bo‘lishi mumkin. Samarali texnologik sxemalarni tanlash yoki ularni haqiqiy ehtiyojlar va sharoitlarga muvofiq tuzish muhim. Eng oddiy va tarqalgan texnologiya – chiziqli texnologiya bo‘lib, u tadqiqotlarni vaziyatni yozish va tahlil qilish, muammoni qo‘yish, uni echish vazifalarini shakllantirish, tadqiqot usullarini tanlash, tahlil qilish va ijobiy echimlarni qidirish, echimni eksperimental tekshirish, agar bunga imkon bo‘lsa, innovatsiyalarni ishlab chiqish bosqichlari bo‘yicha ketma-ket olib borishdan iborat. 120 Har bir bosqich tadqiqot usullarining o‘ziga xos to‘plami hamda vaqt cheklovlari bilan tavsiflanadiki, bu tadqiqot o‘tkazish muvaffaqiyatini belgilaydi. Amaliyotda har doim ham texnologik sxemani shunday to‘g‘ri chiziqli va izchil qurib bo‘lmaydi. Bosqichlarning har birida yangi muammolar yoki qiyinchiliklar vujudga kelishi hamda ular oldingi bosqichga qaytishga va uni tadqiq etishni tuzatishga majbur qilishi mumkin. Masalan, muammo yuzaki va bir tomonlama aniqlangan bo‘lib chiqishi mumkin, uni yangi rakursda ko‘rib chiqish zarurati paydo bo‘ladi va hokazo. Bularning barchasi o‘tib ketilgan bosqichlarga qaytishga, o‘tkazib bo‘lingan tadqiqot ishlarini to‘g‘rilashga majbur qilishi mumkin. SHu tarzda yangi tadqiq etish texnologiyasi turkumi – davriy tadqiqot turkumi vujudga keladiki, u o‘tib bo‘lingan bosqichlarga, natijalarning ishonchliligini ta’minlash uchun bosib o‘tilganni takrorlashga qaytish bilan tavsiflanadi. Vaziyatli yondashuvda ko‘pincha tahlil qilish bosqichida vaziyat mazmunini qidirish va kerakli axborot, masalan, yangi dalillar yoki statistika bilan to‘ldirish uchun vaziyat bayoniga qaytishga to‘g‘ri keladi. Aynan yozilgan vaziyat barcha voqealarni yanada to‘liq va kompleks ko‘rish hamda mavjud axborotni oddiy, izchil to‘ldirishga qaraganda kerakli axborotni yanada asosli ravishda aniqlash imkonini beradi. Ratsional texnologiyalarning ko‘p sxemalari ishlarni yoki operatsiyalarni parallel bajarish imkoniyatini ko‘zda tutadi. Masalan, murakkab, kompleks muammolarni echishda alohida tadqiqotchilik ishlarini parallel bajarish mumkin, ayrim hollarda esa bu hatto, masalan, bir-biridan mustaqil ishlayotgan ekspertlardan foydalanishda zarurdir. Mazkur texnologiya vaqtni tejaydi, xodimlardan yanada samarali foydalanish imkonini beradi, uning kompetentligini va faoliyat unumdorligini oshiradi. Parallel tadqiqot texnologiyasining bir ko‘rinishi – bu faoliyatni tarmoqlantirish texnologiyasi: muammo aspektlari yoki uni echish funksiyalarini bo‘lish, ayrim muammo turlari bo‘yicha bir xil parallel tadqiqotlarni o‘tkazish. 121 Axir tadqiqot – bu doim eng yaxshi natijani olish maqsadida noma’lum, yangi, nooddiy narsalarni qidirishdir. Tadqiqotda, ularning echimini avvaldan belgilangan sxemada tasavvur qilish qiyin bo‘lgan muammolar mavjud bo‘lganda moslashuv turkumiga tegishli texnologiyadan – har bir tadqiqot bosqichini o‘tkazish davomida texnologik sxemani ketma-ket to‘g‘rilashdan foydalaniladi. Texnologik sxemadagi har bir bosqich uning natijalari bo‘yicha baholanadi, va bu baho yangi bosqichni aniqlash uchun zarurdir. Tadqiqotning texnologik izchilligi uni o‘tkazishning aniq maqsadlarini hisobga olmasligi mumkin emas – bu vaziyatni chuqur o‘rganish va aniqlangan muammoni butunlay hal qilish maqsadlari, muammoni qisman echish maqsadlari, yangi bilimlarni olish va xizmatchilarning ma’lumotlarini rivojlantirish maqsadlari, yangiliklar dasturini ishlab chiqish maqsadlari bo‘lishi mumkin. Qisman o‘zgartirish maqsadlariga erishish uchun faoliyat sifatini izchil o‘zgartirish texnologiyasidan: mavjud boshqarish sifatini baholash va noprinsipial, ahamiyatsiz, lekin haqiqiy sifat o‘zgarishlarini qidirishdan foydalaniladi. Bunday texnologiya tadqiqotlarni kam resurslar mavjudligida o‘tkazish, innovatsiyalar, tavakkalchiliklarni chetlab o‘tish, qayta o‘zgartishlar ishonchliligini oshirish imkonini beradi. Tasodifiy qidiruv texnologiyasi ham mavjud. Bunday texnologiyaning birinchi bosqichida muammoni qo‘yishga, uni tanlash, asoslashga ko‘p e’tibor qaratish nazarda tutilmaydi. Istalgan muammo olinadi, va unga tayangan holda tutash muammolar tadqiq etiladi, aloqalar o‘rnatiladi, ushbu asosda rivojlanish yo‘nalishini aniqlanib, u unga diqqat-e’tiborni jamlash zarur bo‘lgan asosiy muammoni aniqlab beradi. Vaziyatli yondashuvda bunday texnologiya vaziyatni yozishda va muammoni aniqlashda, ya’ni birinchi variantda aniqlangan muammo vaziyatni keyingi his etilishini ham, shuningdek vaziyatning dalillarni 122 to‘plash, voqelarni his etish va hokazolar bilan bog‘langan yozilishini ham aniqlaydigan vaqtda qo‘llanishi mumkin. Yana bir tadqiqot texnologiyasi – mezonli tuzatish texnologiyasi mavjud bo‘lib, u tadqiqotni tayyorlashda texnologik sxemaning o‘zi emas, balki tadqiqotni o‘tkazish paytida uni ehtimoliy tuzatish mezonlari majmuasi ishlab chiqiladi. Agar biz ma’lum natijaga erishsak, unda muayyan hatti-harakatlarni bajaramiz, aks holda biz oldingi yoki qandaydir boshqa bosqichga qaytamiz va yana qidirishni davom ettiramiz. Ushbu texnologik sxema ba’zan tadqiqot algoritmi deb ataladi. Tadqiqot o‘tkazishni texnologik sxemalarini tanlash uning samaradorligini oshirishga ko‘maklashadi. Tadqiqot texnologiyasi ko‘p jihatdan tadqiqotchining mahoratini aks ettiradi. Boshqaruv vaziyatlarini tadqiq etish har xil ishlarni bajarishni nazarda tutadi. Ularning tavsifi va mazmuni olib borilayotgan tadqiqotning maqsadi va turiga, shuningdek o‘rganilayotgan ob’ektning o‘zga xos xususiyatlariga bog‘liq. Biroq, har qanday tadqiqot olib borilayotganda bajariladigan quyidagi ish turlari mavjud: tadqiqot maqsadlari va vazifalarini qo‘yilishi; tadqiqot ob’ekti va predmetini aniqlash; mavjud axborotni dstlabki tahlil qilish; muammoni aniqlash; boshlang‘ich gipotezalarni ifodalash; axborotni to‘plash va qayta ishlash; natijalarni tahlil qilish va umumlashtirish; olingan dalillar asosida boshlang‘ich gipotezalarni tekshirish; xulosalarni ta’riflash, ularning asoslanganligini tekshirish; tadqiqot natijalarining yakuniy ifodalanishi. 123 Bundan tashqari, vaziyatlarni tadqiq etishda iqtisodiy-matematik modellarni ishlab chiqish, ulardan qo‘shimcha axborotlarni olish, eksperimentlar o‘tkazish uchun foydalanish mumkin. Ushbu ish turlari doim ham bajarilmaydi, chunki modellashtirish va eksperiment o‘tkazish tadqiqotni murakkablashtiradi, uni davomli va yuqori qiymatli qiladi. Biroq esda tutish kerakki, tadqiqot jarayonida iqtisodiy-matematik modellar va eksperimentdan foydalanish olinadigan natijalarning to‘g‘riligi va ishonchliligini oshiradi. Har qanday tadqiqot rejalashtirilgan bo‘lishi zarur. Vaziyatlarni tadqiq etishni rejalashtirish, ishlab chiqilgan reja asosida tadqiqotchilik va loyihalash ishlarini o‘rnatilgan muddatlarda berilgan sifat darajasida va ajratilgan resurslar doirasida bajarishni tashkillashtirish uchun amalga oshiriladi. Istalgan yangilik kiritish, u texnik, iqtisodiy, kadrlar va ijtimoiy-psixologik jihatdan tayyorlangan bo‘lsagina, uning korxona iqtisodiy va ijtimoiy rivojlanishining barcha tomonlariga ko‘rsatadigan ta’siri hisobga olingan bo‘lsagina samara keltiradi. Vaziyatlar tadqiqotini rejalashtirishning asosiy vazifasi – ishlarni bajarish tartibi, ketma-ketligi va muddatlarini nazarda tutuvchi chora-tadbirlar tizimini aniqlashdan iborat. Aniq tashkilot muammolarini o‘rganuvchi amaliy tadqiqotlarni o‘tkazishda, ishlar rejasi shuningdek tadqiqot natijalarini boshqaruv amaliyotiga tatbiq etishni va sinovdan o‘tkazishni (aprobatsiya qilishni) nazarda tutishi mumkin. Aprobatsiya qilish bajarilgan tadqiqotni tashkilot rahbariyati bilan muhokama qilishdan, shuningdek olingan natijalarni mehnat jamoasining yig‘ilishida, konferensiyada, majlisda ko‘rib chiqishdan iborat bo‘lishi mumkin. Tadqiqot natijalarini tatbiq etish ularni boshqaruv amaliyotida faol qo‘llash yo‘li bilan amalga oshiriladi. Boshqaruv vaziyatlari tadqiqotini rejalashtirish quyidagi bosqichlarni o‘z ichiga oladi: 1. Tekshiriladigan tashkilot, uning alohida bo‘linmalari yoki ish o‘rinlarini aniqlash. 124 2. Muammo yoki muammolarni aniqlash va tadqiq etish bo‘yicha taxminiy ishlar hajmini aniqlash. 3. Kutilayotgan natijalarni ta’riflash. 4. Rejalashtirilgan ish hajmini amalga oshirish uchun kerakli xodimlarning miqdoriy va kasbiy-malakaviy tarkibini aniqlash. 5. Rejalashtirilgan ishlarni bajarish muddatlarini belgilash. 6. Tadqiqotlarni bajarish uchun kerakli sharoitlarni, shu jumladan xonalar, tashkiliy texnika, uskunalar, jihozlarga va hokazolarga ehtiyojlarni aniqlash. 7. Rejalashtirilayotgan ishlarning smeta qiymatini hisoblash. Umumiy tadqiqot rejasi ishchi rejada – mavzu bo‘yicha tadqiqotlar rejasini rivojlantirish maqsadida tuziladigan hujjatda aniqlashtiriladi. U quyidagilarni aniqlaydi: umumiy ishlar hajmini bosqichlarga ajratish; tadqiqot bosqichlari bo‘yicha ishlarni boshlash va yakunlashning kalendar muddatlari, ishlarni bajarish jadvali; ishchi guruhlar va alohida ijrochilar bo‘yicha aniq tadqiqot ob’ektlarini va sohalarini taqsimlash; ishchi guruhlar rahbarlari va ijrochilarning aniq vazifalari va vakolatlarini belgilash; oraliq natijalarni, shuningdek buyurtmachiga hisobot hujjatlarini taqdim etish shakllari va muddatlarini belgilash; har bir tadqiqot bosqichi bo‘yicha ishlar qiymatini aniqlash: Mavzu bo‘yicha tadqiqot rejasi ishlar hajmi, muddatlar, kerakli resurslar, kutilayotgan natijalarni aniqlaydi; ishchi reja o‘zida harakatlar jadvalini, ijrochilarning tarkibi va vakolatlarini, tadqiqotlar o‘tkazish jadvalini, har bir tadqiqot bosqichida ishlar qiymatini ifodalaydi. 125 Tashkilotning kadrlar bilan ta’minlanganligini tadqiq etish, xodimlarni mehnat jaranida o‘zining ishtiroki bilan tayyor mahsulot yaratadigan maxsus resurs sifatida baholash uchun zarurdir. Tashkilotning kadrlar bilan ta’minlanganligini tavsiflash uchun mehnat salohiyatining miqdoriy va sifat tavsiflari ko‘rib chiqiladi. Mehnat salohiyatini miqdor jihatdan tavsiflash uchun quyidagi ko‘rsatkichlar ishlatiladi: sanoat-ishlab chiqarish xodimlari va nosanoat bo‘linmalar xodimlarining soni; me’yoriy mehnat jadalligi darajasida ishlab berish mumkin bo‘lgan ish vaqti miqdori (xodimning mehnatda qatnasha olish chegaralari). Mehnat salohiyatini sifat jihatdan baholash uchun quyidagi ko‘rsatkichlar ishlatiladi: korxona xodimlarining jismoniy va psixologik salohiyati (xodimning mehnat qobiliyati va moyilligi – salomatlik, jismoniy rivojlanish, bardoshlilik ahvoli va h.k.); ma’lum sifatga ega mehnat qilish qobiliyatini aniqlaydigan umumiy va maxsus bilimlar, mehnat ko‘nikmalari va uquvlari hajmi (ta’lim va malaka darajasi, tayyorgarlikning fundamentalligi va h.k.); xo‘jalik faoliyati sub’ektlari kabi jamoa a’zolarining sifati (mas’uliyat, mehnatga qiziqish, korxona iqtisodiy faoliyatiga daxldorlikning mavjudligi va h.k.). Korxonaning mehnat jamoasini quyidagilar ham tavsiflaydi: ijtimoiy-demografik komponentlar: jins-yosh tuzilishi, ma’lumot darajasi, oilaviy tarkibi, salomatlik ahvoli va boshqalar; ishlab chiqarish komponentlari: kasb-malaka tuzilishi, kasbiy bilimdonlik darajasining oshishi va yangilanishi, ijodiy faollik va boshqalar. Bu kabi axborotni to‘plash maxsus tadqiqotlarni – suhbatlashish, testlash, kuzatish va boshqalarni talab qiladi. 126 Tashkilot kadrlaridan foydalanish darajasini o‘rganish uchun ularning mehnat qilish jarayonini tahlil qilish zarur. Bu quyidagi ikki asosiy omillar negizida bajarilishi mumkin: aniq xodimning mehnat xarajatlarini o‘rganish; uning mehnatining qizg‘inligini o‘rganish. Umumiy holda boshqaruv xodimlarining mehnat xarajatlari sarflangan vaqt bilan tavsiflanadi. Bu tahlilning muhim bosqichidir, chunki kishi harakatlari va uning mehnat natijalari o‘rtasidagi vaqt bog‘lanishlarini ochib, nafaqat ish samaradorligini baholash, balki haqiqiy sharoitlarda lavozim majburiyatlarini bajarishga ish vaqti xarajatlarining ob’ektiv zaruriy miqdorini aniqlash mumkin. Olingan natijalar asosida to‘xtab turishlar, tanaffuslar va boshqa, bartaraf etish kerak bo‘lgan vaqt yo‘qotishlarini aniqlash mumkin. Ish vaqti xarajatlarini o‘rganishning maqsadi alohida xodim ish vaqtini yuklanishi haqida tasavvur hosil qilishdan iborat. Boshqaruv apparatida ish vaqti xarajatlarini tahlil qilish usullari bilan umuman olganda, mehnatni me’yorlashtirish amaliyotida yaxshi ishlab chiqilgan ishlab chiqarish xodimlari ish vaqti xarajatlarini tahlil qilish usullari bilan bir xil. Bularga axborot to‘plash uchun qo‘llanadigan uzluksiz kuzatishlar usuli (ish vaqtini fotosuratga olish va xronometraj qilish), tanlanma kuzatishlar usuli (davriy va fursatli), anketalash, intervyu olish, so‘rovlar o‘tkazish kiradi. Funksiyalarni, umumiy ishlangan vaqt hajmida ish vaqti yo‘qotishlari (xodimning aybi bilan va boshqa unga bog‘liq bo‘lmagan sabablarga ko‘ra) ulushini, ijodiy, tashkiliy va texnik ishga xarajatlar ulushini, lavozimga xos va xos bo‘lmagan ishlarni bajarishga xarajatlar ulushini ajratish bilan bajarish paytidagi vaqt xarajatlari tuzilishi baholanadi. Ayni vaqtda shuni yodda tutish kerakki, ish vaqti xarajatlari bo‘yicha mehnat jarayonining tavsifi birmuncha rasmiy xususiyatga ega va uning mohiyatini aks ettirmaydi. Shu sababli xodim mehnatini nafaqat uning miqdoriy, balki sifat tavsiflari – qizg‘inligi, jadalligi bo‘yicha ham baholagan ma’qul. Xodim mehnati olingan 127 natijalar, ya’ni tayyorlangan hujjatlar, qabul qilingan qarorlar, qabul qilingan tashrifchilar soni va boshqalar bilan bilvosita tavsiflanishi mumkin. Boshqaruv tizimida hujjat asosiy axborot tashuvchi hisoblanadi, shu sababli axborot ta’minotini tadqiq etishda eng avvalo boshqaruv apparatiga hujjatli xizmat ko‘rsatish tizimini ko‘rib chiqish zarur. Bunda quyidagilar aniqlanadi: qator yillar uchun boshqaruv apparatining kirish va chiqish hujjatlari hajmi; kirish va chiqish hujjatlari tarkibining umumiy tavsifi, mazkur boshqaruv appparatining asosiy va eng ommaviy hujjatlari; hujjatlarning tarkibiy bo‘linmalar bo‘yicha taqsimlanishi, hujjatlar oqimlarining umumiy tavsifi; standart va unifikatsiya qilingan hujjat shakllarining mavjudligi hamda mavjud hujjatlarni mashinali qayta ishlash usullari; boshqaruv apparatida ish yuritish masalasi qo‘yilishining umumiy tavsifi; hujjatli ishlarni tartibga solish darajasi va hisobga olish-ma’lumot berish apparatining holati. Ko‘rsatilgan masalalar bo‘yicha ma’lumotlarning manbalari quyidagilardan iborat: 1. Devonxona va tarkibiy bo‘linmalarning hisobga olish-ma’lumot berish apparatining ma’lumotlari. 2. Ish yuritish bo‘yicha yo‘riqnoma. 3. Tadqiqotchilarning chuqur bilimga ega boshqaruv apparati xodimlari bilan shaxsiy suhbatlari. Boshqaruv apparatiga hujjatli xizmat ko‘rsatishni batafsil tekshirish va tahlil qilishda quyidagi ish turlari amalga oshiriladi: 1. Boshqaruv apparati hujjatlari tarkibini va harakatini o‘rganish, ya’ni hujjatlar oqimi tarkibining batafsil miqdoriy tavsifi, asosiy va eng ommaviy 128 hujjatlarning harakatlanish marshrutlarini, muassasaning eng ommaviy ish turlarini bajarishga hamrohlik qiluvchi hujjatlar kompleksini o‘rganish. 2. Ish yuritish masalasi qo‘yilishini o‘rganish. 3. Hujjatlar shaklini, ya’ni hujjatlar shaklidan foydalanish va o‘zaro bog‘liqligini, hujjatlardagi rekvizitlarning harakatlanishida ko‘rsatkichlarning takrorlanuvchanligini o‘rganish. Olingan ma’lumotlarini tizimga solish va umumlashtirish uchun tadqiqotchilar boshqaruv apparati hujjatlar aylanmasi sxemasini tuzadilar va uning kompleks tahlilini o‘tkazadilar. Tadqiqotni tashkil qilish o‘z ichiga qator masalalarni echishni oladi. Ishlarni tashkil qilish jarayonida tadqiqotchilik loyihasini amalga oshirish to‘g‘risidagi buyruq chiqariladi, dasturlarning rahbarlari va ishchi guruhlarning rahbarlari tayinlanadi; ular orasida aniq topshiriqlar taqsimlanadigan tegishli malakali mutaxassislar tanlab olinadi; ishchi guruhlar barcha kerakli resurslar bilan ta’minlanadi. Barcha tadqiqotchilik va loyihalash ishlariga umumiy rahbarlikning oliy daraja menejerlari tomonidan amalga oshirilishi maqsadga muvofiq – bu holda tadqiqotchilik loyihasi haqiqatan yuqori maqomga ega bo‘ladi, resurslar bilan o‘z vaqtida ta’minlanadi, tadqiqotchilar barcha kerakli axborotga ega bo‘la oladilar. Shunday qilib, birinchi rahbarning qonuniy hokimiyati tadqiqot jarayonini engillashtiradi, tezlashtiradi, va zarur bo‘lganda natijalarni boshqaruv amaliyotiga, boshqa tashkilot a’zolari tomondan yangiliklarga eng kam qarshilik ko‘rsatilgan holda tatbiq etishni ta’minlaydi. Kutilayotgan natijalar sifatini oshirish uchun tadqiqotchilik ishiga tashkilot turli bo‘linmalari va xizmatlarini jalb qilish zarur. Bu bo‘linmalardagi mavjud axborotdan eng to‘liq foydalanish va tadqiqotchilik ishida, bu ishga rasman jalb qilinmagan xodimlarning ijodiy salohiyatini ishga solish imkoniyatini beradi. Tadqiqotlarga shtatda turuvchi mutaxassislar bilan birga tashqi maslahatchilik, ilmiy-tadqiqotchilik va boshqa ixtisoslashgan tashkilotlarning 129 vakillarini, shuningdek, boshqaruv tizimlarini tadqiq etish sohasida kerakli malaka va tajribaga ega alohida kasb ustalarini jalb qilish mumkin. Shuni yodda tutish kerakki, chetdan jalb qilingan shaxslar tomonidan bajarilayotgan tadqiqotchilik ishi, faqat tashkilot rahbariyati va tashqi maslahatchilar orasida haqiqiy hamkorlik mavjud bo‘lgandagina tashkilot uchun samarali va chindan foydali bo‘lishi mumkin. Yüklə 5,01 Kb. Dostları ilə paylaş:
|