Microsoft Word etno kitab son srift 12

ETNOPSİXOLOGİYA 
142 
Danışıqlarda iştirak edən ingilislər üçün işə qabarıq şəkildə 
ifadə olunan prosesual empirizm, fürsətcil (konyunktur) yanaşma 
xarakterikdir. Qeyd olunmalıdır ki, işlər dərhal gəlir və uğur 
gətirdikdə ingilislər çox iddialı, özlərinə güvənən davranış nümayiş 
etdirirlərsə, uğur və gəlirlər 5-10 il sonra əldə olunacağı təqdirdə 
olduqca ləng və könülsüz işə daxil olurlar. Bununla belə, 
partnyorluğun gələcəkdə davam və inkişaf etdirilməsinə olduqca 
pozitiv yanaşırlar. 
İngilislər danışıqlara hazırlıq məsələlərinə olduqca az diqqət 
ayırırlar. Hazırlıqlara praqmatizm (gəlir əldə etmək) baxımından 
yanaşırlar. Yəni düşünürlər ki, danışıqlarda tərəf müqabilinin 
yanaşmasından asılı olaraq ən uyğun qərar tapılacaqdır. Bununla 
belə, onlar kifayət qədər elastikdirlər, əks tərəfin bütün 
təşəbbüslərinə həvəslə cavab verirlər. İngilislər üçün ənənəvi 
bacarıq kəskin tərəflərdən qaçmağı və yayınmağı bacarmaqdır. 
Bununla yanaşı, ingilis şəriklərlə danışıqlar dəqiq və razılıqla 
olmalıdır, onlar adətən improvizasiyanı, düşünülməmiş hansısa 
təkliflərin irəli sürülməsini qəbul etmirlər. 
Danışıqlar faktiki, sorğu əsasında əldə olunmuş və statistik 
məlumatlara əsaslanaraq aparılır və hər bir yanaşma nəzərdən 
keçirilir. Aparılan danışıqların detallaşdırılması (danışıqlarda hər 
bir xırdalığın nəzərdən keçirilməsi) səviyyəsi kifayət qədər yüksək 
olur. Belə ki, gələcək razılaşmanın hər bir detalı, parametrləri ciddi 
şəkildə müzakirə edilir. 
İngiltərə klassik mühafizəkarlıq ölkəsidir. Onun həyat və 
yaşam tərzində ciddi riayət olunan ənənəvi və çoxəsrlik ritualizm 
böyük məna kəsb edir. Belə hesab olunur ki, ingilislər danışıqlar 
aparılması üçün müəyyən ünsiyyət ritualı hazırlayıblar və ona ciddi 
əməl edirlər. Misal üçün, əgər ticarət danışıqları aparılırsa, onlara 
başlamamışdan əvvəl ən azından bazarın firmalar baxımdan 
xarakteristika edilməsi (hansı şirkət və firmaların bazara məhsul 
təqdim etdiyini), məhsulun dəyərini, qiymətin qalxma və ya 
enməsinin nəyə əsaslanmasını, lazım olan ingilis şirkəti və orada 
işləyən şəxslər barəsində məlumatın toplanması mühümdür. 

---