ANARIN “AĞ QOÇ, QARA QOÇ ” ƏSƏRİNİN MOTİVİ ƏSASINDA AĞ VƏ QARA
RƏNGİN TƏZADI
Nurlanə İSKƏNDƏROVA
Bakı Slavyan Universiteti
nurlanaiskenderova@mail.ru
Həyatımız bir təbiət lövhəsi kimi rəngli və al-əlvandır. Bu rənglərin hər birinin həyatımızda öz xüsusi yeri və xatirəsi
vardır. Hər bir rəng yaşadığımız hər an kimi fərqli və məna doludur. Əgər hər hansı bir şəxsə hər hansı bir rəng haqqında
sual versək, onun həyatında qoyduğu iz qədər fərqli düşüncələri paylaşar. Biz rənglərin bir çox mənalarına ta qədimdən
bələdik və bu rənglərin hər birinin özünəməxsusluğunu və dərin məna kəsb etdiyini bilirik.
Anarın “Ağ qoç, qara qoç ” əsərində də biz ağ və qara rənglərə rast gəlirik. Biz bu rənglərin tarixən bir-birinə zidd
rənglər olduğuna bələdik. Ancaq burada ağ qoç, qara qoç tamamilə simvolik məna daşıyırlar. “Məlikməmməd” xalq
nağılından götürülmüş bu simvolik obrazlar burada ağ- işıqlı dünyanı, qara- qaranlıq, zülmət dünyanı təsvir edir. Burada baş
qəhrəman jurnalist Məlik də bu zülmət arasında işıqlı dünyaya yol tapmağa çalışır. Amma bu heç də asan deyil, əsərdə qeyd
olunduğu kimi “Əvvəla, ağ qoçu qara qoçdan seçə bilmək lazımdır. Sonra da sıçrayıb ağ qoçun belinə minəndə, elə
möhkəm oturmalısan ki, səni qara qoçun belinə ata bilməsin”. Buradan da göründüyü kimi “ağ qoç qara, qoç” dedikdə
“işıqlı və qaranlıq dünyanı, yəni yaxşını pisdən ayırmağı bacarmağı, xeyiri şərdən seçmək nəzərdə tutulur.
| 
