Microsoft Word Moliyaviy hisob-2

8.3. Hisob-kitob schyoti bo’yicha muomalalar hisobi

Korxonalar boshqa yuridik shaxslar, davlat nazorat organlari va boshqa tashkilotlar bilan bo’ladigan hisob-kitoblarini asosan naqd pulsiz hisob-kitoblar ko’rinishida amalga oshiradi. Mablag’larni bir hisob raqamidan ikkinchi hisob raqamiga naqd pul ishtirokisiz, pul o’tkazish yo’li bilan amalga oshiriladigan hisob-kitoblar naqd pulsiz hisob-kitoblar deyiladi.
O’zbekiston Respublikasi hududida naqd pulsiz hisob-kitoblar 1995 yil 4 sentyabrdagi «O’zbekiston Respublikasida naqd pulsiz hisob-kitoblarni olib borish to’g’risida»gi 60yo’riqnomaga asosan olib boriladi.
Naqd pulsiz hisob-kitoblar quyidagi asosiy tamoyillarga asoslanadi:

• 
  korxona, tashkilotlar o’z pul mablag’larini (o’z mablag’lari va qarz mablag’lari) bankda saqlashlari lozim;
  
• 
  barcha naqd pulsiz hisob-kitoblar bank orqali o’tishi kerak;
  
• 
  xo’jalik organlari hisob-kitoblar shakllarini erkin tanlashlari va uni shartnoma orqali mustahkamlab qo’yishlari mumkin;
  
• 
  xo’jalik organlarining hisob-kitoblar bo’yicha shartnomaviy munosabatlariga bank aralashmasligi kerak;
  
• 
  tovarlar va xizmatlar uchun to’lovlar to’lovchining roziligi bilan amalga oshiriladi;
  
• 
  to’lovlar xo’jalik organlarining hisobraqamidagi mablag’lari hisobidan, ba’zida bank krediti hisobidan amalga oshirishi mumkin;
  
• 
  to’lov qoidasi mol etkazib beruvchi va mol sotib oluvchi tomonidan mol etkazib berish to’g’risidagi shartnoma asosida kelishib olinadi;
  
• 
  mol etkazib beruvchining hisobraqamiga pul mablag’larini o’tkazish mazkur mablag’larning mol sotib oluvchining hisobraqamidan o’chirilganidan keyin amalga oshiriladi.
  

Bank muassasasida hisob-kitob schyotini ochish uchun korxona quyidagilarni taqdim qilishi lozim:

• 
  hisobvaraqni ochish haqida ariza (0401025-shakl); uni korxona rahbari imzolashi shart;
  
• 
  korxonaning davlat ro’yxatidan o’tkazilganligi haqida hujjat;
  
• 
  korxonaning notarius tasdiqlagan ustavi nusxasi;
  
• 
  imzolar namunalari va muhr nusxasi tushirilgan, notarius tasdiqlagan varaqcha (0401026-shakl);
  
• 
  korxonani tuzish haqidagi ta’sis shartnoma (muassisning qarori, ta’sischilar umumiy yig’ilishining qarori) nusxasi;
  
• 
  soliq organida ro’yxatdan o’tganligi va identifikatsiyalashgan soliq to’lovchi nomeri berilganligi to’g’risida notariusda tasdiqlangan guvohnoma ko’chirmasi yoki shaxs soliq to’lovchi sub’ekt emasligi to’g’risida ma’lumot.
  

Korxonaning hisobvarag’ida olingan materiallar, asosiy vositalar uchun mol yuboruvchiga to’lanmalari, byudjetdan, ijtimoiy sug’urtadan bo’lgan qarzni to’lash, ish haqi berish uchun kassaga olingan pul va boshqa zaruriyatlar uchun to’langan pul mablag’lari aks ettiriladi.
Odatda, bank tomonidan har qanday pul o’tkazib berish yoki naqd pul berish korxona yoki hisobvaraqni tasarruf etuvchining buyrug’i yoki u bilan kelishilgan holda amalga oshiriladi. Lekin bank quyidagi hollarda korxona roziligini olmay boshqa tashkilotlarning hujjatlari bo’yicha uning hisob-kitob schyotidan pulni majburiy o’tkazib beradi: moliya va soliq organlarining buyrug’i bo’yicha to’lanmagan soliq va yig’imlar, shuningdek, ular bo’yicha jarima va boqimandalar summasini; qondirilgan da’volar summasini – ijro varaqlari, xo’jalik sudining buyrug’i bo’yicha; kreditdan foydalanganligi uchun foiz summasini; bank tomonidan ko’rsatilgan xizmatlar summasini.
Hisob-kitob schyoti bo’yicha barcha muomalalar hisob-kitob schyotining egasi roziligi bilan belgilangan shakldagi to’lov (bank) hujjatlari asosida amalga oshiriladi.
To’lov shakllari deganda, odatda, huquqiy me’yorlarda ko’zda tutilgan, kreditor hisobiga mablag’larni o’tkazish usuli, hisob-kitob hujjati turi va hujjatlar aylanish tartibi bilan farqlanuvchi naqd pulsiz to’lovlar shartlari ko’zda tutiladi.
Korxonalar o’rtasidagi naqd pulsiz hisob-kitoblar:

• 
  to’lov topshiriqnomalari;
  
• 
  cheklar;
  
• 
  akkreditivlar;
  
• 
  tijorat banklari veksellari;
  
• 
  to’lov talabnoma-topshiriqnomalari;
  
• 
  to’lov talabnomalari;
  
• 
  inkasso topshiriqnomalari;
  
• 
  rejali to’lovlar vositasida amalga oshiriladi.
  

Mablag’larni to’lovchi bilan oluvchi o’rtasidagi to’lovlar shakli shartnoma (kelishuv) bilan belgilanadi.
Hisob-kitob hujjatlari belgilangan standartlar talablariga muvofiq kelishi va hisob-kitob hujjati nomi, hisob-kitob hujjati raqami, uning yozilgan kuni, oyi, yilini o’z ichiga olish kerak. Kun raqamlarda, oy so’z bilan, yil raqamlar bilan ko’rsatiladi, hisoblash mashinalarida to’ldiriladigan to’lov hujjatlarida oy raqamlarida ko’rsatilishi mumkin, to’lovchi bankining raqami, to’lovchi bankining nomi ko’rsatiladi, to’lovchi bankining nomi o’rniga hujjat matnida uning firma belgisi; to’lovchining nomlanishi, uning bankdagi hisob raqami; mablag’ oluvchining nomlanishi, uning bankdagi hisob raqami; oluvchi bankining nomlanishi (chekda ko’rsatilmaydi), mablag’ oluvchi bankning raqami ko’rsatilishi mumkin. To’lovchi va mablag’ oluvchi nomining banklar va mijozlar ishini qiyinlashtirmaydigan oqilona qisqartirilishiga yo’l qo’yiladi, to’lov maqsadi ko’rsatiladi (chekda ko’rsatilmagan).
Bank pul berish, naqd pulsiz o’tkazishlar, ba’zi hollarda hisobga yozishlari ham maxsus shakldagi hujjatlar bo’yicha amalga oshiriladi, ularga rahbar va bosh buxgalter imzo chekib, korxona muhri bilan tasdiqlanadi.
Qonun hujjatlarida ko’zda tutilgan ayrim hollarda bank pul mablag’larini korxonaning hisobkitob schyotidan inkasso yo’li bilan majburiy tarzda o’chiradi. Bundan tashqari, bank ssudalaridan foydalanganlik uchun foizlar, to’lash muddati o’tgan ssudalar bo’yicha summalar, bank xizmatlari qiymati singari va hokazo pul summalarini o’zining xohishiga qarab hisobdan o’chiradi. Bunda bank pullarni hisob-kitob schyotidan o’chirish, shu jumladan pullarni byudjetga o’tkazish va kassaga ish haqi uchun berishni unga tegishli hujjatlar kelib tushgandagidek ketma-ketlikda amalga oshiradi.
Korxona va tashkilotlar bilan hisob-kitoblarda ular o’rtasida ko’zda tutilgan to’lov shakliga bog’liq holda hujjatlar qo’llanadi. Agar shartnomada korxonaning o’zi qarzini mol etkazib beruvchilar, pudratchilar va turli tashkilotlarga o’tkazishi ko’zda tutilgan bo’lsa, to’lov topshiriqnomasi yoziladi.
To’lov topshiriqnomasi korxonaning o’ziga xizmat ko’rsatuvchi bankka o’z hisobvarag’idan muayyan summani boshqa korxonaning va shu bankdagi yoki ana shu shaharda yoxud boshqa shaharda joylashgan bank muassasasidagi schyotiga o’tkazish to’g’risidagi topshirig’i hisoblanadi. Bunda to’lovchi bankka belgilangan shakldagi blankda topshiriqnoma taqdim etadi.
Topshiriqnomalar yozilgan kundan boshlab 10 kun davomida amal qiladi (yozilgan kun hisobga kirmaydi).
Tomonlarning kelishuviga ko’ra topshiriqnomalarga asoslangan to’lovlar muddatli, muddatdan oldin va muddati uzaytirilgan bo’lishi mumkin.
Muddatli to’lov quyidagi variantlarda amalga oshiriladi:

• 
  bo’nak to’lovi, ya’ni tovarlarni yuklab jo’natish yoki xizmatlar ko’rsatishdan oldin;
  
• 
  tovar yuklab jo’natilganidan so’ng, ya’ni tovarni to’g’ridan-to’g’ri aktseptlash yo’li bilan;
  
• 
  yirik bitimlarda qisman to’lovlar.
  

Muddatidan oldin va muddati uzaytirilgan to’lovlar shartnomaviy munosabatlar doirasida, tomonlarning moliyaviy mavqeiga zarar keltirmasdan amalga oshirilishi mumkin.
Olingan tovarlar va ko’rsatilgan xizmatlar uchun topshiriqnomalar bank tomonidan ular taqdim etilgan kunda hisob-kitob schyotida mablag’lar bo’lganda yoki bank ssudasi hisobiga imkoniyati mavjud bo’lgandagina qabul qilinadi.
To’lov topshiriqnomalari blanklarda (0401002) tuziladi, bitta bank muassasasi xizmat ko’rsatadigan uchta va undan ortiq oluvchiga o’tkazilganda esa banklarda yig’ma to’lov topshiriqnomalari (0401003) tuziladi.
Mablag’ to’lovchi va oluvchiga bitta bank muassasasi tomonidan xizmat ko’rsatiladigan hisob-kitoblari topshiriqnoma asosida uch nusxada taqdim etiladi. Birinchi nusxa to’lovchi bankida memorial order bo’lib xizmat qiladi, ikkinchi nusxa bir shahardagi o’tkazishlarda uning hisobvarag’idan yozish chog’ida oluvchiga yuboriladi, uchinchi nusxasi to’lovchiga berilib, topshiriqnoma qabul qilinganligi to’g’risida tilxat va bank muassasasi shtampi bilan beriladi.
Agar mablag’ to’lovchi va oluvchiga bir shaharda joylashgan turli bank muassasalari xizmat ko’rsatayotgan bo’lsa, topshiriqnoma to’rt nusxada taqdim etiladi, ularning birinchisidan memorial order sifatida foydalaniladi, ikkinchi va uchinchi nusxalari to’lovdan so’ng mablag’ oluvchining bankiga yuboriladi, bunda ikkinchi nusxa order bo’lib xizmat qiladi va bankda qoladi, uchinchi nusxa oluvchi hisobvarag’idan ko’chirmaga ilova qilinadi, to’rtinchi nusxa to’lovchiga tilxat va bank shtampi bilan birga qaytariladi.
Ijro uchun qabul qilingan topshiriqnomalar summalari topshiriqnomalarda ko’rsatilgan to’lovchilar hisobvarag’idan o’chiriladi.
Aktseptlangan topshiriqnoma to’lovga faqat to’lov summada qabul qilinishi mumkin. Aktseptlangan topshiriqnomalarni qabul qilganda bank topshiriqnomaning orqa tomonida ularni to’lash uchun qabul qilgan korxonaning qabul qilish sanasi ko’rsatilgan shtampi bo’lishini nazorat qilishi kerak.
Hisob-kitobni bank tomonidan aktseptlangan topshiriqnoma bilan amalga oshirmoqchi bo’lgan to’lovchi unga xizmat ko’rsatuvchi bank muassasasiga aktsept uchun topshiriqnomani (0401002) uch nusxada taqdim etadi. Dastlabki ikki nusxaga imzo chekilishi va muhr izi tushirilishi shart.
Topshiriqnomani bajarish mumkinligi va u to’g’ri rasmiylashtirilgani tekshirilganidan so’ng uning summasi bank muassasasi tomonidan topshiriqnoma taqdim etgan to’lovchining hisobvarag’idan o’chiriladi va «Aktseptlangan to’lov topshiriqnomalari va banklarning hisobkitob cheklari» hisobvarag’ida deponentlanadi.
Topshiriqnomaning birinchi nusxasi bank muassasasi muhri izi bilan tasdiqlanadi va to’lovchining ishonchli vakiliga beriladi, bu vakilning imzosidan namuna topshiriqnoma ikkinchi nusxasida keltiriladi. Zarurat tug’ilganda bank ishonchli vakil shaxsini tasdiqlaydigan hujjatlarni topshiradi.
O’tkazma yuboruvchidan qabul qilingan aktseptlangan topshiriqnomalarni aloqa korxonalari va transport tashkilotlari ularga xizmat ko’rsatuvchi bank muassasalariga to’lov topshiriqnomalarining blanklardagi reestrida (0401007) topshiradi.
Noto’g’ri rasmiylashtirilishi, depozitning amal qilish muddati tugagani yoki boshqa sabablarga ko’ra to’lashga qabul qilinmagan aktseptlangan topshiriqnomalar reestrdan uning yakuni tuzatilgan holda o’chiriladi va hisobot taqdim etgan korxonaga qaytariladi.
Ishlatilmagan aktseptlangan topshiriqnoma summasi uni aktseptlagan bankka taqdim etilgan topshiriqnoma bo’yicha to’lovchi hisobvarag’ida tiklanadi.
Aktseptlangan topshiriqnoma uning aktsept kunidan boshlab bir oy davomida to’lash uchun taqdim etilmaganda ushbu topshiriqnoma summasi «Aktseptlanmagan to’lov topshiriqnomalari va banklarning hisob-kitob cheklari» hisobvarag’idan «Boshqa debitorlar va kreditorlar» balans hisobvarag’iga o’tkaziladi va keyin da’vo muddati tugaganidan so’ng, respublika byudjetining daromadiga o’tkaziladi.
To’lov topshiriqnomasi bo’yicha pul o’tkazib berilganida quyidagi yozuvlar qilinadi:
D-t 6410-«Byudjetga to’lovlar bo’yicha qarzdorlik»
D-t 6520-«Davlat maqsadli fondlariga to’lovlar»
D-t 6990-«Boshqa majburiyatlar»
K-t 5110-«Hisob-kitob schyoti».
To’lovlarning to’lov talabnoma-topshiriqnomalari shaklida mol etkazib beruvchi mahsulotni yuklab jo’natgandan so’ng to’lov talabnomasini yozib, unga xizmat ko’rsatadigan bankka topshiradi. U xaridordan pulni undirish va uni mol etkazib beruvchining hisob-kitob schyotiga kiritish uchun talabnomani xaridorning bankiga jo’natadi. To’lovchining aktsepti (roziligi) mavjud bo’lganda, hisobvaraqlar haqi to’lanadi. Agar shartnomaga muvofiq korxonaning o’zi xaridorlardan berilgan mahsulot, bajarilgan ish va xizmatlar qiymatini undirish kerak bo’lsa, to’lov talabnoma-topshiriqnomasi tuziladi, uning shakli va mazmuni to’lov topshiriqnomasiga o’xshashdir.
To’lov talabnoma-topshiriqnomasi mol etkazib beruvchining xaridorga bankni chetlab o’tib, unga yuborilgan to’lov va yuklab jo’natish hujjatlari asosida, shartnoma bo’yicha etkazib berilgan mahsulot, bajarilgan ishlar va ko’rsatilgan xizmatlar qiymatini to’lash to’g’risidagi talabini ifodalaydi.
To’lovchi olingan to’lov talabnoma-topshiriqnomasini to’lash imkoniyatini belgilab, uni xizmat ko’rsatuvchi bank muassasasiga topshiradi, toki to’lov talabnoma-topshiriqnomasi bo’yicha aktseptlangan summa to’lovchi hisobvarag’idan mol etkazib beruvchining hisobvarag’iga o’tkazilsin.
To’lov talabnoma-topshiriqnomalarini mol etkazib beruvchi 0401040 – son blankda yozadi va shartnomada ko’zda tutilgan yuklab jo’natish hamda boshqa hujjatlar bilan birga 3 nusxada bevosita xaridorga yuboriladi.
Birinchi nusxa belgilangan tartibda rasmiylashtirilib, mol etkazib beruvchining imzolari va muhr izi qo’yilgan bo’lishi kerak.
To’lov talabnoma-topshiriqnomasi to’lovchi hisobvarag’ida mablag’ bo’lganida qabul qilinadi.
To’liq yoki qisman to’lashga rozi bo’linganda to’lovchi to’lov talabnomatopshiriqnomasining barcha nusxalarini hisobvaraqni tasarruf etishga vakolatli shaxslar imzolari va muhr izi bilan rasmiylashtiradi hamda ularning hammasini xizmat ko’rsatuvchi bankka topshiradi, bunda:

• 
  birinchi nusxa mablag’larni to’lovchi hisobvarag’idan chiqarish uchun asos bo’lib xizmat qiladi va muomala yakunlanganidan so’ng bank uchun hujjatlarda joylashtiriladi;
  
• 
  ikkinchi nusxa mol etkazib beruvchiga xizmat ko’rsatadigan bankka yuboriladi;
  
• 
  uchinchi nusxasi yuklab jo’natish hujjatlari bilan birga jo’natish uchun qabul qilish va tovarlar, bajarilgan ishlar, ko’rsatilgan xizmatlar haqi to’langani to’g’risida tilxat sifatida to’lovchiga qaytariladi;
  
• 
  to’lovchi bankka aktseptlangan to’lov talabnoma-topshiriqnomalarini taqdim etishi shart bo’lgan muddatni tomonlar shartnomada belgilaydi va uni bank nazorat qilmaydi.
  

To’lov talabnoma-topshiriqnomasi unga ilova qilingan yuklab jo’natish hujjatlari va to’lashdan bosh tortilgani to’g’risidagi xabarnoma bilan birga bevosita mol etkazib beruvchiga qaytarib beriladi. Kelib tushgan va to’lanmagan to’lov hujjatlari hisobini to’lovchi O’zbekiston Respublikasi qonun hujjatlarida ko’zda tutilgan tartibda amalga oshiradi.
To’lov talabnomasi hisob-kitob hujjati bo’lib, mol etkazib beruvchi (yuk jo’natuvchi) va vositalarni boshqa oluvchilarning to’lovchiga muayyan summani bank orqali to’lash to’g’risidagi talabini o’z ichiga oladi.
To’lov talabnomalari bilan hisob-kitob qilish zarurati O’zbekiston Respublikasi hukumati tomonidan, yuzaga kelgan moliyaviy vaziyatdan va to’lovlarni ta’minlash zaruratidan kelib chiqib belgilanadi.
To’lov talabnomalari bilan hisob-kitob qilishda vositalarni oluvchi unga xizmat ko’rsatuvchi bankka inkasso uchun to’lovchidan muayyan summani bank orqali to’lash talab qilingan hisob-kitob hujjatini taqdim etadi.
To’lovchilarning aktseptli yoki aktseptsiz talabli hisob-kitoblari korxonalar o’rtasida yuklab jo’natilgan (berilgan) tovarlar, bajarilgan ishlar va ko’rsatilgan xizmatlar uchun, boshqa to’lovlar bo’yicha esa – amaldagi qonunlar yoki shartnomada ko’zda tutilgan hollarda qo’llanadi, talabnomada mazkur to’lov shaklini belgilagan tegishli me’yoriy hujjat, shartnoma bandiga, albatta, havola qilinishi kerak.
Olingan aktsept belgilangan hisob-kitoblarda talabnoma aktsept muddati tugagan kunning ertasiga to’lanadi.
To’lovchi unga xizmat ko’rsatadigan bank muassasasiga mazkur bank muassasasi talabnomani olgan kundan so’ng 3 kun davomida, talabnoma kelib tushgan kunni hisobga olmaganda, aktseptdan voz kechishi to’g’risida aytish huquqiga egadir.
Zarurat tug’ilganda korxonaning so’roviga binoan bank muassasasi rahbari talabnoma aktsepti muddatini 10 kunga qadar uzaytirishi mumkin.
Bank tomonidan 10 kun mobaynida rozilik (aktsept) olinmagan taqdirda bunday talabnomalar bank muassasasiga qaytarilib, hujjat aktseptlanmagani ko’rsatiladi.
Aktseptdan voz kechishlarni qabul qilish huquqi berilgan mansabdor shaxslar doirasi bank rahbari tomonidan belgilanadi. Agar aktseptdan voz kechish umuman asoslab berilmagan bo’lsa, uni bank ijro etish uchun qabul qilmaydi.
To’lov talabnomasi 0401001 – sonli blanklarda tuziladi. Agar talabnoma spetsifikatsiya bilan muvofiqlashtirilmagan bo’lsa, unga tovar transport hujjatlari yoki ular o’rnini bosuvchi hujjatlar ilova qilinishi kerak. Bank boshqa ilovalarni qabul qilmaydi, amaldagi qoidalarda ko’zda tutilgan hollar bundan mustasno.
Talabnomalarda mol etkazib beruvchi, albatta:

• 
  shartnoma sanasi va raqamini ko’rsatadi;
  
• 
  tovarlarni yuklab jo’natish (berish) sanasi hamda tovar- transport yoki qabul qilish-topshirish hujjatlari va transport turi, tovarlar aloqa korxonasi orqali jo’natmalar sifatida yuborilganda - pochta kvitantsiyalarining raqamlari ko’rsatilishi kerak.
  

Talabnomalar 4 nusxada taqdim etiladi:

• 
  talabnomaning birinchi nusxasi to’lovchining bankiga to’lash paytida memorialorder bo’lib xizmat qiladi;
  
• 
  talabnomaning ikkinchi nusxasi inkasso muomalasi yakunlanganidan so’ng mol etkazib beruvchining hisobvarag’idan ko’chirma qilganda unga berish uchun mo’ljallanadi;
  
• 
  uchinchi nusxa unga ilova qilingan tovar-transport hujjatlari bilan birga talabnoma to’lovchining bankiga kelib tushgandan so’ng keyingi ish kunidan kechiktirmay to’lovchiga to’lov to’g’risida xabar berish va aktsept uchun topshiriladi;
  
• 
  to’rtinchi nusxa bir shahardagi hisob-kitoblarda mablag’lar hisobvarag’iga yozilgandan so’ng mol etkazib beruvchining bankida memorial-order sifatida ishlatiladi.
  

Talabnomalar tovar yuklab jo’natilgan (xizmat ko’rsatilgan)dan so’ng shartnomada tilga olingan muddatdan kechiktirmay inkassoga topshiriladi.
Talabnomalar ikki nusxada tuziladigan reestrga (0401014) kiritiladi.
Reestr shakli mol etkazib beruvchilarning xohishiga binoan mol etkazib beruvchi bankining roziligi bilan o’zgartirilishi va rekvizitlar bilan to’ldirilishi mumkin.
Korxona buxgalteriyasida hisob-kitob schyotidagi pullar harakati bank ko’chirmalari bo’yicha «Hisob-kitob schyoti» nomli 5110–aktiv hisobvaraqda hisobga olinadi. Ushbu hisobvaraq bo’yicha kredit oborotlari 2-jurnal-orderda yoziladi, debet bo’yicha oborotlar esa turli jurnal-orderlarda aks ettiriladi. 2-jurnal-orderga 2-qaydnoma yuritiladi, unda 5110«Hisob-kitob schyoti» hisobvaraq debetiga kiritilgan summalar hisobga olinadi.
Hisob-kitob schyotiga yozilgan va undan o’chirilgan summalarni hisobda aks ettirishdan oldin bank ko’chirmasi buxgalter tomonidan sinchiklab tekshiriladi va shundan so’ng bevosita hisob-kitob varag’idan ko’chirmada hisobvaraqlar korrespondentsiyalari tuziladi.
Bunda banklardagi korxonalarning hisob-kitob schyotlari passiv ekanini e’tiborda tutish zarur, binobarin, bank buxgalteriyasida pulning hisob-kitob schyotiga kelib tushishi hisobvaraqning krediti bo’yicha, hisobdan o’chirish esa uning debetida aks ettiriladi. Korxonalarda esa, aksincha, hisob-kitob schyoti aktiv hisoblanadi, shuning uchun pul mablag’larining hisob-kitob schyotida ko’payishi debet bo’yicha, kamayishi esa kredit bo’yicha aks ettiriladi.
Agar bank ko’chirmasida xatoga yo’l qo’yilgan bo’lsa, tegishli summa 4860-«Da’volar bo’yicha olinadigan schyotlar» hisobvarag’ining debeti yoki krediti bo’yicha, 5110-«Hisobkitob schyoti» hisobvaraq bilan korrespondentsiyada aks ettiriladi, bu haqda darhol bankka xabar qilinishi kerak.
Xatoning tuzatilgani to’g’risida bank korxonaga navbatdagi ko’chirmada xabar qiladi va bunga asoslanib tuzatuv yozuvini kiritadi.
Tovarlarni jo’natish va pul mablag’larini hisob-kitob varaqlariga o’tkazish bilan bog’liq bo’lgan muomalalar buxgalteriya hisobida quyidagicha rasmiylashtiriladi:

• 
  tovarlar jo’natilishi bilan mol yuboruvchida:
  

D-t 4010-«Xaridor va buyurtmachilardan olinadigan schyotlar»
K-t 9010, 9020.

• 
  mol yuboruvchida hisob-kitob schyotiga pul o’tkazilganida:
  

D-t 5110-«Hisob-kitob schyoti»
K-t 4010-«Xaridor va buyurtmachilardan olinadigan schyotlar».

• 
  materiallar kelib tushishi bilan mol oluvchilarda:
  

D-t 1010-«Xom-ashyo va materiallar»
K-t 6010-«Mol etkazib beruvchilar va pudratchilarga to’lanadigan schyotlar».

• 
  mol sotib oluvchida hisob-kitob schyotidan pul o’tkazilganda:
  

D-t 6010-«Mol etkazib beruvchilar va pudratchilarga to’lanadigan schyotlar»
K-t 5110-«Hisob-kitob schyoti».
Veksel bir tomon (veksel beruvchi) ikkinchi tomonga (veksel tuzuvchiga) bergan va gerb yig’imi to’langan, belgilangan shaklda tuzilib, so’zsiz yozma qarz pul majburiyati hisoblanadi. Veksellar oddiy va o’tkazma veksellar bo’lishi mumkin.
Oddiy veksel yozma hujjat bo’lib, veksel beruvchi (qarzdor) ning muayyan pul summasini muayyan muddatda va muayyan joyda veksel tutuvchiga yoki uning buyrug’iga binoan to’lashi to’g’risida oddiy va hech narsa bilan shartlanmagan majburiyatidir.
O’tkazma veksel (tratta) yozma hujjat bo’lib, veksel beruvchining to’lovchiga muayyan pul summasini muayyan muddatda va muayyan joyda oluvchiga yoki uning buyrug’iga binoan to’lashi to’g’risida so’zsiz buyrug’idir.
Hozirda O’zbekiston Respublikasi xalq xo’jaligida veksellardan amalda foydanilmayapti. Ular muomalada bo’lmasada, ammo hisob-kitoblarning qulay usulidan biri bo’lib hisoblanadi.
Inkasso topshiriqnomalariga binoan to’lovlar hisobi korxonalar hisobvaraqlaridagi mablag’larni ular roziligisiz hisobdan o’chirishning quyidagi hollarida qo’llanadi: byudjetga to’lovlar bo’yicha boqimandalar, jarimalarni undirishda va mablag’larni hisobdan o’chirishning so’zsiz tartibi belgilangan boshqa hollarda: undiruvchilarning farmoyishlari bo’yicha; ijro etish va unga tenglashtirilgan hujjatlar bo’yicha.
Mablag’larni hisobvaraqlardan so’zsiz tartibda hisobdan o’chirish undiruvchilarning to’lov talabnoma-topshiriqnomasi blankida taqdim etiladigan farmoyishlari asosida amalga oshiriladi.
Rejali to’lovlar tartibidagi hisob-kitoblar shakli korxonalar o’rtasida, ya’ni mol etkazib beruvchi va xaridor o’rtasida doimiy aloqa mavjud bo’lgan hollarda qo’llaniladi. Hisobkitobning bu shakli mashinasozlik korxonalarida, ko’mir, gaz, metall sotib olishda, oziqovqat sanoati korxonalari bilan savdo tashkilotlari o’rtasida non, sut mahsulotlarini sotish va sotib olishda qo’llaniladi. Uning xususiyati shundaki, hisob-kitob har bir jo’natilgan mahsulot uchun emas, balki belgilangan muayyan muddatda, ya’ni har kuni yoki 3-5 kunda bir marta olib boriladi. Ushbu shakldagi hisob-kitobning to’g’ri olib borilishini bank nazorat qilib turadi. Hisob-kitob hujjatlari xaridor yoki mol etkazib beruvchi tomonidan yozilishi mumkin. Vaqti-vaqti bilan jo’natilgan mahsulot va to’langan pul tekshirib turiladi, o’rtadagi farq qo’shimcha mablag’ to’lash yoki mahsulot jo’natish bilan tartibga solinadi.
Rejali to’lovlar orqali olib boriladigan hisob-kitoblar hisobi mol yuboruvchining balansida 4010-«Xaridor va buyurtmachilardan olinadigan schyotlar» hisobvarag’ining «Rejali to’lovlar hisob-kitobi» analitik hisobvarag’ida yuritiladi.
Mahsulot sotilganida quyidagicha provodka beriladi:
D-t 4010-«Xaridor va buyurtmachilardan olinadigan schyotlar»
K-t 9010-«Mahsulotni sotishdan olingan daromad».
Sotilgan mahsulotning puli kelib tushganida quyidagicha provodka beriladi:
D-t 5110-«Hisob-kitob schyoti»
K-t 4010-«Xaridor va buyurtmachilardan olinadigan schyotlar».
Mijoz (korxona) chek daftarchalarini unga xizmat ko’rsatuvchi bank muassasasidan oladi. Mehnatga haq to’lash, pensiyalar, kasallik varaqasi bo’yicha nafaqalar, mukofotlar, xizmat safarlari va xo’jalik xarajatlari uchun naqd pullarni bank cheki asosida korxonaning hisobkitob schyotidan shu korxona kassasiga beradi.
Pul cheki korxonaning hisob-kitob schyotidan chekda ko’rsatilgan naqd pul summasini berish to’g’risida bankka bergan farmoyishidan iborat. Chek siyohda yoki sharikli ruchkada to’ldiriladi. Unda summa, chek berilgan vaqt, oluvchining nomi, shuningdek, olingan summaning nima maqsadda ishlatilishi ko’rsatiladi.
Pul badallari haqidagi e’lon bilan hisob-kitob schyotiga naqd pullar topshirilganligi rasmiylashtiriladi. Ushbu hujjat bir nusxada to’ldiriladi va unda to’lanadigan pulning hosil bo’lish manbai ko’rsatiladi. Bank qabul qilingan pulga kassirga kvitantsiya beradi, u buxgalteriyada kassa chiqim orderini tuzish va kassa bo’yicha pul mablag’larini hisobdan chiqarish uchun asos vazifasini o’taydi.
Hisob-kitob schyotidagi barcha o’zgarishlar haqida bank o’z mijozini hisob-kitob schyotidan ko’chirmalar berish orqali xabardor qiladi. Bank ko’chirmalarida hisob-kitob schyotiga mablag’larning tushishi va undan hisobdan chiqarilishi, kun boshi va oxiri uchun undagi mablag’ qoldiqlari ko’rsatiladi.