Sosial Psixologiya - Mühazirələr (az) 100521161548 051021211057-1
Təlqinin dərəcəsi suqgerandın özünün psixi inkişaf səviyyəsindən də asılıdır.
Təlqin şəraitində adamların yaş, cins xüsusiyyətləri zəminində spesifik cəhətlər
meydana çıxır. Yaşlılara nisbətən uşaqların təlqinə asanlıqla qapılması faktından
tərbiyə praktkasında geniş istifadə olunur. Yorğun, fiziki cəhətdən zəifləmiş adamlar
təlqinə nisbətən asanlıqla qapılırlar.
Təlqin psixoloji sirayət ilə bağlıdır, lakin müəyyən xüsusiyyətlərinə görə ondan
fərqlənir. Burada əsas cəhət ondan ibarətdir ki, psixoloji sirayət zamanı böyük bir insan
kütləsi qeyri-mütəşəkkil surətdə eyni emosional halətlə yaşamağa başlayır. Təlqin isə
təktərəfli prosesdir: o, suqgestorun və suqgerandın eyni emosional halətlə yaşamasını
nəzərdə tutmur, tuta da bilməz. Həmin prosesi düzgün xarakterizə etmək üçün təlqinin
inandırmadan fərqini, qısa da olsa, xatırlamaq məqsədəuyğundur.
İnandırma - məntiqə əsaslanır. O, intellektual təsir vasitəsi kimi informasiyanın
müstəqil surətdə təhlil olunmasını nəzərdə tutur. Bu zaman informasiyanı qəbul edən
şəxs nəticəni nəinki hazır şəkildə qəbul etmir, əksinə, onu özü çıxarır. Məhz buna görə
də inandırma psixoloji cəhətdən elə qurulur ki, informasiyanı qəbul edən şəxsin bu və
ya digər nəticə ilə razılaşması üçün qoyulan məsələ məntiqi surətdə əsaslandırılır. Bu
baxımdan təlqin inandırmadan köklü surətdə fərqlənir; o, intellektual təsir kimi deyil,
emosional-iradi təsir kimi meydana çıxır.
