Mövzu-: 14.Şifahi işgüzar kommunikasiyanın formaları: monoloji nitq və dialoji nitq

Fənn: Azərbaycan dilində işgüzar və akademik kommunikasiya

Mövzu-: 14.Şifahi işgüzar kommunikasiyanın formaları: monoloji nitq və dialoji nitq

1. 
   Monoloji nitqin əsas formaları
   
2. 
   Monoloji nitq, ictimai nitq, natiqlər üçün tövsiyyələr
   
3. 
   Dialoq ünsiyyət forması kimi əsas inkişaf mərhələləri
   
4. 
   Dialoq, növləri və meyarları
   
5. 
   İşgüzar söhbət, işgüzar danışıqlar, görüşlər
   

Ədəbiyyat

1. 
   Abdullayev N. Nitq mədəniyyətinin əsasları. Bakı, 2013
   
2. 
   Cəfərov N.,Mərdanova S.,Qəribli A.Azərbaycan nitq mədəniyyəti.Bakı,2018
   
3. 
   Həsənov H. Nitq mədəniyyəti və üslubiyyatın əsasları. Bakı, 2003
   
4. 
   Eminli B., Paşayeva G. Azərbaycan dilində işgüzar və akademik kommunikasiya.Sumqayıt, 2021
   
5. 
   Məmmədli N. Azərbaycan dilində işgüzar və akademik kommunikasiya. Bakı, 2021
   

Monoloji nitq. Nitq prosesində danışanın və dinləyənin iştirakı həmişə eyni formada olmur. Bəzən dinləyən sual verir, danışana öz rəyini söyləyir. Bəzən isə dinləyən müsahibinin danışığına müdaxilə etmir, münasibət bildirmir. Bunlar nitqin dialoji və monoloji formalarını yaradır. Monoloji nitq dialoji nitqlə müqayisədə struktur baxımından sadədir. Burada bir nəfər fikri geniş və ya müxtəsər şəkildə, rabitəli bir tərzdə ifadə edir. Bu zaman danışanın müsahibi və müsahibləri ilə əks əlaqəsi olmur. Monoloji nitqin əsas məqsədi nitqin əsas kommunikativ növlərindən (təsvir, təsdiqləmə, fikir söyləmə, səciyyələndirmə) istifadə etməklə hər hansı bir məzmunu başqasına çatdırmaqdır. Bu nitq proqramlaşdırılmış, təşkil olunmuş nitqdir. Belə ki, danışan deyəcəklərini əvvəlcədən düşünür, eyni zamanda ifadə edəcəyi fikrin həcmini bilir. Bundan başqa, ifadə edəcəyi fikrin xarakterini müəyyənləşdirir, auditoriyaya müraciət formasını dəqiqləşdirir. Hansı materialları deyəcəyini, müsahibinin və müsahiblərinin səviyyəsini, deyəcəklərinin onlara necə təsir edəcəyini təsəvvüründə qabaqcadan canlandırır. Monoloji nitq mütəşəkkil nitq növü hesab olunur. Məsələn, müəllimin mühazirəsi monoloji nitqdir. Bədii ədəbiyyatda da çoxlu sayda monoloji nitqə rast gəlirik. Məsələn, İsgəndərin monoloqu, Hamletin monoloqu, İblisin monoloqu və s.
Monoloji nitq fasiləsiz, ardıcıl, əlaqəli və məntiqli olmalıdır. Ona görə də monoloji nitqdən istifadə edən çatdıracağı məlumatın məzmununu dərindən bilməli və aydın dərk etməlidir. Eyni zamanda zəngin söz ehtiyatına malik olmalı, nitqin təsirlilik və emosionallıq xüsusiyyətlərini qorumalıdır. Danışdığı dilin qayda-qanunlarını mükəmməl bilməlidir. İşgüzar ünsiyyətdə monoloq bir şəxsin davamlı bir ifadəsidir. Nisbətən fasiləsiz, ardıcıl və məntiqli, nisbi dolğunluğa malikdir, quruluşu mürəkkəbdir. Yığıncaqda məruzə, hesabat və mesaj janrları, səhmdarlara, həmtəsisçilərə edilən çıxışlar ilə təmsil olunan monoloq, bir qayda olaraq, vərəqdən oxunan, yazılı bir xarakter daşıyan və buna görə də dərhal mövcud olan nitqdir. İki formada–şifahi və yazılı formada ifadə olunur.
Bu gün işgüzar ünsiyyət dairəsi əhəmiyyətli dərəcədə genişlənir. Reklam, sosial ünsiyyət işgüzar ünsiyyətin ayrılmaz hissəsinə çevrilir. Bu gün bir müəssisə və biznesin müvəffəqiyyəti bir çox hallarda mövqelərini əlverişli təqdim etmək, potensial tərəfdaşa maraq göstərmək və xoş təəssürat yaratmaq qabiliyyətindən asılıdır. Buna görə monoloji nitq getdikcə işgüzar ünsiyyət təcrübəsinə çevrilir: təqdimat nitqi, təntənəli nitq, müxtəlif iclaslarda açılış nitqi və digər etiket mətnləri və s.