Mübarizə təbdirləri. Əkin materialları ümumi qayda üzrə dezinfeksiya edilməlidir.
Zərərverici kütləvi çoxaldığı sahələrdə məhsul yığıldıqdan sonra (payızda) Bay bay preparatı (3-4 l/ha) çilənməlidir.
Yumşaq yalançı çanaqlı yastıca (Coccus hesperidum L.). - Bərabərqanadlılar dəstəsi (Homoptera), koksidlər (Coccidae) fəsiləsinə mənsubdur.
Yetkin fərdin bədəni yumurtavari olub, rəngi narıncı, yaxud sarımtıldır. Polifaqdır.
Zərərvericinin 1-ci və 2-ci yaşda olan sürfələri qışlayır.
Aprelin axırları, mayın əvvəllərində inkişafını başa çatdırmış, qışlamış sürfələr yetkin hala keçir. İyun ayının əvvəllərində birinci nəslin sürfələri kütləvi əmələ gəlməyə başlayır, 2-ci nəslin sürfələrinə avqust, 3-cü nəslin sürfələrinə isə oktyabrda təsadüf edilir.
Zərərverici bakirə üsulla çoxalır. Bir dişi fərd 360-a qədər sürfə verə bilir.
İl ərzində 3 nəsil verir.
Zərərverici bitkinin şirəsini sorur, nəticədə cavan bitkilər böyümə və inkişafı zəifləyir, məhsul verən ağaclarda isə zərərvericinin yarpaqlar üzərinə buraxdığı ifrazatında saprofit göbələklər çoxalır, onları çirkləndirir və əmtəəlik dəyərini aşağı salır.
Mübarizə tədbirləri. 1. Qış və yay dövründə zərərverici əleyhinə mineral-yağ emulsiyası olaraq 30ss preparatının 3-5%-li məhlulu çilənməlidir.
2. Yay dövründə ayrı-ayrı nəsillər əleyhinə antio – 2 l/ha, Bİ-59 – 2 l/ha, Aktara 0,7 kq/ha emulsiyası ilə çiləmə aparılmalıdır.
Zeytun yalançı çanaqlı yastıcası (Saissetia oleae B.) -Bərabərqanadlılar dəstəsi (Homoptera), koksidlər (Coccidae) fəsiləsinin nümayəndəsidir.
Yetkin fərdin bədəninin uzunluğu 4 mm-dir.
Yumurtası uzunsovdur, ağımtıl və ya qəhvəyi rəngdə olur. Sürfəsi açıq-qəhvəyi rəngdə olub, yastıdır və uzunsovdur.
Zərərverici sürfə fazasında budaqların üzərində qışlayır. Qışlamadan çıxan sürfələr qidalanır, iyun ayında yetkin hala çevrilir və yumurta qoymağa başlayır.
Bir dişi fərd orta hesabla 2000-2500 ədəd yumurta qoya bilir. İyunun sonu, iyulun əvvəllərində yumurtadan çıxan sürfə bir müddət qidalanır və sonra qışlamaya gedir. İl ərzində 1 nəsil verir.
Zərərverici zeytun bitkisinin yarpaqları, budaqları və meyvələri ilə qidalanır. Nəticədə bitki böyümə və inkişafdan qalır və meyvələr əmtəəlik dəyərini itirir.
