Muallifdan

Mehnat hayqiriqlari nazariyasi tarafdorlari tildagi barcha so‘zlar ibtidoiy kishilarning birgalashib mehnat qilish jarayonida mehnat qilishga undaydigan Ixtiyorsiz qiyqirishlar natijasida paydo bo‘lgan , deb da’vo qiladilar .
Bu nazariyani XIX asrning 70 – yillarida fransuz faylasufi L. Nuare yaratdi . Uning qayd qilishicha , til instinktiv hayqiriqlardan paydo bo‘lgan. Nemis olimi Karl Byuxer ham ushbu nazariyani quvvatlaydi.
Bu nazariya bir qarashda haqiqatga birmuncha yaqin nazariyadek ko‘rinsa ham , mantiq jihatdan asossizdir . Chunki mehnat qilishdagi qiyqiriqlar , hayqiriqlar mehnat jarayonidagi bir maromga , bir qolipga solish uchun bir vosita bo‘lgan , xolos . uy , oh , voh , viq , oho, ehe kabi hayqiriqlar kishilar o‘rtasida aloqa vositasi bo‘lganligi ehtimol.
Mehnat hayqiriqlari undov nazariyasiga o‘xshab ketadi . Lekin bu nazariya ham tilning kelib chiqish sabablarini , tilning paydo bo‘lishini jamiyatning paydo bo‘lishi , so‘zlash va fikr yuritish qobiliyatiga ega bo‘lgan insoniyatning paydo bo‘lishi bilan uzviy bog‘lay olmaydi .
Ijtimoiy kelishuv nazariyasi. Bu nazariya XIX asrning ikkinchi yarmida paydo bo‘lib , uni ilgari suruvchi olimlar ba’zida bir-biriga zid xulosalarga kelishgan , ularning tilning kelib chiqishi to‘g‘risidagi asosiy fikrlari bir xil. Bu nazariyaga asosan, narsalarni qanday atashni odamlarning o‘zlari kelishib olishgan. Biror narsani nomlashda kelishib olish uchun , tabiiyki , kelishuv vositasi , ya’ni til kerak bo‘ladi . Ushbu nazariya tilning paydo bo‘lishini emas , balki til rivojlanishining bir yo‘nalishini yoritishi mumkin . Hozirgi vaqtga kelib u yoki bu fanga taalluqli atamalar yoki so‘zlar o‘zaro kelishib olinadi . Lekin buning til shakllanishiga aloqasi yo‘q.
Yuqorida ko‘rsatib o‘tilgan nazariyalarning hammasi ham tilning kelib chiqishi masalasini to‘g‘ri yoritishga ojizlik qiladi . Chunki bu nazariyalar tilning kelib chiqishi masalasini insoniyatning paydo bo‘lishi , dastlabki kishilar jamoasining vujudga kelishi masalasidan ajratib olgan holda qaraydi .
Jamiyatdan tashqarida yashagan inson bolasi qancha umr ko‘rmasin , u gapirmaydi . Chunki til nasldan naslga , avloddan avlodga o‘tmaydi , ya’ni uni irsiyatga bo‘lab qo‘yish to‘g‘ri bo‘lmaydi. Irsiyat qonuniga binoan , bolaning biologik , antropologik xususiyatlari avloddan avlodga o‘tadi , lekin o‘zbek oilasida tug‘ilgan bola faqat o‘zbek tilida gapiradi deyish noto‘g‘ridir. U qaysi tilda gapira boshlashi qaysi oila , qaysi ijtimoiy muhitda tarbiyalanishiga bog‘liq.
Qayd etilgan nazariyalarda, birinchidan , til go‘yo jamiyat tarixi taraqqiyotidan chetda , o‘z holicha taraqqiy etadigan hodisa, deb qaralgan. Shuning uchun ham tilning kelib chiqishi masalasi ibtidoiy davrdagi kishilarning mehnat faoliyatidan ajratilgan holda qaralgan. Ikkinchidan, bu nazariyalarda tilning kelib chiqishi masalasi tafakkurning paydo bo‘lish masalasi bilan birgalikda , o‘zaro bog‘langan holda emas , balki ajratilgan holda talqin qilingan. Uchinchidan , odamning paydo bo‘lishi jarayonidagi barcha biologik asoslar hisobga olinmagan.
Sharq tilshunosligida ham tilning paydo bo‘lishiga oid mulohazalar bildurilgan. Jumladan, Alisher Navoiyning “Muhokamat-ul lug‘atayn” asari muqaddimasida o‘sha davr dunyoqarashiga mos bo‘lgan tilning paydo bo‘lishiga doir qarashlar bayon qilingan. Alisher Navoiy tilning paydo bo‘lishini Nuh alayhissalom avlodlariga bog‘laydi:
“Mundin so‘ngra uch nav tildurkim , asil va mo‘tabardur va ul tillar iborati gavhari bila koyilining ( aytuvchi , so‘zlovchi ) adosig‘a zevar va har qaysining furu’i (shox , daraxtning shoxi ) bag‘oyat ko‘ptur . Ammo turkiy va forsiy va hindiy asl tillarning manshaidurki (bir narsaning chiqib kelgan o‘rni , kelib chiqish joyi , boshlanishi), Nuh payg‘ambar... ning uch o‘g‘lig‘akim , Yofas va Som va Homdur , etishur . Va bu mujmal tafsili budurki , Nuh... to‘fon tashviridin (to‘lqin , falokat) najot va aning mahlakasidin ( xavf – xatar joyi va vaqti , halokat , xavf – xatar) hayot topti , olam ma’murasida bashar jinsidin osor va inson navidin namudor qolmaydur erdi . Yofasniki , tavorix ahli Abu – t – turk bitirlar , Xito mulkiga yibordi va Somniki , Abu – l – furs bitirlar , Eron va Turon mamolikining vasatida ( o‘rta , o‘rtaliq ) voliy (hokim , hukumdor ,podshoh qildi va Homniki , Abu – l – hind depturlar , Hindiston bilodig‘a (shaharlar , mamlakatlar) uzatti . Va bu uch payg‘ambarzoda avlod va atbo‘i (tobelar , fuqarolar, qaramlar , izdoshlar ) mazkur bo‘lg‘an mamolikda yoyildilar va qalin bo‘ldilar. Va Yofas o‘g‘loniki , Abu – t – turkdur , tarix ahli ittifoqi(bir fikrga kelish, hammasi degan ma’noda )depturlarki , nubuvvat (payg‘ambarlik) toji bila sarafroz va risolat ( payg‘ambarlik , rasullik ) mansabi bila qarindoshlaridin mumtoz (saralangan , ajratilgan ) bo‘ldi . Va uch tilki , turkiy va forsiy va hindiy bo‘lg‘ay . Bu uchovning avlod va atbo ‘i orasida shoe bo‘ldi . (“Muhokamat ul – lug‘atayn”dan) .
Olimlarning faraz qilishicha , mehnat , ibtidoiy mehnat qurollarini yasash odamlar a’zolarini asta-sekin juda uzoq davrlar davomida takomillashtirib , til hamda tafakkurning rivoj topishida beqiyos rol o‘ynagan .
`Demak, mehnat qilish, mehnat qurollarini yasash jarayonida odamlar borgan sari uyushib boradi , natijada kishilik jamiyati vujudga keladi. Hayvonot dunyosidan ajralib chiqqan odamlarda jamoa bo‘lib mehnat qilish jarayonida bir-biriga nimadir deyish ehtiyoji tug‘iladi . Bu zaruriy ehtiyoj esa tilni yaratadi . Til bilan ayni bir vaqtda tafakkur paydo bo‘ladi . Mehnat bilan bir vaqtda muhim ehtiyoj talabi bilan til va tafakkurning paydo bo‘lishi natijasida bu uch omil bir-biriga ta’sir qilib , rivojlanish imkoniyati yazaga kelgan. Buning natijasida mehnat qilish yo‘llari , mehnat qurollari , til va miya asta-sekin takomillasha boshlaydi . Ilgari tosh hech qanday ahamiyatga ega bo‘lmagan bo‘lsa , endi kishilar undan foydalanishni o‘rgana boshlaydilar va uning xususiyatlarini bilib oladilar . Endi odam toshni yorib yoki sindirib , undan har xil shakldagi turli mehnat qurollari yasay boshlaydi va ana shu mehnat qurollaridan foydalanish jarayonida boshqa narsalarning ham turli xususiyatlarini bila boradi. Bu esa narsalarni bir-biriga solishtirib , ularning xususiyatlarini aniqlashni o‘rgatadi. Oqibatda tafakkurning rivoj topishiga imkoniyat tug‘iladi.
Odamlar mehnat qilishni bilganlaridan keyin , oziq-ovqat topish uchun zarur narsalar haqida, ya’ni mehnat qurollari tayyorlash , undan qanday foydalanish , qaysi tarafga borish , oziq-ovqat topish harakatini jamoa bo‘lib bajarish va boshqalar to‘g‘risida ozmiko‘pmi fikr yurgizadigan bo‘ladilar . Ular guruh-guruh bo‘lib , birgalikda harakat qila boshlaydilar. Bu esa insonlar tili va tafakkurining borgan sari o‘sishiga , ularda mavhum tushunchalarning paydo bo‘lishiga asos bo‘ladi.
Endigina mehnat qilish qobiliyatiga erisha boshlagan , eng ibtidoiy mehnat qurollarini yasashni o‘rgana boshlagan odamlardan bir necha bosqich yuqori darajada yashayotgan Afrikadagi qabila jamoasi holatidagi xalq tillarining so‘z boyligi , grammatik tuzilishi hamda tafakkurining rivojlanish farqlari qiyoslab bo‘lmaydigan darajada ekanligini , rivoj topganini faraz qilish mumkin. Shu tariqa Afrika , Amerika qit’alarida qabila bo‘lib yashayotgan xalqlarning rivojlanish darajasi , so‘z boyligi , grammatik tuzilishi , tafakkur qilish qobiliyati eng taraqqiy topgan ingliz , rus , nemis , arab kabi xalqlar tillarining so‘z boyligi , grammatik tuzilishi va boshqa til hodisalaridan , tafakkur etish darajasidan juda katta farq qiladi. Yuqoridagi fikrlar til va tafakkurning rivojlanib borishi kishilik jamiyati taraqqiyoti bilan uzviy bog‘langanining yorqin dalilidir.
Jamiyat tarixida tillarning keyingi taraqqiyoti milliy tillarning vujudga kelishi bilan bog‘liq. Milliy til mahalliy shevalar bilan o‘zaro bog‘langan holda taraqqiy qilib boradi . Bu jarayonda ba’zi shevalar milliy tilga qo‘shilib, uni boyitadi ; ba’zi shevalarni esa milliy til asta-sekin siqib chiqaradi.
Milliy tilning yagonaligi shuni ko‘rsatadiki , til shu millatning barcha tabaqalar , guruhlar va sinflariga tushunarli va bab-baravar xizmat qilib , ularning hammasi uchun birdan bir aloqa vositasi bo‘lib qoladi . Chunki til ayrim sinf , ayrim tabaqa , ayrim guruh tomonidan yaratilmagan , balki jamiyatning barcha a’zolari – umumxalq tomonidan yaratilgan.
Xullas , til birligi uning erkin rivojlanishi millatning asosiy belgilaridan biridir . Milliy tilning xalq tilidan farqi uning adabiy yozuv shakliga egaligidir . Milliy tilning bu shakli mazkur millatning har bir a’zosi , har bir sheva uchun umumiydir. Har bir millatning madaniy merosi ana shu tilda o‘z aksini topadi.