Mustafayev Elvin Museyib oğlu Müəssisə iqtisadiyyatın əsas subyekti kimi

FƏSİL 2. MÜƏSSİSƏNİN BİZNES FƏALİYYƏTİNİN TƏŞKİLİ
VƏ İDARƏ EDİLMƏSİ.
2.1. Azərbaycan müəssisələrinin biznes fəaliyyətinin təhlili
və qiymətləndirilməsi.

Azərbaycan müəssisələrinin biznes fəaliyyəti konkret məhsul bazarında fəaliyyət göstərən istehsalçı müəssisələr arasında rəqabətin zəif olması ilə xarakterizə olunur. Bunun əsas səbəblərindən biri ondan ibarətdir ki, respublikada konkret məhsul istehsalı ilə əsasən bir və ya iki müəssisə məşğul olur. Nəticədə yerli istehsalçı müəssisələr əksər hallarda inhisarçı mövqeyə malik olurlar. Bu da onlara fəaliyyət göstərdikləri əmtəə bazarlarında biznes fəaliyyətini zəif rədabət şəraitində həyata keçirməyə imkan verir. Bundan əlavə yerli sahibkarlara, xüsusən də, istehsalçı müəssisələrə dövlət köməyinin həyata keçirilməsi çərçivəsində onların istehsal etdikləri məhsulların idxalına məhdudiyyətlər müəyyənləşdirilir və yaxud idxal rüsumlarının dərəcələri yüksəldilir. Bu cür tədbirlər istehsalçı müəssisəni idxal olunan xarici malların təsirindən və rəqabətindən qoruyur. Bu isə qeyd edildiyi kimi müəssisənin istehsal etdiyi məhsul bazarında rəqabəti zəiflədir.

Dövlətin yerli müəssisələrə himayədarlığı müəssisələrin biznes fəaliyyətinə müsbət təsir göstərməklə yanaşı, eyni zamanda mübahisə doğuran məsələyə çevrilir. Dövlətin müəssisələrə köməyi onları süni surətdə rəqabətdən qorumaqla deyil, əksinə, onların fəaliyyət göstərdikləri bazarlarda sağlam rəqabət şəraiti formalaşdırmaqla həyata keçirilməlidir. Dövlət köməyi əsasən iqtisadiyyatın prioritet sahələrinə daha çox istiqamətlənməlidir və belə sahələrdə fəaliyyət göstərən müəssisələr daha yüksək inkişaf tempinə malik olmalı, daha səmərəli biznes fəaliyyətini həyata keçirməlidirlər.
Azərbaycanda biznes fəaliyyəti həm xidmət, həm də istehsal sahəsində fəaliyyət göstərən müəssisələrin biznes fəaliyyəti ilə xarakterizə olunur. Hər iki istiqamətdə müəssisələr tərəfindən səmərəli biznes fəaliyyətinin həyata keçirilməsi, onların yüksək mənfəət əldə etmələri ölkə iqtisadiyyatının inkişafı üçün mühüm əhəmiyyət kəsb edir. Bununla belə, istehsal müəssisələrinin, xüsusən də, sənaye sahəsində fəaliyyət göstərən müəssisələrin biznes fəaliyyəti daha mühüm əhəmiyyət kəsb edir.
Azərbaycan Respublikasında inkişaf etməkdə olan sahibkarlıq strukturları -yeni yaradılan və modernizə edilən müəssisələr yeni məhsul, yeni texnologiya yaratmaq istiqamətində deyil, bazarda mövcud olan rəqabətqabiliyyətli məhsul istehsalını həyata keçirməyə üstünlük verirlər və bu məqsədlə artıq xarici bazarlarda tətbiq olunan texnologiyaları alıb tətbiq etməyə, ya da xarici şirkətlərlə birgə fəaliyyəti həyata keçirməyə üstünlük verirlər.
Respublikada biznes fəaliyyətini həyata keçirən müşssisşlər əsasən emal və yeyinti sənayesində, mebel məhsulları, tikinti materialları, elektrik məhsulları istehsalı, kimya sənayesi və s. istiqamətlərdə fəaliyyət göstərən və daha çox müvəffəqiyyət qazanan müəssisələrdir. Həmin müəssisələrin məhsulları əsasən yerli bazarlar üçün nəzərdə tutulsalarda müəyyən hallarda xarici bazarlara da çıxarılırlar. Lakin müəyyən sənayesi müəssisələri, xüsusən də kimya sənayesi müəssisələri məhsullarını xarici bazarlara çıxarmaq üçün geniş imkanlara malikdirlər.
Yerli müəssisələrin istehsal etdikləri məhsul bazarlarında rəqabət əsasən istehsalçı müəssisələr arasında deyil, onlarla həmin məhsulları idxal edən firmalar arasında baş verir. Buna baxmayaraq həmin müəssisələr səmərəli biznes fəaliyyətini həyata keçirmək, rəqabətə dözmək inkanına malik olurlar. Çünki, onlardan fərqli olaraq idxalçı müəssisələr əlavə olaraq nəqliyyat xərclərinin, gömrük və yüksək dərəcəli vergi rüsumlarının ödənişini həyata keçirirlər ki, nəticədə onlarla müqayisədə yerli istehsalçı müəssisələr rəqabət üstünlüyü əldə etmək və daha güclü mövqeyə malik olmaq imkanı əldə edirlər.
Azərbaycan müstəqilliyə qədəm qoyduqdan sonra, müəssisələr, xüsusən də kiçik və orta sahibkarlıq bazar prinsipləri əsasında formalaşmağa və inkişaf etməyə başlamışlar və proses bu gün də davam edir. Belə bir şəraitdə kiçik və orta müəssisələrin rəqabətqabiliyyətli olması və səmərəli biznes fəaliyyətini həyata keçirməsi ölkə iqtisadiyyatı üçün olduqca mühüm əhəmiyyət kəsb edir. Son illərdə Azərbaycan sənayesi bazar prinsiplərinə uyğun formalaşmaqda və inkişaf etməkdədir. 2005 - 2013 –cü illərdə ölkədə sənaye məhsulu istehsalının dinamikasını 2.1 sayl cədvəldə nəzərdən keçirək.