2022- yil 19- fevral : Ta’lim jarayonining to’laqonli bo’lishini ta’minlaydigan muhim bir omil bu tarbiyadir. Yoshlarimizning tarbiyasi namunali bo’lar ekan, ta’limda bo’shliqlar bo’lishi amrimahol. Talabalarimizning tarbiyali, xush axloqli bo’lishida ma’naviy-ma’rifiy ishlarning o’rni birlamchi va betakrordir. So’zlarimdan bilinib turganidek, bugungi kunni ma’naviy-ma’rifiy ishlarni o’rganish, to’g’rirog’i, ularni amalga oshirish uchun tuzilgan ishlar rejalarini tahlil qilishga bag’ishladim. Bu uchun men guruh tyutorlaridan biri bo’lmish N.Nurillayevaga murojaat qildim. Bu tyutor menga shu kunga qadar va bundan keyin o’z guruhi bilan amalga oshirgan va amalga oshirishni rejalashtirgan ishlar rejasini taqdim etdi. Reja, kutganimdek, ma’naviy, ma’rifiy, tarbiyaviy sohalarda olib boriladigan ishlar, tadbirlarni qamrab olgan, milliyligimiz ildizlari, ularning bugungi rivoji targ’ib etilgan, talabalarimiz o’rtasida fidoiylik, daxldorlik hislarini shakllantirish, rivojlantirishga qaratilgan.
Ish rejani ko’zdan kechirib bo’lgach, kafedra o’qituvchilari bilan ma’naviy-ma’rifiy sohada olib borilayotgan islohotlar, talabalarda sog’lom dunyoqarash, kitobxonlik ko’nikmasini shakllantirish borasida amalga oshirilayotgan ishlar xususida suhbatlashdik.
Mana shu mazmunli suhbat asnosida bugungi amaliyot kunim va amaliyotning dastlabki haftasi ham o’z nihoyasiga yetdi.
2-hafta : 2022- yil 21-fevral : Endi navbat passiv (kuzatish, ish o’rganish) amaliyotga yetib keldi. Kafedrada o’qitiladigan fransuz tili mutaxassisligi fanlarining tajribali o’qituvchilari darslarida qatnashish hamda tahlil qilish, ularning ma’naviy-ma’rifiy, tarbiyaviy borada olib borayotgan ishlarini kuzatishni o’z oldimga amaliy maqsad qilib qo’ydim. Biriktirilgan guruh bilan ham bo’lg’usi pedagog sifatida yaqinroq bo’lish maqsadida kuzatishlar va tahlillar olib borish ham tuzgan rejamning bir qismi edi.
Shu kuni men f.f.f.d N.B.Kuldashevaning IV bosqich talabalarda CHTUIK fanidan olib borgan amaliy mashg’ulot fanini kuzatishga kirdim. Dars mavzusi “Le covoiturage : les avantages et les nuisances” .
