O‘zbekiston respublikasi oliy va o‘rta maxsus ta’lim vazirligi toshkent to‘qimachilik va yengil sanoat instituti

Ijodning amal qilish xususiyatlari. Ijodning asosiy manbai va sub’ekti ijodkor shaxs hisoblanadi. Ijodkor shaxs esa asosan quyidagi xislatlari bilan alohida ajralib turadi:
1. Perseptiv xususiyatlar (g‘aroyib ma’no-mazmunga ega bo‘lgan diqqatning jamlanishi, ta’sirchanlik, ko‘ngilchanlik), intellektual xususiyatlar (intuitsiya, fantaziya, o‘ylab chiqarish, oldindan ko‘rish qobiliyati, keng dunyoqarash), xarakterli xususiyatlar (bir qolipda ishlamaslik, originallik, qunt, yuqori darajadagi o‘z-o‘zini tashkillashtirish va mehnatga layoqatlilik) ;
2. Bilish motivatsiyasining dominantli o‘rni, tadqiqiy ijodiy faollik, sub’ektning yangilikni topishga bo‘lgan qobiliyatida va muammolarni echishdagi o‘ziga xoslikda namoyon bo‘ladi. Masalan, original echimlarni topish va prognozlash ehtimolligi, yuqori baholarni ta’minlaydigan estetik, axloqiy va intellektual ideallar etalonlarini yaratish qobiliyati va boshqalar shular jumlasidandir;
3. O‘zida aqliy va motivatsion omillarni integratsiya qiluvchi intellektual faollik;
4. Muammoni topishdagi zukkolik, mulohazalarning uzun zanjirini yaxlitlash qobiliyati, “chetdan qarash”ga layoqatlilik, ta’sirlanishning maqsadliligi, xotiraning tayyorligi, fikrlash egiluvchanligi, baholash qobiliyati, g‘oyalarni hayotga oson tatbiq qilish, qo‘shimcha ishlanma berishga layoqat, osongina yaxlitlash, yumor hissining mavjudligi;
5. Yuqori ijodiy qobiliyat va motivatsion-ijodiy faollikning organik birligi;
6. Oddiy hodisalar doirasidan chiquvchi, ammo tabiat qonunlariga zid bo‘lmagan harakatlarni amalga oshirish, kelajakda bo‘ladigan narsani his qilish, boy fantaziya va intuitsiya, yangilik va noyob narsalarga katta qiziqish;
7. Mustaqillik, tavakkal qilishga moyillik, faollik, qiziquvchanlik, mavjud narsaga qoniqmaslik, qaror qabul qilishga tayyorgarlik, e’tirof etilishga intilish, ichki motivatsiya, o‘sishga tayyorlik;
8. Olamdagi narsa va hodisalar tabiatidagi muqobilliklarni ko‘ra bilish va shakllantirish, fantaziyani ifodalay olish, savol bera olish va yuzaki izohlardan qochish, qunt, mustaqil pozitsiya, tavakkalga tayyorgarlik, o‘rganilayotgan muammoga katta qiziqish;
9. O‘z-o‘zini shakllantirish, yuksaltirishga intilish, qilayotgan ishini burch deb bilish, shaxsning autentikligi, o‘z kuchiga ishonch, yuqori darajadagi tanqidiylik va refleksiya.
Agar odam o‘zini ijodiy fikrlashga majbur qilishning yo‘lini bilganda hamma daho bo‘lar edi. Ayni shu ma’noda, biz ijodni buyuk topishmoq va shu bilan birga buyuk baxt deyishimiz mumkin. Ehtimol har bir odam o‘zining ijodiy faoliyati orqali ijodning turli qirralarini aks ettirishi va takomillashtirib borib biron-bir unga aloqador yangi g‘oyalarni shakllantirish imkoniyatiga ham ega bo‘lishi mumkin. Biroq ijod makon va vaqtga nisbiy bog‘langani uchun ham uning to‘xtab qolish holatini va ma’lum bir makonda shakllanib qolmasligini ham ko‘rishimiz mumkin. Bunga misol sifatida biz Sharq va G‘arb ilmiy tafakkur taraqqiyotini keltirishmiz maqsadga muvofiq bo‘ladi. Zero, mazkur hududlardagi shakllangan g‘oyalarning o‘zaro bir-biriga ko‘rsatgan ta’sirini Osiyosentrizm yoki Evropatsentrizm vakili ham mutloqo inkor eta olmaydi. Shu ma’noda, ijod dinamikasi umumbashariy xarakterga ega.
Ijtimoiy ongda yangiliklarning yagona manbasi individual ongdir. Ijod odamlarning ongli faoliyatining ifodalanishi bo‘lib, insonning shaxsiy borlig‘i shaklini tashkil qiladi. Ijod insonning ob’ektiv va sub’ektiv ro‘yolikni o‘zgartiruvchi faoliyatidir. Shuning uchun ham A.M.Korshunov “Ijod bu sub’ektning ob’ekt bilan faol o‘zaro harakatidir. Bu jarayonda sub’ekt maqsadga yo‘naltirilgan holda atrof-olamni o‘zgartirib, ob’ektiv qonuniyatlar talabiga ko‘ra yangi, ijtimoiy ahamiyatdagi olamni yaratadi. Atrof-olamga ta’sir qilib, sub’ekt o‘z-o‘zini ham o‘zgartiradi”¹, - deb yozadi. Bu fikri bilan faylasuf ijod amaliy faoliyat shakli sifatida namoyon bo‘lishiga alohida urg‘u beradi. Biroq, nazarimizda, ijodni ekzistensial faollik bilan nisbatlash, uni sub’ekt-ob’ektli shaklidan farqli bo‘lgan fikriy harakatlar orqali amalga oshiriluvchi, eng istiqbolli qurilma hisoblanadi. Chunki ijodning chuqur talqini ma’noning yaratilishi bilan bog‘liqdir, ya’ni ijod jarayoni qandaydir ideal borliq bilan bog‘lanadi.
Ilmiy-tadqiqot faoliyatining amal qilish xususiyatlari quyidagilarda namoyon bo‘ladi:
- ilmiy tadqiqot faoliyatida moddiy va ma’naviy qadriyatlarni yaratish sifatida namoyon bo‘ladigan aksiologik jihatda. Ijodiy faoliyatning yangi, ilgari mavjud bo‘lmagan bilimlarni ochish ma’nosidagi evristik jihatda;
- ilmiy tadqiqot faoliyatda insonning o‘z-o‘zini namoyon qilishi va o‘z-o‘zini rivojlantirishi sifatida namoyon bo‘ladigan gumanistik jihatlar ham muhim ahamiyat kasb etadi. SHuningdek, ijodning asosiy omili erkin faoliyatda namoyon bo‘ladi. Ijod bu– dunyoga prinsipial yangilik kiritish va yaratuvchanlik demakdir.