O‘zbekiston yozuvchilar

EY, SIRLI DIYOR XORAZM
Ey, sirli diyor, Xorazm,
Ey nurli shior, Xorazm.
Necha evrilgan tarixning,
Senda rasmi bor, Xorazm.
Seni kimlar turtib-chetlab,
Qilmadi abgor, Xorazm.
Goh seni sotdi Guldursun,
Goh sotdi O‘tror, Xorazm.
Ming minorlar o‘lkasi,
Ming parchin devor Xorazm.
Mirobi iqlim bo‘lgansan,
Gohi suvga zor Xorazm.
Jahon aljabrinda noming,
Har daf’a takror, Xorazm.
O‘ynoqi g‘amdir kuylaring,
Chalsam yonar tor, Xorazm.
Shayx Najmiddin bahodir,
Ko‘ksingda tumor, Xorazm.
www.ziyouz.com kutubxonasi

---

Omon MATJON
62
Sensiz bu Osiyo naylar,
Yo Parvardigor, Xorazm?!
Senga abad Jayhun va Sir
Shoshmaydi bekor, Xorazm.
To‘lar daryo, to‘lar dengiz,
Qolmagaysan zor, Xorazm.
Yurtda ne-ne ulug‘ zotlar,
Seni deb bedor, Xorazm.
O‘zbekiston jamolida,
Sen naqshi nigor, Xorazm.
Jahon mehrobida so‘zim:
Bor Xorazm, bor Xorazm!..
www.ziyouz.com kutubxonasi

---

MAQSUDAM
63
* * *
Men goh mundoq qarab, o‘yga tolaman,
Qani kimlar bizning kelajagimiz?
Safimizga ertang kim kelar ekan,
Kimga qolar ekan kelajagimiz?
Davronlar aylanar tinmay, bilamiz,
Goho qayg‘uramiz, goho kulamiz.
Bugunniku obdon tashvish qilamiz,
Kimlarga bog‘liq, xo‘sh, kelajagimiz?
Kim asrar Vatanim, yurtim – elimni,
Kim saqlar tarixim, ona tilimni.
Kim tutar umidli cho‘zgan qo‘limni,
Kimlarning qo‘lida kelajagimiz?
Bugun tiklanmoqda jur’at, adolat,
Orzular uyg‘ondi dilda, harorat.
Gʻimirsilab qoldi lekin adovat,
Qiyin bo‘lmasmikan kelajagimiz.
Shunday payt o‘ylayman sizni, yoshlarni,
Shu ovunch ko‘nglimdan quvlar g‘ashlarni.
Sabab yo‘q hech egish uchun boshlarni,
Kimning qo‘lida deb kelajagimiz.
Chunki yoniq yurak – oftob sizdadir,
Ulug‘ istiqlolga shitob sizdadir.
Barcha savollarga javob sizdadir,
Sizning qo‘lingizda kelajagimiz.
www.ziyouz.com kutubxonasi

---

Omon MATJON
64
* * *
Qaydan kelib qolding, qayin, oq qayin, 
Bu turfa daraxtlar tig‘iz o‘rmonga?! 
Nega kerak ekan nozik vujuding,
Bu qorlar mulkiga, bu qahratonga?!
Bir yoqdan jodugar ignabarg archa,
Chimchilab-chaqishga urinsa zimdan,
Bir yoqdan cho‘ng eman zug‘m etar senga, 
Behayo qarag‘ay yalang‘ochlar tan.
Agar tug‘ilganing rost bo‘lsa shunda, 
Jindak shabbodaga titrarsan nechun?! 
Qora tamg‘a o‘yib kumush badanga,
Nechun oqizarlar ko‘z yoshingni xun?!
Amir haramida tutqun qiz raqsin,
Qizlarxon qayg‘uli etgandek ijro.
O‘rmon sahnasiga sen – oq raqqosa,
Birgina lahzaga chiqdingmikan yo?!
Inja o‘xshatmalar ko‘pdir,
Lekin 
sen 
Bu qora o‘rmonda yolqinsan mag‘rur!
Ne 
so‘z?!
Azaldan-da poklik, nafosat,
Shunday sharoitda yashashga majbur.
www.ziyouz.com kutubxonasi

---

MAQSUDAM
65
* * *
Dilimning rangini gul bilsa bo‘ldi,
Mening kimligimni el bilsa bo‘ldi.
Olis yulduzlarga sirrim aytmiram,
Nolishimni tonggi yel bilsa bo‘ldi.
Ucharga har qushdan par topinmadim,
Parvozlar hadisin dil bilsa bo‘ldi.
Jaholat mehrobi toshin o‘pmadim,
O‘shal bag‘ri toshim til bilsa bo‘ldi.
Damlar shikvasiga uchma, omon bo‘l,
Fazl-u kamolingni el bilsa bo‘ldi.
www.ziyouz.com kutubxonasi

---

Omon MATJON
66