O‘zbekiston yozuvchilar

UYGʻONISH
Quyoshdan bir nurli ko‘chki qo‘zg‘otgan, 
Qishning muz choyshabin parchalab otgan,
Gʻaflat uyqusidan yerni uyg‘otgan,
Bu bahor emasmi,
Savolim, shuldir?!
Tongga o‘choqboshi singari shoshib,
Eshikka qo‘shqanot bag‘ishlab ochib.
Farzandin uyg‘otgan mehrlar sochib,
Bu ona emasmi,
Savolim shuldir?!
Davraboshi bo‘lib aldov, xiyonat,
Burchakka qisilgan paytlar diyonat,
Vijdonni uyg‘otgan, solgan qiyomat,
Bu imon emasmi,
Savolim shuldir?!
Olam bir yoq, seni bir yoq etolgan,
Vafoni yurakka bayroq etolgan.
Tunni yulduz bilan uyg‘oq etolgan,
Bu sevgi emasmi,
Savolim shuldir?!
Lekin bir xalq mudrab, yotinqirasa,
Har kimg‘a o‘z tinchi yoqinqirasa.
Shoirlari qo‘rqib bosinqirasa,
Xalqni kim uyg‘otar,
Savolim shuldir?!
www.ziyouz.com kutubxonasi

---

MAQSUDAM
73
TARIX MUZEYIDA
Ko‘rganing qoladi degan bir gap bor,
Tarix muzeyiga kirdik... ko‘rgani.
Jahonni titratgan sohibqironning,
Qiziq-da, birpasda mahv bo‘lgani.
Mana erk! Bir uyda shoh bilan qulning,
Zabarjad toji-yu chipta kovushi!
Ammo “msye!” deya xayolni bo‘lar,
Boshlovchining hissiz, silliq tovushi!
Botirlar ishidan shod tursak, ammo,
Hush-u xayollarni bo‘g‘di bo‘lak hol.
Hamma narsa erkin bo‘lganda endi,
O‘zimiz yurolmay qoldik bemalol:
Biri “Hech narsaga qo‘l tekkizmang!” deb, 
Bittasi “Sekin yur!”, “Jim!” deb do‘q urar. 
Yurish-turishingni cheklasa biri,
Biri gapirishni man qilib turar.
Chapga mumkin emas, o‘ngga sirayam,
Ortiqcha savolni jinlari suymas.
Uzoq qoldirmaslar bir yerda, ammo
Mundoq ilgari ham ketgani qo‘ymas.
Ajabo! Bitta xalq shuncha jon chekib,
So‘nggi, og‘ir jangni etganda tayin,
Zo‘rg‘a ag‘darganda bitta podshoni,
O‘rniga chiqibdi mingta “xo‘jayin!”
www.ziyouz.com kutubxonasi

---

Omon MATJON
74
* * *
Ahmad Yassaviy maqbarasi poyida yerga 
yumalayotgan ziyoratchi ayollarni ko‘rib...
Yumalang opajon, yumalang singlim,
Ulug‘ Yassaviyning xoki poyida.
Ko‘rsa e’tiqodning boz tirilganin,
Ruhi yuksalgaydir yotgan joyida.
Yumalang opajon, yumalang singlim,
Zora duolaring topsa ijobat.
Zora barham topsa, yurtimizga ham,
Chor tarafdan xuruj etguvchi ofat.
Yumalang opajon, yumalang singlim,
Ulug‘larni yodlab cho‘kingiz tizlar.
Balki Temur bunda bosh ekkanidan,
Ulug‘bek boshida balqqan yulduzlar.
Hatto taqir yerga chin ixlos qo‘ysang,
Ko‘ngilga shundan-da oliyroq taxt yo‘q. 
Nurlar, sharpalarning bu quyunida,
O‘zingni tanishdan ortiqroq baxt yo‘q.
Yumalang, qaysi bir go‘shada agar,
Ko‘ngling andakkina topsa bas taskin.
Hech kim tinglamagan, anglamagan qalbing 
Iymon ko‘zgusida topsa bas aksin.
www.ziyouz.com kutubxonasi

---

MAQSUDAM
75
Yumalang opajon, yumalang singlim,
Yetmish yil kimlarning o‘pmadik poyin?!
Na o‘zing yolchiding, na otang, bobong,
Na o‘tmishing aniq, na ertang tayin.
Ayollar shu taxlit tavob etsalar,
Bu, demak, eng so‘nggi, zarur qoida.
Balki Ona Yer ham ko‘ksin changallab,
Shundoq yumalanar Quyosh poyida.
www.ziyouz.com kutubxonasi

---

Omon MATJON
76
* * *
Oy chiqdi-yu, lekin qamar yo‘q,
Yer ko‘rindi, ammo samar yo‘q.
Bugun ko‘plar Tangridan so‘zlar, 
Lekin asl bir payg‘ambar yo‘q.
Millat uchun aziz joy qani, 
Poytaxt bor, lekin shahar yo‘q.
Bulg‘angan chog‘ Bog‘i Eram ham,
Kim aytadi: “Sutda zahar yo‘q!?”
O‘z kasbidan kim xordir, ko‘ring, 
Unda ilohiydan asar yo‘q.
Bizga zulm qilg‘onlar qani, 
“Agar” bor-u, lekin “magar” yo‘q.
Suvratga tush yorug‘ dunyoda,
Omon, ushbu bordir, digar yo‘q.
www.ziyouz.com kutubxonasi

---

MAQSUDAM
77