Qurilish biror inshootni tayyorlash jarayoni, shuningdek shunday jarayon ketayotgan joydir. Qurilish murakkab jarayon boʻlib, unda bir necha vazifalar amalga oshiriladi. Qurilish

2-bob. Strategiyaning maqsad hamda vazifalari
Qurilish tarmog‘ida boshqaruvning zamonaviy uslublarini shakllantirish, loyihalarni amalga oshirishda investitsiyaviy jozibadorlikni oshirish va innovatsion yechimlarni joriy etishga yo‘naltirilgan o‘zgarishlarni amalga oshirish Strategiya maqsadi hisoblanadi.
Strategiya quyidagi ustuvor yo‘nalishlarni nazarda tutadi:
hududlarni shaharsozlik jihatidan rivojlantirish va ushbu jarayonda jamoatchilikning samarali ishtirokini ta’minlash;
shaharsozlik faoliyatining sifati va xavfsizligini oshirish;
shaharsozlik faoliyati sohasidagi ma’muriy tartib-taomillarning samaradorligi, ratsionalligi va shaffofligini ta’minlash, shuningdek, qurilish tarmog‘i tashkilotlari faoliyatining samaradorligini oshirish;
shaharsozlik faoliyatini raqamlashtirish, tarmoqqa zamonaviy axborot-kommunikatsiya texnologiyalarini joriy etish;
shaharsozlik faoliyati sohasida kadrlarni tayyorlash, qayta tayyorlash va ularning malakasini oshirish tizimini takomillashtirish, ilmiy salohiyatni rivojlantirish.
3-bob. Strategiyaning asosiy yo‘nalishlari
§ 1. Hududlarni shaharsozlik jihatidan rivojlantirish va ushbu jarayonda jamoatchilikning samarali ishtirokini ta’minlash
Hududlarni shaharsozlik jihatidan rivojlantirish hududdan foydalanish va uni rivojlantirishning iqtisodiy va ijtimoiy shart-sharoitlarini uyg‘unlashtirish asosida ularni barqaror rivojlantirish orqali, quyidagi tamoyillarga rioya qilgan holda amalga oshiriladi:
a) insonning ham aholi zich bo‘lgan, ham aholi zich bo‘lmagan hududlarda munosib yashashi uchun sharoitlarni yaratish va saqlash;
b) mamlakatning iqtisodiy, ijtimoiy va ekologik rivojlanishi uchun teng shart-sharoitlarni yaratish, rivojlanishning uzoq muddatli salohiyatini saqlash va lozim darajada ta’minlash;
v) aholi punktlarining ko‘p markazli tuzilishini rivojlantirish, urbanistik vositalar yordamida shahar va qishloq o‘rtasidagi aloqalarni yaxshilash;
g) yangi aholi zich bo‘lmagan hududlarni o‘zlashtirishdan ko‘ra mavjud aholi punktlari hududlarini yangilash va ulardan intensiv foydalanishga ustunlik berish, erdan ehtiyotkorona foydalanish, shuningdek, kelajakda makondan foydalanishning turli imkoniyatlarini saqlab qolish;
d) aholi zich bo‘lmagan hududlar tizimini himoya qilish hamda shakllangan tabiiy va madaniy xilma-xillikni saqlash;
e) zaif rivojlangan infratuzilmaga ega aholi punktini shaharlar va boshqa rivojlanish markazlari bilan hamkorlik asosida mustaqil (o‘zini o‘zi ta’minlay oladigan) funksional birlikka aylantirish;
j) xizmatlar va transport/muhandislik infratuzilmasining aholi zich bo‘lgan va aholi zich bo‘lmagan hududlar tizimiga samarali muvofiqligi, butun mamlakat hududida kommunikatsiyalardan foydalanish va axborot olish imkoniyati, ijtimoiy infratuzilmani rivojlantirish, iqtisodiy faoliyatni rag‘batlantirish va unga ko‘maklashish;
z) aholi punktlarida yaxlit transport tizimining shakllanishiga ko‘maklashish va jamoat transportiga ustunlik berish;
i) transport/muhandislik infratuzilmasining atrof-muhitga salbiy ta’sirini maksimal darajada qisqartirish, boshqa kutiladigan salbiy ta’sirlarni yengish;
k) tarixiy va madaniy aloqalar, madaniy va tabiiy landshaftlar, ularning o‘ziga xos belgilari, tarixiy va tabiiy yodgorliklarni himoya qilish va saqlash;
l) qo‘riqlanadigan hududlar va rekreatsiya hududlarini saqlash va rivojlantirish; tuproq, suv, flora, fauna va iqlimni saqlash, himoya qilish va tiklash;
m) tegishli rejalashtirish yechimlari, muhandislik va tashkiliy-xo‘jalik chora-tadbirlari orqali aholi zich bo‘lgan va aholi zich bo‘lmagan hududlarni tabiiy, texnogen va ijtimoiy tahdidlar hamda favqulodda vaziyatlardan himoya qilish;
n) qayta tiklanadigan energiyani rivojlantirish uchun istiqbolli joylarni saqlab qolish, atmosfera havosidan issiqxona gazlarini singdirishga yordam beruvchi makon-hududiy yechimlarni yaratish;
o) tabiiy va madaniy landshaftlarni, ayniqsa qishloq xo‘jaligi hududlari va ko‘p funksiyali ixcham aholi punktlarini rivojlantirishga ko‘maklashish yo‘li bilan saqlash va barqaror rivojlantirish;
p) makon va shaharsozlik bo‘yicha rejalashtirish jarayonida seysmik holatni hisobga olish.
Insonning yashash faoliyati uchun munosib muhitni, atrof-muhit, tabiiy resurslar va madaniy merosni muhofaza qilishni ta’minlash hamda ommaviy va shaxsiy manfaatlar muvozanatiga erishish uchun hududlarni shaharsozlik jihatidan rivojlantirish masalasida jamoatchilikning rolini oshirish ham maqsadga muvofiqdir.
Bayon etilganlar munosabati bilan Strategiya doirasida quyidagi chora-tadbirlarni amalga oshirish nazarda tutiladi:
1) ijtimoiy-iqtisodiy va investitsiyaviy rivojlantirishning uzoq muddatli prognozlari bilan bog‘liqlikda yangi aholi punktlarini joylashtirish va mavjud aholi punktlarini rivojlantirish bo‘yicha faoliyatni birlashtirish maqsadida mamlakatning butun hududida joylashtirishning bosh sxemasini hamda Qoraqalpog‘iston Respublikasi va viloyatlar hududlarida tumanlarni rejalashtirish sxemalarini ishlab chiqish;
2) shahar muhiti elementlarining maqsadi, an’anaviy arxitektura va madaniyat, shuningdek, joyning tabiiy-iqlim sharoitlarini hisobga olgan holda hududiy “Dizayn-kod”ni ishlab chiqish va joriy etish;
3) shahar muhitini matematik (3D) modellashtirish bo‘yicha standartlar majmuini joriy etgan holda “Aqlli shahar” texnologiyalari elementlaridan foydalanish;
4) 2025-yilga borib aholi punktlarining hududlarni rivojlantirish sxemalari (bosh rejalar, bosh rejalar sxemalari, hududni arxitektura-rejalashtirish yuzasidan tashkillashtirish) bilan to‘liq qamrab olinishiga erishish;
5) aholi punktlarining bosh rejalariga kompleks shaharsozlik jihatidan rivojlantirishni strategik rejalashtirish, shuningdek, yerdan foydalanish va aholi punktlari hududlarida qurilish olib borishni tartibga solishni ta’minlovchi ommaviy hujjat maqomini berish;
6) aholi punktlarining bosh rejalarining jamoat muhokamasi natijalarini inobatga olgan holda ularni tasdiqlash tartibini amaliyotga joriy etish;
7) shaharsozlik hujjatlarini ishlab chiqish va qo‘llashning yagona standartlarini yaratish;
8) shaharni rejalashtirish sohasidagi ilg‘or xorijiy tajribani o‘rganish, shu jumladan arxitektura va shaharsozlik loyihalarini ishlab chiqishda ishtirok etish uchun ishonchli obro‘ va tajribaga ega bo‘lgan yetakchi xorijiy mutaxassislar va tashkilotlarni jalb qilish.