Qurilish iqtisodiyoti

1.2. “Qurilish iqtisodiyoti” fanining predmeti, obyekti va maqsadi
Zamonaviy mutaxassis ham davlat, ham xo`jalik yurituvchi subyektlar darajasida qurilish va investitsiya siyosati sohasidagi ustuvor yo`nalishlarni to`g`ri tushunishi va bilishi ilmiy-texnik taraqqiyot, resurslardan oqilona foydalanish, menejment, tadbirkorlik va biznesning zamonaviy yutuqlari bilan bog`liq holda yangi qurilishga kapitalni investitsiyalash, mavjud ishlab chiqarishni kengaytirish, rekonstruksiya qilish, yangi turdagi texnika va texnologiyalarni yaratish va ularni ishlab chiqarishga joriy etish uchun juda muhimdir. Shuningdek, iqtisodiyotni boshqaruvning turli darajalarida ishlab chiqilgan turli xil qurilish variantlari, investitsion qarorlar va iqtisodiy loyihalar samaradorligini tanlash, tahlil qilish va baholash usullarini ham bilishi muhim hisoblanadi.
Fanning predmeti bo`lib, qurilish ishlab chiqarishining rivojlanish qonuniyati va tendensiyalari hamda qurilishda iqtisodiy islohotlarni chuqurlashtirish va bozor mexanizmlarini takomillashtirish vazifalari bilan bevosita bog`liq holda qurilish korxonalari iqtisodiyoti masalalari hisoblanadi.
Qurilish iqtisodiyotining predmeti jismoniy va yuridik shaxslar o`rtasida vujudga keladigan iqtisodiy munosabatlardir. Ularning sababi ishlab chiqarish mahsulotini ishlab chiqarish, iste`mol qilish, ayirboshlash va taqsimlash, qurilish majmuasida faoliyat yurituvchi va uning faoliyatini tartibga soluvchi iqtisodiy ilovalar bo`lishi mumkin. Aniqroq aytganda, bular qiymat, talab, raqobat va taklif qonunlaridir.
Iqtisodiy munosabatlar va qonuniyatlarni muvaffaqiyatli o`rganish uchun ularga bevosita bog`liq bo`lgan qo`llaniladigan tadqiqot usullarini tahlil qilish kerak. Ulardan quyidagi to`qqiz usulni ajratib ko`rsatish mumkin: dialektik usul, pozitiv metod, me`yoriy usul, ilmiy abstraksiya usuli, analiz va sintez usullari, induksiya va deduksiya usullari, iqtisodiy va matematik usullar, tajriba usuli va amaliyot orqali tekshirish.