S. N. Yuldashev, X. M. Ibragimova, B. X. Fayziev mehnatni tashkil etish va

Tayanch iboralar
Mehnat jarayoni, bozor iqtisodiyoti, mehnatni tashkil qilish, ilmiy tashkil
qilish, psixofiziologik vazifalar, ijtimoiy, tartibga solish, ishlab chiqarish madaniyati,
mehnat unumdorligi, mehnat sarfi, samaradorlik, natura birligi, qiymat ko’rsatkichi,
mehnat taqsimoti, mehnat kooperatsiyasi, operatsiya, ish usuli, brigada, sex,
sexlararo kooperatsiya, ko’p stanokli ish, texnologik jarayon, texnologik operatsiya,
to’g’ri kelish tanaffuslari, mashina vaqti, xizmat ko’rsatish vaqti, ish o’rinlari,
jihozlar, texnologik, ishni rejalashtirish, ish o’rni, tashkil qilish, jihozlash, xizmat
ko’rsatish, rejalashtirish, ish usullari, mehnat harakatlari, ish zonasi, parallellik,
taqsimlash, mehnat sharoiti, sanitariya, gigienik, psixofiziologik, estetik, ishlash
rejimi, dam olish rejimi, og’ir mehnat, charchash, shovqin.

---

72
II-BOB. MEHNATNI TEXNIK ME’YORLASHNING ASOSLARI
REJA:
2.1 To’qimachilik sanoat korxonalarida mehnatni me’yorlashning mazmuni va
vazifalari.
2.2 Ish vaqti sarfi va jihozlarning ishlash vaqtining tasnifi.
2.3 Mehnat me’yorlari va ularni hisoblash usullari.
2.4 Mehnatni me’yorlashning usullari.
2.5 Mehnatni me’yorlashning analitik-tadqiqot usuli.
2.6 Xronometraj.
2.7 Ish vaqtini fotografiya qilish.
2.8 Fotoxronometraj.
2.9 Ish vaqti sarfini o’rganishning momentli kuzatish usuli.
2.10 Mehnatni me’yorlashda analitik hisoblash usuli. Mikroelementlar bo’yicha
mehnat sarfini me’yorlashtirish.
2.11 Korxonada mehnatni me’yorlashni tashkil etilishi.
2.1 To’qimachilik sanoat korxonalarida mehnatni me’yorlashning mazmuni va
vazifalari
Respublikamizning bozor iqtisodiyotiga o’tishi iqtisodiy va ijtimoiy
taraqqiyotni ta’minlashni taqozo etadi. Bu vazifalar mamlakatimizning boy tabiiy
resurslaridan, fan-texnika yutuqlaridan, shuningdek mehnat resurslaridan samarali
foydalanish asosida hal etiladi.
Mehnat resurslaridan oqilona va samarali foydalanish iqtisodiy taraqqiyotning
muhim sharti bo’lib, bunda mehnatni oqilona tashkil qilish, me’yorlash asosiy o’rinni
egallaydi. Iqtisodiy taraqqiyotning asosini mehnat unumdorligining to’xtovsiz oshib
borishi tashkil etadi, shunga ko’ra ishlab chiqarish korxonalarining har bir ish o’rnida
mehnatning oqilona usullariga asoslangan holda me’yorlash, uni
takomillashtirishning zarur vositalaridan bo’lib hisoblanadi.

---

73
Ishlab chiqarishda mehnatni tashkil qilish har bir ishni bajarishga muayyan
malaka talab qiladigan mehnat miqdorini aniqlashga asoslangan bo’lib, har bir ish
uchun mehnat me’yori belgilanishi kerak. Mehnat sarflanadigan vaqt bilan
o’lchanadi, shu sababli qaysi ishga yoki operatsiyani bajarishga qancha vaqt talab
qilinishni aniqlamoq kerak.
Me’yorlash - mehnatni ilmiy asosda tashkil qilishni ta’minlashning bir tekis,
bir me’yorda ishlash, mehnat unumdorligini oshirishning imkoniyatlarini aniqlash,
ulardan foydalanishning hamda ish vaqtini zoye ketkazmaslikning zarur shartidir.
Bozor iqtisodiyoti sharoitida mehnatni me’yorlash ishlab chiqarishning o’sishiga
yordam berishi bilan bir qatorda ishchi mehnatini engillashtirishga,
sog’lomlashtirishga, fan va texnika yutuqlaridan samarali foydalanishga, ishchining
o’z mehnatini ongli, ijodiy yondoshishiga qaratilgandir. Shunga ko’ra mehnatni
me’yorlashning asosiy qoidalari belgilangan bo’lib, ular quyidagilardan iborat:
- mehnat me’yorlarining ilmiy-texnika taraqqiyotining talablarini hisobga
olgan holda belgilanishi;
- mehnat samaradorligiga kam mehnat sarflab ko’p mahsulot olishga mehnat
sharoitlarini yaxshilash, mehnatni takomillashtirish yo’li bilan erishilishi;
- mehnat me’yorlarini belgilashda ishchi va xodimlarning jalb etilishi.
Mehnatni me’yorlashning mazmuni esa quyidagilardan iborat:
- mehnat jarayonlarini takomillashtirish, ish o’rinlarini yanada oqilona tashkil
qilish asosida mehnat unumdorligini oshirish;
- ilg’or ish usullarini o’rganish, ularni keng yoyish uchun sharoitni yaratish;
- mehnat qurollari va predmetlaridan, shuningdek ish vaqti hamda ilg’or
mehnat usullaridan oqilona foydalanishga asoslangan holda, turli ishlarga ish
vaqtining sarflanishini aniqlash;
- ishchilar va texnologik jihozlarning ishlash vaqtidan oqilona foydalanishga
asoslangan holda texnologik operatsiyalarning eng oqilona izchillikda bajarilishini va
davom etishini belgilash;
- texnikaning va ishlab chiqarishning hozirgi zamon darajasiga muvofiq
mehnat me’yorlarini hisoblab chiqish va ishlab chiqarishga joriy qilish;

---

74
- ishlab chiqarishning hamma uchastkalariga xizmat qiladigan ishchilar sonini
belgilash;
- ish haqini oqilona tashkil qilish uchun sharoitlar yaratish;
- korxonaning biznes rejasini tuzish uchun iqtisodiy asosni belgilash va
boshqalar.
Mehnatni me’yorlashning vazifasi esa mehnat sarf qilishning asoslangan
me’yorlarini belgilash, ularni joriy qilish yuzasidan tadbirlar ishlab chiqish, ishbay va
vaqtbay ishchilar uchun texnik jihatdan asoslangan mehnat me’yorlarini, ishlab
chiqarish vazifalarini tuzib chiqish, mehnat me’yorlarini vaqti-vaqtida qaytadan
ko’rib chiqish, yozma va og’zaki ko’rsatmalar berishni tashkil qilishdan iboratdir.
Mehnatni me’yorlash mehnatni va ishlab chiqarishni oqilona tashkil qilishning
eng muhim vositalaridan bo’lib, u texnika, texnologiya, iqtisodiyot va kishilarni bir-
biri bilan bog’lovchi bo’g’indir. U texnologik jarayonlarni loyihalash bilan
chambarchas bog’liq bo’lib, korxonanig ish faoliyatini rejalashtirishda, ayniqsa
mehnat va ish haqini tashkil qilish va rejalashtirishda muhim ahamiyatga ega.
Shu bilan birga mehnatni me’yorlash natijasida olingan ma’lumotlar
korxonaning ishlab chiqarish quvvatini hisoblab chiqishda, korxonaning biznes-
rejasini tahlil qilishda keng qo’llaniladi.
Shunday qilib, mehnatni me’yorlash - bu mehnat unumdorligini o’stirishga
qaratilgan iqtisodiy jarayon bo’lib, u texnika, texnologiyadan samarali foydalanish,
mehnat va ishlab chiqarish jarayonini oqilona - ilmiy jihatdan tashkil qilishga xizmat
qiladi, mehnat fiziologiyasi va psixologiyasiga asoslanadi.
Bozor iqtisodiyotiga o’tish davrida korxonalarda mehnatni me’yorlash
masalalariga bo’lgan e’tibor susaymoqda. Bu vaqtinchalik bo’lib, o’tish davriga
xosdir. Bu davrda raqobatning yo’qligi va ichki bozorning rivojlanmaganligi sababli
korxonalar ishlab chiqarayotgan mahsulotlarning narxlarini oshirib sotish hisobiga
o’zlariga foydani ta’minlaydilar, ishlab chiqarish xarajatlarini kamaytirishni
o’ylamaydilar.
Chet el tajribalaridan ma’lumki, rivojlangan mamlakatlarda mehnatni
me’yorlash, odatda firmaning ichki boshqaruvining asosiy vazifalaridan bo’lib

---

75
hisoblanadi. Xalqaro tashkilotlarning tanlov tekshiruvlariga asosan AQShda
mehnatni me’yorlash sanoatning hamma tarmoqlarida: mashinasozlik, yog’och
tayyorlash, qog’ozlarni chiqarish, charm sanoati, qurilish materiallarini ishlab
chiqarish va boshqalarda keng qo’llaniladi. Oziq-ovqat sanoatining korxonalarida
85% mehnatni me’yorlash qo’llanilgan[11].
Mehnatni me’yorlashning zarurligi va aktualligi ishlab chiqarish xarajatlarini
chuqur tahlil qilish asosida xarajatlarni qisqartirish imkoniyatlarini belgilash,
rejalashtirish, mahsulot tayyorlash jadvallarini tuzish, jihozlarni to’liq ishlashini
ta’minlash bilan belgilanadi.
Bozorni iqtisodiy toifa va muomala muhiti sifatida xarakterlaydigan asosiy
tomonlari mehnatni me’yorlash jarayonida oqilona va optimal qarorlar qabul
qilinishiga ta’sir ko’rsatishidir.
Mulk shakllarini o’zgarib borishi bilan ish beruvchida va ishlovchida ish vaqti
xarajatlari va undan samarali foydalanishga iqtisodiy qiziqishi ortib boradi. Ish
beruvchi mulkdor sifatida xarajatlar bilan ishchi mehnatidan oqilona foydalanishga,
maksimal foyda olishga intiladi, shu bilan bir qatorda ishlovchilar sonini
optimallashtirish, ish vaqti xarajatlarini minimallashtirish asosida yuqori sifatli
mahsulot ishlab chiqarishni ta’minlashga harakat qiladilar.
Shuning uchun bozor iqtisodiyot sharoitida faoliyat yuritayotgan ko’plab
mamlakatlarning firmalarida mehnatni me’yorlash dasturlari ishlab chiqilgan.
Dasturlar hamma xodimlar uchun me’yorlashtirish sohasini kengaytirish mehnat
salohiyatidan maksimal foydalanishga qaratilgan o’zaro bir-biri bilan bog’liq
tadbirlardan tashkil topadigan tizimli yondoshuvga asoslangan bo’lib, u me’yor va
me’yoriy hujjatlarni yuqori sifatliligini ta’minlashga, ularni kerakli darajada ushlab
turishga, yuqori malakali mutaxassis-me’yorlovchilarni shakllantirishga qaratilgandir.
Mehnatni me’yorlashtirishdagi yangi yo’nalishlardan bo’lib, korxona ichida
mehnatni me’yorlashda markazlashtirilgan xizmatni muvofiqlashtirish faoliyatini
kuchaytirishdan iborat bo’lib, u bir turli vazifalar, ishlar uchun bir xil kuchlanishdagi
vaqt me’yorlarini belgilashga talabning o’sishi va yagona avtomatlashtirilgan
me’yoriy-axborot asoslarini yaratishga bo’lgan zaruriyat bilan bog’liqdir.

---

76
Shu bilan bir qatorda mehnatni me’yorlash masalalarini o’rganish bo’yicha
maslahat beruvchi xizmatlarni tashkil qilish, hisobot yuritish, hujjatlarni tayyorlash
ham asosiy masalalardan bo’lib qolmoqda.
Mehnatni me’yorlash masalalari boshqarishni ijtimoiy-iqtisodiy va ijtimoiy-
psixologik tomonlari bilan bevosita bog’langandir, bunda xodim mehnatidan samarali
foydalanishni o’stirish eng dolzarb muammo bo’lib qolmoqda. O’z mehnat
qobiliyatini sarf qilayotgan xodimda ish vaqtidan unumli foydalanishga qiziqish
ortadi, lekin shu bilan bir qatorda ish beruvchidan normal ish sharoitini yaratib berish
talablari kuchayadi, me’yorlarning optimalligi, texnik jihatdan asoslanganligi va
ob’ektivligi ham maqsadga muvofiqdir. Shunday qilib, mulklarning turli shakllarida
ishlab chiqarishni boshqarishning har xil tashkiliy huquqiy turlaridan
foydalanilayotgan bir vaqtda mehnatni tashkil qilish va me’yorlash masalalari eng
aktual bo’lib qolmoqda.
Mehnatni me’yorlashning ahamiyati boshqarishning asosiy unsuri sifatida
mehnatni me’yorlashning usullarida, vaqt me’yori, mahsulot ishlab chiqarish, xizmat
ko’rsatish va boshqa me’yorlarda aks etadi. Mehnat me’yorlarining sarflangan
mehnatni rag’batlantiruvchi, ishlab chiqarish va mehnatni boshqarishning
samaradorligini belgilash, mehnat unumdorlik darajasini baholash va mahsulot
sifatini yaxshilashdagi ahamiyati oshib bormoqda. Shunga ko’ra vaziyatning
o’zgarishi me’yorlarning turlarini o’zgarishiga olib keladi. Buni menejerlar tezda
payqab olishlari va tezkorlik bilan ishlab chiqarishga joriy etishlari zarur.
Bozor iqtisodiyotiga o’tish davrida mehnatni me’yorlash vazifasi davlatning
boshqaruv tasarrufidan chiqadi va mehnatga haq to’lash o’lchovi sifatida
korxonaning vazifasiga aylanadi. Bu davrda mehnat me’yorlarining ish haqini
tartibga solish vazifasi yo’qolib, uning mehnatni taqsimlash va rag’batlantirish
vositasi sifatidagi ahamiyati oshib boradi. Bunday vaziyat o’z navbatida ishlab
chiqarish jarayonida qatnashadigan hamma xodimlarning mehnatini
me’yorlashtirishning yaxshilashni, xodimlar sonini optimallashtirishni, ularni ishlab
chiqarish jarayonida joy-joyiga qo’yishni, boshqaruvchini ish faoliyatlarini bo’limlar
bo’yicha belgilashni aniq talab etadi.

---

77
Mehnat me’yorlari ahamiyatining oshishi va ularning vazifalarini o’zgarishini
hisobga olgan holda mehnatni me’yorlashga bo’lgan talab oshib boradi va
quyidagicha ifodalanadi:
- ishlab chiqarish faoliyatining barcha turlari va bajariladigan hamma ishlarni
mehnat sarfini baholash va o’lchashni ta’minlashga qaratilgan mehnatni me’yorlash
sohalarini maksimal kengaytirish;
- mehnat me’yorlarining yuqori sifatini belgilash, ularni zaruriy mehnat
xarajatlariga maksimal yaqinlashtirish;
- tashkiliy-texnik, iqtisodiy-psixofiziologik va ijtimoiy omillarni to’liq hisobga
olgan holda mehnat me’yorlarini ilmiy asoslash;
- mehnat me’yorlarini erkinlashtirish, u shaxsni ma’naviy rivojlanishiga, uning
ijodiy, ishlab chiqarish va moddiy ehtiyojlarini qondirishga qaratish.
Bu talablarni hayotga tatbiq etish mehnatni me’yorlashtirishni davlat darajasida
boshqarilishini talab etadi. U korxonalarning rivojlanishida jiddiy ta’sir ko’rsatishi
kerak, ayniqsa davlat korxonalarida uning ahamiyati kattadir. Ushbu masalani ijobiy
xal etish mehnatni me’yorlashda ilmiy–uslubiy, me’yoriy xujjatlar bilan ta’minlash
va kadrlar ta’minoti bo’yicha muammolarni markazlashgan holda echish orqali
amalga oshiriladi.
Zamon talablaridan kelib chiqqan holda mehnatni me’yorlashning tashkiliy va
uslubiy muammolarini chuqur o’rganish, ilmiy-texnik taraqqiyot natijalari asosida
ishlab chiqarishni, mehnatni tashkil qilish, texnika va texnologiyalardagi
o’zgarishlarni hisobga olish kerak. Bu korxonalarni, ilmiy tadqiqot tashkilotlarining
sifatli tashkiliy, uslubiy, dasturli ma’lumotlar bilan ta’minlash uchun kerak.
Me’yoriy xujjatlar bilan ta’minlash korxonalarda mehnat ko’rsatkichlari
bo’yicha me’yoriy bazalarni takomillashtirish va ularni rivojlanishini ko’zda tutadi.
Chet el korxonalarida me’yoriy bazalarni yaratishga katta e’tibor beriladi.
Yirik korxonalar bunday bazalarni o’zlari yaratadilar, kichik va o’rta korxonalar esa
ixtisoslashtirilgan markazlarning xizmatidan foydalanadilar. Bizda esa me’yoriy
bazalar ishlab chiqarishning o’ziga xos bo’lgan xususiyatlarini hisobga olgan holda,
korxonalarning o’zida tashkil etilmoqda. Me’yoriy xujjatlarni tayyorlash juda

---

78
murakkab jarayondir, ko’p korxonalarda bu masala bilan shug’ullanadigan
mutaxassislarning etishmasligi sababli mahalliy me’yoriy hujjatlar yoki ilmiy
tadqiqot institutlari tomonidan tuzilgan tarmoq me’yoriy xujjatlaridan
foydalaniladilar[11]. Hozirgi paytda mehnat bo’yicha me’yoriy baza quyidagi
vazifalarni bajarishi kerak:
- har xil ishlarni bajarish uchun standart vaqtni belgilash, texnologik
jarayonlarni optimallashtirish rejalashtirish;
- ishlab chiqarish jarayoni talab qilgan aniqlikda texnologik operatsiyani yoki
ishni bajarish uchun vaqt me’yorini aniqlash;
- qo’lda yoki avtomatlashtirilgan holda hisoblar olib borishni qulayligini
ta’minlash.
Me’yoriy baza zamon talablariga mos kelishi uchun tarmoq va tarmoqlararo
mehnat me’yorlari tizimli ravishda ko’rib chiqilishi va yangilanib turilishi kerak, bu
esa o’z navbatida me’yoriy ilmiy ishlar bilan shug’ullanuvchi tashkilotlarning ishini
qayta tiklashni talab etadi.
Mehnatni me’yorlash ishlarini jadallashtirishning yana asosiy yo’nalishlaridan
bo’lib, oliy o’quv yurtlarida mehnat masalalari bilan shug’ullanuvchi mutaxassislarni
tayyorlash hisoblanadi. Mehnat me’yorlarining texnik jihatdan asoslanganligi va
ilg’orligi ishlab chiqarish jarayonini unsurlarga ajratgan holda ish vaqti sarfini va
jihozlardan foydalanish vaqtining o’rganilishi bilan belgilanadi.
Mehnat jarayoni – bu mehnat va tabiiy jarayonlarning mehnat predmetlari
(xom ashyo, materiallar, yarim fabrikatlar va boshqalar) bilan chambarchas bog’liq
holda amalga oshiriladigan faoliyat bo’lib, uning natijasida xom ashyo yoki
materialdan ma’lum bir turdagi tayyor mahsulotning yaratilishidir.
Mehnat jarayonida ishchilar mehnat qurollaridan foydalangan holda mehnat
predmetlariga ta’sir ko’rsatadilar, uni o’zgartiradilar va tegishli mehnat mahsuliga
aylantiradilar. Bu jarayonda mehnat predmeti bir qancha bosqichlarni bosib o’tadi,
ularning har biri ishlab chiqarish jarayonining ma’lum bir qismini ifoda etadi.
Mehnat jarayonlarining vazifasiga ko’ra ishlab chiqarish jarayoni texnologik,
transport, nazorat jarayonlariga bo’linadi.

---

79
Mehnat predmetlarining o’zgartirilishiga qaratilgan ishlab chiqarish jarayoni -
texnologik jarayon deb ataladi. Masalan, detallarni qirqish, ulash, dazmollash,
pardozlash va boshqalar.
Transport jarayoni mehnat predmetlariga o’zgartirishlar kiritmagan holda,
mehnat predmetlari va mehnat qurollarini uzatish, ortish, tashish va tushirishdan
iborat.
Nazorat jarayoni ishlab chiqarish jarayoni unsurlarini, texnologik
operatsiyalarning bajarilishini va tayyor mahsulotni bajarish sifatini davlat
standartlari, texnik shartlariga mosligini tekshirishdan iborat.
Mehnat jarayonlarining turlari va ularning xarakteri korxonada qabul qilingan
texnologiya, texnika, ishlab chiqarishning turi, ishlab chiqarish tuzilmasi, xom ashyo
va materiallarning tarkibi va boshqalarga bog’liq.
Texnikaviy me’yorlashda ishlab chiqarish jarayonini amalga oshiradigan
mehnatning xarakteri, uning tarkibini o’rganish maqsadga muvofiq bo’lib, uni ushbu
jarayonlarga ajratish mumkin: qo’l mehnati, mashina aralash qo’l mehnati,
mashinalashgan, avtomatlashtirilgan jarayonlar.
- qo’l mehnati jarayoni – bu ayrim yoki bir guruh ishchilarning qo’l mehnati
qurollari (qaychi, bo’r, dazmol, qo’l ignasi va h.k.) yordamida yoki bularsiz ishlab
chiqarish jarayonini amalga oshirish tushuniladi. Masalan, poyafzal ustki qism
detallarini qo’l pichog’i yordamida qirqish, bo’r bilan belgilash, dazmollash, paxtani
qo’lda titish va boshqalar);
- mashina aralash qo’l mehnati jarayoni - bu ishlab chiqarish jarayonini alohida
ishchi yoki bir guruh ishchilar ishtirokida mehnat qurollari yordamida amalga
oshirilishidir. Masalan, universal va maxsus tikuv mashinalarida bajariladigan
texnologik operatsiyalar, presslar yordamida detallarni qirqish va boshqalar;
- mashinalashgan jarayon – bu ishlab chiqarish jarayonlarida texnologik
operatsiyani mashinaning ishchi organlari yordamida ishchining bevosita nazorati
ostida bajarilishiga aytiladi. Masalan yigiruv, to’quv ishlab chiqarishning hamma
o’timlarida bajariladigan, poyafzalni quyma usulda yig’ish bilan bog’liq va boshqa
operatsiyalar;

---

80
- mahsulot tayyorlashning barcha texnologik operatsiyalari ijrochining nazorati
va kuzatuvi ostida mashinalarning ishchi organlari tomonidan bajariladigan
avtomatlashtirilgan jarayon deb ataladi. Bunga avtomat stanoklar, avtomatlashtirilgan
to’qimachilik stanoklari, oziq-ovqat sanoatida ishlatiladigan avtomatlar misol bo’la
oladi.
Engil sanoat korxonalaridagi murakkab ishlab chiqarish jarayoni o’zaro
bog’langan bir qancha ishlab chiqarish jarayonlarining yig’indisidan tashkil topadi.
Masalan, tikuv mahsulotlarini ishlab chiqarish gazlamalarni bichishga tayyorlash,
detallarni bichish, detallarni yig’ish, tayyor mahsulot holiga keltirish, pardozlash kabi
jarayonlardan tashkil topadi.
Ishlab chiqarish jarayoni o’zaro bog’liq mehnat jarayonlarining yig’indisidan
iborat bo’lib, uning muayyan tashkiliy-texnikaviy sharoitlarda bir ish o’rnida
bajariladigan qismi operatsiya deb ataladi.
Operatsiya – bu muayyan mehnat predmetiga bir yoki bir necha ishchilar
(brigada) tomonidan bir ish o’rnida texnologik jihozlarni qayta sozlamay ham ta’sir
ko’rsatayotgan mehnat predmetlarining joyini o’zgartirmasdan amalga oshiriladigan
ishlab chiqarishning ajralmas bir qismidir. Demak, operatsiya mehnat predmeti, ish
o’rni va ijrochining doimiy birligi bilan belgilanadi.
Operatsiya ishlab chiqarish jarayonining bir qismini tashkil etib, u o’z
navbatida ish usullari va harakatlaridan tashkil topadi.
Ish usullari – ishchining aniq maqsadga qaratilgan ish harakatlarining
tugallangan yig’indisidan tashkil topadi. Ish usullari o’z navbatida asosiy va
yordamchi usullarga bo’linadi. Mehnat predmetiga ta’sir o’tkazib, unga bevosita
o’zgartirish kiritadigan usullar asosiy usul, asosiy texnologik jarayonni amalga
oshirish uchun mehnat predmetlarining shaklini o’zgartirmaydigan yordam beruvchi
usullarni yordamchi usullar deb ataladi. Masalan, biron-bir detalni ulash uchun
bajariladigan texnologik operatsiyada detallarni olish, tekislash, mashina tepkisini
ko’tarish, ipni uzish kabilar yordamchi usullarga misol bo’ladi.
Ish usullari o’z navbatida mehnat harakatlariga bo’linadi. Mehnat harakatlari
ishchining biron-bir a’zosi: tanasi, qo’li, barmoqlarining tanaffussiz bir bor jildirishi

---

81
asosida bajariladigan harakatlarga aytiladi. Masalan, qo’lni uzatish, mehnat
predmetini ko’tarish, tepkini tushirish va boshqalar.
Texnologik operatsiyalarni mehnat jihatidan bunday uzviy elementlarga bo’lish
ishlab chiqarish jarayonini tahlil qilish uchun, operatsiyaning tarkibini o’rganish,
yaxshilash, uni bajarishda izchillikka, aniq ketma-ketlikka erishish yo’llarini
belgilash uchun keng imkon yaratadi, ilg’or ish usullarini o’rganishni targ’ib qilishda
ishlatiladi.
Operatsiyaning har bir elementini bajarishning oqilona yo’llarini topish o’z
navbatida ishni bajarish vaqtini qisqartirishga, mehnat unumdorligini o’stirishga
yordam beradi.
Shunday qilib, ishlab chiqarish jarayonini turlarga va mehnat qilish jihatidan
tarkibiy qismlarga ajratish mehnatni oqilona texnik jihatdan me’yorlash sohasida olib
boriladigan ishlarning eng muhimlaridan biridir.