Sh. Maxmudov «statistika» fanidan o’quv uslubiy majmuasi

Ko’rib chiqiladigan asosiy savollar:

1. 
   Statistik ko‘rsatkichlarning mazmuni va ahamiyatini tushuntirib bera oladi.
   
2. 
   Statistik ko‘rsatkichlarning turlari va tasnifini izohlay oladi;
   
3. 
   Mutlaq va nisbiy ko‘rsatkichlarni tasniflay oladi;
   
4. 
   Nisbiy ko‘rsatkichlarning tasnifi va ular orasidagi bog‘lanishlar
   

Mavzuga oid tayanch tushunchalar va iboralar:
Sifat va miqdor, me’yor va statistik ko‘rsatkich, mutlaq ko‘rsatkichlar, nisbiy ko‘rsatkichlar, taqqoslash va solishtirish, statistik ko‘rsatkichlar tizimi, to‘g‘ri va teskari ko‘rsatkichlar, dinamika nisbiy ko‘rsatkichlari, tuuilma nisbiy ko‘rsatkichlari, o‘zaro bog‘lanish nisbiy ko‘rsatkichlari, fazoviy taqqoslash nisbiy ko‘rsatkichlari, intensivlik nisbiy ko‘rsatkichlari, shartnoma (reja,norma)ni bajarish nisbiy ko‘rsatkichlari.
Mavzuga oid asosiy muammolar:

• 
  Statistik ko‘rsatkichlar haqida to`liq tushunchaga ega bo`lish;
  
• 
  Statistik ko‘rsatkichlarning turlarini tahlil qilish.
  

1-savol bo’yicha dars maqsadi:

• 
  Statistik ko‘rsatkichlarning mazmuni va ahamiyatini tushuntirib bera oladi.
  

Identiv o’quv maqsadlari:

• 
  Statistik ko‘rsatkichlarning mazmuni va ahamiyatini tushuntirib bera oladi.
  

1-asosiy savolning bayoni:
Oldin aytganimizdek, statistika ommaviy hodisa va jarayonlarni miqdoran son shaklida ifodalaydi. Ammo statistikada ishlatiladigan «sonlar» matematikadagi abstrakt sonlar emas. Agarda matematikadagi sonlar umuman katta kichiklikni, shakllarni belgilar orqali ifodalanishi bo‘lsa va ular butun va kasr, mavhum va haqiqiy, ratsional va irratsional va h.k. sonlardan tashkil topsa, statistikada ular ko‘rsatkichlar, aniqrog‘i statistik ko‘rsatkichlardir.
Xo‘sh, statistik ko‘rsatkichlar nima? U qanday mazmunga va tuzilishga ega? Statistik ko‘rsatkichlarning qanday turlari mavjud? Ular ommaviy hodisa va jarayonlarni bilishda va tahlil qilishda, turmushimizda, iqtisodiyotni boshqarishda qanday ahamiyatga ega? Statistik ko‘rsatkichlar tizimi deganda nima tushuniladi va u qanday tartibda tuziladi? Ushbu bob mana shu masalalarga bag‘ishlangan va qo‘yilgan savollarga javob beradi.
Ko‘rsatkich so‘zi quyidagi lug‘aviy ma’nolarga ega: 1) ko‘rsatish uchun xizmat qiluvchi yozuv, ishora; 2) biror narsaning rivoji, darajasi, ishning borishi, bajarilishi va shu kabilarni bildiruvchi belgi yoki narsa.
Falsafiy jihatdan statistik ko‘rsatkich o‘rganilayotgan hodisa va jarayonning (yoki xossalarning) me’yoridir. Hodisaning sifati bilan miqdorining o‘zaro bog‘liqligi, ajralmas birligi uning me’yori deb ataladi. «Me’yor - deb izohlaydi buyuk faylasuf olim Gegel - sifat aniqligiga ega bo‘lgan miqdor..., u ma’lum miqdorki, u bilan biror muayyan narsa bog‘langan». Statistik ko‘rsatkichlar me’yor ekanligiga ishora qilib, Gegel yozgan edi: «Statistikada qo‘llanadigan sonlar faqat o‘zlarining sifat natijalari bilangina qiziqarlidir. Quruq raqamlar bilan ishlash ... oddiy qiziquvchanlik predmeti hisoblanadi, u na nazariy va na amaliy jihatdan diqqatga sazovor emas».³

Statistik ko‘rsatkich - bu ommaviy hodisa va jarayonning me’yori, ya’ni uning sifat va miqdor birligini ifodalash shakli (tavsifnomasi)
Statistik ko‘rsatkichlar deb ma’lum makon va zamon sharoitida ommaviy hodisa va jarayonlarning holatini, rivojlanishini, tuzilishini, o‘zaro bog‘lanishlarini ifodalovchi me’yorlar yuritiladi. Statistik ko‘rsatkich o‘rganilayotgan birliklar (obyektlar) to‘plami yoki guruhining xossalarini umumlashtirib tavsiflaydi. Shu jihatdan u yakkama-yakka belgilardan farq qiladi. Masalan, har bir kishining yashash umri - bu belgi. Mamlakat yoki mintaqa aholisining o‘rtacha yashash umri statistik ko‘rsatkichdir.
Iqtisodiy ko‘rsatkich - bu iqtisodiy hayotda ro‘y berayotgan u yoki bu hodisa yoki jarayonning sifat-miqdoriy aniqligidir. Sifat deganda hodisaning ichki qiyofasi (aniqligi) yoki uning rivojlanish qonuni bilan bevosita bog‘liq bo‘lgan mohiyati tushuniladi. Sifat hodisaning turli-tuman jihatlari, xossalari, muhim belgilarining birikmasida ayon bo‘ladi.
Miqdor - hodisaning tashqi qiyofasi (aniqligi) bo‘lib, uning u yoki bu xossasining o‘lchami, soni, ro‘yobga chiqish darajasi shaklida ko‘rinadi.
Statistik ko‘rsatkich qator muhim belgilar, tarkibiy unsurlarga ega (3.1-chizma).