Eposdagi motivlar tizimining birinchi qismini qahramonining ilk hayoti bilan bogʻliq motivlar tashkil etadi. Bu doiraga moʻjizaviy tugʻilish va ilk jasoratga oid motivlar, doʻst tutinish va uylanish motivlari, epik ot va qurol bilan bogʻliq motivlar kiradi. Bu jarayonda epik qahramon toʻla shakllanadi. Bu motivlardan keyin epik qahramonning ijtimoiy hayot bilan aloqador faoliyatini yorituvchi motivlar boshlanadi. Bu doiraga epik qahramonning jangavor guruhi motivi, vatan himoyasi va asirga tushish motivlari, eposda mifik evrilish motivi va yakuniy motiv xisoblangan epik qahramonning oʻlimi bilan bogʻliq tafsilotlar kiradi. Albatta har bir eposda boshqa motivlar ham boʻlishi mumkin. Biz bu yerda asosan oʻzbek eposidagi motivlar tizimiga tayandik.
