Termiz davlat universiteti pedagogika fakulteti

Tayanch so’zlar: : “ot”, “sifat”, “son”, “fe’l”, “olmosh” tushuncha, sintaksis, “gap”, “ega”, “kesim”, “ikkinchi darajali bo’lak”, “uyushiq bo’lak”, “undalma” , so’z yasalishi, “o’zak”, “qo’shimcha”, “o’zakdosh so’zlar”.


16-mavzu: Grаmmаtik tushunchаlаrni shаkllаntirishni tа’minlаydigаn mеtоdik shаrtlаr. Grammatik va so’z yasalishiga doir mashqlar
REJA:
I. O’quvchilar aqliy faoliyatini faollashtirish.
2. Grammatik va so’z yasalishiga oid mashqlar.
3. Og’zaki tahlil namunasi:
I. O’quvchilar aqliy faoliyatini faollashtirish. Bilimni o’zlashtirishning natijasi ma’lum darajada o’qitish metodlariga bog’liqdir. Bayon metodi asosan o’quvchilarning eslab qolishiga mo’ljallanadi va ularning bilish faoliyatini faollashtira olmaydi, shuning uchun kutilgan natijani bermaydi. Maktab tajribasini ommalashtirish va olimlar (L. V. Zankov, Yu. N. Babanskiy, V. P. Strezikozin va boshq.)ning maxsus tekshirishlari ko’rsatishicha, izlanish metodlari (boshlang’ich sinflarda qisman izlanish metodi) ko’proq samarali hisoblanadi. Grammatik tushunchani shakllantirishda izlanish vaziyati o’qituvchi bergan vazifa va uni jamoa bo’lib bajarish vaqtida yaratiladi. Izlanish vaziyati o’quvchilarni yangilikni bilishga qiziqtiradi va vazifani bajarish usulini mustaqil ravishda ijodiy tanlashga undaydi. Masalan, o’quvchilarni so’z yasovchi qo’shimchalar bilan tanishtirishda o’qituvchi xattaxtaga gul – gulchi, g’alla – g’allakor, traktor – traktorchi kabi so’zlarni ikki ustun tarzida yozadi. O’quvchilarga “Ikki ustun shaklida yozilgan so’zlarni kuzating, ma’nolaridagi farqini o’ylab ko’ring, shu so’zlarning ma’nosini farqlashga xizmat qilayotgan qismini toping” topshirig’i beriladi. Birgalikda o’tkazilgan muhokamadan so’ng o’quvchilar quyidagicha xulosaga keladilar:
– “Gul” so’zi o’simlikning bir turini, “gulchi” esa gullarni parvarish qiluvchi kishi ma’nosini bildiradi; “g’alla” – o’simlik, “g’allakor” – g’alla yetishtiruvchi kishi; “traktor” so’zi qishloq xo’jalik mashinasini, “traktorchi” esa traktorda ishlovchi kishi ma’nosini bildiradi. So’zning -chi, -kor qismi ikki so’zning ma’nosini farqlashga xizmat qiladi; -chi, -kor alohida kelganda ma’no anglatmaydi, bular qo’shimcha; so’zga qo’shilganda ishlovchi, shug’ullanuvchi kishi ma’nosini anglatyapti, ya’ni yangi ma’noli so’z hosil bo’lyapti; demak, -chi, -kor so’z yasovchi qo’shimcha.
Muammoli vaziyatni orfografik mavzu bilan tanishtirish jarayonida ham yaratish mumkin. Masalan, o’qituvchi “Hayvonlarga qo’yilgan nomning bosh harf bilan yozilishi” mavzusini tushuntirish uchun o’quvchilarga “Kim qanday uy hayvonlarini boqadi? Ularga o’zingiz nom qo’yganmisiz? Qanday nom qo’ygansiz?” kabi savollarni beradi. O’quvchilar tartib bilan o’zlari boqayotgan hayvonlari va unga qo’ygan nomlarini aytadilar (mushuk – Mosh, kuchuk – Olapar, sigir – Targ’il, ot – Lochin kabi); o’qituvchi ikki ustun shaklida xattaxtaga yozib boradi. O’qituvchi «Ikki ustun shaklida yozilgan so’zlarni o’qing, ularni taqqoslang. Ularning yozilishida qanday farq bor? Nima uchun? Isbotlang» topshirig’ini beradi. Bu savol-topshiriqlar xarakteri bolalarni o’ylashga, izlanishga majbur qiladi. Ular birinchi ustundagi so’zlar kichik harf bilan, ikkinchi ustundagilar esa katta (bosh) harf bilan yozilganini aytadilar, ammo nima uchun shunday yozilganini isbotlashga ularning bilimlari yetishmaydi. SHunday qilib, muammoli vaziyat yaratiladi. O’quvchilar yangi materialni o’rganish zarurligini sezadilar. Bu metodda eng muhim jihat muammoli vaziyat yaratish, til hodisalarini tahlil qilish, o’zaro taqqoslash omillarini bajarish bilan bolalarning bilish faoliyatini faollashtirish hisoblanadi. Suhbat-muhokama jarayonida muammoni o’qituvchi rahbarligida o’quvchilarning o’zlari hal qilishlari yoki o’qituvchi tomonidan hal qilinishi ham mumkin.
Muhokamaning borishi bilimlar asosida topshiriqlarni faol bajarishni, faol aqliy faoliyatni talab qiladi.