Xəbər bülleteni №12

      Bəkir Nərimanoğlu

Aqropark kənd təsərrüfatı məhsulunun intensiv istehsalı, daşınması, saxlanması və satışının təşkilində mühüm rol oynayır. Kənd təsərrüfatı məhsulu tez xarab olduğundan realizasiya prosesi sürətli olmalıdır. Lakin əksər hallarda məhsulu vaxtında satmaq mümkün olmur və o, yararsız vəziyyətə düşərək zərər gətirir. Bu, fermerlərin maddi itkisi ilə yanaşı bazarda məhsul qıtlığına gətirir. Daxili istehsal tələbatı ödəməyəndə idxal məhsullarına üstünlük verilir, xarici məhsulların çoxu isə geni dəyişdirilmiş məhsullardır. Bu baxımdan istehsal, emal və logistika xidmətlərini vahid ərazidə cəmləşdirən aqroparkların yaradılması zəruridir.

Aqroparklar müxtəlif sahəvi strukturları özündə birləşdirir. Bura kənd təsərrüfatı maşınqayırması, kimya, tikinti, bitkiçilik, heyvandarlıq, yeyinti, nəqliyyat, ticarət qurumları aiddir. Başqa sözlə, aqropark dedikdə qarşılıqlı əlaqədə olan kənd təsərrüfatı və sənaye müəssisələrinin birlikdə fəaliyyəti nəzərdə tutulur.

Dünyada aqrar-sənaye komplekslərinin bir neçə modeli var. İlk dəfə Avropa Birliyi ölkələrində formalaşan kooperativlər sürətlə inkişaf edərək bazarın 50 faizindən çoxuna sahib olub. Bu model birgə işləmə prinsipi ilə fəaliyyət göstərir.

İkinci model müqaviləyə əsaslanan kənd təsərrüfatı istehsalı modelidir. Transmilli şirkətlər modeli hesab olunan bu modelə əsasən, istehsalçı ilə alıcı məhsulların istehsal həcmi və müddəti, məkan və qiyməti ilə bağlı məlumatları əhatə edən müqavilə bağlayır. Bu model ilk dəfə Yaponiya və ABŞ-da şəkər çuğunduru, şaftalı məhsullarının istehsalında tətbiq olunub, sonra başqa məhsullara da tətbiq olunub. Müqaviləyə əsaslanan kənd təsərrüfatı modeli daha çox ABŞ-da tətbiq olunur, meyvə-tərəvəz və broyler istehsalının 80-90%-ni əhatə edir. Avropada da bu model geniş yayılıb.

Lisenziyalı anbar modelində kəndlilər istehsal etdikləri məhsulları xüsusi rejimli anbarlarda saxlayır, bunun müqabilində mədaxil qəbzləri əldə edirlər. Həmin mədaxil qəbzləri vasitəsilə fermerlərin maliyyə təşkilatlarından kredit cəlb etmək imkanı var. Lisenziyalı anbar mexanizmi pambıq, zeytun və zeytun yağı, günəbaxan yağı, fındıq və sair məhsullar üzrə ixtisaslaşdırılıb. Bu modeldə fermerlər bir sıra xidmətdən ödənişsiz yararlanır. Nümunə olaraq laboratoriya xidmətini göstərmək olar. Məhsulların bazara sürətlə çıxışı üçün elektron informasiya xidməti də fəaliyyət göstərir.

Azərbaycanda aqroparklar prezidentin ötən il aprelin 16-da imzaladığı “Aqrar sahədə idarəetmənin təkmilləşdirilməsi və institusional islahatların sürətləndirilməsi ilə bağlı tədbirlər haqqında” fərmanına əsasən yaradılıb (Fərman). İlk aqroparkın təməli ötən il noyabrın 15-i Şəmkirdə qoyulub. “Şəmkir Aqropark” üçün 543 hektar ərazi ayrılıb. Aqroparkda müasir istixana kompleksi, şitillik, tinglik və intensiv bağçılıq təsərrüfatları, meyvə və tərəvəz emalı zavodları, tara istehsalı fabriki, logistika və aqroservis mərkəzi, soyuducu anbar, satış mərkəzləri, avtopark, elmi araşdırma və innovasiyalar mərkəzi, otel və müxtəlif infrastruktur müəssisələrinin inşa olunması nəzərdə tutulur.

Xızı rayonunda və Yalama qəsəbəsində də aqroparkın yaradılmasına başlanıb.

İqtisadi və Sosial İnkişaf Mərkəzinin Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə apardığı “Biznesin inkişafı və davamlı fəaliyyət üçün effektiv təcrübənin təşviq edilməsi (yayılması), innovativ texnologiyaların tətbiqi sahəsində fermerlərin maarifləndirilməsi və bilgilərinin artırılması” layihəsinə aid tədqiqatda deyilir ki, aqroparkların yaradılması məhsul bolluğuna səbəb olacaq, xaricə məhsul ixracını artıracaq. Adətən qış aylarında paytaxt bazarlarında xaricdən gətirilən məhsullar çox baha satılır. Çoxu geni dəyişdirilmiş məhsullardır. Aqroparklardakı anbarlarda saxlanan məhsullar isə nisbətən ucuz olacaq. Bu yeniliyin tətbiqi bölgələrdə yeni iş yerlərinin açılmasına, kənd camaatının məşğulluq səviyyəsinin artırılmasına da təkan verəcək.

İqtisadçı ekspert Vüqar Bayramov bildirir ki, aqroparklar aqrar, emaledici biznes və təhsil müəssisələrinin birgə klaster formasında fəaliyyətini nəzərdə tutur: “Aqroparklar üçün ən əlverişli bölgələr Gəncə və Gəncə ətrafı, Lənkəran, Xızı və Xaçmaz rayonları hesab edilir. Ölkənin digər bölgələrində də aqroparkların yaradılması üçün əlverişli şərait var”.

Dövlət Sosial Təminat Xidməti 9 aylıq hesabat verdi

22.10.2015

Oktyabrın 22-si Əmək və Əhalinin Sosial Müdafiəsi Nazirliyində Dövlət Sosial Təminat Xidmətinin bu ilin 9 ayında gördüyü işlərə həsr olunmuş hesabat iclası keçirib. Transparency.az-a verilən məlumata görə, hesabat məruzəsi ilə çıxış edən Dövlət Sosial Təminat Xidmətinin rəisi Çingiz Əliyev deyib ki, şəffaflığın və ünvanlılığın təmin olunmasına ciddi nəzarət nəticəsində dövlət sosial yardımı alan ailələrin sayı 9 ayda 16,7 faiz azalıb, hazırda 498410 nəfər ailə üzvünü əhatə edən 114050 ailəyə hər ay orta hesabla 153 manat ünvanlı sosial yardım ödənir.

Xidmət rəisi bildirib ki, prezidentin 20 iyun 2014-cü il sərəncamına uyğun olaraq müharibə əlilləri və şəhid ailələrinin mənzillə təminatı işləri uğurla yerinə yetirilir: “Bu ilin ötən dövründə 150-dən çox müharibə əlili və şəhid ailəsi yeni mənzillə təmin olunub. Müharibə əlilləri və onlara bərabər tutulanların minik avtomobilləri ilə təminatında da mühüm addımlar atılır. Ümumilikdə indiyədək dövlət büdcəsi hesabına minik avtomobili ilə təmin olunan 5650 nəfər imtiyazlı şəxsin 32,4%-nə, yəni 1833 nəfərinə maşın keçən il və cari ilin ötən dövründə təqdim edilib”.

Çingiz Əliyev cari ilin 9 ayı ərzində ölkə əhalisinin 4,4 faizinin, yəni 427284 nəfərin aylıq və sosial müavinətlə təmin olunduğunu, onlardan 344070 nəfərinə (80,5%) aylıq, 83214 nəfərinə (19,5) isə birdəfəlik sosial müavinət ödəndiyini bildirib: “Qeyd olunan dövrdə ölkədə 53962 nəfərə Azərbaycan prezidentinin aylıq təqaüdləri verilib. Ümumilikdə hesabat dövründə ötən ilin müvafiq dövrü ilə müqayisədə aylıq və birdəfəlik sosial müavinət alanların sayı 6039 nəfər (1,4%), prezidentin aylıq təqaüdləri ilə təmin olunanların sayı isə 3066 nəfər (6%) artıb. 9 ayda sosial müavinət və təqaüdlərin, kompensasiyaların ödənməsinə ötən ilin müvafiq dövrü ilə müqayisədə 8,8 milyon manat və ya 4% çox vəsait yönəldilib”.

Xidmət rəisi bildirib ki, cari ilin yanvar-sentyabr aylarında sosial müdafiəyə daha çox ehtiyacı olan 400 nəfər əlilliyi olan şəxsə sosial-məişət problemlərinin həllinə köməklik məqsədilə birdəfəlik maddi yardımlar verilib, bu da ötən ilin müvafiq dövrü ilə müqayisədə 63 nəfər və ya 18,7 % çoxdur: “Hesabat dövründə 14 nəfər əlilliyi olan şəxsin ölkə daxilində müalicəsinə, 39 nəfər əlilliyi olan şəxsin xaricdə müalicəyə göndərilməsinə birdəfəlik maddi yardım formasında köməklik göstərilib. 112 nəfər 20 Yanvar şəhidinin ailəsinə, 316 nəfər 20 Yanvar əlilinə, Çernobıl qəzasının nəticələrinin aradan qaldırılmasında iştirak edərkən əlil olmuş 486 nəfər şəxsə, sağlamlıq imkanları məhdud iki və daha artıq məktəbli üzvü olan 1492 ailədəki 3117 uşağa görə həmin ailələrə birdəfəlik maddi yardım ödənib. Ümumilikdə bu dövrdə 4484 nəfərə yaxın əlilliyi olan şəxs və şəhid ailəsi birdəfəlik maddi yardımla təmin edilib”.

Çingiz Əliyev hazırda Dövlət Sosial Təminat Xidmətinin tabeliyindəki sosial xidmət müəssisələrində 1072 nəfərin tam dövlət təminatında yaşadığını, 12424 nəfər tənha ahıl və əlil şəxsin evlərində səyyar formada sosial xidmətlə təmin edildiyini bildirib.

Nazirliyin keçirdiyi yarmarkada 650 kilodan çox saxta bal aşkar olunub

22.10.2015

Oktyabrın 10-dan Bakının Nizami küçəsində (köhnə dəyirmanın yaxınlığında) arıçılıq məhsullarının sərgi-satış yarmarkasını keçirən Kənd Təsərrüfatı Nazirliyi yeni məlumat yayıb. Qeyd olunur ki, yarmarkanın keçirildiyi müddətdə şəffaflığın, təhlükəsizliyin təmin olunması məqsədi ilə satış salonunda və bal saxlanan anbarda müşahidə kameraları quraşdırılıb: “Eləcə də arıçılıq məhsullarının sərgi-satış yarmarkasının mütəşəkkil keçirilməsi üçün mütəxəssislərdən ibarət işçi qrupu yaradılıb və yarmarkanın gedişinə daim nəzarət edilir.

Oktyabrın 21-də işçi qrupu salonda satılan arıçılıq məhsullarına nəzarət edərkən laboratoriya müayinəsindən keçməyən, mənşəyi məlum olmayan, anbara təhvil verilməyən və qeydiyyata alınmayan hər biri 50 kiloqramdan artıq 13 ədəd balla dolu bidonun yarmarkaya keçirilməsi faktı aşkar edib. 7 arıçıya aid bidonlar aktlaşdırılaraq dərhal sərgi-satış yarmarkasından çıxarılıb və həmin arıçılar yarmarkadan kənarlaşdırılıb”.

Ermənistanda ilk dəfə ömürlük məhbus azadlığa buraxılıb

22.10.2015

Ermənistanda ilk dəfə ömürlük məhbus azadlığa çıxıb. Paytaxt Yerevanda icma məhkəməsi ömürlük məhbus Soqomon Köçəryanı xəstəliklə bağlı vəsatətə əsaslanaraq həbsdən buraxıb.

Transparency.az bildirir ki, 1995-ci ildə İran vətəndaşı olan azərbaycanlını qətlə yetirdiyi üçün ölüm hökmünə məhkum olunmuş Köçəryanın cəzası sonradan ömürlük həbsə dəyişdirilib.

Qarabağdakı işğalçı müharibənin iştirakçısı olmuş Köçəryanın ağır ürək xəstəliyindən əziyyət çəkdiyi, 20 ildə həm həyat yoldaşını, həm də qızını itirdiyi vurğulanır.

Çin Kommunist Partiyası məmurlara yeni qadağalar qoydu

22.10.2015

Çin Kommunist Partiyasının Davranış Kodeksinə əlavələr edilib.

Təkpartiyalı sistemin hökm sürdüyü Çin Xalq Respublikasını Kommunist Partiyası idarə edir. Partiyanın 88 milyon nəfər üzvü var. Çin rəhbərləri, irili-xırdalı bütün məmurlar Kommunist Partiyasının üzvüdürlər.

Novator.az xəbər verir ki, Çin Kommunist Partiyasının Davranış Kodeksinə edilən əlavələr əsasən məmurlar üçün nəzərdə tutulub. Rəsmən bəyan edilib ki, kodeksə əlavələrdə əsas məqsəd bir sıra dövlət qulluqçularını korrupsiyadan çəkindirmək və onların mənəvi keyfiyyətlərinin artmasına yardım göstərməkdir.

Çin Kommunist Partiyasının bütün üzvlərinə, xüsusilə məmurlara şamil edilən yeni qaydalara görə, partiya üzviləri ictimai maraqları üstün tutmalı, fədakarcasına zəhmətə qatlaşmalı, əxlaqlı olmalı, qeyri-adilikdən uzaq durmalıdır.

Yeni qaydalar partiya üzvlərinə ləziz yeməklər yeməyi, qolf oynamağı, arvadlarına xəyanət etməyi, sevgili saxlamağı qadağan edir.

Kodeksə edilən əlavələrdə partiya daxilində təfriqə salmağı, vəzifədən sui-istifadə etməyi, işin keyfiyyətinə xələl gətirən məlumatı gizlətməyi yasaqlayan məqamlar da var.

Sərkisyan Avrasiya İqtisadi Komissiyasına 4 il sədrlik edəcək

22.10.2015

Ermənistan Avrasiya İqtisadi Komissiyasına 4 il sədrlik edəcək. Transparency.az xəbər verir ki, xarici işlər nazirinin müavini Şavarş Köçəryan oktyabrın 22-də jurnalistlərə belə deyib.

Avrasiya İqtisadi Komissiyası Avrasiya İqtisadi İttifaqının icra orqanıdır. 2014-cü ildə yaradılmış Avrasiya İqtisadi İttifaqına Rusiya, Qazaxıstan, Belarus, Ermənistan və Qırğızıstan daxildir. Avrasiya Ali İqtisadi Şurasının oktyabrın 16-da Qazaxıstanın Burabay qəsəbəsində keçirilin iclasında (iclasa prezidentlər Nursultan Nazarbayev, Serj Sərkisyan, Aleksandr Lukaşenko, Almazbek Atambayev, Vladimir Putin qatılıb) Avrasiya İqtisadi Komissiyası ilə bağlı qərarlar verilib. Komissiyanın kollegiyasına hər üzv ölkədən iki nəfər daxil edilib. Kollegiyanın sədri postu Ermənistan təmsilçisi Tiqran Sərkisyana həvalə olunub. O, səlahiyyətlərinin icrasına gələn il fevralın 1-dən başlayacaq.

Tiqran Sərkisyan ölkəsinin ABŞ-da səfiridir. 55 yaşlı Tiqran Sərkisyan 2008-2014-cü illərdə Ermənistanın baş naziri olub.

Müdafiə Sənayesi Nazirliyinin səyyar kollegiya keçirilib

22.10.2015


Müdafiə Sənayesi Nazirliyinin tabeli müəssisələrində 2015-ci ilin doqquz ayının yekunlarına həsr edilmiş səyyar kollegiya keçirilib. Mdi.gov.az-ın 22 oktyabr məlumatına görə, nazir Yavər Camalovun sədrliyi ilə keçirilən iclasda birlik və müəssisələrin istehsal, maliyyə-təsərrüfat fəaliyyətlərinin yekunları və qarşıda duran məsələlər müzakirə edilib.

Yavər Camalov qeyd edib ki, təmas xəttində tam üstünlüyü əldə edən və düşmənə sarsıdıcı zərbələr vuran Azərbaycan ordusunun təminatını daha da gücləndirmək məqsədilə müəssisələrdə silah, sursat və hərbi vasitələrin istehsalının genişləndirilməsi və keyfiyyətinin daha da yaxşılaşdırılması istiqamətində tədbirlər həyata keçirilir.

Nazirin sözlərinə görə, Müdafiə Sənayesi Nazirliyi cari ilin doqquz ayında uğurlu nəticələr əldə edib: “Hesabat dövründə nazirliyin müəssisələrində 2015-ci il üçün nəzərdə tutulan tədbirlərin icrası davam etdirilib, güc strukturlarının sifarişləri əsasında müdafiə təyinatlı məmulatlar istehsal olunaraq sifarişçilərə təhvil verilib. Eləcə də mülki məmulatların istehsalı genişləndirilib, bu sahə üzrə proqnoza 102,5 faiz əməl edilib. Cari ildə istehsal olunan məmulatların 86 faizi müdafiə və xüsusi təyinatlı, 14 faizi isə mülki məmulatlardır”.

63 sahibkara 4,5 milyon manat güzəştli kredit verildi

22.10.2015

İqtisadiyyat və Sənaye Nazirliyinin Sahibkarlığa Kömək Milli Fondu oktyabrın 22-də Tovuz rayonunun Qovlar şəhərində işgüzar forum keçirib. Forumda Tovuz və ətraf rayonlardan olan 63 sahibkara 4,5 milyon manat güzəştli kredit verilib. Kreditlər əsasən taxılçılıq, heyvandarlıq, arıçılıq, üzümçülük, bağçılıq, tərəvəzçilik, süfrə suları və meyvə şirələri, tamet istehsalı sahələrinin inkişafına yönəldiləcək.

Economy.gov.az-ın məlumatına görə, 80-ə yaxın sahibkarın iştirak etdiyi forumda danışan Sahibkarlığa Kömək Milli Fondunun icraçı direktoru Şirzad Abdullayev qeyd edib ki, 2015-ci ilin ötən dövrü ərzində 4500-ə yaxın sahibkar 170,4 milyon manat güzəştli kredit alıb: “Bu kreditlərdən istifadə etməklə investisiya layihələrinin reallaşdırılması 10500-ə yaxın yeni iş yerinin yaradılmasına imkan yaradır. Ümumilikdə indiyədək Gəncə-Qazax iqtisadi rayonunda fəaliyyət göstərən sahibkarlıq subyektlərinin investisiya layihələrinin maliyyələşdirilməsinə 210,3 milyon manatdan çox güzəştli kredit ayrılıb”.

Nazirlər Kabineti bələdiyyə qulluğuna müsabiqə qaydasını təsdiqləyib

22.10.2015

Nazirlər Kabineti “Bələdiyyə qulluğuna müsabiqənin elan edilməsi, sənədlərin qəbulu, müsabiqənin keçirilməsi və nəticələrinin qiymətləndirilməsi qaydası”nı (QAYDA) təsdiqləyib. Transparency.az xəbər verir ki, qaydaya əsasən, müsabiqə hər bir namizədin bilik səviyyəsinin, peşə hazırlığının, ümumi dünyagörüşünün, bələdiyyə icra aparatının struktur bölmələrində müvafiq vəzifələrə yararlı olmasının müəyyən edilməsi məqsədi ilə aşkarlıq şəraitində şəffaf üsullarla keçirilir.

On altı yaşına çatmış, irqindən, milliyyətindən, dinindən, dilindən, cinsindən, sosial mənşəyindən, əmlak vəziyyətindən, yaşayış yerindən, əqidəsindən, ictimai və digər birliklərə mənsubiyyətindən asılı olmayaraq müvafiq vəzifənin tələblərinə uyğun peşə hazırlığına malik olan və dövlət dilini sərbəst bilən, habelə bələdiyyə qulluğuna qəbul edilmək üçün qanunvericiliklə müəyyən olunmuş şərtlərə cavab verən Azərbaycan Respublikasının vətəndaşları bələdiyyə qulluğuna qəbul edilmək üçün müsabiqəyə buraxılırlar.

Bələdiyyə orqanlarında vakant vəzifələr üzrə bələdiyyə qulluğuna qəbul üçün bələdiyyənin müsabiqə komissiyası müsabiqə elan edir. Bələdiyyə orqanlarına qulluğa qəbul olunmaq üçün müsabiqədə iştirak etmək istəyən şəxs sənədlərini müsabiqə elan edilən gündən etibarən 30 gün müddətində bələdiyyənin icra aparatına təqdim etməlidir.

Sənədlərin qəbulu başa çatdıqdan sonra 30 gün müddətində müsabiqə komissiyası tərəfindən müsabiqə keçirilir. Bələdiyyə qulluğuna qəbulun müsabiqə əsasında keçirilməsi üçün 5 nəfər bələdiyyə üzvü və qulluqçusundan ibarət müsabiqə komissiyası yaradılır. Müsabiqə komissiyasının üzvü namizədlərdən hər hansı biri ilə yaxın qohumluq, şəxsi yaxınlıq, asılılıq münasibətində olduqda və yaxud obyektiv qiymətləndirməyə mənfi təsir edə bilən hallar mövcud olduqda özü-özünə etiraz etməlidir. Eyni qaydada namizəd belə əsaslar olduqda müsabiqə başlamazdan əvvəl müsabiqə komissiyasının hər hansı üzvünə (üzvlərinə) etiraz edə bilər.

Müsabiqə namizədlərə sualların, tapşırıqların verilməsi və namizədlərin həmin sualları cavablandırması, tapşırıqları həll etməsi və müsahibənin keçirilməsi yolu ilə həyata keçirilir. Suallar konkret, aydın olmaqla namizədin nəzəri biliklərinin, tapşırıqlar isə onların həlli üçün qısa zaman tələb olunmaqla praktiki vərdişlərinin, bacarığının müəyyən edilməsi üçün verilir.

Müsahibə hər bir namizədlə fərdi qaydada həyata keçirilir və ən azı 15 dəqiqə aparılır.

Müsabiqə zamanı namizədin sual və tapşırıqları yerinə yetirməsi və müsahibə zamanı suallara verdiyi cavablar müsabiqə komissiyasının üzvləri tərəfindən ballarla qiymətləndirilir. Namizədlərin balları eyni olduqda müvafiq ixtisas üzrə əmək stajı daha çox olan şəxslərə, şəhid ailələrinə, əlillərə, öhdəsində 16 yaşadək iki və daha çox uşağı olanlara və vakant vəzifənin tələblərinə uyğun elmi dərəcəsi və ya elmi adı olanlara üstünlük verilir.

1000 seçki məntəqəsini kameralar izləyəcək

23.10.2015


Mərkəzi Seçki Komissiyası noyabrın 1-nə təyin edilmiş parlament seçkisi ilə bağlı yeni qərar çıxarıb. Transparency.az xəbər verir ki, oktyabrın 23-dən qüvvəyə minən qərara əsasən, 119 seçki dairəsi üzrə 1000 seçki məntəqəsində veb-kameralar quraşdırılmalı, bu zaman işğal edilmiş ərazilər istisna olmaqla ölkə ərazisinin tam əhatə olunması prinsipi əsas götürülməlidir. Veb-kameralar quraşdırılmış seçki məntəqələrinin siyahısı səsvermə gününə 5 gün qalmışdan gec olmayaraq dərc edilməlidir.

Mərkəzi Seçki Komissiyası 2008-ci ildən başlayaraq İnformasiya Mərkəzinin sisteminə qoşulmaqla seçki məntəqələrinin 500-ündə (təqribən 10 faizində), sonradan isə 1000-ində (təqribən 20 faizində) veb-kameralar tətbiq edir.

Parlament seçkisi noyabrın 1-də 125 dairə üzrə keçiriləcək. Deputatlığa namizədlərin sayı 760 nəfərdən çoxdur. Seçki yarışına 24 siyasi partiya (Yeni Azərbaycan Partiyası, Milli İstiqlal Partiyası, Vətəndaş Həmrəyliyi Partiyası, Müsavat Partiyası, Ümid Partiyası, Sosial Demokrat Partiyası, Xalq Partiyası, Ədalət Partiyası, Böyük Quruluş Partiyası, Demokratik İslahatlar Siyasi Partiyası, Bütöv Azərbaycan Xalq Cəbhəsi Partiyası, Klassik Xalq Cəbhəsi Partiyası, Vətəndaş və İnkişaf Partiyası, Milli Dirçəliş Hərəkatı Partiyası və s.) qatılıb.

1 noyabr seçkisi üçün 5 milyon 344 mindən çox bülleten çap olunub.

10 min dollardan baha olmayan mallar gömrük ödənişindən azad edildi

23.10.2015

Prezident İlham Əliyev Azərbaycanın gömrük-buraxılış məntəqələrində gömrük-keçid qaydalarının sadələşdirilməsinə fərman verib. Oktyabrın 22-də imzalanan fərmana görə, fiziki şəxslərin Azərbaycanın gömrük ərazisinə gətirdiyi və istehsal, yaxud kommersiya məqsədləri üçün nəzərdə tutulmayan ümumi gömrük dəyəri 10 min ABŞ dolları ekvivalenti məbləğindən (müşayiət edilən hər bir yetkinlik yaşına çatmamış fiziki şəxsə görə əlavə 2 min ABŞ dolları ekvivalenti məbləğindən) artıq olmayan mallar (aksizli mallar, avtonəqliyyat vasitələri və səfər zamanı fiziki şəxsin zəruri ehtiyaclarının ödənilməsi üçün nəzərdə tutulan əşyalar istisna olmaqla) gömrük ödənişi ödənilmədən gömrük sərhədindən keçirilir.

İlham Əliyev Dövlət Gömrük Komitəsinə gətirilməsi və aparılması qadağan edilən və məhdudlaşdırılan əşyaların siyahısının dövlət sərhədinin buraxılış məntəqələrində hər kəsin yaxşı görə biləcəyi lövhələrdə yerləşdirildiyinə dair məlumatı bir ay müddətində təqdim etməyi tapşırıb.

Avtomobilə texniki xidmət göstərən qurumlara dair yeni tələblər təsdiqləndi

23.10.2015

Standartlaşdırma, Metrologiya və Patent üzrə Dövlət Komitəsi “Avtomobil nəqliyyatı vasitələrinə texniki xidmət göstərən texniki-təmir stansiyaları və sahələri“ standartını təsdiq edib. Standart Azərbaycan Respublikasının ərazisində avtomobil nəqliyyat vasitələri və onların hissələri ilə əlaqədar texniki xidmətə (texniki qulluğu və təmiri) dair ümumi tələbləri və texniki xidmət qaydalarını müəyyən edir.

Transparency.az xəbər verir ki, standarta əsasən, nəqliyyat vasitələrinə xidmət zamanı əməyin mühafizəsi sahəsindəki qanunvericilik tələblərinə əməl olunmalıdır. Xidmət göstərilən zaman “Ölçmələrin vəhdətinin təmin edilməsi haqqında” qanunun tələblərinə uyğun olaraq tipi təsdiq olunmuş və kalibrləmədən keçmiş ölçmə vasitələrindən yararlanmalıdır. Nəqliyyat vasitələrinə texniki xidməti həyata keçirən personal müvafiq sahədə ixtisaslaşmaya malik olmalı və ixtisaslaşma təlim və ya təhsil haqqında sənədlərlə təsdiqlənməlidir.

Həmçinin xidmət zamanı istifadə olunan komponentlər və texniki mayelər, aidiyyəti texniki normativ hüquqi aktların və nəqliyyat vasitələri istehsalçısının texniki sənədlərinin tələblərinə uyğun gəlməlidir. Avtoservisdə müəyyən edilmiş qaydada tikilmiş, möhürlənmiş və istehlakçının tələbi ilə ona təqdim edilən rəy və təkliflər kitabı olmalıdır. Sifariş qəbul edilən, rəsmiləşdirilən otaqda sifarişlərin qeydiyyat jurnalı, göstərilən xidmətlər üçün təyin edilən qiymətlər, ehtiyat hissələrinin və materialların qiymətləri, həmçinin yaxşı görünən yerdə stend üzərində avtoservis təşkilatının iş rejimi, göstərilən texniki xidmətlərin siyahısı, sifarişlərin yerinə yetirilməsi müddətləri və s. məlumatlar yer almalıdır.

Standarta əsasən, avtoservisin sifarişçi və ya onun nümayəndəsi ilə birbaşa ünsiyyətdə olan hər bir işçisi üzərində avtoservis təşkilatının adının, həmçinin bu işçinin soyadı və adı qeyd olunduğu yaxa kartı gəzdirməlidir. Nəqliyyat vasitəsi avtoservisdə qalmaqla təmirə verildikdə avtoservis müqavilə ilə yanaşı təhvil-təslim aktı tərtib etməlidir. Nəqliyyat vasitəsi istehlakçıya və ya onun nümayəndəsinə göstərilən texniki xidmətin haqqı tam ödənildikdən sonra təhvil-təslim aktının və müqavilənin surəti, istehlakçının şəxsiyyətini təsdiq edən sənəd təqdim edildikdə, istehlakçının nümayəndəsinə isə etibarnamə təqdim edildikdə verilməlidir.

Sifarişçinin yanında aparılan şinlərin quraşdırılması və şinlərin təmiri, təmizləmə-yuma, pardaqlama, sürtkü-yanacaq doldurma, tənzimləmə, diaqnostika, həmçinin yolda texniki yardım kimi avtoservis xidmətləri sifarişçinin şifahi sorğusu üzrə müqavilə bağlanmadan qulluq göstərilməsini təsdiqləyən sənədi verməklə və hesab-kassa xidməti üzrə qanunvericilik tələblərinə əməl olunması şərti daxilində həyata keçirilə bilər. Yolda göstərilən texniki yardım zamanı sifarişçi və avtoservis qanunvericiliklə təyin olunmuş qaydada yol hərəkəti təhlükəsizliyinin təminatı üzrə tədbirlər görməlidir.

Standart avtoservisləri 3 kateqoriyaya bölür:

- Nəqliyyat vasitələri istehsalçısının servis şöbələrinə və nəqliyyat vasitələrinə göstərilən xidmətə dair tələblərini yerinə yetirən, təyin olunmuş qaydada istehsalçı və ya onun nümayəndəsi tərəfindən nəqliyyat vasitələrinə xidmətin göstərilməsinə dair səlahiyyətləri və onların sahibləri tərəfindən əmtəə nişanından istifadə hüququnu alan A kateqoriyalı avtoservis təşkilatları;

- В kateqoriyalı avtoservis təşkilatları — nəqliyyat vasitələrinə xidmətin göstərilməsinə dair nəqliyyat vasitələri istehsalçısının nümayəndəsi tərəfindən (həmçinin A kateqoriyalı avtoservis təşkilatları tərəfindən) verilən səlahiyyətlərə malik olan və onların nəqliyyat vasitələrinə xidmətin göstərilməsinə dair tələblərini yerinə yetirən avtoservis təşkilatlarıdır. Bu kateqoriyadan olan avtoservis təşkilatlarına nəqliyyat vasitələri komponentlərinin istehsalçılarının nümayəndələri olan avtoservis təşkilatları da daxildir;

- С kateqoriyalı avtoservis təşkilatları — servis şöbələrinə və nəqliyyat vasitələrinə göstərilən xidmətə dair nəqliyyat vasitələri istehsalçısının tələblərini mütləq yerinə yetirməsi tələb olunmayan avtoservis təşkilatlarıdır.

Standartda həmçinin nəqliyyat vasitələrinə qulluq üzrə xidmətlərin siyahısı da verilib.

Valideynsiz böyümüş Xocalı köçkünlərinə mənzillər verilib

23.10.2015

Qaçqınların və Məcburi Köçkünlərin İşləri üzrə Dövlət Komitəsi Xocalı soyqırımı zamanı hər iki valideynini itirmiş şəxslərə yeni mənzillər verib. Prezident İlham Əliyevin tapşırığı ilə 16 ailə ev alıb.

Rəsmi məlumata görə, baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov oktyabrın 22-də məcburi köçkün gəncləri qəbul edib. O deyib ki, Sabunçu rayonunun Ramanı qəsəbəsində məcburi köçkünlər üçün tikilmiş yaşayış binasından gənclərə ailə tərkibinə uyğun, hər cür şəraiti olan mənzillər ayrılıb. Məcburi köçkün gənclərə mənzillərin orderləri və açarları təqdim olunub.

Transparency.az xatırladır ki, 1992-ci il fevralın 25-dən 26-na keçən gecə erməni silahlı birləşmələri Rusiyaya məxsus 366-cı alayın şəxsi heyəti və hərbi texnikasının bilavasitə iştirakı ilə Xocalı şəhərini işğal edib. Şəhər yerlə-yeksan edilib, 613 nəfər öldürülüb, 1000-dən artıq dinc sakin şikəst olub, 150 nəfər yoxa çıxıb. Bu hərbi-siyasi cinayət nəticəsində 8 ailə tamamilə məhv edilib, 25 uşaq hər iki valideynini, 130 uşaq isə valideynlərindən birini itirib.

Ekspert prezident fərmanını təriflədi və arzusunu dilə gətirdi

23.10.2015

İqtisadçı ekspert Qubad İbadoğlu prezident İlham Əliyevin gömrük yoxlamalarına dair fərmanını şərh edib. Oktyabrın 22-də imzalanan fərmana əsasən, Azərbaycan Respublikasının gömrük ərazisinə gətirilən və istehsal, yaxud kommersiya məqsədləri üçün nəzərdə tutulmayan ümumi gömrük dəyəri 10 min ABŞ dolları ekvivalenti məbləğindən artıq olmayan mallar gömrük ödənişindən azaddır.

Buna qədər ümumi gömrük dəyəri 1500 ABŞ dolları ekvivalenti məbləğindən artıq olmayan mallara görə ödəniş verilmirdi.

Yeni qaydalar vətəndaşı müşayiət edən hər bir yetkinlik yaşına çatmamış fiziki şəxsə görə əlavə məbləği 500 ABŞ dollarından 2000 ABŞ dollarına qədər artırır.

Yenilik aksizli mallara, avtonəqliyyat vasitələrinə və səfər zamanı fiziki şəxsin zəruri ehtiyaclarının ödənilməsi üçün nəzərdə tutulan əşyalara şamil olunmur.

Transparency.az-a danışan iqtisadçı ekspert Qubad İbadoğlu deyir ki, fərmanla gömrüyə bəyan ediləcək məbləğ 6,6 dəfədən çox müəyyənləşdirilir: “Bu, sərhəd buraxılış məntəqələrində “yaşıl kanal”dan istifadə edən vətəndaşların sayını və rahatlığını artıracaq, rüşvət sistemini zəiflədəcək.

Fərman həmçinin fiziki şəxslərin xarici ticarətdə, xüsusilə də idxal əməliyyatlarında iştirakına stimul verəcək, orta və uzunmüddətli dövrdə istehlak bazarında idxal mallarının qiymətlərinin sabitləşməsinə müsbət təsir göstərəcək. Odur ki, yeni fərmanı təqdir edir və bu istiqamətdə mütərəqqi dəyişikliklərin hüquqi şəxslərlə bağlı gömrük-idxal əməliyyatlarına da şamil olunmasını arzulayıram”.

Sosial müdafiə və reabilitasiya xərcləri 33,8% artıb

23.10.2015

Əmək və əhalinin sosial müdafiəsi naziri Səlim Müslümov Şamaxıda bu rayonun və Qobustan, İsmayıllı, Ağsu, Göyçay rayonlarının sakinlərini qəbul edib. Nazirliyin rəsmi məlumatına görə, oktyabrın 23-də keçirilən qəbulda vətəndaşlar məşğulluğun və əmək hüquqlarının təminatı, mənzil və minik avtomobili ilə təmin olunmaq üçün növbəyə dayanma, bərpa müalicəsi və reabilitasiya vasitələri, əlil arabası, sanator-kurort yollayışı ilə təmin olunma və başqa məsələlərlə bağlı müraciət ediblər. Müraciətlərin bir qismi elə yerindəcə həll olunub, o cümlədən bir sıra vətəndaşlara münasib iş yerlərinə göndərişlər verilib, qəbula gələn bir nəfər əlilliyi olan şəxs müraciətinə uyğun olaraq əlil arabası alıb. Səlim Müslümov ayrı-ayrı vətəndaşların müalicəsinə köməklik göstərilməsi, sanator-kurort yollayışı ilə təmin olunmaları barədə tapşırıqlar verib.

Nazir deyib ki, cari ilin 9 ayında əlillərin və sağlam imkanları məhdud uşaqların sosial müdafiəsi və reabilitasiyası tədbirlərinə ötən ilin müvafiq dövrü ilə müqayisədə 33,8 % çox, o cümlədən əlilliyi olan şəxslərin və sağlamlıq imkanları məhdud uşaqların müalicəsinə köməklik üçün 77,3% çox, onların cəmiyyətə inteqrasiyası və onlar üçün bərabər imkanların yaradılması layihələrinə 2,6 dəfə çox, belə insanların xarici ölkələrdə reabilitasiyasına şərait yaradılmasına 9,8% çox, əlilliyi olan şəxslərin sosial-məişət problemlərinin həllinə 50%-dən çox vəsait yönəldilib.

Mənzil və minik avtomobili ilə təmin olunmaqla bağlı müraciətləri cavablandırarkən nazir müharibə əlilləri və şəhid ailələri üçün tikilən fərdi evlərdən inşası yekunlaşan evlərin, hazır yaşayış binalarından alınmış və təmiri başa çatan mənzillərin istifadəyə verilməyə başlandığını, bu ilin ötən dövründə 150-dən çox müharibə əlili və şəhid ailəsinə yeni mənzilin təqdim edildiyini bildirib: “Bakıda və bir sıra bölgələrdə çoxmənzilli yaşayış binaları da inşa olunur. Hazırda sakinlərini qəbul etdiyimiz Şamaxı rayonunda da müharibə əlilləri və şəhid ailələri üçün 36 mənzilli yaşayış binası və 1 fərdi ev tikilir. Eyni zamanda Qobustan rayonunda 3, İsmayıllı rayonunda 3, Ağsu rayonunda 10, Göyçay rayonunda 3 fərdi ev inşa edilir”.

Səlim Müslümov qeyd edib ki, müharibə əlilləri və onlara bərabər tutulan şəxslərə təkcə son bir ayda 300 minik avtomobili verilib və yaxın günlərdə daha 100 avtomobil onlara təqdim olunacaq: “Minik avtomobili üçün növbəyə dayanmaqdan ötrü müvafiq tibbi göstəriş olmalıdır. Bu ilin 9 ayında Əmək və Əhalinin Sosial Müdafiəsi Nazirliyi yanında Dövlət Tibbi-Sosial Ekspertiza və Reabilitasiya Xidmətinə müraciət edən 1219 nəfər imtiyazlı şəxs ciddi şəkildə müayinə edildikdən sonra onlardan yalnız 32,2 faizinə, yəni 393 nəfərinə minik avtomobilinə tibbi göstərişin olması barədə qərarlar qəbul edilib və onlar növbəyə götürülüb”.

Məhkəmə-Hüquq Şurasının iclası keçirilib

23.10.2015

Məhkəmə-Hüquq Şurası hakim assosiasiyaları rəhbərlərinin və hakimlərin iştirakı ilə geniş iclas keçirib. Jlc.gov.az-ın məlumatına görə, iclasda çıxış edən şura sədri, ədliyyə naziri Fikrət Məmmədov deyib ki, son illər məhkəmə infrastrukturu müasirləşdirilir, Dünya Bankı ilə birgə həyata keçirilən layihə çərçivəsində 11 məhkəmə üçün yeni, müasir tələblərə cavab verən bina inşa olunub, 40-dək məhkəmə binası qabaqcıl standartlara uyğun layihələndirilib və hazırda onlardan 10-nun inşasına başlanıb.

İclasda çoxmərhələli seçim prosesi nəticəsində son illər ərzində 2600 namizəd sırasından 307 nəfər hüquqşünasın hakim vəzifəsinə təyin edildiyi qeyd olunub.

Məlumata görə, 2010-cu ildə yeni qaydalarla seçilmiş 50-dək hakimin ilkin səlahiyyət müddətinin bitməsi ilə əlaqədar ətraflı təhlillər aparılıb, onların hər birinin fəaliyyəti yerində öyrənilib, yuxarı instansiya məhkəmələrinin rəyləri, Ədliyyə Nazirliyinin təqdim etdiyi və digər məlumatlar müzakirə olunub.

Ali Məhkəmənin sədri Ramiz Rzayev hakimlərin yol verdiyi xarakterik nöqsanlara toxunub, vahid məhkəmə təcrübəsinin formalaşdırılması üzrə vəzifələri qeyd edib.

Səlahiyyət müddəti başa çatan hakimlərin iştirakı ilə keçirilən açıq müzakirələr zamanı vətəndaşların şikayətlərini doğuran nöqsan və çatışmazlıqlar nəzərə çatdırılıb, ədalətli və qərəzsiz olmağın, etik davranış kodeksinin tələblərinə dönmədən əməl etməyin və vətəndaşlara qayğılı münasibətin hər bir hakimin ən ümdə vəzifəsi olması vurğulanıb, onların hakim vəzifəsinə yararlılığına dair müvafiq təkliflər hazırlanıb.

Bizimpullar.az portalı istifadəyə verilib

23.10.2015

Mərkəzi Bank www.bizimpullar.az adlı yeni portal istifadəyə verib. Cbar.az-ın məlumatına görə, portal əhalinin müasir maliyyə alətlərindən istifadə üzrə biliklərinin artırılması, onlarda rasional maliyyə davranışlarının inkişaf etdirilməsi və yığım mədəniyyətinin formalaşdırılmasına xidmət edəcək.

Portalda iqtisadiyyat və maliyyə sahəsindən maarifləndirici xarakterli materiallar, bank xidmətləri və mərkəzi bankçılığa dair izahedici animasiyalar, iqtisadi məzmunlu oyunlar, virtual muzey və məktəblilər üçün rubrikalar yer alır.

Müharibə əlilləri və şəhid ailələrinə yeni mənzillər təqdim olunub

23.10.2015

Əmək və Əhalinin Sosial Müdafiəsi Nazirliyi hazır yaşayış binalarından alınaraq təmir etdirilmiş daha 9 mənzili müharibə əlilləri və şəhid ailələrinin istifadəsinə verib. 6 mənzil Gəncə şəhərində, 3-ü Mingəçevir şəhərində təqdim olunub.

Rəsmi açıqlamaya əsasən, ailə üzvlərinin sayına görə hər biri iki və ya üç otaqlı olan mənzillərdə müasir tələblərə cavab verən yaşayış şəraiti yaradılıb.

Mənzillərin istifadəyə verilməsi tədbirlərində əmək və əhalinin sosial müdafiəsi nazirinin müavini İlqar Rəhimov iştirak edib.

Azər Qasımlı: “Monopoliyalar qanunla qadağan olunmalıdır”

23.10.2015

Siyasi elmlər üzrə fəlsəfə doktoru, müxalif REAL Hərəkatının İdarə Heyətinin üzvü Azər Qasımlı sahibkarlığın inkişafına yönələn təkliflərlə çıxış edib. Transparency.az-ın məlumatına görə, o qeyd edib ki, ölkədə tam rəqabətli sistem yaradılmalı, monopoliyalar qanunla qadağan olunmalıdır: “Dövlət orqanları sahibkarların işinə maksimum dərəcədə az müdaxilə etməli, iş adamlarına ucuz kredit proqramları təklif olunmalıdır. Bu gün Azərbaycanda rəqabət əvəzinə oliqarxik sistemə bağlı monopoliyalar kök salıb. Hər birinin arxasında da yüksək rütbəli məmur durur. Azad mühit əvəzinə dövlət orqanları, Vergilər Nazirliyi sahibkarları soymaqla məşğuldur. Hər ay iş adamlarından pul yığırlar. Ucuz kredit əvəzinə kiçik və orta sahibkarlara yük olan kredit sistemi tətbiq edilir”.

Azər Qasımlı Rəqabət Məcəlləsi qəbul etməyə və haqsız rəqabəti qanunla sərt cəzalandırmağa çağırıb: “Lisenziyalaşdırılan iqtisadi fəaliyyətlərin sayı azaldılmalı, lisenziyaların əldə edilməsi sadələşdirilərək “vahid pəncərə” mexanizmi ilə həyata keçirilməlidir. Sahibkarlığa Kömək Milli Fondundan kreditlər yalnız kiçik və orta sahibkarlara verilməli, ucuz kredit imkanlarına çıxış sadələşdirilməlidir.

Dövlət və hökumət strukturlarının biznesə müdaxiləsini minimuma endirmək üçün yoxlamaların sayı kəskin azaldılmalı, vergiləri vaxtlı-vaxtında ödəyən sahibkarları 3 ildən tez yoxlamaq qanunla qadağan olunmalıdır”.

REAL təmsilçisi sahibkarların hüquq və maraqlarını qoruyan ombudsman institutu yaratmağı da təklif edir. Onun fikrincə, böyük özəlləşdirmə proqramı qəbul etmək, dövlət sektorundakı emal və xidmət yönlü müəssisələri özəlləşdirmək, şəhərdaxili nəqliyyatı, eləcə də metropoliteni böyük şəhər bələdiyyələrinin səlahiyyətinə vermək gərəkdir: “Kommunal sektor mülkiyyət hüququ dövlətdə qalmaq şərti ilə konsessiya müqavilələri əsasında özəl sektora uzunmüddətli idarəetməyə verilməlidir.

Ucuz kredit bazarının formalaşması Mərkəzi Bankın əsas hədəflərindən biri olmalıdır. Bu məqsədlə bank sektorunun kredit resurslarına olan tələbatını qarşılamaq üçün hökumət mərkəzləşdirilmiş kredit resurslarının həcmini əhəmiyyətli dərəcədə artırmalıdır.

Azərbaycan Dünya Ticarət Təşkilatına üzv olmalıdır. Dünyanın aparıcı fondları, bankları və sığorta şirkətlərindən iqtisadiyyatımıza sərmayə qoyuluşu asanlaşdırılmalıdır. Xarici bank kapitalının ölkəyə axınına əngəllər götürülməlidir”.

Xankəndi seçiciləri 13, leriklilər 108, laçınlılar 102 məntəqədə səs verəcək

23.10.2015

noyabr parlament seçkisi 125 dairənin 5386 məntəqəsində keçiriləcək. Seçki Məcəlləsinə görə, hər seçki məntəqəsinin ərazisində ən çoxu 1500 və ən azı 50 seçici qeydə alınmalıdır.

Transparency.az/cnews qeyd edir ki, ən az məntəqəsi olan seçki dairəsi 122 saylı Xankəndi dairəsidir. 4880 seçicisi olan bu dairə üzrə 13 məntəqə yaradılıb.

Məntəqələri çox olan dairələrə gəlincə, 78 saylı Lerik dairəsində seçicilər 108 məntəqədə səs verəcəklər. 121 saylı Laçın seçki dairəsi 102 məntəqə ilə ikinci sırada gəlir.

72 saylı Yardımlı-Masallı və 124 saylı Şuşa-Ağdam-Xocalı-Xocavənd dairələrinin hər birində 82 məntəqə var.

Məntəqələri çox olan digər dairələr bunlardır:

53 saylı Quba-Qusar — 76 məntəqə

101 saylı Göygöl-Daşkəsən — 74 məntəqə

52 saylı Quba — 72 məntəqə

84 saylı Füzuli — 71 məntəqə

120 saylı Cəbrayıl-Qubadlı — 71 məntəqə

54 saylı Şabran-Siyəzən — 70 məntəqə.

Dairələr, məntəqələr, seçicilər

Prezident: “Kim söz başa düşmür, öz cəzasını alacaq”

26.10.2015

Prezident İlham Əliyev oktyabrın 25-də Sumqayıta səfər edib. O, Kimya Sənaye Parkının ərazisində “Azertexnolayn” Məhdud Məsuliyyətli Cəmiyyətinin texniki avadanlıqlar zavodunun açılış, “SOCAR Polymer” layihəsi çərçivəsində inşa ediləcək yüksək sıxlıqlı polietilen zavodunun təməlqoyma, “Azərikimya” İstehsalat Birliyinin etilen-polietilen zavodunda yeni qurğuların işə salınması mərasimlərinə qatılıb.

AZƏRTAC-ın məlumatına görə, etilen-polietilen zavodunun kollektivi ilə görüşündə İlham Əliyev deyib ki, kimya sənayesi, müasir texnologiyalar, qeyri-neft sektorunun inkişafı ölkə iqtisadiyyatını irəliyə aparacaq əsas amillərdir: “Ölkə iqtisadiyyatı ilk növbədə sənaye istehsalından asılıdır və şadam ki, bu gün Azərbaycanda yaradılan müasir müəssisələr ən yüksək standartlara cavab verir. Bizim siyasətimiz bundan ibarətdir. Sənayeləşmə siyasətinin aparılması üçün bizdə güclü iradə var. Eyni zamanda burada yaradılan və yaradılacaq şəraitdən özəl qurumlar da istifadə edəcəklər. Çünki biz artıq xammal yox, hazır məhsul ixrac edəcəyik. Kiçik və orta sahibkarlar üçün də çox böyük imkanlar yaradılacaq. O məhsullar ki bu günə qədər idxal edilirdi, artıq Azərbaycanda istehsal olunacaq və bütün bu işləri görmək üçün çox böyük tədbirlər planı icra edilir. İlk növbədə Azərbaycanda investisiya iqlimi müsbətdir, digər tərəfdən dövlət vəsaiti qoyulur, özəl sektor da bu işlərdə fəal iştirak edir.

Eyni zamanda bütün xoşagəlməz hallara qarşı daha da ciddi mübarizə aparılmalıdır. Sahibkarlığın inkişafı Azərbaycanın ümumi inkişafının əsas şərtidir. Ona görə sahibkarlara maksimum sərbəstlik verilməlidir və verilir. Son vaxtlar qəbul edilmiş qərarlar, qanunlar, verilmiş sərəncamlar bu məqsədi güdür ki, sahibkarlara heç kim mane olmasın, süni əngəllər aradan götürülsün, sahibkarlar maksimum dərəcədə sərbəst, rahat şəraitdə işləsinlər, ölkəmizə vəsait qoysunlar, iş yerləri yaratsınlar və Azərbaycanda biznes mühiti daha da yaxşılaşsın.

Bu gün biznes mühitinin yaxşılaşması üçün bütün şərait yaradılır. Siyasi iradə var, qanunvericilikdə düzəlişlər edilib, yeni qaydalar tətbiq olunur və əlbəttə ki, ictimai nəzarət daha da güclü olmalıdır. Çünki bəzi hallarda sahibkarlara qarşı ədalətsizliklər göstərilir, onların işinə müdaxilələr olur, onlara qarşı əsassız tələblər irəli sürülür, qanunsuz ödəmələr tələb olunur. Bütün bunlara son qoyulur və son qoyulacaq. Bütün hallarda həm inzibati tədbirlər, həm cəza tədbirləri davam etdiriləcək. Bu gün biznesə mane olmaq istəyən şəxslər Azərbaycana xəyanət edirlər. Çünki ölkəmizin uğurlu inkişafı biznesin inkişafından asılıdır. Dövlət siyasəti, prezidentin siyasi iradəsi var. Belə olan halda dövlət qurumları burada maneçilik törətməməlidirlər, əskinə, kömək etməlidirlər, şərait, imkan yaratmalıdırlar ki, biznes inkişaf etsin.

Burada işlərin böyük hissəsi dövlətin və Dövlət Neft Şirkətinin vəsaitləri hesabına görülür ki, sənaye potensialımız inkişaf etsin. Özəl qurumlar da gəlib burada iş görəcəklər, bu imkanlardan istifadə edib öz fəaliyyətlərini genişləndirəcəklər, daha çox vəsait əldə edəcəklər və həmin vəsaiti Azərbaycana daha çox investisiya şəklində yatıracaqlar. Bax, bizim siyasətimiz bundan ibarətdir. Bir daha demək istəyirəm ki, Azərbaycanın bu istiqamətdəki siyasəti birmənalıdır. Mən dəfələrlə xəbərdarlıq etmişəm və bir daha deyirəm, kim söz başa düşmür, öz cəzasını alacaq. Bu gün həm ictimaiyyət, həm sahibkarlar görürlər ki, biz artıq konkret addımlar atmağa başlamışıq. Ona görə bu gün dünyada yaşanan böhran zamanı belə nəhəng qurğuların istifadəyə verilməsi, investisiyaların cəlb edilməsi və iqtisadi sahədə inkişafa nail olmağımız Azərbaycanın gücünü göstərir. Heç bir qüvvə bizim yolumuzda dayana bilməz. Çünki bizim yolumuz inkişaf, tərəqqi, sosial rifah, sosial ədalət yoludur.

Korrupsiyaya, rüşvətxorluğa qarşı mübarizə bundan sonra da aparılacaq. İş adamlarının fəaliyyətinə müdaxilə edən dövlət qurumları bundan sonra da cəzalandırılacaq, artıq ictimaiyyət bunu görür və görəcək. Bizim çox güclü siyasi iradəmiz var. Bu iradənin təməlində Azərbaycan xalqının dəstəyi dayanır. Xalq da bizim bütün təşəbbüslərimizi alqışlayır, bəyənir, dəstəkləyir. Əgər bu dəstək olmasa biz heç bir iş görə bilmərik.

Əminəm ki, biz 2015-ci ili də uğurla başa vuracağıq. Bu gün burada təməl daşını qoyduğum “SOCAR Polymer” müəssisəsi nəinki Azərbaycanda, regionda ən böyük investisiya layihələrindən biridir. Əminəm ki, bu gözəl nümunə digər qurumlar tərəfindən də bir nümunə kimi qəbul olunacaq. Mən bir daha bütün iş adamlarını Azərbaycana sərmayə qoymağa dəvət edirəm. Əgər onların işinə müdaxilələr varsa, onlara bir daha müraciət edib deyirəm ki, dərhal məlumat verin, dərhal səsinizi qaldırın. Cəmiyyətdə ictimai nəzarət daha da güclü olmalıdır və hər bir siqnala reaksiya verilir, araşdırılır və əgər təsdiqini tapırsa, onda ölçülər götürülür”.

İllik dövriyyəsi 120 min manatdan aşağı olan sahibkarlıq subyektlərində vergi yoxlamaları dayandırılıb

26.10.2015

Vergilər Nazirliyində kollegiya iclası keçirilib. Kollegiya iclasında çıxış edən vergilər naziri Fazil Məmmədov deyib ki, 2015-ci ilin 9 ayında dövlət büdcəsinə 5 milyard 94,2 milyon manat vəsaitin toplanması təmin edilib, proqnoza 100,5 faiz əməl olunub: “Qeyri-neft-qaz sektoru üzrə vergi daxilolmaları 3 milyard 488 milyon manat təşkil edib ki, bu da proqnozun 100,8 faiz icra edilməsi ilə yanaşı ötən ilin müvafiq dövrü ilə müqayisədə 358 milyon manat və ya 11,4 faiz artıq vəsaitin dövlət büdcəsinə səfərbər edilməsi deməkdir”.

Analitik-informasiya şöbəsinin yaydığı rəsmi məlumata görə, nazir vergi orqanlarının sərt nəzarət sistemi ilə sahibkarların fəaliyyətinə yersiz müdaxilələr arasında sərhəd müəyyənləşdirilməsinin zəruriliyini qeyd edib. Hər bir vergi ödəyicisinin dövlət büdcəsinin təmin edilməsində rol oynadığını bildirən vergilər naziri ilk növbədə lüzumsuz yoxlamaların aparılmasına yol verilməməsini, kiçik və orta biznesin fəaliyyətinə müdaxilələrin minimuma endirilməsini və yaxın gələcəkdə tamamilə aradan qaldırılmasını, bütün yoxlamaların risk meyarlarına əsaslanmasını, yoxlamaların yalnız ciddi nəticələr gözlənilən vergi ödəyicilərində aparılmasının vacibliyini və əsassız tələblərin irəli sürülməsinin yolverilməzliyini iclas iştirakçılarının nəzərinə çatdırıb. Qeyd edilib ki, ilk növbədə yoxlamadan əvvəlki hazırlıq işlərinə xüsusi diqqət yetirilməli, vergidən yayınma risklərinin səviyyəsinin və  hüquq pozuntularının mövcudluğu faktları dəqiq araşdırıldıqdan sonra vergi yoxlamalarının təyin edilməsi barədə qərar çıxarılmalıdır.

Fazil Məmmədov illik dövriyyələri 120 min manatdan aşağı olan və sadələşdirilmiş qaydada vergi ödəyən sahibkarlıq subyektlərində səyyar vergi yoxlamalarının və operativ nəzarət tədbirlərinin (əmək müqavilələrinin bağlanmasına və aksizli məhsulların satışı zamanı aksizlərin tətbiqinə nəzarət və dövriyyənin müəyyənləşdirilməsi üçün xronometraj metodu ilə müşahidələrin aparılması istisna olmaqla) keçirilməsinin müvəqqəti dayandırılması haqqında göstəriş verib, bu da obyekti olan 70 minə yaxın vergi ödəyicisini əhatə edəcək. Cari ilin 9 ayı ərzində bu qəbildən olan nəzarət tədbirlərinin sayı 20 mindən çox olub.

Nazir deyib ki, 2015-ci ilin 9 ayında dövlət büdcəsinə daxil olmuş vəsaitin 600 milyon manatını vergi nəzarəti tədbirləri nəticəsində toplanmış vəsait təşkil edir. Əldə olunmuş nəticələrə baxmayaraq hələ də vergi orqanlarının fəaliyyətində bir sıra ciddi nöqsanların olduğunu xatırladan Fazil Məmmədov vergi orqanları əməkdaşlarının etik davranış məsələlərinə nəzarətin artırılması, daxili nəzarət tədbirlərinin gücləndirilnməsinin vacibliyini vurğulayıb. Vergilər naziri korrupsiya və vəzifəsindən sui-istifadə etmə hallarına yol verən əməkdaşlar barədə daha sərt tədbirlərin görülməsi, fəaliyyətində korrupsiyaya cəhd elementləri aşkar edilmiş əməkdaşlara münasibətdə intizam tədbirləri görülmədən onların dərhal işdən azad edilmələri barədə tapşırıq verib.

Hərbi hissələrdə “Açıq qapı” günü keçirilib

26.10.2015

Müdafiə Nazirliyinin məlumatına görə, hərbi hissələrdə “Açıq qapı” günü tədbiri keçirilib. Oktyabrın 25-də Əlahiddə Ümumqoşun Ordusu, birlik, birləşmə və hərbi hissələrdə, Hərbi Hava Qüvvələrinin aviabazalarında, Hərbi Dəniz Qüvvələrinin gəmilərində, o cümlədən xüsusi təyinatlı təhsil müəssisələrində səhər saatlarından başlayan “Açıq qapı” günü tədbirlərində əsgər valideynləri və yaxınları, yerli icra orqanlarının nümayəndələri, müharibə veteranları, rayon ictimaiyyəti və təhsil ocaqlarının təmsilçiləri iştirak ediblər.

Ziyarətçilər şəxsi heyətin yaşayış, sosial-məişət şəraitlə yaxından tanış olub, xidməti və inzibati binalarda, əsgər yataqxanaları, yeməkxanalarına baş çəkib, müxtəlif təlim nöqtələrində döyüş texnikası, silah-sursatlara, çöl-səhra şəraitində qida məntəqələrinə, şəxsi heyətin əşya-əmlak təminatında olan nümunələrə baxıb və hərbi qulluqçuların nümunəvi çıxışlarını izləyiblər.

Ölkədə fəaliyyət göstərən kütləvi informasiya vasitələri nümayəndələrinə də hərbi hissələrdə keçirilən «Açıq qapı» gününü izləməyə şərait yaradılıb.

Fərdi uçot sistemində qeydiyyata alınan əcnəbilərin sayı 17,65 faiz artıb

26.10.2015

Dövlət Sosial Müdafiə Fondunun fərdi uçot sistemində qeydiyyata alınan əcnəbilərin sayı bu ilin əvvəli ilə müqayisədə 17,65 faiz artıb. Transparency.az-a verilən məlumata görə, sentyabrda əlavə olaraq 327 nəfər əcnəbi vətəndaş qeydiyyata alınıb, fərdi uçot sistemində onların sayı 26 500 nəfərə yüksəlib.

114 ölkənin vətəndaşlarını əhatə edən əcnəbilər arasında ən yüksək say göstəricisi Тürkiyə vətəndaşları (13 439 nəfər) üzrə müşahidə olunur. İkinci yerdə gələn Gürcüstan vətəndaşlarının sayı 2 903 nəfərə, üçüncü yerdə gələn Rusiya Federasiyasının vətəndaşlarının sayı isə 1 578 nəfərə çatıb.

Sonrakı yerlərdə İran İslam Respublikası (957), Hindistan (924), Çin Xalq Respublikası (843), Böyük Britaniya (539), Pakistan İslam Respublikası (525), Ukrayna (389), Banqladeş Xalq Respublikası (367), Özbəkistan (266), Almaniya Federativ Respublikası (236), Filippin Respublikası (230), ABŞ (224), Türkmənistan Respublikası (209), Qazaxıstan Respublikası (199), Koreya (189), İtaliya Respublikası (185) qərarlaşıb.

Dövlət fondu sosial sığorta hesabatı sayıb

26.10.2015

Bu ilin əvvəli ilə müqayisədə Dövlət Sosial Müdafiə Fondunun fərdi uçot sistemində qeydiyyatda olan sığortaolunanların sayı 5,38 faiz artıb. Fonddan Transparency.az-a verilən məlumata görə, Azərbaycanda fərdi şəxsi hesabı olan sığortaolunanların sayı 3 milyon 136 min 356 nəfərə çatıb.

Fondun fərdi uçot sistemində qeydiyyatda olan sığortaolunanların 59,18 faizi (1 856 005 nəfər) kişi, 40,82 faizi (1 280 351 nəfər) isə qadındır.

Fərdi şəxsi hesabı olanlar arasında 30-40 yaş aralığında olan sığortaolunanlar üstünlük təşkil edir. Göstərilən yaş kateqoriyalarına aid olan şəxslər ümumi sığortaolunanların 25 faizini (783 806 nəfər) əhatə edir.

Fərdi uçot sistemində qeydiyyatda olan sığortaolunanların 21,26 faizi (666 819 nəfər) 30 yaşa kimi olan şəxslər, 20,58 faizi (645 639 nəfər) 40-50 yaş aralığında olan şəxslər, 21,18 faizi (664 266 nəfər) 50-60 yaş aralığında olan şəxslər, 11,98 faizini (375 826 nəfər) 60 yaşdan yuxarı olan şəxslərdir.

Sabiq komediya aktyoru prezident seçildi

26.10.2015

Oktyabrın 25-i Mərkəzi Amerika dövləti Qvatemalada prezident seçkisinin ikinci turu keçirilib. Seçkidə 46 yaşlı sabiq komediya aktyoru Cimmi Morales qalib gəlib.

Novator.az xəbər verir ki, Ali Seçki Tribunalı Moralesin 69% səs topladığını bəyan edib. Moralesin rəqibi, sabiq birinci ledi Sandra Torres səslərin 31%-ni yığıb.

4 uşaq atası olan Morales Qvatemalanın 50-ci prezidentidir. O, ölkəni silkələyən korrupsiya qalmaqalı fonunda dövlət başçısı seçilib. Sentyabrda Qvatemala prezidenti Otto Peres Molina istefa verib və həbs edilib. Baş Prokurorluğun irəli sürdüyü ittihamlara görə, Molina yüksək rütbəli məmurlarla birgə korrupsiya sxemi qurub, gömrük rüsumlarının azaldılması üçün iş adamlarından rüşvət alınmasına rəhbərlik edib.

Müsavat seçkini dayandırmaq tələbi qoyub

26.10.2015

Müsavat Partiyası 1 noyabr parlament seçkisini dayandırmaq tələbi irəli sürüb. Oktyabrın 25-də partiya paytaxtın Yasamal rayonunda, İdman Sağlamlıq Kompleksinin stadionunda mitinq keçirib. Musavat.com xəbər verir ki, partiyanın başqanı, 33 saylı Xətai dairəsindən deputatlığa namizəd Arif Hacılı çıxışında qeyd edib ki, Müsavatın seçkidən imtinası aktualdır, bu məsələ oktyabrın 28-də son dəfə müzakirə olunacaq.

Partiyanın sabiq başqanı, 15 saylı Yasamal dairəsindən deputatlığa namizəd İsa Qəmbər son günlər ölkədə baş verən hadisələrə toxunaraq hakimiyyəti ittiham edib: “Milli təhlükəsizlik nazirinin hansı oyunlardan çıxdığı rəsmi şəkildə etiraf olunur. İlham Əliyev bilirdi ki, Milli Təhlükəsizlik Nazirliyi özünün bilavasitə funksiyaları ilə məşğul olmaq əvəzinə xalqa qarşı fəaliyyət göstərir, demokratik düşərgəyə qarşı fəaliyyət göstərir. Amma elə danışır ki, guya indi bilir bu nazirlik milli təhlükəsizliklə məşğul olmaq əvəzinə biznes strukturuna çevrilib. İlham Əliyev indi bilib ki, bu nazirik Azərbaycanda iş adamlarına divan tuturmuş, şantaj edirmiş, adamların sərvətlərini, var-yoxlarını əlindən alırmış. İndi məlum olur ki, Milli Təhlükəsizlik Nazirliyi deyil, milli təhlükə nazirliyi, Azərbaycan dövlətinə təhlükə nazirliyidir. Söhbət təkcə bu nazirlikdən getmir, bütün nazirliklər bu gündədir”.

Mitinqin qətnaməsində deyilir: “Ölkədə azad və ədalətli seçkilərin keçirilməsi üçün seçkiqabağı demokratik şərait yoxdur. Seçki qanunvericiliyi belə seçkilərin keçirilməsinə imkan vermir. Seçki komissiyaları tam olaraq hakimiyyətin nəzarəti altındadır. Bərabərhüquqlu təbliğat imkanları mövcud deyil, xüsusilə pulsuz efir vaxtının verilməməsi bu imkanları tamamilə aradan qaldırıb. Yüzədək siyasi məhbusun olması, seçki kampaniyası dövründə də repressiyaların davam etməsi, söz və ifadə azadlığına qarşı davamlı basqılar, saxtakarlıqların və qanun pozuntularının vüsət alması vəziyyəti bir qədər də ağırlaşdırır”.

Müsavat Partiyası bu tələbləri qoyub: “Siyasi məhbuslar azad edilsin! Azad və ədalətli seçkilərin keçirilməsi üçün normal mühit yaradılsın! Seçki qanunvericiliyində əsaslı dəyişikliklər edilsin, ilk növbədə seçki komissiyalarının müstəqilliyi təmin edilsin! Bərabərhüquqlu təbliğat imkanlarının təmin edilməsi, xüsusilə ictimai diskussiyaların təşkil edilməsi məqsədi ilə pulsuz efir vaxtı ayrılsın! Seçki kampaniyası dövründə Müsavat Partiyasından olan və digər namizədlərin imzatoplama, eyni zamanda təbliğat kampaniyasına qeyri-qanuni müdaxilə edən yerli hakimiyyət və icra orqanlarının nümayəndələri barədə ciddi tədbir görülsün! Bütün bu və digər zəruri tədbirlərin görülməsi üçün parlament seçkisi dayandırılaraq dörd ay sonraya təyin edilsin!”

Parlament seçkisi noyabrın 1-də 125 dairə üzrə keçiriləcək. Müsavatın 25 namizədi qeydə alınıb.

Seçki yarışına daha 23 siyasi partiya (Yeni Azərbaycan Partiyası, Milli İstiqlal Partiyası, Vətəndaş Həmrəyliyi Partiyası, Ümid Partiyası, Sosial Demokrat Partiyası, Xalq Partiyası, Ədalət Partiyası, Böyük Quruluş Partiyası, Demokratik İslahatlar Siyasi Partiyası, Bütöv Azərbaycan Xalq Cəbhəsi Partiyası, Klassik Xalq Cəbhəsi Partiyası, Vətəndaş və İnkişaf Partiyası, Milli Dirçəliş Hərəkatı Partiyası və s.) qatılıb.

Hökumət rəsmisi kölgə iqtisadiyyatı barədə sualları cavablandırıb

26.10.2015

Dövlət Statistika Komitəsi sədrinin müavini Rauf Səlimov ANS TV-nin “Hesabat” verilişinin qonağı olub. O, kölgə iqtisadiyyatı barədə sualları da cavablandırıb.

- Kölgə iqtisadiyyatı deyiləndə konkret nə nəzərdə tutulur?

- Belə bir anlayış var — gizli iqtisadiyyat və yaxud kölgə iqtisadiyyatı. Lakin gizli iqtisadiyyatla yanaşı bərabər müşahidə olunmayan digər üç element də var: qeyri-qanuni fəaliyyət, ev təsərrüfatlarının öz şəxsi istehlakı üçün istehsal etdiyi mallar və qeyri-formal fəaliyyət.

- Bu gün Azərbaycanda kölgə iqtisadiyyatı neçə faiz təşkil edir?

- Kölgə iqtisadiyyatı və bundan öncə də sadaladığım üç komponent daxil olmaqla müşahidə olunmayan iqtisadiyyatın ümumi daxili məhsulda payı 2013-cü ilin statistik məlumatına görə, 9,1 faizdir. Hazırda biz 2014-cü ilin statistikası üzərində iş aparırıq, müşahidə olunmayan iqtisadiyyatın ümumi daxili məhsulda payı təxminən 9 faiz səviyyəsində gözlənir.

- Bəzən bu rəqəm 25-30 faiz göstərilir. Bu informasiyalar nə dərəcədə etibarlıdır?

- Müşahidə olunmayan iqtisadiyyatın ümumi daxili məhsulda payını hətta 50-60 faiz həddində qiymətləndirənlər var. Lakin təhlil zamanı ilk növbədə ümumi daxili məhsulun tərkibinə baxmalıyıq. Hazırda ümumi daxili məhsulun tərkibində neft sektoru 31-32 faizdir. Neft sektorunda gizli iqtisadiyyat yoxdur. Azərbaycan mədən sənayesində şəffaflıq təşəbbüsünə qoşulub və bu sahədə Dövlət Neft Fondu BMT-nin mükafatını alıb. Burda üçtərəfli koalisiya var. Bütün neft şirkətləri hesabatlar verir və bu sahədə şəffaflıq tam şəkildə təmin edilib. Hamı qəbul edir ki, bizim neft sektorunda kölgə iqtisadiyyatı, gizlədilmiş, uçotdan yayındırılmış məhsul yoxdur.

İqtisadiyyatın digər sahələrinə nəzər yetirdikdə görərik ki, uçotdan bilərəkdən gizlədilən hissə — ticarət sahəsində 29, daşınmaz əmlakla əlaqədar əməliyyatlarda 31, tikintidə isə 12 faiz təşkil edir. Amma biz informasiya, rabitə, elektrik enerjisinin istehsalı və su təchizatı sahəsində gizli iqtisadiyyat müşahidə etmirik. Bir sıra sahələrdə uçotdan yayınan məhsul və xidmətlər ümumiyyətlə yoxdur.

- Son illərdə ümumiyyətlə hansı tendensiya müşahidə olunur? Kölgə iqtisadiyyatı artır, yoxsa azalır?

- 2003-cü ildə kölgə iqtisadiyyatının ümumi daxili məhsulda payı 20,7 faiz idi. İndi isə 9,1 faizdir. 10 il bundan öncə mənfəət vergisi 27 faiz idisə, indi 20 faizdir. Fiziki şəxslərin gəlir vergisinin yuxarı həddi 35 faiz idisə, indi 25 faizdir. Bu amillər sahibkarın kölgədən çıxıb daha şəffaf, rəsmi qaydada fəaliyyət göstərməsinə zəmin yaradır.

- Azərbaycanda kölgə iqtisadiyyatı hansı həddə yol veriləndir və o yol verilən həddə çatmaq üçün dövlət hansı işləri görməlidir? Yəni vəziyyətimiz indi təhlükəli həddə deyil ki?

- Xeyr. Cənab prezidentin bu yaxınlarda verdiyi göstəriş və sərəncamdan bilirsiniz ki, sahibkarlar iki il ərzində yoxlamalardan tam azad olunublar. Bu o deməkdir ki, onların uçotdan nəyisə gizlətməsinə artıq heç bir səbəb yoxdur.

Sabiq baş nazir Korrupsiyaya Qarşı Mübarizə üzrə Dövlət Komissiyasının yenidən təşkilini istəyir

26.10.2015

Sabiq baş nazir, Azərbaycan Xalq Partiyasının sədri, “Azadlıq-2015” blokunun 63 saylı Sabirabad birinci seçki dairəsindən deputatlığa namizədi Pənah Hüseyn seçki platformasında korrupsiya ilə mübarizə, sosial-iqtisadi problemlər və idarəetmə islahatları məsələlərinə də yer verib. Transparency.az-ın məlumatına görə, sabiq baş nazir qeyd edir ki, siyasi və iqtisadi hakimiyyətlər ayrılmalı və onların arasında sağlam, yalnız qanunlarla tənzimlənən rəqabət mühiti bərqərar edilməlidir: “Adı ciddi korrupsiya iddialarında hallandırılan məmurlar vəzifədən uzaqlaşdırılmalı, barələrində təhqiqat başlanmalı və təhqiqat başa çatana qədər onların ali dövlət hakimiyyəti orqanlarında rəhbər vəzifələr tutmalarına yol verilməməlidir”.

Partiya lideri informasiya haqqında qanunun liberallaşdırılmasını və diffamasiya haqqında qanunun qəbulunu vacib sayır, QHT-lərin qeydiyyatının sadələşdirilməsini və onların sərbəst fəaliyyət imkanlarının təmin edilməsini istəyir.

Pənah Hüseynin digər təklifi yeni konstitusiyanın qəbulu, prezident respublikasından parlament respublikasına keçid haqda geniş ictimai diskussiyalar aparılmasıdır. O, hakimiyyətin bölünməsi prinsipinə nail olmaq məqsədi ilə Nazirlər Kabinetinin və Milli Məclisin səlahiyyətləri genişləndirilməsi təklifi irəli sürür.

Namizədin seçki platformasında bu təkliflər də var:

- Hakimiyyət orqanlarında rəhbər vəzifələrə seçilmə, vəzifə müddəti, təkrar seçilmə və s. kimi məhdudiyyət proseduralarının konstitusiyada təsbit edilməsi;

- Təhlükəsizlik sektoru üzərində parlament nəzarətinin təmin edilməsi məqsədi ilə müvafiq hakimiyyət strukturlarının Milli Məclisə hesabatlılığı qaydasının təsbit edilməsi. Silahlı Qüvvələrdə peşəkar xidmət hərbi qulluqçularının sayının artırılması hesabına həqiqi hərbi xidmət müddətinin azaldılması. Bütün ali təhsil pillələri üzrə hərbi xidmətə möhlət hüququnun tətbiq edilməsi;

- Qanunvericilikdə iri şəhər bələdiyyələrinin yaradılması və bələdiyyə başçılarının birbaşa seçilməsi qaydasının təsbit olunması;

- Korrupsiyaya Qarşı Mübarizə üzrə Dövlət Komissiyasının siyasi müxalifətin və vətəndaş cəmiyyətinin iştirakı ilə yenidən təşkil edilməsi. Mətbuatın və vətəndaş cəmiyyəti sektorunun təmsilçiliyi əsasında müstəqil antimonopoliya komissiyasının yaradılması və şəffaf şəkildə fəaliyyəti;

- Yüksək vəzifəli məmurların və onların yaxın qohumlarının əmlaklarının, kapitalının və gəlirlərinin bəyan edilməsi qaydasının tətbiqi;

- Dövlət büdcəsindən maliyyələşən iş və xidmətlərin məcburi monitorinqi;

- İqtisadi-maliyyə amnistiyası elan edilməsi. Leqallaşmış xüsusi mülkiyyətin toxunulmazlığına təminat verilməsi;

- İqtisadi fəaliyyət azadlığı və biznes mühitinin yaxşılaşdırılması üçün tədbirlər görülməsi, o cümlədən, orta və xırda biznes üzrə ombudsman institutunun yaradılması;

- Xırda və orta biznesdən alınan vergilərin, o cümlədən gömrük vergilərinin ağlabatan həddə qədər azaldılması. Azərbaycanın Dünya Ticarət Təşkilatına daxil olması;

- Maaş və sosial ödənişlərin minimum hədləri və ya baza hissələrinin  orta inkişaf etmiş Avropa ölkələri səviyyəsinə qədər artırılması;

- Kredit böhranının həlli üzrə dövlət proqramının hazırlanması və həyat keçirilməsi;

- Neft gəlirlərindən hər bir vətəndaşa birbaşa pay verilməsinin təmin edilməsi;

- Dövlət ali təhsil müəssisələrində ödənişli təhsil sistemi ləğv edilməsi. Ödənişli təhsil sistemi saxlandığı müddətdə təhsil haqlarının artırılmasına yol verilməməsi…

Pənah Hüseyn milli azadlıq hərəkatının liderlərindən, Xalq Cəbhəsinin qurucularındandır. Əbülfəz Elçibəyin prezidentliyi zamanı (1992-93) dövlət katibi və baş nazir postlarını tutub. 1993-cü ildən bəri iki dəfə uzun müddətə həbsdə yatıb. 2005-2010-cu illərdə 63 saylı Sabirabad birinci seçki dairəsindən Milli Məclisin deputatı olub.

Parlament seçkisi noyabrın 1-də 125 seçki dairəsinin 5386 məntəqəsində keçiriləcək.

Dövlət Neft Fondunun 9 aylıq gəlir-çıxarı bəlli olub

26.10.2015

Dövlət Neft Fondu 9 aylıq gəlir-çıxarını açıqlayıb. Transparency.az-a verilən məlumata görə, bu ilin yanvar-sentyabr aylarında Neft Fondunun gəlirləri 5 milyard 543,4 milyon manat, xərcləri isə 6 milyard 397,1 milyon manat olub.

Neft və qaz sazişlərinin həyata keçirilməsi ilə bağlı gəlirlər 5 milyard 492,2 milyon manat göstərilir. Mənfəət neftinin və qazın satışından 5 milyard 479,5 milyon manat, akrhesabı ödənişlərdən 2,2 milyon manat, bonus ödənişlərindən 2,1 milyon manat, tranzitdən 8,4 milyon manat əldə edilib.

Fondun vəsaitinin idarə olunmasından əldə edilən gəlirlər 51,2 milyon manatdır.

Valyuta məzənnələrinin dəyişməsindən yaranan fərqdən fond 7 milyard 828,3 milyon manat büdcədənkənar gəlir götürüb.

Hesabat dövrü ərzində dövlət büdcəsinə 5 milyard 650 milyon manat transfert edilib. Bu, keçən ilin müvafiq dövrünə nisbətən 1 milyard 749,7 milyon azdır.

2015-ci il oktyabrın 1-nə fondun aktivləri bu ilin əvvəlinə (37 104,1 milyon ABŞ dolları) nisbətən 6,38% azalaraq 34 738,1 milyon ABŞ dollarına bərabər olub.

Dövlət Məşğulluq Xidməti üç rübdə görülən işlərlə bağlı hesabat iclası keçirib

26.10.2015

Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti 9 ayda görülən işlərlə bağlı hesabat iclası keçirib. Transparency.az-ın məlumatına görə, hesabat məruzəsi ilə çıxış edən Dövlət Məşğulluq Xidmətinin əmək bazarının təhlili və statistika şöbəsinin müdiri İsa Həsənov bildirib ki, bu ilin 9 ayı ərzində ümumilikdə 22470 nəfər işaxtaran və işsiz vətəndaş münasib işlərlə təmin olunub: “Məşğulluq orqanlarında qeydiyyata alınan və xüsusi peşə hazırlığı olmayan işaxtaran və işsiz şəxslərdən 1200 nəfərə yaxını idarə, müəssisə və təşkilatlarla bağlanmış müqavilələr əsasında ödənişli ictimai işlərə cəlb edilib. Xidmətin Bakı, Sumqayıt, Gəncə, Mingəçevir şəhərlərindəki əmək birjaları vasitəsilə 3089 nəfər müvəqqəti xarakterli işlərə göndərilib. Qeyd olunan dövrdə 2878 nəfərə işsiz statusu verilib, 3142 nəfərə isə işsizlik müavinəti təyin edilib”.

Hesabata əsasən, 9 ayda peşə və ixtisası olmadığından münasib iş yeri seçməkdə çətinlik çəkən, yaxud peşə vərdişlərinə uyğun gələn iş olmadığı üçün öz peşəsini dəyişməsi zəruri olan 2776 nəfər şəxs peşə hazırlığı və əlavə təhsil kurslarına cəlb olunub, əsasən orta ümumtəhsil məktəblərinin yuxarı sinif şagirdlərindən ibarət 72857 nəfər vətəndaşa peşəyönümü məsləhətləri verilib.

Bu ilin ötən dövründə keçirilən 54 əmək yarmarkasında 4119 nəfər işsiz və işaxtaran vətəndaşa boş (vakant) iş yerlərinə göndərişlər verilib, onlardan 3641 nəfəri (88,4%) göndərişlər üzrə münasib iş yerləri ilə təmin olunublar. Bu tədbirlərdə 440 nəfər peşə hazırlığı kurslarına, 229 nəfər haqqı ödənilən ictimai işlərə cəlb edilib.

İqtisadiyyat və Sənaye Nazirliyi lisenziya verilən ünvanları açıqlayıb

26.10.2015

İqtisadiyyat və Sənaye Nazirliyinin sahibkarlığın inkişafı siyasəti şöbəsinin müdiri Elçin İbrahimov Economy.gov.az-a lisenziyaların verilməsi ilə yeniliklərdən danışıb. O deyib ki, dövlət başçısının 19 oktyabr 2015-ci ildə imzaladığı “Sahibkarlıq fəaliyyətinin xüsusi razılıq (lisenziya) tələb olunan növlərinin sayının azaldılması, xüsusi razılıq (lisenziya) verilməsi prosedurlarının sadələşdirilməsi və şəffaflığının təmin edilməsi haqqında” fərmanına əsaslanan İqtisadiyyat və Sənaye Nazirliyi lisenziya tələb olunan fəaliyyət növlərinin sayının minimuma endirilməsi və dövlət təhlükəsizliyindən irəli gələn hallarla əlaqədar xüsusi razılıq (lisenziya) tələb olunan fəaliyyət növlərinin müəyyən olunması ilə bağlı təkliflər hazırlayır: “Qüvvədə olan qanunvericiliyə əsasən lisenziyalaşdırılan fəaliyyətə yeni başlamaq istəyən sahibkarlara əlavə xərc çəkməmək üçün yeni siyahının təsdiq olunmasını gözləməyi tövsiyə edirik. Yeni siyahı və qaydalar təsdiq olunanadək lisenziyaların verilməsi prosesinə gəlincə, həm normativ-hüquqi bazanın təkmilləşdirilməsi, həm də texniki-təşkilati istiqamətlər üzrə işlər aparılır, “ASAN xidmət” mərkəzlərində sahibkarlara xidmətin yüksək səviyyədə göstərilməsi üçün İqtisadiyyat və Sənaye Nazirliyinin əməkdaşlarına müvafiq treninqlər keçirilir.

Noyabrın 2-dən müddəti bitən lisenziyaların yenisi ilə əvəz edilməsi üçün sənədlərin qəbulu prosesinə başlanacaq. Növbəti mərhələdə isə qısa müddət ərzində yeni fəaliyyətə başlamaq istəyən sahibkarlara lisenziyaların (ilk dəfə) verilməsi ilə bağlı müraciətlərin qəbuluna start verilməsi nəzərdə tutulur”.

Bakıda lisenziyalar 5 saylı “ASAN xidmət” mərkəzində (Nizami rayonu, Heydər Əliyev prospekti 115) veriləcək. Regionlardakı “ASAN xidmət” mərkəzlərinin ünvanları da Economy.gov.az-da yerləşdirlib. Qaçqın və məcburi köçkün olan sahibkarlar fəaliyyət göstərdikləri ərazi üzrə “ASAN xidmət” mərkəzlərinə müraciət edə bilərlər.

Lisenziya verilən ünvanlar

Seçkiqabağı təşviqatı 767 namizəd davam etdirir

26.10.2015

Milli Məclisə noyabrın 1-də keçiriləcək seçki ilə bağlı yeni rəqəmlər açıqlanıb. AZƏRTAC xəbər verir ki, seçkiqabağı təşviqatı qeydə alınan 767 namizəd davam etdirir. Təşviqat səsverməyə 24 saat qalmış başa çatacaq.

Seçkiyə çağırış bildirişlərinin paylanması işləri yekunlaşıb. Ölkə üzrə 5 milyon 200 minə yaxın vətəndaş seçici siyahılarında qeydiyyatdadır.

Seçkini izləmək istəyən 500-ə yaxın beynəlxalq müşahidəçi qeydiyyatdan keçib. Onlar 37 beynəlxalq təşkilatın nümayəndələridir. Yerli müşahidəçilərin sayı isə 60 minə yaxındır.

Sahibkarlıq sahəsində yoxlamaları dayandıran qanun imzalandı, siyahı təsdiqləndi

27.10.2015


Prezident İlham Əliyev sahibkarlıq sahəsində aparılan yoxlamaları dayandıran qanunu imzalayıb. Transparency.az bildirir ki, qanun 4 maddədən ibarətdir: