Xəbər bülleteni №22

ABŞ-da ilkin seçkilər

02.02.2016


ABŞ-da prezidentliyə iddiaçıların ilkin seçki yarışı Ayova ştatından başlayıb. Novator.az-ın məlumatına görə, fevralın 1-i Ayovada keçirilmiş ilkin seçkini respublikaçılardan senator Ted Kruz udub. Milyarder Donald Tramp və senator Marko Rubio ondan bir az geri qalıblar.

Demokratlara gəlincə, sabiq dövlət katibi, 1993-2001-ci illərdə prezident postunu tutmuş Bill Klintonun xanımı Hillari Klinton Berni Sandersi cüzi fərqlə geridə qoyub. Martin O’Melli 0,6% səs toplayaraq yarışı tərk edib. Respublikaçı Mayk Hakabi də eyni addımı atıb.

Respublikaçılar prezidentliyə namizədi 18-21 iyul qurultayında, demokratlar 25-28 iyul qurultayında seçəcəklər. Namizəd olmaq üçün ilkin seçkilərdə respublikaçı iddiaçı qurultaya 1237, demokrat iddiaçı 2383 nümayəndə qazanmalıdır.

ABŞ-da prezident seçkisi 2016-cı ilin noyabrın 8-də keçiriləcək.

Məhkəmədə insident: zala qaz buraxıldı

02.02.2016


Fevralın 2-si Bakı Ağır Cinayətlər Məhkəməsində mərhum jurnalist, ANN.TV-nin reportyoru Rasim Əliyevi döyərək öldürməkdə təqsirləndirilən Elşən İsmayılov, Camal Məmmədov, Arif Əliyev, Kənan Mədətov və Samir Mustafayevin mühakimə prosesində insident baş verib. Nəticədə məhkəmə prosesi yarımçıq qalıb.

ANN.Az-ın məlumatına görə, hadisə hakim Eldar İsmayılov həkimlərin ifadə verməsinə dair vəsatəti təmin etməyəndən sonra olub. Dörd şahid dindiriləndən sonra zərərçəkən tərəfin vəkili Fariz Namazov həkimlərin məsuliyyəti və əlavə şahidlərin dindirilməsi üçün vəsatət qaldırıb. Hakim vəsatəti təmin etmədikdən sonra etiraz səsləri artmağa başlayıb.

Hakim Eldar İsmayılov vəsatətin təmin olunmadığını elan edən kimi mərhum jurnalistin valideynləri zalda stulların üzərinə çıxaraq qışqırmağa, hakim və məhkəmə heyətinə etiraz etməyə başlayıb. Elə bundan sonra Elşən İsmayılov, Camal Məmmədov, Arif Əliyev, Kənan Mədətov və Samir Mustafayev də qışqırmağa, yumruqla divara və saxlandıqları dəmir barmaqlıqlara vurmağa başlayıblar. Hakim aranın sakitləşməsinə çalışsa da, buna müvəffəq olmayıb. Bundan sonra zala məhkəmə mühafizəçiləri gəlib, lakin onlar da valideynləri və ittiham olunanları sakitləşdirə bilməyiblər. Mühafizəçilər zala bibər qazı buraxıblar, boğucu qaz iyindən sonra zaldakı etirazçılar küçəyə çıxmağa məcbur olublar.

Etirazçılar küçədə də qışqırmağa və binanın qarşısındakı avtomobillərə zərbələr endirməyə başlayıblar.

Onlar məhkəməyə inanmadıqlarını, prosesin sifarişlə keçirildiyini deyiblər.

ANN.TV-nin reportyoru Rasim Əliyevi ötən il avqustun 8-də bir qrup şəxs döyüb. Jurnalist bir gün sonra xəstəxanada keçinib. Hadisə ilə bağlı “Qəbələ” klubunun futbolçusu Cavid Hüseynov, onun bibisi oğlu və daha 4 nəfər həbs olunub.

Bakı Şəhər Prokurorluğunda aparılan istintaq müəyyən edib ki, Cavid Hüseynov avqustun 6-da “Qəbələ” klubunun heyətində Kiprin “Apollon” klubu ilə Bakı şəhərində keçirilən oyunda iştirakından sonra jurnalistlərin suallarını cavablandırarkən yol verdiyi hərəkətlərə görə şəxsi “Facebook” səhifəsində tənqidi fikirlər yazmış Rasim Əliyevə zəng edərək ondan təkzib verməyi tələb edib.

Bundan sonra Cavid Hüseynovun bibisi oğlu Elşən İsmayılov da Rasim Əliyevə zəng edərək təkzib verməsini tələb edib və bu zəmində aralarında mübahisə yaranıb. Nəticədə Elşən İsmayılov Rasim Əliyevdən qisas almaq məqsədilə özünə yaxın olan Camal Məmmədov, Arif Əliyev, Kənan Mədətov və Samir Mustafayevdən ibarət qrup yaradaraq avqustun 8-i saat 16 radələrində Bayıl qəsəbəsində “Bayıl market” mağazasının qarşısında onunla görüşüb. Onlar Rasim Əliyevə əl və ayaq zərbələri ilə daxili orqanlarının zədələnməsinə səbəb olan çoxsaylı ağır dərəcəli bədən xəsarətləri yetirib hadisə yerindən qaçıblar. Təcili-tibbi yardım vasitəsilə Bakı Kliniki Tibbi Mərkəzə çatdırılmasına və üzərində müalicə və əməliyyat aparılmasına baxmayaraq Rasim Əliyevin həyatını xilas etmək mümkün olmayıb və o, avqustun 9-u saat 5 radələrində orada vəfat edib.

Kənan Mədətov, Camal Məmmədov, Samir Mustafayev, Elşən İsmayılov, Arif Əliyev zərərçəkmiş şəxsin ölümünə səbəb olan qəsdən sağlamlığa ağır zərər vurmada təqsirləndirilirlər. Rasim Əliyevə məxsus mobil telefonun oğurlanaraq sındırılması epizoduna görə Arif Əliyevə və Elşən İsmayılova oğurluq ittihamı da irəli sürülüb.

Cavid Hüseynov Cinayət Məcəlləsinin 307.1 (ağır cinayətin törədilməsi və hazırlanmasını bilərək həmin cinayət barəsində xəbər verməmə) və 307.2-ci (qabaqcadan vəd etmədən ağır cinayəti gizlətmə) maddələri ilə təqsirləndirilir. Onun işi ayrıca icraata ayrılıb. Cinayətin Cavid Hüseynovun təhriki ilə törədilməsi fərziyyəsi də araşdırılıb.

Yanvarın 26-sı Bakı Ağır Cinayətlər Məhkəməsindəki prosesdə şahid ifadəsi verən Cavid Hüseynov deyib ki, Rasim Əliyevin döyülməsində heç bir rolu olmayıb.

İqtisadi Azadlıq İndeksi açıqlanıb

02.02.2016


2016-cı il üçün İqtisadi Azadlıq İndeksi açıqlanıb. İndeksi “Wall Street Journal” qəzeti və “Heritage” Fondu birgə hazırlayıb.

Transparency.az xəbər verir ki, İqtisadi Azadlıq İndeksi 178 ölkəni əhatə edir. Azərbaycan bu siyahıda 91-ci yerdədir və qismən azad ölkə sayılır.

İqtisadi cəhətdən ən azad ölkələr siyahısında 5 ölkənin adı yer alır. 1-ci yerdə Honkonq, 2-ci yerdə Sinqapur, 3-cü yerdə Yeni Zelandiya, 4-cü yerdə İsveçrə, 5-ci yerdə Avstraliya gəlir.

Əsasən azad ölkələr qrupunda keçmiş SSRİ məkanından Estoniya (ümumi sıralamada 9-cu), Litva (13), Gürcüstan (23) və Latviya (36), digər dövlətlərdən Böyük Britaniya (10), ABŞ (11), Almaniya (17), Yaponiya (22) var.

Qismən azad ölkələrə reytinqin tərtibçiləri keçmiş SSRİ məkanından Ermənistanı (54), Qazaxıstanı (68), Azərbaycana qonşu ölkələrdən Türkiyəni (79) daxil ediblər.

İqtisadiyyatı əsasən azad olmayan ölkələr sırasında Qırğızıstanın (96), Moldovanın (117), Tacikistanın (149), Rusiyanın (153) adlarına rast gəlmək mümkündür.

İqtisadiyyatı azad olmayan ölkələr sırasında Belarus (157), Ukrayna (162), Özbəkistan (166), İran (171), Türkmənistan (174) var.

Siyahının sonuncu pilləsi olan 178-ci yerdə Şimali Koreya dayanır.