Xəbər bülleteni №3
Yüklə 0,51 Mb.
|
|
Banka aidiyyəti olan şəxslər sırasına bankda mühüm iştirak payı olan şəxslər, bankın inzibatçıları, struktur bölmələrinin rəhbərləri, qərar qəbulu prosesində iştirak edənlər və onların yaxın qohumları daxildir. Bu dəyişiklik nədən ibarətdir və bank sektoruna nə kimi təsir göstərəcək? Transparency.az-a danışan iqtisadçı ekspert Samir Əliyev deyir ki, Mərkəzi Bank fəaliyyət göstərən bankların kapitalına dair bir sıra normativ müəyyənləşdirib: “Həmin normativə əsasən, məcmu kapitalın adekvatlıq əmsalı 12 faizdən, I dərəcəli kapitalın adekvatlıq əmsalı isə 6 faizdən az olmamalıdır. Banklar leverec əmsalını 6 faizdən az olmayan səviyyədə saxlamalıdır. Müşahidələr göstərir ki, heç də bütün banklar bu tələbləri yerinə yetirə bilmir. Devlavasiya zərbəsi nəticəsində bankların kapitalında ciddi problemlər yaranıb. Hətta 50 milyon manatlıq həddi keçməyə müvəffəq olmuş banklar yenidən kapital çatışmazlığı ilə üzləşiblər. Ötən il adekvatlıq əmsalı bank sistemində ortalama 19 faiz olduğu halda bu il əmsal kəskin azalıb və normadan aşağı düşüb. İyunun 1-dən sonra adekvatlıq hesablanan zaman aidiyyəti şəxslərə verilmiş kreditlərin 100 faiz nəzərə alınması durumu daha da pisləşdirir. Deməli, banklar kapitalın artırılmasında daha dayanıqlı vəsait cəlb etməyə vadar olacaq, kreditlərə isə təkcə aidiyyəti şəxslərə yox, həm də təsadüfi müştərilərə veriləcək”. Ekspert deyib ki, 8 ay təxirə salınan proses konsolidasiyaya xidmət edir və bankların manevr imkanını məhdudlaşdırır: “Yəni Mərkəzi Bankın normativini yerinə yetirməyən banklar, xüsusən də kiçik banklar lisenziyanı itirmək təhlükəsi ilə üzləşə bilərlər. Bu isə onların bazarı tərk etməsi deməkdir. Deməli, bütün yollar bankların sayının azaldılmasına aparır. Əmanətlərin Sığortalanması Fondu yəqin ki, bir nömrəli hazırlıq vəziyyətinə gətirilib. Elə əhalinin əsəbləri də son həddədir. Hazırda bütün gözlər Mərkəzi Banka baxır”. Media sərəncamı büdcəyə ayda 5660 manata başa gələcək 22.07.2015 Bu ay Azərbaycanda 61 jurnalistə “Əməkdar” fəxri adı verildi – prezidentin sərəncamı ilə 44 nəfər əməkdar jurnalist, 17 nəfər əməkdar mədəniyyət işçisi fəxri adı aldı. Transparency.az bildirir ki, 61 nəfərin təqaüdü dövlət büdcəsinə ayda 3660 manata başa gələcək. Azərbaycanda “Əməkdar” fəxri adı üçün 60 manat təqaüd müəyyən edilib (“Xalq” fəxri adı üçün təqaüdün məbləği 100 manatdır). İyulda daha 2 jurnalistə prezidentin fərdi təqaüdü kəsilib. Bu təqaüdün məbləği 1000 manatdır. İki yeni fərdi təqaüdçü üçün büdcədən ayda 2000 manat ödənəcək. Beynəlxalq Bank rəhbərlərini dəyişdi. Kurs da dəyişir 23.07.2015
İyulun 22-də Azərbaycan Beynəlxalq Bankı səhmdarlarının növbədənkənar ümumi yığıncağı keçirilib. Yığıncaqda bankda dövlətə məxsus səhmlərin özəlləşdirilməyə hazırlanması fərmanından (Fərman) irəli gələn vəzifələr müzakirə edilib, Müşahidə Şurasının və İdarə Heyətinin tərkibi, bankın səhmlərinin formasının dəyişdirilməsi barədə məsələlərə baxılıb. Beynəlxalq Bankın İdarə Heyətinin əvvəlki sədri Cahangir Hacıyev bu il martın 18-də istefa verib. O zamandan sədrin səlahiyyətlərini Emil Mustafayev icra edirdi. Transparency.az www.ibar.az-a istinadla xəbər verir ki, səhmdarların 22 iyul toplantısında bankın Müşahidə Şurasının tərkibi 7 nəfərdən 5 nəfərə endirilib. Emil Mustafayev, Vaqif Əkbərov, Qubad Hüseynov və Rəşad Hacıyev səlahiyyət müddətlərinin başa çatması ilə əlaqədar İdarə Heyətinin üzvlüyündən və tutduqları vəzifələrdən azad ediliblər. İdarə Heyətinin yeni tərkibi seçilib, Elmar Məmməd oğlu Məmmədov 4 il müddətinə İdarə Heyətinin sədri vəzifəsinə, Murad Oqtay oğlu Şirəliyev və Ülvi Eldar oğlu Mansurov isə həmin müddətə İdarə Heyəti sədrinin müavinləri vəzifələrinə təyinat alıblar. Yeni seçilmiş İdarə Heyətinə kredit siyasətinin yenidən işlənib hazırlanması, bankın təşkilati strukturunun və filial şəbəkəsinin təkmilləşdirilməsi barədə tapşırıqlar verilib. Bankın Audit Komitəsinə kreditlərin verilməsi zamanı bank və mülki qanunvericiliyin tələblərinə riayət edilməsi məsələlərinin araşdırılması, aşkar olunmuş nöqsanlara yol vermiş şəxslərin hərəkətlərinə hüquqi qiymət verilməsi və onların məsuliyyətə cəlb olunması üçün tədbirlərin görülməsi həvalə edilib. “Qiymətli kağızlar bazarı haqqında” qanunun qüvvəyə minməsi ilə əlaqədar səhmlərin sənədli formadan sənədsiz formaya dəyişdirilməsi barədə qərar qəbul edilib (Sənədli səhm və istiqraz buraxılışı qadağan edilir). İyulun 15-də prezident İlham Əliyev Beynəlxalq Bankın dövlətə məxsus səhmlərinin özəlləşdirilməyə hazırlanması haqqında fərman verib. Fərmanda qeyd olunub ki, son illər bankın idarə edilməsində və investisiya-kredit siyasətində yol verilmiş nöqsanlar, o cümlədən səmərəsi aşağı olan riskli investisiya layihələrinin maliyyələşdirilməsi bankın maliyyə vəziyyətinin pisləşməsinə, problemli aktivlərinin artmasına və likvidliyinin daralmasına səbəb olub, yaranmış vəziyyətin aradan qaldırılması, bankın maliyyə mövqeyinin bərpası və dayanıqlığının təmin edilməsi üçün problemli aktivlərin bankın idarəetməsindən çıxarılaraq ixtisaslaşmış quruma verilməsi zərurəti yaranıb. Sənədə görə, Maliyyə Nazirliyi və Mərkəzi Bank on beş gün müddətində “Azərbaycan Beynəlxalq Bankı” ASC-yə məxsus problemli aktivləri müəyyən etməli və həmin aktivlərin mərhələli şəkildə müvafiq həcmdə likvid vəsait müqabilində bankın balansından çıxarılıb dövlətə məxsus “Aqrarkredit” Qapalı Səhmdar Cəmiyyəti Bank Olmayan Kredit Təşkilatının idarəetməsinə verilməsi üçün tədbirlər görməlidir. Ekologiya və Təbii Sərvətlər Nazirliyi “Qaynar xətt” hesabatı verdi 23.07.2015 Ekologiya və Təbii Sərvətlər Nazirliyi 24 saat fəaliyyət göstərən 168 saylı “Qaynar xətt”inə 2015-ci ilin aprel-iyun ayları ərzində 955 şikayət daxil olduğunu açıqlayıb. Transparency.az-ın məlumatına görə, açıqlamada deyilir ki, şikayətlərin 901-ni nazirliyin əməkdaşları yerində araşdırıb qanuna müvafiq tədbirlər görüb, digər müraciətlərin araşdırılması isə davam etdirilir. Şikayətlər əsasən ağacların kəsilməsi, aşma təhlükəsinin olması, məişət tullantılarının qalaqlanması, çirkab suların axıdılması, atmosfer havasının çirklənməsi, yerin təkindən istifadə, flora və faunanın mühafizəsi ilə əlaqədar olub. Aprel-iyun ayları ərzində daxil olmuş şikayətlər əsasında Ətraf Mühitin Mühafizəsi Departamentinə göndərilmiş 301 şikayət, Ətraf Mühit üzrə Milli Monitorinq Departamentinə göndərilmiş 44 şikayət, istehsalat siyasəti şöbəsinə göndərilmiş 10 şikayət əsasında tədbirlər görülüb. Dövlət Ekspertiza İdarəsinə göndərilmiş 457 şikayətdən 451-i, Meşələrin İnkişafı Departamentinə göndərilmiş 80 şikayətdən 65-i, Milli Geoloji Kəşfiyyat Xidmətinə göndərilmiş 52 şikayətdən 24-ü, Su Hövzələrində Bioloji Resursların Artırılması və Mühafizəsi Departamentinə göndərilmiş 7 şikayətdən 5-i, Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı Departamentinə göndərilmiş 4 şikayətdən 1-i üzrə araşdırma aparılıb, qalan şikayətlərin araşdırılması davam etdirilir. Hesablama Palatası 6 aya yekun vurdu, pozuntuları açıqladı 23.07.2015 
Hesablama Palatası 2015-ci ilin 6 ayı ərzində həyata keçirdiyi nəzarət tədbirlərinin nəticələri ilə bağlı məlumat yayıb. Rəsmi açıqlamaya görə, 6 ay ərzində 58 nəzarət tədbirinin başlanması və 34 tədbirin nəticələri ilə bağlı kollegiya qərarları qəbul olunub. 34 nəzarət tədbirindən 1-i dövlət büdcəsinin gəlirləri ilə yanaşı xərclərini, 1-i dövlət büdcəsinin xərcləri ilə birgə dövlət zəmanəti ilə alınmış kreditlər üzrə vəsaitləri, 29-u dövlət büdcəsinin xərclərini, 2-si Dövlət Sosial Müdafiə Fondunun vəsaitlərini, 1-i Dövlət Neft Fondunun büdcəsini əhatə edib. 6 ay ərzində 107 kollegiya qərarı qəbul edilib. Nəticələri ilə bağlı qəbul edilmiş kollegiya qərarları əsasında 50 quruma təqdimat göndərilib. Həmin təqdimatların 34%-ni yerli icra hakimiyyəti orqanlarına aid olub. Ötən illər üzrə qəbul olunmuş qərarların icrasının davamı olaraq və 2015-ci ilin hesabat dövründə görülmüş tədbirlərin nəticəsi kimi ümumilikdə 1564,3 min manat dövlət vəsaitinin bərpası təmin edilib (ötən il üzrə müvafiq göstəricidən 5,2% çox). Qanunvericiliklə müəyyən edilmiş qaydada bərpa edilmiş pul vəsaitlərinin nöqsanlar üzrə tərkibi əsasən artıq əməkhaqqı xərclərinin ödənişi, təmir-tikinti işlərinin dəyərinin artırılması və maddi dəyərlililərin çatışmazlığı ilə bağlı olub. Hesabat dövründə təhvil verilməmiş 1309,1 min manat məbləğində çatışmayan və ya müqavilə öhdəliklərinin yerinə yetirilməsi təmin olunmayan inventar və avadanlıqların təhvil verilməsi, 352,5 min manat məbləğində iş və xidmətlərin görülməsi təmin edilib. Maliyyə intizamının gücləndirilməsi, yol verilmiş nöqsanların aradan qaldırılması və nöqsanlara yol vermiş vəzifəli şəxslərlə bağlı göndərilmiş təqdimatların icrası olaraq 101 vəzifəli şəxslə bağlı müxtəlif intizam-tənbeh tədbirləri görülüb. Müəyyən edilmiş xarakterik nöqsanlar arasında dövlət satınalmalarını tənzimləyən normativ-hüquqi aktların və vəsaitlərin istifadəsi zamanı funksional və iqtisadi təsnifatı tələblərinin pozulması halları xüsusilə seçilir. 2015-ci ilin 6 ayı ərzində nəzarət tədbirlərinin əhatəsinə daxil olmuş satınalmaların ümumi məbləği 885 milyon manat təşkil edib. Ümumi məbləğdən 9,8 milyon manat satınalma prosedurları tətbiq edilmədən, 3,3 milyon manat isə təsdiq edilmiş məbləğ məhdudiyyətini aradan qaldırmaq məqsədilə ayrı-ayrı müqavilələrə bölünməklə həyata keçirilib. Satınalmalar zamanı müvafiq sahədə peşəkarlığı olmayan, texniki və maliyyə imkanları araşdırılmadan iddiaçıların satınalma proseslərinə cəlb olunması, işçi qüvvəsi, idarəetmə səriştəsi və müvafiq sahədə təcrübəsi olmayan müəssisələrin qalib elan olunması, rəqabətsiz satınalma metodlarından istifadə halları, keçirilmiş satınalmalar haqqında müvafiq icra hakimiyyətinə vaxtında məlumat verilməməsi kimi nöqsanlar da aşkar edilib. 6 aylıq hesabatda deyilir ki, nəzarət tədbirlərində tələbatdan artıq malların və inventarların alınması, avadanlıqların istismara verilməyərək istifadəsiz qalması, iş və xidmətlərin dəyərinin və həcminin artıq müəyyən edilməsi nəticəsində səmərəsiz xərclərə yol verilməsi hallarına da rast gəlinib. Dövlət Əmək Müfəttişliyi Xidməti 12 nəfəri işinə bərpa etdirib 23.07.2015 Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti (DƏMX) bu ilin yanvar-iyun aylarında 489402 manat məbləğində gecikdirilmiş sosial xarakterli ödənişlərin işçilərə ödənilməsini təmin edib. Transparency.az-a verilən rəsmi məlumata görə, ödənilməsi təmin olunan gecikdirilmiş sosial xarakterli ödənişlərin 413969 manatı əmək haqlarından, 8278 manatı zərərə görə ödənclərdən, 67155 manatı sosial müavinət və kompensasiyalardan ibarət olub. Nazirliyin açıqlamasında deyilir ki, 6 ayda DƏMX işdən qeyri-qanuni şəkildə çıxarılmış 12 nəfərin yenidən öz əvvəlki işinə bərpa olunmasını təmin edib. Hüquqşünas avtomobillərin paytaxta girişinə məhdudiyyəti qanunsuz sayır 23.07.2015 Nəqliyyat vasitələrinin paytaxt Bakıya girişi çərçivəyə salınır. Baş Dövlət Yol Polisi İdarəsinin ictimaiyyətlə əlaqələr şöbəsinin rəisi Kamran Əliyevin APA-ya açıqlamasına görə, icazə verilən maksimum kütləsi 5 tondan artıq yük avtomobillərinin, habelə regionların qeydiyyatında olan minik avtomobillərinin saat 7-dən 22-dək paytaxta girişinə məhdudiyyətlər tətbiq ediləcək. “Azadlıq” qəzetinə danışan hüquqşünas Müzəffər Baxışov deyib ki, məhdudiyyəti Nazirlər Kabinetinin Yol Hərəkətinin Təhlükəsizliyi Komissiyası müəyyən edib: “Həmin komissiyanın belə bir məhdudiyyət qəbul etmək səlahiyyəti yoxdur. Bu, konstitusiyanın 71-ci maddəsi (İnsan və vətəndaş hüquqlarının və azadlıqlarının təminatı – red.) ilə ziddiyyət təşkil edir. Avtomobillərin istismarı və müəyyən yerlərə daxil olması ilə bağlı məhdudiyyətlər yalnız “Yol hərəkəti haqqında” qanunla müəyyən oluna bilər. “İnsan hüquqlarının tənzimlənməsi” haqqında konstitusiya qanununun 3-cü maddəsinə görə, insan və vətəndaşların hüquqlarının məhdudlaşdırılması yalnız qanunla müəyyən edilə bilər. Yəni “Yol hərəkəti haqqında” qanunla belə bir məhdudiyyət tətbiq oluna bilər ki, 5 tondan yuxarı olan avtomobillərin Bakı şəhərinə buraxılması qadağandır. Bu yalnız qanunla müəyyən edilə bilər, belə bir səlahiyyətə isə Milli Məclis sahibdir. “Yol hərəkəti haqqında” qanunda belə bir norma yoxdursa, hər hansı nəqliyyat vasitəsini şəhərə buraxmamağa heç kimin səlahiyyəti çatmır. Baş verənlər konstitusiyanın 25-ci maddəsinin (Bərabərlik hüququ – red.) pozulmasıdır. Hamı məhkəmə və qanun qarşısında bərabərdir. Sosial vəziyyətindən asılı olmayaraq bu və ya digər şəxslərə məhdudiyyət qoyula bilməz”. Avropa Oyunlarına görə iyunun 1-dən rayon qeydiyyatında olan avtomobillər şəhərə buraxılmayıb. Baş nazirin müavini, Nazirlər Kabinetinin Yol Hərəkətinin Təhlükəsizliyi Komissiyasının sədri Abid Şərifov bu ayın əvvəlində bəyan edib ki, Avropa Oyunları zamanı (12-28 iyun 2015) paytaxtda nəqliyyat sıxlığının aradan qaldırılması nəticəsində yollardakı rahat və fasiləsiz hərəkətdən məmnun qalan şəhər sakinlərinin çoxsaylı müraciəti əsasında paytaxtda nəqliyyat problemlərinin həlli üzrə müvafiq tədbirlər planı hazırlanır. Sığorta növləri: artım nədədir, azalma nədə? 23.07.2015 2015-ci ilin birinci yarısında sığorta növləri arasında ən ciddi artım kreditlərin sığortasında qeydə alınıb. AZƏRTAC-ın məlumatına görə, Azərbaycan Sığortaçılar Assosiasiyasının sədri Orxan Bayramov bildirib ki, bu növ sığortadan toplanan sığorta haqqı 28,9 dəfə artaraq 436,9 min manat təşkil edib. Su nəqliyyat vasitələrinin sığortasında yığım 6,8 dəfə artaraq 2 milyon manat, kənd təsərrüfatı heyvanlarının sığortasında isə 6,6 dəfə artaraq 1,2 milyon manat olub. Orxan Bayramov əlavə edib ki, həyatın yaşam sığortasında 27,7 faiz, sağalmaz xəstəliklərdən sığortada 90,5 faiz, fərdi qəza və xəstəlik sığortasında 6,1 faiz, səfər sığortasında 6,7 faiz artım var. Avtomobil nəqliyyatı vasitələri sahiblərinin mülki məsuliyyətinin könüllü sığortasında 46,1 faiz azalma qeydə alınıb. Hesabata əsasən, istehsalatda bədbəxt hadisələrdən sığortada 11,2 faiz, daşınmaz əmlakın icbari sığortasında 2,1 dəfə, daşınmaz əmlakın istismarı ilə bağlı mülki məsuliyyətin icbari sığortasında 6 faiz, avtomobillərin icbari sığortasında isə 19,8 faiz artım olub. Nazirlər Kabinetinin Yol Hərəkəti Təhlükəsizliyi Komissiyasının qərarı dərc olundu 23.07.2015
İyulun 23-də AZƏRTAC Nazirlər Kabinetinin Yol Hərəkəti Təhlükəsizliyi Komissiyasının “Bakı şəhərində nəqliyyatın hərəkətinin təkmilləşdirilməsi üzrə əlavə tədbirlər haqqında” qərarını dərc edib. Qərara əsasən, Daxili İşlər Nazirliyinin Baş Dövlət Yol Polisi İdarəsi, Nəqliyyat Nazirliyi və Bakı Şəhər İcra Hakimiyyətinə xüsusi təyinatlı, o cümlədən qəza-bərpa və xilasedici, həmçinin kənd təsərrüfatı məhsullarını daşıyan bütün növ nəqliyyat vasitələrinin hərəkəti istisna olmaqla icazə verilən maksimum kütləsi 5 tondan artıq olan yük avtomobillərinin hərəkətinin Bakı şəhərində mayın 1-dən oktyabrın 1-dək səhər saat 7-dən axşam saat 10-dək, oktyabrın 1-dən mayın 1-dək səhər saat 7-dən axşam saat 9-dək məhdudlaşdırmaq tapşırılıb. Gündüz saatlarında kütləsi 5 tondan artıq olan yük avtomobillərinin hərəkəti isə Nazirlər Kabinetinin Yol Hərəkəti Təhlükəsizliyi Komissiyası ilə razılaşdırılmaqla, Daxili İşlər Nazirliyinin Baş Dövlət Yol Polisi İdarəsinin xüsusi icazələri əsasında təşkil edilməlidir. Daxili İşlər Nazirliyi, Nəqliyyat Nazirliyi, İqtisadiyyat və Sənaye Nazirliyi, Maliyyə Nazirliyi, Əmlak Məsələləri Dövlət Komitəsi, Bakı Şəhər İcra Hakimiyyəti və Abşeron Rayon İcra Hakimiyyəti Bakı şəhərinə şəhər və rayonlardan, həmçinin ölkə xaricindən gələn ümumi istifadədə olan nəqliyyat vasitələri istisna olmaqla, digər növ avtonəqliyyat vasitələri üçün şəhərin cənub və şimal istiqamətlərindən giriş ərazilərə yaxın yerlərdə bütün zəruri şəraiti olan ödənişsiz duracaqların təşkili ilə bağlı təklifləri üç gün müddətində Yol Hərəkəti Təhlükəsizliyi Komissiyasına təqdim etməlidirlər. Bakı şəhərinə gələn taksi avtomobilləri üçün şəhərə daxil olmadan çatma məntəqəsi kimi Bakı Beynəlxalq Avtovağzalı təyin olunur. Daxili İşlər Nazirliyinə duracaqların tikintisini 2015-ci ilin sentyabrın 1-dək başa çatdırmaq, Nəqliyyat Nazirliyinə isə duracaqlardan istifadə edən sürücülərin və sərnişinlərin Bakı şəhərinin daxilinə çatdırılması üçün avtobus və taksi dayanacaqlarının və müvafiq avtobus marşrutlarının təşkilini təmin etmək tapşırılıb. Qərarda Bakı-Sumqayıt-Bakı marşrutu üzrə yeni sərnişin qatarlarının bu ilin sentyabrın 15-dək istismara verilməsi də öz əksini tapıb. Daxili İşlər Nazirliyi və Bakı Şəhər İcra Hakimiyyəti paytaxtda müntəzəm sərnişin daşımalarını yerinə yetirən avtobusların və operativ nəqliyyat vasitələrinin xüsusi zolaqla hərəkətinin təmin edilməsi məqsədi ilə müvafiq avtomobil yollarının siyahısını müəyyənləşdirməli, bu zolaqlarda göstərilən növ nəqliyyat vasitələrinin hərəkətinin təşkili ilə bağlı təklifləri 10 gün müddətində Yol Hərəkəti Təhlükəsizliyi Komissiyasına təqdim etməlidirlər. Avro zonası borc içində batır (Ən yeni statistika) 23.07.2015 
2015-ci ilin birinci rübündə avro zonası ölkələrinin xarici borcu ümumi daxili məhsula (ÜDM) nisbətdə 92,9 faizə çatıb. Transparency.az xəbər verir ki, Britaniyanın “Financial Times” qəzeti Avropa İttifaqının Statistika Xidmətinə istinadla belə açıqlama yayıb. Statistikaya görə, 2014-cü ilin son rübündə avro zonası ölkələrinin xarici borcu ÜDM-ə nisbətdə 92 faiz, bir il bundan öncə isə 91,9% faiz olub. Xarici borc sarıdan ən acınacaqlı durum Yunanıstandadır. Bu ölkənin xarici borcu ÜDM-ə nisbətdə 169 faizə çatıb. 100 faizlik həddi İtaliya, Belçika, Kipr və Portuqaliya da ötüb. Transparency.az bildirir ki, 2015-ci il yanvarın 1-nə Azərbaycanın xarici borcu 6 milyard 478 milyon 200 min ABŞ dolları olub. Bu, ÜDM-in 8,6 faizi həcmində borc deməkdir. DSMF sədri: “Sosial sığorta gəlirləri 8 faiz artıb” 23.07.2015
İyulun 23-də fondun yaydığı rəsmi məlumata görə, Elman Mehdiyev deyib ki, qeyri-büdcə daxilolmalarının belə sürətli artımı ölkədə orta aylıq əməkhaqqının artımı, daimi yeni iş yerlərinin yaradılması və əmək haqlarının leqallaşdırılması dərəcəsinin yüksəldilməsinin birbaşa təsirinin göstəricisidir: “Bu artım tendensiyası dövlət büdcəsindən Dövlət Sosial Müdafiə Fonduna ayrılan transfertin ötən ilin müvafiq dövrü ilə müqayisədə 18 milyon manat azalmasına səbəb olub”. Elman Mehdiyev deyib ki, bu ilin 6 ayı ərzində DSMF-nin xərcləri 1 milyard 457,7 milyon manat təşkil edib, vəsaitin 98,2 faizi və ya 1 milyard 431 milyon manatı əhaliyə ödənişlərə yönəldilib. Avropa İttifaqı Donald Tuskun Şengen bəyanatına aydınlıq gətirdi 23.07.2015
İyulun 22-də Avropa İttifaqı Şurasının prezidenti Donald Tusk Bakıda prezident İlham Əliyevlə birgə mətbuat konfransı keçirib. APA-nın həmin gün yaydığı məlumata görə, Donald Tusk Azərbaycan prezidenti ilə viza rejiminin sadələşdirilməsi məsələsini müzakirə etdiyini və bu ilin sonunadək danışıqların yekunlaşacağını bildirib: “Azərbaycanın Şengen zonasına daxil olmasını istəyirik. Xalqlar bu və ya digər ölkələrdən sərbəst səfərlər etsinlər. Biz belə bir razılığa gəldik ki, viza rejimi sadələşdirilsə, sürəkli giriş-çıxış üçün Şengen vizalarının verilməsi asanlaşacaq”. İyulun 23-də Avropa İttifaqının Azərbaycan nümayəndəliyi dəqiqləşdirmə yayıb. Nümayəndəlikdən Transparency.az-a verilən məlumatda qeyd edilir ki, prezident Tuskun viza rejiminin sadələşdirilməsi ilə bağlı dəqiq bəyanatı belə olub: “Biz insanların mobilliyini, xalqlarımız arasında səfərləri və birbaşa əlaqələri təşviq etmək kimi ortaq qəti niyyətimizi müzakirə etdik. Viza Rejiminin Sadələşdirilməsi və Readmissiya Sazişinin keçən ilin payızında qüvvəyə minməsini alqışlayıram. Bu, mühüm addımdır. Keçən il Azərbaycandan Şengen məkanına olan ziyarətçilərin sayı 70 min nəfər olub. Bu, əvvəlki ilə nisbətən təxminən 20 faiz artım etməkdir. İndi verilən vizaların üçdə bir hissəsini uzunmüddətli vizalar təşkil edir”. Kənd Təsərrüfatı Nazirliyinin strukturuna daxil olan üç qurumun əsasnamələri təsdiq edilib 24.07.2015
Prezident İlham Əliyev Kənd Təsərrüfatı Nazirliyinin strukturuna daxil olan üç qurumun (Kənd Təsərrüfatı Layihələri və Kreditlərinin İdarə Edilməsi üzrə Dövlət Xidməti, Bitki Sortlarının Qeydiyyatı və Toxum Nəzarəti üzrə Dövlət Xidməti, Baş Dövlət Texniki Nəzarət Müfəttişliyi) əsasnamələrini təsdiqləyib. Transparency.az bildirir ki, fərman iyulun 23-də imzalanıb. Kənd Təsərrüfatı Layihələri və Kreditlərinin İdarə Edilməsi üzrə Dövlət Xidməti kənd təsərrüfatı layihələrinin qiymətləndirilməsini, maliyyələşdirilməsini, təşkilini və icrasına nəzarəti həyata keçirir, habelə sahibkarlıq fəaliyyəti ilə məşğul olan fiziki və hüquqi şəxslərə dövlət büdcəsindən ayrılan və digər mənbələrdən cəlb edilən maliyyə vəsaitinin müvəkkil kredit təşkilatları vasitəsilə güzəştli kredit şəklində verilməsini təmin edir. Bitki Sortlarının Qeydiyyatı və Toxum Nəzarəti üzrə Dövlət Xidməti bitki sortlarının ekspertizasını, sınağını, qeydiyyatını və mühafizəsini, kənd təsərrüfatı sahəsində toxumçuluğun idarə edilməsini və toxumçuluğa dövlət nəzarətinin həyata keçirilməsini təmin edən icra hakimiyyəti orqanıdır. Baş Dövlət Texniki Nəzarət Müfəttişliyi siyahısı Azərbaycan Respublikasının Nazirlər Kabinetində müəyyən edilən nəqliyyat vasitələrinin və mexanizmlərin dövlət qeydiyyatını aparır, onların texniki vəziyyətinə və istismarına dövlət nəzarətini həyata keçirir.
İqtisadiyyat və Sənaye Nazirliyində kollegiya iclası: yeni təkliflər hazırlanır 24.07.2015
İqtisadiyyat və Sənaye Nazirliyində geniş kollegiya iclası keçirilib. www.economy.gov.az-ın məlumatına görə, nazirliyin struktur bölmələrinin və tabeliyindəki qurumların rəhbərlərinin iştirakı ilə keçirilmiş kollegiya iclasında iqtisadiyyat və sənaye naziri Şahin Mustafayev 2015-ci ilin birinci yarısının nəticələrindən danışıb. O deyib ki, ilin birinci yarısında ümumi daxili məhsul 5,7% artıb, sənaye istehsalında 3,8%, kənd təsərrüfatında 7,3%, rabitədə 10,7%, tikintidə 11,5%, nəqliyyatda 1,7%, ticarətdə 13,4%, ümumilikdə qeyri-neft sektorunda 9,2%-lik artıma nail olunub, ölkə iqtisadiyyatına 12,7 milyard manat həcmində investisiya qoyulub. Şahin Mustafayev bildirib ki, Sumqayıt Kimya Sənaye və Balaxanı Sənaye parklarında infrastrukturun yaradılması, Mingəçevir və Qaradağ sənaye parklarının təşkili işləri davam etdirilir: “Artıq Sumqayıt Kimya Sənaye Parkında 4 rezident qeydiyyatdan keçib və bu rezidentlər 700 milyon manatdan çox investisiya qoyuluşunu nəzərdə tutur. Balaxanı Sənaye Parkında isə avtomobil şinlərinin bərpası, işlənmiş mühərrik yağlarının və plastik qabların təkrar emalı üzrə fəaliyyət göstərəcək 3 rezident qeydiyyatdan keçib. Neftçalada sənaye məhəlləsinin təşkilinə hazırlıq işləri başa çatdırılıb və yaxın vaxtlarda tikinti işlərinə başlanacaq. Ölkənin digər regionlarında da sənaye parklarının və məhəllələrinin yaradılması istiqamətində araşdırmalar aparılır”. Yüklə 0,51 Mb. Dostları ilə paylaş:
|
