Yadında qalsın
Yüklə 4,97 Mb. Pdf görüntüsü
|
|
Üçüncü fəsil
Sənin varlığınla varam! Bütün eşqim sənin olsun! Məhrəm olduğumuz andan etibarən, qəribə bir hiss bütün vücudumu bürümüşdü. Yavaş-yavaş eşqin qüdrətinə və aşiqcəsinə darıxmağın varlığına inanmağa başlayırdım. Bütün varlığımla ona bağlanmışdım. Hicran qəmi çox tez başlamış, hər şey çox tez dəyişmişdi. Həyat dəftərimin yeni səhifəsini yazmağa başlamışdım. Orada Həmidlə mən təkcə bibioğlu-dayıqızı deyildik. Oktyabr ayının 5-i axşamüstü saat 5-dən etibarən artıq onunla həyat yoldaşı və ömür sirdaşı olmuşduq. Nişanın ertəsi gün səhər tezdən dərsim var idi. Rəfiqələrimə şirniyyat və dondurma qonaqlığı verdim. Üzüyüm əldən-ələ gəzirdi. Subaylar da üzüyü barmaqlarına taxıb gülə-gülə deyirdilər: “Fərzanənin sağ 53 əli bizim başımıza!” O qədər danışdılar ki, axırda müəllimələr də nişanlandığımı başa düşüb təbrik etdilər. Rəfiqələrimin o qədər zarafat etmələrinə, mənimlə deyib-gülmələrinə baxmayaraq, darıxmaq hissi məni tərk etmirdi. O gecədən etibarən Həmid üçün yaman darıxırdım. Bu üç ayı necə başa vuracağımı bilmirdim. Öz-özümü danlayıb deyirdim ki, axı niyə belə bir iş tutdum. Nikah mərasimini ezamiyyətdən sonraya saxlasaydım, bu qədər həsrət çəkib kədərlənməzdim. Axşamüstü saat dörd olardı, dərsim bitmək üzrəydi. Bütün fikrim-zikrim Həmiddə qalmışdı. Müəllimənin dediklərindən heç nə başa düşmürdüm. Öz-özümə hesablayıb gördüm ki, Həmid indilərdə Həmədana çatmalıdır. Yerimdəcə, parta arxasında oturduğum halda çantamdan telefonumu çıxardım. Həmidin çatıb- çatmadığını bilmək istəyirdim. İlk dəfə idi ki, ona mesaj yazırdım. Həmidin telefon nömrəsini görən kimi ürəyim bərk döyünməyə başladı. Mesajı bir neçə dəfə yazıb, sildim. Özümü əlinə ilk dəfə telefon alan adam kimi hiss edirdim. Barmaqlarım çaşıb qalmışdı. Söz seçməkdə niyə bu qədər qərarsız olduğumu anlaya bilmirdim. Bir sətir yazmaq üçün on beş dəqiqə vaxt sərf etdim və nəhayət, yazdım: “Salam! Bağışlayın, səhərdən dərsdə olduğum üçün sizdən xəbər tuta bilməmişəm. Sağ-salamat çatdız?” Elə bil, Həmid telefonu əlində tutub mənim mesajımı gözləyirmiş. Üstündən bircə dəqiqə keçməmiş yazdı: “Salam. Dərsin saat neçədə qurtarır?” Bu, onun mənə yazdığı ilk mesaj idi. Yazdım: “Bir neçə dəqiqəyə qurtaracaq”. Yazdı: “Yoldayam, universitetə gəlirəm. Gözlə, evə birlikdə gedərik”. 54 Mən onun Həmədanda olduğunu düşünürdüm, o isə Qəzvində olduğunu və arxamca gəldiyini yazırdı. Fikirləşdim ki, deyəsən, yenə şıltaqlığı tutub. Çünki o, səhər tezdən Həmədana getməli idi. Universitetin qapısından çıxanda heç kimi görmədim. Əmin oldum ki, zarafat edir. Çıxışdan təxminən 100 metr uzaqlaşmışdım ki, bir motosikletin siqnal səsinə diksindim. Motosikletlə məni aparmağa gəlmişdi. -Ezamiyyətə getməmisiz? Kaskanı başından çıxarıb dedi: -Mənim bəxtimdən ezamiyyət ləğv olundu. Üz-gözündən sevinc yağırdı. Mən də sevindiyimdən yerə-göyə sığmırdım. Düzü, nişanın ertəsi günü baş tutacaq üçaylıq ezamiyyətə dözməyə gücüm yox idi. Ötüb keçən bir neçə saat mənə bir neçə il kimi görünürdü. Motosikletin tərkini göstərib, “min, gedək” deyəndə təəccübləndim. -Həmid ağa, mən qorxuram, bu vaxta qədər motosikletə minməmişəm. Mənlik deyil. Sən get, mən taksi ilə gələrəm. Əl çəkmədi. -Əyləş. İnşallah, öyrəşəcəksən. Yavaş sürəcəm, qorxma. Bir neçə dəfə “Qul huvəllah” surəsini oxuyub oturdum. Bütün yolboyu qaranlıq tunelə girən adam kimi qorxumdan gözlərimi yumdum. Yadıma uşaq vaxtı məhəlləmizdə nümayiş olunan sirk düşdü. Sirkdə bir nəfər motosikleti düz divarda sürürdü. Çatana qədər yarıcan oldum. Dairəni fırlanarkən motosiklet o qədər əyildi ki, qorxudan “ya Zəhra” -deyə qışqırdım. Mənə elə gəlirdi ki, motosiklet aşacaq, yıxılıb maşının altına düşəcəyik. 55 Ezamiyyət ləğv olunduğuna görə qərara gəldik ki, analiz və nikah üçün nəzərdə tutulan kursda iştirak edək. Beləliklə, Şəhid Büləndi tibb müəssisəsinə gedib qeydiyyatdan keçdik. Həmid ikinci günə qədər hər gün axşamüstü gəlib məni evə aparırdı. Dəsrlərimin nə zaman qurtardığını bilir, vaxtında özünü yetirirdi. Onun bu dəqiqliyi xoşuma gəlirdi. Məni hər gün tərkinə mindirib apardığı Honda markalı mavi motosikletlə o qədər qəza törətmişdi ki, sağlam yeri qalmamışdı. Adətən, universitetin qapısından təxminən 50-100 metr aralıda gözləyirdi. Həftənin birinci günü idi, yorğunluq məni əldən salmışdı. Universitetin qapısından çıxanda gördüm ki, yenə aralıda dayanıb məni gözləyir. Ona çatanda dedim: -Bu qədər zəhmət çəkib arxamca gəlirsiz, olmaz ki, universitetin girişində dayanasız, mən də bu qədər yolu piyada gəlmək məcburiyyətində qalmayım? -Allahdan gizli deyil, səndən nə gizli. Qorxuram yaxın rəfiqələrin motosikletlə getdiyimizi görəndə xəcalət çəkəsən. Buna görə bir az uzaqda saxlayıram. -Bu nə sözdür?! Başqalarının nə dediyi mənə qətiyyən önəmli deyil. Əksinə, İmam Mehdi (ə) yardımçısının miniyi gərək sadə olsun. Bundan sonra düz qapının ağzında saxla. Sonrakı günlərdə elə də etdi. Mən də rəfiqələrimlə sağollaşan kimi motosikletə otururdum. İkinci gün analiz verdik, sonra da ayrı-ayrılıqda bizim üçün nəzərdə tutulmuş dərslərə başladıq. Bir saatlıq dərsdə bir neçə dəfə mesaj yazıb soruşurdu: “Halın yaxşıdır? Susamamısan? Ac deyilsən?” Hətta yanımda olmayanda belə mənimlə danışmağa bir bəhanə axtarırdı. Dərs 56 qurtaran kimi məni universitetə aparırdı. Günortadan sonra iki dərsim vardı. Həmidin əmisi oğlu Mehdinin toyu idi. Toydan sonra bir-birimizi görə bilmədik. Çünki səhər tezdən analiz işləriylə məşğul idik. Sonra universitet, unversitetdən sonra da toy məni yamanca yormuşdu. Evə çatan kimi yuxuya getdim. Səhər tezdən oyananda telefonuma baxdım. Həmid çoxlu mesaj yazmışdı, narahat olduğunu, məndən cavab gözlədiyini bildirmişdi. Ancaq mən heç birini görməmişdim. Birincisində bir beyt şeir yazmışdı: Yaxşıların qəlbinə göz dikmək günah sayılsa, Nə olardı, yadların da bu günahı ayağıma yazılsa! Mənim cavab yazmadığımı görəndə belə yazmışdı: “Qəlbimizdə yeri əbədi olan, qəlblərində zərrə qədər yerimiz olmayanlar sağ olsun!” Yatdığm heç ağlına da gəlməmişdi. Bundan sonra belə yazmışdı: “Bizimlə qəlblə danışmaq nə qədər çətindir, heç demə. Elə isə, yaxşı olacaqsa, divarla danış”. Şeirə çox həvəsi var idi. Hərdən özü də şeir yazardı. Bu mesajların bəzilərinin öz şeiri olduğunu bilirdim. Ancaq mən hisslərimi dilimə gətirə bilmirdim. Qəlbimdə qorxu var idi. Aşiq olmaqdan, sonra da hər şeyin vaxtsız bitəcəyindən qorxurdum. Qəlbimdə onun üçün ölürdüm, ancaq bütün aşiqanə sözlərimi üzbəüz deməkdən çəkinirdim. Bəzi vaxtlar sevgimi inkar edirdim, bununla onu itirəcəyimdən qorxurdum. Həmidin bu qədər məhəbbət dolu mesajları müqabilində sadəcə rəsmi bir cavab verərək yazdım: “Yadımdasınız! Yenicə durmuşam, kitab oxuyuram”. Məncə, soyuq rəftarımı hiss edib belə yazdı: Eşq bəzən dərdli-qəmli ayrılıqdan yaxşıdır, 57 Eşqə saldı, söylədi döz, sabir olman yaxşıdır. Mən Quranda həzrət Yəqubdan öyrəndim bunu: Sevgilin yoxsa yanında, kor dolanman yaxşıdır. Dilimin qıflı açılana qədər xeyli çəkdi. Sonda hisslərimi büruzə verməyi və Həmidlə daha səmimi olmağı bacardım. Birinci həftə başımda hicab, əynimdə uzunqol köynək, ayağımda da corab olurdu, özümü çox səmimi edə bilmirdim. Sanki yepyeni bir dünyaya düşmüşdüm. Mən bu yadlığı ilk dəfə Həmidlə imamzadəyə gedəndə hiss etdim. Həmid axırda dilə gəlib gileylə dedi: “Sən məni sevmirsən, Fərzanə? Niyə bu qədər ciddi və quru davranırsan? Buz dağı kimisən. Mənimlə danışmırsan, hisslərini söyləmirsən”. Bu nəticəyə gəlməkdə haqlı olsa da, bu sözləri eşidəndə yerimdə donub qaldım. Dedim: “Həmid qətiyyən dediyin kimi deyil. Mən səni bir ömür müştərək həyat üçün seçmişəm. Ancaq sən də mənə haqq qazandır. Mən səninlə səmimiləşmək üçün çox çalışıram. Ancaq bundan ötrü bir az zamana ehtiyacım var”. İmamzadəyə daxil olanda necə ziyarət etdiyimi bilmədim. Həmidin sözləri mənə yaman təsir etmişdi. Ürəyimdə fırtına qopurdu sanki. Zərihin kənarında oturdum, barmaqlarımı zərihin millərinə keçirib dayanmadan ağladım. Mən onunla belə rəftar etmək istəmirdim. Allahdan kömək istədim. Ağır rəftarımın Həmidi zərrə qədər də incitməsini istəmirdim. İş o qədər mürəkkəbləşdi ki, sonda anam da məsələyə qarışmalı oldu. Biz evə çatanda mənə dedi: -Qızım, nə üçün Həmidin yanında başını bağlayırsan? Bir-birinizin əlindən tutun, səmimi davranın. O, sənin həyat yoldaşındır. 58 O, Həmidə qarşı utancaqlığımın getməsi üçün məsləhət gördü ki, onun əllərinə krem sürtüm. Həmid rabitə şöbəsində işlədiyi üçün tikanlı və hərbi məftillərlə çox təmasda olurdu. O, qışın soyuğunda da bu kimi işləri görmək məcburiyyətində idi. Buna görə də, əlində sağlam yer yox idi. Onun əllərinə krem sürtəndə hər ikimizin əlləri əsirdi. Həmid məndən də çox utanırdı. Bir-birimizə məhrəm olduğumuzu qəbul etmək bir ay sürdü. *** Həmidə aldığım hədiyyənin kağızını bir neçə dəfə dəyişməli oldum. Çox istəyirdim ki, ilk hədiyyəm yaddaqalan olsun. Qapının zəngi çaldı. Yapışqanı, qayçını və hədiyyə kağızını cəld çəkməcəyə qoydum. Pilləkənin aşağısında məni gözləyirdi. Nə etdimsə, yuxarı çıxmadı. Hədiyyəni çadramın altında gizlədib aşağı düşdüm. Həmid dedi: -Anam sizi ailəcə sabaha nahar yeməyinə dəvət edir. Təşəkkür edib dedim: -Həmid, gözlərini yum. Güldü. -Nədi, məni suyla islatmaq istəyirsən? -Sənin işin olmasın, gözlərini yum! Gözlərini yumanda dedim: “Cığallıq edib açma ha, yaxşı yum! Gözaltı da baxma!” Bir neçə saniyə gözlətdim. Hədiyyəni çadramın altından çıxarandan sonra gözlərinin qarşısında tutdum. -İndi aça bilərsən. Gözləri hədiyyəyə sataşan kimi çox sevindi. Heç gözləmirdi. Elə oradaca açmağa başladı. Hədiyyə olaraq, qutunun içinə naməlum bir şəhid məzarından bir ovuc torpaq və şəhid kəfənindən bir parça qoymuşdum. Onları 59 döyüş bölgələrinə ekskursiya zamanı vermişdilər. Mənə çox əziz idi. Bunlara baxanda rahatlaşırdım. Həmid təşəkkür edib dedi: “İlk hədiyyəni heç vaxt unutmayacam”. Sonra torpağı köynəyinin cibinə qoyub dedi: “Çox istəyirəm ki, bu hədiyyəni sevgimizin əlaməti olaraq, həmişə üstümdə gəzdirim. Söz verirəm ki, bunu heç vaxt özümdən ayırmayacam”. Həyətdə güllərin yanında çənəmiz qızışdı. Hər şeydən danışırdıq. Həmid sabahkı qonaqlığa çox həssas idi. Mən bibimgilə ilk dəfə gəlin kimi gedəcəkdim. Həmid dedi: -Orda məbada oturasan ha! Bizdə adətdir, gəlinlər kömək edərlər. -Gözüm üstə! Sən narahat olma, özüm hər şeyi bilirəm, bu işlərin ustasıyam. Narın-narın yağmağa başlayan payız yağışı bizi sağollaşmağa məcbur etdi. Yağışın damlaları güllərin yarpaqları üzərinə qonur, üzümüzü isladırdı. Həmid həyətimizdən çıxandan sonra, hələ qapını örtməmiş, “Həmid, səni sevirəm!” – dedim, sonra da bərk örtüb qapıya söykəndim. Ürəyim sərçə ürəyi kimi döyünürdü. Gözlərimi bağlamışdım. Həmid qapının arxasından dedi: “Fərzanə, mən də səni sevirəm”. Utandığımdan qaçaraq evə girdim. İlk dəfə idi ona “səni sevirəm” deyirdim. Ertəsi gün ailəcə bibimgilə getdik. Axşamdan bütün bədənimi saran həyəcan bibim qızları və eltilərimlə səmimi söhbətlərdən, zarafatlardan sonra yox oldu. Müvəqqəti nikah oxunandan sonra “ata” deyə müraciət etdiyim qayınatam bizi mehriban qarşıladı. Bibim də məni tez-tez əzizləyirdi. Nahardan sonra söhbət toy vaxtından düşdü. Qərara gəldik ki, oktyabrın 17-si, həzrət Əli (ə) və həzrət 60 Zəhranın (ə) evlilik günündə daimi nikah üçün qeydiyyat şöbəsinə gedək. Ancaq Həmid dedi: -Əgər mümkünsə, nikahı bir az gec qeyd etdirək. Mən təqvimə baxdım, həmin güc ay öz əqrəbində olacaq. Həmin gün kəbin kəsdirmək bəyənilməz işdir. Qonaqlıqdan sonra məni universitetə apardı, özü isə analizin cavabını almağa getdi. Mənim bəxtimdən müəllim gəlmədi, dərs olmadı. Rəfiqələrimlə söhbət etdiyim yerdə birdən telefonumun ekranında “Əziz yoldaşım, başımın tacı Həmid” sözləri göründü. Mesajı görən rəfiqələrimdən biri zarafata dedi: “Uşaqlar, Fərzanənin telefonuna baxın, yoldaşının adının yerinə inşa yazıb”. Həmid mənim xüsusi həmsöhbətim, həyatım, gələcəyim, bir sözlə, bütün varlığım idi. Yazmışdı ki, analizin cavabını almışam və hər şey qaydasındadır. Zarafata yazdım: “Hər şeyin qaydasında olduğuna əminsən? Mən narkoman deyiləm ki?!” Həmid dedi: “Çox şükür Allaha, hər ikimiz sağlamıq”. Bir neçə dəqiqə sonra yenə mesaj gəldi: “Təyyarədən dispetçerə! Sizin qəlbinizə enməyim üçün yer varmı, yoxsa yenə başınıza dolanım?” Mən də yazdım: “Hələlik bir dövrə vur, sonrasına baxarıq”. Onu incitməyə ürəyim gəlmədi, dərhal yazdım: “Təşrif buyurun, mənim qəlbim sizə məxsusdur. Ancaq gələndə əl-ayağınızı yuyun, ogünkü kimi yağlı olmasın”. Tibb universitetində oxuduğuma, həm də təmizliyə həssas olduğuma görə mənə “Təmizkar xanım” deyirdi. Düzdür, özü də təmizliyə riayət edirdi, ancaq “təmizkar xanım” qədər yox. 61 Analizin cavabını alandan sonra qərara gəldik ki, iki gün sonra nikaha gedək. Ancaq bu dəfə də qismət olmadı. Anasıgil Sünbülabada getmişdilər, işləri xeyli uzanmışdı. Analiz yalnız bir ay müddətində etibarlı olduğuna görə Həmid bu gecikmələrin məni narahat edəcəyindən qorxurdu. Bir mesaj yazıb dedi: “Əzizim, qətiyyən narahat olma, tezliklə gedib kəbin məsələsini həll edəcəyik”. Həmin an təqvimə baxıb yazdım: “Oktyabrın 31-i İmam Hadinin (ə) doğum günüdür. Sənin fikrin nədir, bəlkə elə o günə salaq?” Həmid cavab yazdı: “Çox gözəl! Elə indi ata-anamla danışacam ki, qəti olsun”. Cümə axşamı idi, paltarlarımı ütüləyirdim. Birdən qapının zəngi çaldı. Bir az sonra anam otağıma gəlib dedi: “Həmid qapıdadır, əzadarlığa getmək istəyir deyə, yuxarı çıxmadı. Deyəsən, səninlə işi var”. Çadramı başıma keçirib bir stəkan şərbət götürdüm və həyətə düşdüm. Əncir ağacının altında dayanmışdı. Məni görən kimi yaxınlaşdı. Hal-əhval tutandan sonra şərbəti ona uzatdım. İçəndən sonra təşəkkür edib dedi: “Allah sənə Kərbəla ziyarəti qismət etsin!” Sonra da əlimə bir qutu verib dedi: “Anam sənə xüsusi hədiyyə göndərib”. Təşəkkür edib dedim: -Kəbin üçün bir şey edə bildin? Başını yellədi. -Bu gün getdim, ayın 31-nə növbə aldım. -Bəs niyə yuxarı gəlmirsən? -Əzadarlığa gedirəm. Bilirsən də, hər həftənin cümə axşamı günləri məclislərimiz olur. Sonra tərəddüd edərək dedi: “Bir söz desəm, “yox” deməzsən?” Təəccübləndim. -Nə olub, Həmid? Nəsə baş verib? 62 -Olar ki, əzadarlığa birlikdə gedək? İnan, ora gələnlər çox səmimi və mehribandırlar. Düzü, səninlə getmək üçün dostum Bəhramın maşınını da almışam. Bu dəfə gəl, xoşun gəlməsə, bir də gəlməzsən. Bundan əvvəl bir-iki dəfə də məclisə gədəndə məndən gəlməyimi istəmişdi. Ancaq getməyə utanır, hər dəfə bir bəhanə gətirirdim. Onun əza dəstələri barədə dediklərindən düşünürdüm ki, məclisləri olduqca mehriban və səmimi keçir, mən özümü onların arasında yad hiss edərəm. Bu səfər də dəvət edəndə sözünü yerə salmağa üzüm gəlmədi və onunla birlikdə dəstəyə yollandım. Orada heç kimi tanımadığımdan yolda Həmidə dedim: “Həmid, məni evə qaytar, özün get, tez qayıt”. Ancaq Həmid nə olursa- olsun, məni də aparmaqda israrlı idi. Məclisin əvvəlində özümü yad hiss edirdim. Bir kənarda oturmuşdum. Ancaq məclisdəkilərin rəftarı özümü onlardan biri kimi hiss etməyimə səbəb oldu. Heç kimi tanımasam da, yavaş-yavaş bütün xanımlarla dostlaşdım. Çox gözəl ab-havası var idi. Səmimi bir məclis keçdi. Ertəsi gün universitetdə dərsim var idi. Həmid həmişə olduğu kimi motosikletlə arxamca gəlmişdi. Ancaq bu dəfə əlində gözəl bir gül dəstəsi də vardı. Güllər payızın qürubunda günəş şüaları altında işıldayırdı. Salamlaşıb xoş-beş etdikdən sonra gülləri mənə uzatdı. Təşəkkür etdim, gülləri iyləyib dedim: “Minnətdaram, Həmid can, məni çox sevindirdin. Bu gözəl gülləri nəyə borcluyuq?” -Bu güllər mənimlə məclisə getdiyin üçün bir təşəkkürdür. Allahdan gizli deyil, sizdən nə gizli! Mənim o məclisə getməyimin tək səbəbi bu idi ki, Həmid məndən əl çəksin. 63 Ancaq onun bu rəftarı həmin gecənin sonsuzadək yadımda qalmasına səbəb oldu. O gündən etibarən mən də “Xeymeyi-Abbas” əza dəstəsinin məclislərinə getməyə başladım. Həmid bu kimi rəftarlarıyla çoxlarını məclis əhli etmişdi. *** Bir-birimizlə daha da səmimi olmuşduq. Ona öz zövqümə uyğun paltar almaq istəyirdim. Səhər tezdən mesaj yazdım ki, bir az tez gəl, bazara gedib sənə paltar alaq. Mesajın göndərildiyi tarixi telefonun ekranında görəndə ürəyim əsdi. Sən demə, bu gün idarəyə gedib nikah oxutdurmalıydıq. Oktyabrın 31-i, İmam Hadinin (ə) mövlud günü idi. Yerə-göyə sığmırdım. Kəbinkəsən demişdi ki, saat 4-də bura gəlin ki, birinci sizin əqdinizi oxuyum. Həmid nahar yeməyində bizdə idi. Tez-tələsik makaron yeyib evdən çıxdıq, peykana minib bazara yollandıq. Vaxtımız az idi. Tez qayıdıb idarəyə çatmalı idik. Öncəki kimi ailələrimizi və kəbinkəsəni gözlətmək istəmirdik. Həmidin pencəyi var idi deyə, ona qəhvəyi zolaqlı bir ağ köynək və bir də şalvar aldıq. Hava getdikcə soyuduğu üçün bir toxuma poliver də aldıq. Saat dördün yarısına kimi bazarda olduq. Həmid məni evə apardı ki, öz anam- atamla gedim, o da gedib valideynlərini aparsın. Evə çatanda tələskənlikdən maşını kanalın dibində saxladı, danışa-danışa maşından düşəndə düz kanalın içinə düşdüm. Həmid bərkdən gülüb dedi: “Halal olsun mənə! Gördün necə sürücüyəm?! Sənin şərəfinə Şumaxer kimi park eləmişəm”. Heç vaxt söz altda qalmazdı. Necə olursa-olsun, söz və rəftarıyla vəziyyətdən çıxırdı. 64 Fələstin küçəsində, Məhəmməd Rəsulullah (s) məscidi ilə üzbəüz yerləşən 125 saylı qeydiyyat şöbəsinə ata- anamla birgə düz saat dörddə yetişdik. Həmidin ata-anası və qardaşı Səid yarım saatdan sonra gəldilər. Onlarla salamlaşandan sonra gözüm qapıda idi, ancaq Həmiddən xəbər yox idi. Yerimdə quruyub qalmışdım. Bu qədər adam gəlmişdi, ancaq səbəbkar ortada yox idi. Maraqlananda bildim ki, öncəki hadisə yenə təkrarlanıb. Yolun yarısında cənabın yadına düşüb ki, yenə vəsiqəni evdə unudub. O gələnə qədər saat beşi keçmişdi. Atam hərbçi olduğu üçün vaxta qarşı çox həssas idi. Onun üçün saat dördlə beşə bəş dəqiqə işləmiş arasında böyük fərq vardı. Biz də belə böyümüşdük. Onun bu qədər gecikdiyinə görə elə hirsləndim ki, çırtma vursaydın, məndən qan çıxardı. Həmid ata-anasıyla otağın bir tərəfində əyləşmişdi, mən də öz ata-anamla düz onlarla üzbəüz. Kəbinkəsən dedi ki, gec gəldiyimizdən dolayı, öncədən növbə alanların işi bitənə qədər gözləməliyik. Bizim əqdimizi ən sonda oxuyacaqmış. Gəlin və bəylər bir-bir içəri əqd oxutdurmağa keçirdilər. Biz də tamaşaçı olmuşduq. Həmid narahat olduğumu görəndə mesaj yazdı: “Ay mənim darlinqim! Narahat olma, vəsiqəmi iki dəfə evdə unutmağımın mütləq bir hikməti var”. Hirsli olduğum zaman mənə Darlinq deyərdi. İngilis dilində “əzizim” deməkdir. Boş vaxtlarında ingilis dilini öyrənməyə gedərdi. Bu dili öyrənməyi həddən artıq sevirdi. Deyirdi ki, bir gün ehtiyacımız ola bilər. Bəzən belə sözlərdən istifadə edirdi. Mesajı oxusam da cavab yazmadım. Həqiqətən, çox narahat idim. Telefonumdan yenə bildiriş səsi gəldi. Bu dəfə lətifə göndərmişdi. Gülməyimin qarşısını ala 65 bilmədim. Mənim güldüyümü görəndə özü də təbəssüm etdi. Həmişə bu şəkildə bir-birimizin ürəyini almağı bacarırdıq. Əgər bir narahatlıq və ya mübahisəmiz olanda çox tez həll olurdu, çox tez! Həmid açıq qəhvəyi rəngli pencək, tünd qəhvəyi rəngli şalvar və bazardan aldığım köynəyi geyinmişdi. Soruşdum: “Köynək əyninə oldu? Bəyəndin?” Bibim sözümü eşidən kimi Həmidə baxıb güldü. Anam soruşdu: “Bacı, gülürsən! Nəsə olub?” Bibim dedi: “Həmid evdə çatanda dedim ki, köynəyini ütüləmişəm, hazırdır, geyin, gec olmamış gedək. Razı olmadı. Dedi ki, mən yeni aldığım köynəyi geyinmək istəyirəm. Nə qədər desəm də, razı olmadı. Təzə aldığı köynəyi ütüləyənə qədər bir xeyli vaxt keçdi”. Zövqümün ona bu qədər dəyərli olduğuna görə çox sevindim. Bizdən əvvəl düz yeddi gəlinlə bəyin nikahı oxunurdu. İdarəni gözəl bəzəmişdilər. Gəlinlə bəyin oturduğu stulların hər iki tərəfi krem rəngli pərdələrlə bəzədilmişdi. Nikah süfrəsinin üstündən narıncı tüllər asılmışdı. Növbəmiz çatanda içəri girib süfrənin kənarında oturduq. Kəbinkəsən soruşdu: “Gəlin qızımız, olar ki, mehri bağışlayasız, mən müvəqqəti kəbini batil edim?” Məndən öncəki yeddi gəlin də müvəqqəti əqd mehrlərini bağışlamışdılar. Həmidə baxıb dedim:”Xeyr, mən bağışlamıram”. Hamının təəccüb dolu baxışları mənə çevrildi. Mat- məəttəl qalmışdılar. Atam soruşdu: “Qızım, mehri almaq istəyirsən?” Dedim: “Bəli, alıram”. Həmid gülərək dedi: ”Baş üstə, verərəm. Elə indicə nağd ödəməyə hazıram”. Kəbinkəsən təbəssümlə dedi: “Elə isə mehr bəyimizin boynuna”. Müvəqqəti nikahı batil edəndən sonra 66 müqəddimə olaraq dua oxudu. İstədim istixarə olaraq, Quranı açım, ancaq Həmid Yasin surəsini açmağımı tövsiyə etdi. Əqd xütbəsi oxunanda Həmid dedi: “Fərzanə, dua elə! Allahdan istə ki, mənim qəlbimdəki diləyi versin”. Həmidin üzünə baxdım. Belə bir anda Allahdan nə istədiyini bilmək istəyirdim. Mən də Allahdan istədim ki, diləyi nədirsə, əgər ona xeyirlidirsə, qəbul olsun”. Kəbinkəsən ruhani bizim tərəfimizdən vəkil olmaq üçün üç dəfə icazə istədi. Gül dərib, gülab gətirdikdən sonra dedim: “Əuzu billahi minəş-şeytanir-rəcim. Bismillahir-Rəhmanir-Rəhim. İmam Mehdinin (ə) və ata- anamın icazəsilə, bəli, razılıq verirəm”. Həmid də eynilə mənim dediyim cümləni dedi. Kəbinkəsənin çox xoşuna gəldi. Bizə dedi: “Bura çoxları gəlib əqd oxutdurub, ancaq heç biri nə Bismillah deyib, nə də İmam Mehdidən (ə) icazə alıb”. Bu dəfə də mən “bəli” deyən kimi şam azanı verildi. Həmid gülərək əlimi tutub dedi: “Gördün, sənə demişdim, bir hikməti var. Qismətimiz budur ki, sən “bəli”lərini mənə azan vaxtı deyəsən”. Bibimlə və anamla görüşüb-öpüşdüm. Mənə bilərzik almışdılar, ancaq qoluma balaca gəldiyindən dəyişib başqasını almaq qərarına gəldilər. Bir çamadan dolu müxtəlif əşyalar da gətirmişdilər: Quran, namaz çadrası, üzərlik, diş fırçası və çox gözəl ətirlər. Hamısını da Həmid öz zövqünə uyğun almışdı. Şöbədən çıxanda Həmid dedi: -Kərbəlaya gedəndə sənə gəlin çadrası almaq istəyirdim. Ancaq dedilər ki, ola bilsin, sənin zövqüncə olmasın. İnşallah, nə zaman Kərbəlaya getsək, sənə öz zövqünə uyğun gəlin çadrası alarıq. 67 Məclis bitdikdən sonra özü nişanlı olan Səid dedi: “Siz indi nikah oxutdurmusuz. Yaxşı olar ki, bizim maşınla gedib, birlikdə şam yeyəsiniz”. Səid polis idi, işi ilə əlaqədar olaraq, ya da təlim məqsədilə tez-tez Sistan-Bəlucistan vilayətinə gedirdi, Qəzvində çox az olurdu. Bizim nişanımızda, bütün qohum-əqrəbanın gəlməsinə baxmayaraq, o, Zahidanda idi. Həmid dedi: “Yox, qardaş, ezamiyyətdən təzə gəlmisən, yaxşı olar ki, sən nişanlınla bir yerə gedəsən. Biz piyada gəzməyi xoşlayırıq”. Hamıyla sağollaşıb, məsciddə namaz qılandan sonra bazara yollandıq. Həmidin Şumaxer sayağı sürücülüyündən, o şəkildə park etməsindən və mənim kanala düşməyimdən fürsət tapıb özümə corab ala bilməmişdim, tələm-tələsik, bir cüt ağ corab geyinmişdim. Həmidə dedim: “Bu ağ corablar məni çox incidir. Gərək qarşımıza çıxan ilk mağazadan bir cüt qara corab alaq”. Ədl dördyolundan Xərrazi küçəsinə keçdik. İlk gördüyümüz dükana girdik. Satıcı dedi: “Sizin üçün nazik corab verim, yoxsa qalın?” Dedim: “Fərqi yoxdur, ancaq qara olsun”. Həmid dərhal dedi: “Yox, xanım, qalın olsa, yaxşıdır”. Məni gülmək tutdu. Onun bu kimi rəftarları həqiqətən də çox ürəyimcəydi. Hər yerdə məni düşündüyünü hiss etmək mənə xoş təsir bağışlayırdı. Səbzəmeydana çatanda restorana girdik. Həmişə olduğu kimi lüləkabab sifariş verdi. Yemək hazır olana qədər on beş min tümən sayıb əlimə verdi. -Bu da sizin mehriniz, xanım. Pulu alıb dedim: -İcazə verin, sayım. Birdən az olar. Güldü. 68 -Say, bəklə bir tümən artıq oldu. Pulu saymadan Həmidin başına fırlatdım, sonra oradakı sədəqə qutusuna atıb dedim: “Yoldaşımın salamatlığı üçün nəzir olsun!” *** Şirin nişanlılıq günlərimiz payızla qışın soyuq havasına düşdü. Ürəkaçan zamanlar idi. Bir xoşagəlməz tərəfi var idi ki, günlər qısa idi. Havanın soyuq olması bizi, vaxtımızı daha çox evdə keçirməyə məcbur edirdi. Nikahın ertəsi günü Həmidi şam yeməyinə dəvət etdik. Küküləri bişirməyə yenicə başlamışdıq ki, qapının zəngi çaldı. Həmidin yenə tez gəldiyini düşündüm. Məhrəm olduğumuz gündən onu hər dəfə yeməyə çağıranda tez gələr, özü də kömək etmək istəyərdi. Hamıyla salamlaşandan sonra mənimlə birgə mətbəxə keçdi. -Bəh-bəh! Gör baş aşpaz nələr bişirib! -Yox, əşi! Bütün kükülərin zəhmətini anam çəkib. Mənə düşən sadəcə qızartmaqdı. Yağ yaxşı qızandan sonra küküləri qızartmağa başladım. Həmid dedi: -Əlimdən bir kömək gəlirsə, çəkinmə, de. -Toyuq təmizləməyi bacarırsan? Atam bir-iki toyuq alıb, indi təmizləmək istəyirdim. Oturduğu stulda bir az sağa-sola tərpənib dedi: -Doğrusu, həm öyrənmək, həm də sənə kömək etmək istəyirəm. Gülüb dedim: -Görünür! Bibim kimi bacarıqlı bir xanımın və bibim qızlarının olduğu evdə oğlanların bu işləri bacarmaması normaldır. 69 -Dediyin kimi də deyil, Fərzanə xanım. O biri qardaşlarıma baxanda yenə mən bişir-düşür işlərini az-çox bacarıram. Sünbülabada gedəndə özüm yemək bişirirəm. Ordakılar da zarafata mənə Yanqom deyirlər. Başım Həmidlə söhbətə qarışmışdı. Küküləri qızardanda əlimə yağ sıçradı. Həmid əlimin yandığını görüb dedi: -Gəl, otur burda, qalanını mən qızardaram. Gərək sənə uzunqol əlcək alaq. Oturub dedim: “Onda sən küküləri qızart, mən də toyuqları təmizləyim. Amma əlimə bax, öyrən ki, öz evimizə gedəndə toyuqları təmizləməyə kömək edərsən”. Mənə kömək etməyi çox istədiyi üçün tez stulun birini çəkib yanımda oturdu, telefonun kamerasını açıb dedi: “Dəqiq öyrənmək üçün gərək necə təmizlədiyini çəkim”. Dedim: “Aman sənin əlindən, ay Həmid!” Toyuqları təmizləməyə başladım. İş görə-görə izah edirdim: -Birinci gərək buranı kəsəsən. Diqqətli olmaq lazımdır, gərək toyuğun dərisini belə ayırasan. Bax, toyuğun bu hissəsi də kababa yaxşıdır…” Öyrədici videolar kimi düz otuz dəfə baxdı, işin bütün incəliyini öyrəndi, digər toyuqları məndən də tez və mükəmməl doğradı. Şam yeməyini yeyəndən sonra həmişə olduğu kimi, boşqabları anamın yumasına razı olmayıb dedi: “Fərzanə ilə yuyarıq. Həm də qab yuya-yuya söhbət edərik”. Mən qabları qab pastasıyla yuyurdum, Həmid də suya çəkirdi. Ancaq yenə də şıltaqlığından əl çəkmir, hərdən üz-başıma su səpirdi. Ona dedim: -Bilirsən, mənim nişanlılıq dövrümün arzusu nədir? Gülərək dedi: 70 -Nədir? Yoxsa o altı milyon tümənə plan cızmısan? -Ona plan cızmağa ehtiyac yoxdu ki. Həmid ağanın nəyi varsa, mənimdir, mənim də nəyim varsa, Həmid ağanın. -Yaxşı, de görüm, nədir arzun? Maraqlı gəldi. -Birinci arzum budur ki, universitetdən evə kimi səninlə piyada gedim. İkinci arzum budur ki, səninlə Mildar dağının başına çıxaq. Yadımdadır, mən uşaq idim, bir dəfə dayımla dağın ətəyinə kimi getdik, ancaq başına çıxa bilmədik. -Qane insanlardan xoşum gəlir. Sadə aruzların var. Universitetdən evə kimi piyada getməyə varam, ancaq dağın başını söz vermirəm. Çünki ora artıq bizim bazamızın bir hissəsi olub. Ora çıxmağa çətin icazə verələr. Həyətdə Həmidlə sağollaşmağım yarım saat çəkdi. O dedi: -Sabah Sünbülabada getmək üçün icazə almışam. Gilas bağımızı belləmək istəyirik. Atam təkdir, kömək etməliyəm. -Sən Allah, ehtiyatlı ol. Mən Ələmut yolundan həmişə qorxmuşam. Asta sürməyə çalış. Çatanda da mənə zəng elə. Səhər saat 10-da dərslərimi yenicə təkrarlamağa başlamışdım ki, mesaj yazdı: “Albalı ətirli sabahın xeyir olsun!” Bildim ki, Sünbülabaddan, albalı ağaclarının yanından yazır. Sünbülabada kimi yetmiş kilometr yol var idi. Bu kənd Ələmut bölgəsində, uca dağların əhatəsində, yaşıllıq içində yerləşirdi. Bəzən də dağlar dumanların arasında gözdən itirdi. Həmidin atasının evi kəndin içərilərində səfalı bir çayın kənarında idi. 71 Zəng edəndə bildim ki, həqiqətən də bağdadır. Hal- əhval tutandan sonra dedi: -Bax, komandir! Yanında dayandığım bu böyük albalı ağacı sənindir. Heç kim buna yaxınlaşa bilməz. Mənə müxtəlif adlar qoşardı. Mənsə onu başqalarının yanında Həmid, tək olanda Həmidim səsləyərdim. İstəyirdim ki, onun yalnız özünə aid olmadığını ona qəbul etdirim. O, həm də mənə məxsus idi. Zarafata başlayıb dedim: -Sünbülabadlı oğlan, nə vaxtdan komandir olmuşam? Gülüb dedi: -Sən çoxdan komandirsən, hələ xəbərin yoxdu? İlk danışığımız 57 dəqiqə çəkdi. Telefondan qardaşının onu ələ saldığını eşidirdim. Qardaşı zarafata deyirdi: “Həmid, yaman arvad sözüylə oturub-duran olmusan ha. Bizi biabır eləmisən”. Həmid böyük qardaşının hörmətini saxlayırdı, ağa Həsənə bir söz demirdi. Ancaq mənə dedi: “Mən arvad sözüylə oturub-durmaram, mən arvadım üçün şəhid olaram”. Bu sözləri deməklə, “Mələklər birlikdə gələrlər” filmindəki bu dialoqu canlandırmaq istəyirdi: “Kişi arvadının və uşaqlarının nökəri olmalıdır!” *** Sünbülabaddan qayıdanda özüylə xeyli qoz-fındıq gətirmişdi. Mətbəxin ortasına böyük bir parça salıb qozları sındıra-sındıra dedim: -Əzizim, bir söz desəm, narahat olmazsan? -Əlbəttə yox! Rahat ol. -Olar ki, bu dəfə bərbərə gedəndə saqqalını mən deyən kimi qırxdırasan? Saç-saqqal modelini dəyişməni istəyirəm. -Necə bir şey istəyirsən? Saç maşınını gətir, özün necə istəyirsən, elə də düzəlt! 72 -Həmid, istəmədim. Bir söz idi, dedim. Özüm bacarmıram axı. -Sənə maşınla işləməyi öyrədərəm. Uzağı, saçım korlanacaq, mən də gedib keçəl qırxdıracam. -Həmid, mən indiyə qədər belə bir iş görməmişəm. -Eybi yox, öyrənərsən. İnsanın zahiri görünüşü həyat yoldaşının zövqünə uyğun olmalıdır. O qədər israr etdi ki, razılaşdım. Maşından istifadə tərzini özü öyrətdi. Saç-saqqalını qaydasına saldım. Yalan olmasın, pis alınmadı, demək olar ki, mən istəyən kimi oldu. O gündən etibarən otağa parça və ya sellofan sərib, saç-saqqalını özüm istədiyim formada düzəldirdim. Təxminən hər gün bir-birimizi görürdük, bir-birimizə çox bağlanmışdıq. Ya Həmid bizə gəlirdi, ya mən bibimgilə gedirdim, ya da birlikdə harasa gedirdik. Bir dəfə yenə günbatana yaxın evdən çıxdıq. Görüş yerimiz Dörd peyğəmbər məqbərəsi idi. Dörd peyğəmbər və bir imamzadənin dəfn olunduğu məqbərə Qəzvin şəhərinin mərkəzində yerləşirdi. Ora o qədər getmişdik ki, ayaqqabıları təhvil alan adam bizi tanıyırdı. Həmişə ayaqqabılarımızı bir yerdə qoyurdu, nömrə də vermirdi. İllər öncə Həmidin ayağı əməliyyat olunduğu üçün həmişə tibbi ayaqqabı geyinirdi. Ziyarətdən sonra motosikletə minəndə dedim: -Bu dəfə ildırım sürətilə gedək. Adətən, motosikletdə nə isə yeyərdik. Çox vaxt qarğıdalı çipsi yeyirdik. Bu dəfə də onun bir neçəsini Həmidə verdim. Həmid çipsləri yeyəndən sonra dedi: -Fərzanə, bu saqqalımla motosikletdə çips yediyimi kim görsə, biabır olaram ha. -Hamıyla ol, amma heç kimlə olma. Rahat ol, Həmid! Bir də bu qarğıdalıdan əlinə düşməyəcək. 73 Həmişə gəldiyimiz yolu, yəni Korpus küçəsindən şəhidlər xiyabanına kimi motosikletlə getdik. Şəhidlər xiyabanının ətrafında, mədəniyyət məhsulları satılan mağaza açılmışdı. Həmidin təklifi ilə ora baş çəkdik. Onun üçün mağazanın ən maraqlı bölməsi kitab satılan bölmə idi. Mən də tablolar olan bölməyə getdim. Həmid yeni çapdan çıxmış bir kitabı götürüb satıcıdan soruşdu: -Siz bu kitabı oxumusuz? Hansı mövzudan bəhs etdiyini bilirsiz? -Deyəsən, qiyamətin isbatı haqdadır. Girişini oxusaz, məlum olar. -Kitabın pulunu vermədiyimə görə, girişini də oxumağa haqqım çatmır. Kitabı yalnız o zaman oxuya bilərəm ki, onu almış olum. Vallah, hətta bir səhifəsini belə oxumaq şəriət cəhətindən problemlidir. Ola bilsin, kitabın müəllifi, ya da naşiri razı olmasın. Satıcı onun bu sözlərinə məndən də çox təəccüb etdi. Həmidə dedim: -Evimizə tablo alaq? Tablolara baxıb dedi: -Yaxşı, məsləhətdir. Nə qədər ki, fürsətimiz var, gərək evimizi fikirləşək. Bütün tablolara baxandan sonda İmam Xameneinin təbəssüm etdiyi halda çəkilmiş tablosunu seçdik. Həmid pulunu ödəyəndə gözü üzük vitrininə sataşdı. -Dürr-Nəcəf qaşlı üzüyünüz var? -Sifariş vermişik, gətirməlidirlər. Mağazadan çıxanda əlini gözümə yaxınlaşdırıb dedi: -Bu üzüyü görürsən, xanım? Qaşı dürr-Nəcəfdir. Həmişə barmağımdadır. Eşitmişəm ki, barmağına bu üzüyü taxanlar qiyamət günü həsrət çəkməyəcəklər. Gərək 74 bunun qaşını ikiyə bölək, yarısı ilə sənə üzük düzəltdirək. Sənin qiyamətdə həsrət çəkməyinə dözə bilmərəm. Şam namazına yarım saat qalırdı. Şəhidlərin qəbirlərinə çatanda məndən bir-iki addım irəlidə gedirdi. Yeganə sevmədiyi şey şəhidlərin məzarı yanında çiyin-çiyinə gəzmək idi. Deyirdi: “Ola bilsin, hansısa şəhidin yoldaşı, hətta qoca olsa belə, bizi çiyin-çiyinə gedən halda görər, şəhid yoldaşıyla birlikdə olduqları gün yadına düşər və o günlər üçün darıxar. Yaxşı olar ki, bu şeylərə riayət edək və bir-birimizdən bir az aralı gəzək”. İlk öncə Həmidin uzaq qohumlarından olan, məzarı birincı sırada yerləşən Şəhid Baratəli Siyahkalinin məzarını ziyarət etdik. Sonra onuncu cərgəyə getdik. Ora Həmidin həmişəki görüş yeri, Şəhid Həsən Hüseynpurun məzarı idi. Bu şəhid, Həmidin dostu və hərbçi yoldaşı idi. Doxsanıncı illərdə keçirilmiş Pejak əməliyyatında şəhid olmuşdu. Həmid onunla dostluğuna çox sadiq idi. Məzarı başına çatanda dedi: “Fatihə oxuyub qutarandan sonra get, başqa şəhidləri ziyarət elə. Mənim Həsənə sözüm var”. Bir az aralanan kimi şəhidlə dərdləşməyə başladı. Ən mühüm sözü də bu idi: “Bəs məni nə vaxt yanına aparacaqsan?” Azan veriləndə İmamzadə Hüseyn hüseyniyyəsinin ortasındaydım. Həmidlə münasibətimizin hər gün daha da yaxşılaşdığına görə çox sevinirdim. Əvvəllər ora gedəndə Həmidlə rahat danışa bilmədiyim üçün xeyli ağlamışdım. İndi isə nə qədər danışsaq da, sözümüz bitmək bilmirdi. Bir-birimizə hədsiz dərəcədə bağlanmışdıq. *** Bir gecə hava çox soyuq idi. Küçələrdə bircə quş belə uçmurdu. Həmid zəng edib danışmalı olduğumuzu bildirdi. Tutqun səsimdən anladı ki, halım o qədər də yaxşı 75 deyil. Ancaq gecənin o vaxtında onu narahat etmək istəmirdim. O qədər israr etdi ki, axırda dedim: “Halım yaxşı deyil, qarnım yaman ağrıyır. Sən narahat olma. İsti nabat içərəm, keçər”. Güclü qarınağrısına tutulmuşdum. Öz-özümə təlqin edirdim ki, sadə ağrıdır, keçib-gedər, ancaq düzəlmək bilmirdi. Həmid telefonun arxasında çox nigaran qaldı. Sağollaşmağımızdan heç 15 dəqiqə keçməmiş qapının zəngi çaldı. Həmid idi. İçəri girən kimi dedi: -Qalx, xəstəxanaya gedirik. -Həmid can, ciddi bir şey deyil, narahat olma. Ancaq xeyri olmadı. Belə vaxtlarda bir yerdə qərar tuta bilmirdi. Sağlamlığıma qarşı çox həssas idi. Hazırlaşıb xəstəxanaya yollandıq. İlk müayinədə apendisit tutması olduğunu söylədilər, qoluma çoxlu venadaxili kateter saldılar. Qolumdan çoxlu qan gəldi, bütün paltarlarım və ayaqqabım qana boyandı. Həmid islanmış bandajla qollarımı və ayaqqabılarımı təmizlədi. Pərvanə kimi başıma dolanırdı. UZİ üçün Şəhid Rəcai xəstəxanasına getməli idik. Tibb bacılarından heç kim bizimlə gəlmədi. Həmidlə ambulansa mindik. Maşında sadəcə ikimiz idik. Halım nisbətən yaxşılaşmışdı, ancaq bir yerdə dura bilmirdim. İlk dəfə idi ambulansa minirdim. Həyəcandan ağrılarımı unutmuşdum. Ambulansın pəncərəsindən bayıra baxırdım. O qədər dəcəllik etdim ki, axırda Həmid dilə gəlib dedi: “Otur, Fərzanə, başın fırlanar. Biabır olduq, elə bil, xəstə deyilsən”. Gecə saat 11 idi. Maşında o qədər atılıb- düşdüm ki, xəstəlik yadımdan çıxdı. UZİ həkimi dedi ki, ciddi bir şey yoxdur, amma bu gün həkim nəzarətində olsa, yaxşı olar. Birinci xəstəxanaya qayıtdıq, zəng vurub vəziyyətim barədə evə məlumat 76 verdik. Həmid yanımda qaldı. Cümə axşamı idi, hər həftə olduğu kimi, bu axşam da əza məclisinə getməli idi, mənə görə qaldı. Çarpayımın yanından tərpənmirdi. Üzümə baxıb dedi: “Düz deyirlər ki, nənəyə oxşayırsan”. Təbəssüm etdim. Çox yorğun idim. Dərmanlar yavaş- yavaş təsirini göstərməyə başlamışdı. Onunla danışa bilmirdim. Necə yuxuya getdiyimin fərqinə belə varmadım. Gecənin yarısından sonra Həmidin ağlamaq səsinə oyandım. Əlimdən tutub ağlayırdı. -Niyə ağlayırsan? Narahat olma, ciddi bir şey yoxdur. -Sənə bir şey olacağından qorxuram. Sən yuxuda ikən ancaq bunu düşünürdüm ki, bir gün ölüm bizi ayırsa, gərək birinci mən ölüm. Yoxsa sənsizliyə dözməyə taqətim çatmaz. Səhərə qədər işi çarpayımın yanında namaz qılmaq oldu, gözlərini bir an belə yummadı. Deyəsən, səhərə kimi məfatihül-cinan kitabının seçilmiş dualarının hamısını oxuyub bitirdi. Tibb bacısı Həmidin namaz qıldığını görüb dedi: “Namazxanamız var. İstəsəniz, orda namaz qıla bilərsiz”. Həmid razılaşmayıb dedi: “Xanımımın yanında qalmaq istəyirəm”. Həmidin rəftarı hətta tibb bacılarına da qeyri-adi gəlirdi. Bizim neçə ildir evli olduğumuzu düşünürdülər. Onlara bir neçə aydır nişanlandığımızı söyləyəndə təəccübdən donub qalırdılar. Tibb bacılarından biri mənə dedi: “Siz artıq eşqin qülləsinə çatmısız. Mənim ərim olsaydı, saat bir olmamış başını atıb yatardı”. O gecə, 2012-ci ilin 28 noyabrında Həmid qətiyyən yatmadı. Düz üç ildən sonra, 2015-ci ilin 28 noyabrında isə mən Həmidin başı üstəydim və gözlərimə yuxu getmirdi. Dəfələrlə diksinib oyandım. Bir dəfə oyananda gördüm ki, Həmidin dostları zəng vurublar. Həmişə əzadarlığa 77 gedərdi, bunu bir dəfə də tərk etməmişdi. Başını verərdi, amma məclisləri əldən verməzdi. O axşam isə getməmişdi və dostları çox nigaran qalmışdılar. Həmidin telefonu şəbəkə xaricində olduğuna görə bütün polis bölmələrini, xəstəxanaları gəzmişdilər. Qorxularından ailəsi ilə əlaqə saxlamamışdılar. Öz-özümə dedim ki, dostlarına xəbər verməməsi onun boynuna bir qonaqlıq borcu qoydu. Ac olmağıma baxmayaraq, səhər yeməyinə meylim yox idi. Həmid icazə aldı və işə getmədi. Tək istədiyim şey darıxdırıcı xəstəxanadan çıxmaq idi. Həmidin telefonunu götürdüm. Onda çox xoşladığım maraqlı bir pinqvin oyunu var idi. Bir az başımı qarışdırdım. Sonra birlikdə telefonundakı şəkillərə baxdıq. Çəkdiyi hər şəklin özünəməxsus xatirəsi vardı. Bir çoxlarını müxtəlif ezamiyyyətlərdə çəkmişdi. Bəzi şəkillərindən çox xoşu gəlirdi, görəndə gülüb deyirdi: “Bax, bu şəkillər əsl şəhadətlik şəkildir”. İsrarla məndən hansı şəklin şəhadət posterinə daha uyğun olduğunu soruşurdu. Sözlərini çox da ciddiyə almır, gülərək şəkilləri bir-bir çevirirdim. Hələ axırıncı şəklə çatmamış maraqdan soruşdum: -Mənim adımı telefonunda necə qeyd etdiyini deməyəcəksən? -Yaxşı bir ad yazmışam. Özün axtar, görüm tapa biləcəksən? Zirənglik edib son zənglərə baxdım. Adımı “Mənim Kərbəlam” kimi qeyd etmişdi. Gülümsədim. -Qəşəngdir. Yaxşı zövqün var. Bəs niyə bu ad? -Mən Kərbəla aşiqiyəm, sən də mənim eşqimsən. Birgünlük xəstəlikdən sonra ilk dəfə idi ucadan gülürdüm. 78 -Onda bundan sonra səndən nə soruşsam, cavabında “Kərbəla” deyərsən: Həmid, hara gedirsən? Kərbəla! Ziyarətə? Kərbəla! Gedək parka? Kərbəla! O gündən sonra bəzən baş-başa qalanda məni “Mənim Kərbəlam” deyə çağırardı. Bəzən belə sadə məhəbbət daha gözəl olur. Anam səhər saat doqquzda məni görməyə gəldi. Hələ də çarpayıda uzanmışdım. Saat ondan sonra rəfiqələrim və qrup yoldaşlarım bir-bir gəlməyə başladılar. Əllərinə havayı xəstə keçmişdi. Biri təzyiqölçənlə, biri termometrlə canıma düşdü. Cana yığıldım, əlacsız qalıb dedim: “Məndən əl çəkin! İnanın, heç bir şeyim yoxdur. Bir az qarnım ağrıyırdı, o da keçib-getdi. İcazə verin, evə gedim”. Heç kim qulaq asmırdı. Nəhayət, saat dörddə xeyli analiz verəndən sonra dostlarımdan ayrılıb evə yollandım. *** Nişanlı olduğumuz günlərdə hər yerə gedirdik, imamzadələri, parkları, restoranları, bir sözlə, bütün Qəzvini gəzmişdik. Ancaq şəhidlər xiyabanı bizim daimi məkanımız idi. İki-üç gündən bir mütləq ora baş çəkirdik. Yelda gecəsinə bir həftə qalmış şəhidlər xiyabanına getdik. Həmid cibindən dəsmal çıxarıb şəhidlərin şəkillərini silməyə başladı. -Bəlkə də bu şəhidin ata-anası dünyadan köçüb, ya da qocalıb. Heç olmasa, biz bu çərçivələri təmizləyək. Maşınla gələndə həmişə özüylə boya gətirər, hansı şəhidin məzar daşının yazıları oxunmurdusa, rəngləyərdi. Bu işi görməyi çox sevirdi. Şəhidlər xiyabanından bazara kimi piyada getdik. Yelda gecəsi üçün mənə öz zövqümə uyğun hədiyyə almaq istəyirdi. Bazarın girəcəyindən qara çadra aldıq. 79 Saat da almaq istəyəndə bibim zəng vurub bizi şam yeməyinə dəvət etdi. Alış-verişimiz bitəndən sonra bibimgilə getdik. Həmidin bacısı Fatimə xanım da oradaydı. Həmidlə bir- birimizə hədsiz məhəbbət bəsləsək, çox səmimi olsaq da, xüsusən böyüklərin yanında bir az soyuq rəftar edərdik, bir-birimizin yanında oturmazdıq, onların hörmətini saxlayardıq. Bu rəftarımız o qədər qəribə idi ki, hətta Fatimə xanım da təəccüb edirdi. Qayıdanda Həmid dedi: -Bilirsən Fatimə mənə nə dedi?! Soruşdu ki, Fərzanəylə küsülüsüz? Niyə yan-yana oturmursuz? -Düzü, mən də baxışlarından anladım. Bəs sən nə cavab verdin? -Bacıma dedim ki, bəzi şeylər var, gərək hörmətini saxlayasan. Fərzanə ilə olduqca rahatıq, ancaq bu o demək deyil ki, həmişə yanaşı oturmalıyıq. Mən ata-anamın evində daha çox anamla oturmağı sevirəm. Öz aramızda bir-birimizi “əzizim”, “ömrüm”, “eşqim” deyə səsləsək də, başqalarının yanında adımızla çağırardıq. Həmid mənə “xanım”, mən də ona “Həmid ağa” deyərdim. İstəmirdim ki, başqaları bizim həyatımızın onların həyatından fərqli olduğunu düşünsünlər. Sağollaşandan sonra piyada bizim evə yola düşdük. Adətən, çox vaxt hara gedirdiksə, yorulana qədər piyada gedirdik. Gecənin o vaxtında küçələr boş idi. Mən bördürün üzərində gedirdim, Həmid də yıxılmayım deyə, əlimdən tutmuşdu. Bütün yolu söhbətləşə-söhbətləşə getdik. O qədər söhbətə dalmışdıq ki, yolun uzunluğunu tamam unutmuşduq. Həyətə girdik. Sağollaşanda dedim: 80 -Yelda gecəsi atam növbətçi komandir kimi hərbi hissədə qalacaq. İstəsən, bizə gələrsən, gecəni birlikdə oyaq qalarıq. Nişanlı günlərimizdə həyətdə sağollaşmağımız bir saat çəkirdi. Bəzən sağollaşmağımız Həmidin bizə gəlmə səbəbindən də uzun olurdu. Bunu rəfiqələrim də anlamışdılar. Nə vaxt zəng edirdilərsə, anam onlara deyirdi: “Fərzanə həyətdə nişanlısıyla danışır, yarım saatdan sonra zəng vurun”. Yarım saatdan sonra zəng vururdular, bizsə hələ də həyətdə söhbət edirdik. Elə bil, evi əlimizdən almışdılar. Sağollaşmaq istəyəndə yeni bir söz yadımıza düşürdü. Ancaq sağollaşmaqla da məsələ bitmirdi. Ondan sonra telefonu götürüb mesajlaşır, zəngləşirdik. Həmid mesaj yazanda yazardı. Mən də Hafizin şeirlərini ona göndərərdim. Bir dəfə Həmidlə xeyli mesajlaşandan sonra yazdım: “Nədənsə birdən-birə ürəyim çipslə sarımsaqlı qatıq istədi. Sabah bizə gəlsən, alarsan”. Cavab yazmadı. Düşündüm ki, yorğunluqdan yuxuya gedib. Yenə yazdım: “İlahi! Eşqimin yuxusunu şirinləşdir! Gecən xeyrə qalsın, Həmidim!” Yuxum gəlmirdi. Dərslərimi oxumağa başladım. Birdən Həmid zəng vurdu. Təəccüb elədim, telefonu açıb dedim: -Mən elə bildim, yatmısan, Həmid can. Nəsə işin var? -Səninlə nişanlanandan bəri gec yatmağa adət etmişəm. Qapıya gələ bilərsən? Aşağıdayam”. -Axı biz çoxdan sağollaşmışdıq, burda neyləyirsən? Çadramı başıma atıb, aşağı düşdüm. Çoxlu çipsi və qatıq almış, qışın soyuğunda motosikletlə gəlmişdi. Yerimdə donub qalmışdım. 81 -Həmid can, qışın soyuğunda sənə zəhmət olmasını istəməzdim. Bilsəydim bu qədər tez alacaqsan, başqa şeylər də tapşırardım. Güldü. Aldıqlarını verib motosikletə mindi. Dedim: -Bura qədər gəlmisən, evə gəl, bir az isin, sonra gedərsən. -Yox, əzizim, gecdir. Bunları verməyə gəlmişdim. Təbəssüm edib dedim: -Həqiqətən, məni utandırdın, Həmid. İndi mən çipsi yeyim, yoxsa xəcalət çəkim?! Payızın son günü – yelda axşamı anamla şam yeməyi hazırlayırdıq. Həmid mesaj yazdı: “Xanım, əgər dərsin, imtahanın yoxdursa, indidən gələ bilərəm?” Həmişə gəlmək istəyəndə əvvəlcədən mesaj yazardı. Mən də zarafata yazdım: “Görüm vaxtım varmı?!” Yazdı: “Lütfən katibənizə deyin, mənə randevü versin. Ürəyim yaman darıxıb”. Dedim: “Həmid ağa, buyurun! Biz də görüşünə müştaqıq. Nə vaxt gəlsəz, qədəmləriz gözüm üstə!” Sanki küçənin başından yazmışdı. Mən axırıncı mesajı yazandan iki dəqiqə keçməmiş qapının zəngi çaldı. Bizim ilk Yelda gecəmiz idi. Şam yeyib, çilə süfrəsini sərdik, sonra da qarpızı ortaya qoyduq. Bacım Fatimə sapla fala baxırdı. Əlimdən tutub dedi: “İstəyirəm Həmid ağanın yanında sizin həyatınızın falına baxım”. Həmidlə mən bu kimi şeylərə inanmırdıq. Ancaq əyləncə məqsədilə yanında oturduq. Bacım hər şeyi əksinə deməyə başladı. Mən də tərs-tərs Həmidə baxırdım. Bacım əlimin içindəki xətləri izah edəndə gülərək Həmidə dedim: “Gördün, sən məni sevmirsən! Falda da belə çıxdı. Əllərinə sağlıq! Gör nə yaxşı ər seçmişəm mən!” Hər ikimiz ucadan güldük. Həmid bacıma dedi: “Dayıqızı, gör bu gecə dava sala bilirsənmi?!” 82 Gecənin yarsına kimi Həmidlə deyib-güldük. Buna adət etmişdik, hər dəfə gələndə gecə saat 12-yə, 1-ə kimi oturub söhbət edirdik. Ancaq gecəni qalmırdı. Bu dəfə də sağollaşanda pilləkəndən ağzımız söhbətə qızışdı. Anam söhbətimizin uzun çəkdiyini görüb bizə çay və qarpız gətirdi. Elə oradaca çay içir, söhbət edirdik, havanın soyuqluğunu və zamanın necə keçdiyini qətiyyən hiss etmirdik. Həmid dəhlizin qapısını açıb çıxmaq istəyəndə gördüm ki, hər tərəfi qar örtüb. Həyətimiz başdan-ayağa ağarmışdı. Həmid yeriyib qarın üstündən keçdi, əl yelləyib getdi. Onun ayaq izləri, insanı məqsədinə doğru aparan nişanlara oxşayırdı, uzun müddət gözlərim önündən getmədi. Heyf ki, o gecə tək getdi və o ayaq izləri çox az təkrarlandı. Ertəsi gün Həmidin aldığı çadralığı ölçüb-biçdik. O günlərdə çadramı önə dartmağı və daha hicablı görünməyi xoşlayırdım. O çadra da mənim bu şəkildə geyinməyimə bir bəhanə oldu. Universitetə gedəndə qrup yoldaşlarım təəccübləndilər. Səbəbini soruşanda bəhanə gətirdim ki, başörtüyü bu cür tikilib. Ancaq belə çadra geyinməyim getdikcə adiləşdi. Həmid məni ilk dəfə bu tərzdə görəndə bəyənib dedi: “Düzü, belə örtünmək sənə daha çox yaraşır”. |