Yadında qalsın
Yüklə 4,97 Mb. Pdf görüntüsü
|
|
Dördüncü fəsil
Dərmansız olanın dərdinə dərman ol! İlin son günlərində hər yeri bəzəyən qırmızı balıqlar və “yeddi sin” süfrəsi mənə ilin bitdiyini xatırlatmaqdan çox “Nur yolçuları” ekskursiyasını xatırladırdı. İlk dəfə yeddinci sinifdə oxuyanda cənuba döyüş bölgələrinə getmişdim. İstəyirdim ki, orada uyuyan şəhidlər məni hər il dəvət etsinlər, mən də onlara qonaq olum. Şəhidlər elə ilk səfərimdə məni özlərinə məftun etmişdilər. Səfər boyu rəfiqələrimlə çox zarafatlar etsək də, şəhid torpağının cazibəsi hər il martın ortalarında novruzdan çox “Nur yolçuları” səfəri üçün darıxmağıma səbəb olurdu. Universitet imtahanına hazırlaşırdım deyə, iki il idi cənuba gedə bilmirdim. Bu il nə olursa-olsun, getmək istəyirdim. Universitet karvanının cənuba gedəcəyi tarix 84 qətiləşən kimi Həmidə mesaj yazdım. Bu dəfə onunla birlikdə ziyarətçilərə xidmətçi kimi getmək istəyirdim. Cavabda yazdı: “Gərək işlərimin gedişatına baxım. Düzü, ilin axırında icazə almaq bir az çətindir. Axşamçağı anamla sizə, nənəni görməyə gələcəyik. Cavabımı orda sənə söyləyərəm”. Şam namazını qılandan sonra gördüm ki, nənə həmişə olduğu kimi, səccadə üzərində əllərini qaldırıb hamı üçün dua edir. Dedim: “Nənə, iki ildir cənub səfərinə gedə bilmirəm. Dua et, bu il gedim”. Nənə qaşlarını çatıb dedi: -Görmürsən, Həmid səni nə qədər sevir?! Onu qoyub hara gedirsən?! -Həmidsiz getmək mənə də çətindir. Ona dedim ki, işdən icazə alsın, birlikdə gedək. Şam süfrəsini yenicə yığışdırırdıq ki, Həmid qapının zəngini basdı. Bibimlə birgə gəlmişdi. Üzündən məlum idi ki, icazə ala bilməyib. Mənim tək getməyimə çox da razı deyildi. Mənə o qədər bağlı idi ki, bir neçə gün ayrılıq ona çətin gəlirdi. Anamla və bibimlə birgə nənənin olduğu otağa keçdik. Otağı yığışdırmış, paltarları çamadandan çıxarmışdım. Birdən yaşıl bir örpək diqqətimi cəlb elədi. Bibimə dedim: “Bibi can, bu örpəyi başına bağla. Məncə, sənə çox yaraşacaq”. Örpəyi bağlayanda yanılmadığımı bildim. -Əladır! Elə bil, sizin üçün tikiblər. Ancaq bibim götürməyib dedi: -Ziyarətdən qayıdanda hədiyyə kimi birinə verərsən. Mənim örpəyim çoxdur. Bibini bu örpəkdə görmək üçün Həmidi çağırdım. Anam da çox israr edəndən sonra bibim qəbul etdi. 85 Bir neçə dəqiqədən sonra Həmidə gözlə işarə verdim ki, mətbəxə keçsin. İcazə alıb-almadığını bilmək istəyirdim. Hicab üçün təşəkkür edib dedi: -Əgər anam onu qəbul etməsəydi, bütün Qəzvini gəzmək bahasına olsaydı belə, axtarıb bu rəngdə örpək tapacaqdım. Həqiqətən, çox yaraşdı. Həmidin anasına bu qədər hörmət etməsi çox xoşuma gəlirdi, məni əsla narahat etmirdi, əksinə, onu daha da həvəsləndirirdim. Mən düşünürdüm ki, bir insan anasına hörmət edirsə, həyat yoldaşına daha çox hörmət edər. -Həmid, icazə məsələsi nə yerdə qaldı? Cənuba gedirsən, ya yox? -Çox istərdim, ancaq görünür, qismət deyilmiş. Ezamiyyətə getməliyəm. İcazə almağım mümkün deyil. -Bu iki ili ancaq dərslə məşğul olmuşam. Çox istəyirdim ki, bu il səninlə birlikdə gedəm. O da belə oldu. -Problem deyil. Sən getmək istəyirsənsə, get, ancaq bil ki, sənsiz çox darıxacam. -Əgər sən razı olmasan, getməyəcəm. Təbəssüm etdi. -Yox, əzizim. Bu nə sözdür?! Bu, şəhidləri ziyarət səfəridir. Get və hər ikimiz üçün dua et”. Ona nə qədər çətin olsa da, özü məni avtobusa mindirib yola saldı. Hələ Qəzvindən çıxmamış mesajları dalbadal gəlməyə başladı. Darıxmaqdan gileylənirdi. Yazmışdı: “Doğrudan da qadın bəladır. Ancaq Allah bu bəlanı bizə çox görməsin!” Cənub səfərində anladım ki, bir-birimizin yanında olmağımıza çox ehtiyacımız var. Bütün səfər beş gün sürdü. Ancaq elə bildim, əlli gün keçdi. Belə bir hala düşəcəyimi ağlımdan belə keçirməmişdim. Gecələr 86 yazışmağımıza, zəngləşməyimizə baxmayaraq, bütün işimiz ahu-zar olmuşdu. Sonuncu gün zəng edəndə səsi tutulmuşdu. -Həmid, necəsən? -Tez qayıtmağını istəyirəm. Saatın tıq-tıq səsi mənə əzab verir, iştahım qalmayıb. -Mən də sənin kimiyəm. Kaş sözünə qulaq asaydım! Kaş gəlməzdim, sonralar imkan tapıb birlikdə gələrdik!” -Sonuncu gün cəbhə bölgəsində mənimçün də dua etdin? -Hər bölgədə səni xüsusi yad edirəm. Burda Şəhid Himmətin öz boyu ölçüsündə bir şəkli var. Hər dəfə yanından keçəndə elə bilirəm ki, sənsən, orda dayanmısan. Gülüb dedi: -Şəhid Himmət hara, mən hara?! Mən daha çox Şəhid Himmətin rabitəçisi kimi şəhid olmaq istəyirəm. Mənim halım da bir o qədər yaxşı deyildi. Ancaq telefonda bu hisslərimi demək istəmirdim, onun daha da darıxacağını bilirdim. Şəhidlərin qonağı olmağıma baxmayaraq, çətin günlər yaşadım. Həm şəhidlərin yanında qalmaq, həm də Həmidin yanına qayıtmaq istəyirdim. Bəlkə də bu istəyim onların və Həmidin eyni ruhdan olduqlarına görə idi. Qayıdanda dəfələrlə zəng vurdu. Qəzvinə saat neçədə çatacağımı bilmək istəyirdi. Mən avtobusdan düşəndə yolun o biri tərəfində motosikletin yanında dayanmışdı. Məni çox səmimi qarşıladı. Motosikletə minəndə bir əli ilə motosikletin sükanını, bir əli ilə də mənim əlimi bərk tutmuşdu. Heç nə demirdi. Bir söz deyib sükutu pozmaq istəyirdim. Ancaq onun əlimi bərk-bərk tutması bir dünya sözə bərabər idi. *** 87 Mən qayıdandan sonra novruz bayramına yalnız bir neçə gün qalırdı. Bu müddətdə səfər yorğunluğunu çıxarmaq əvəzinə bütün günü yarımçıq qalmış işlərimin arxasınca qaçmaqla məşğul oldum. Alış-verişdən tutmuş bayram təmizliyinə qədər xeyli iş qalmışdı. Mən bağçaya açılan pəncərənin şüşəsini təmizləyəndə Həmid mesaj yazaraq yeni ildə nə edəcəyimiz barədə soruşdu. Dedim: -Bilmirəm. Bəlkə şəhidlər xiyabanına gedək? -İstəyirəm ki, Quma gedək. İsrar edirdi ki, yeni hicri-şəmsi ili girəndə həzrət Məsumənin hərəmində olaq. -Həmid, ilin sonunda yollarda tıxac olur. Bizim də maşınımız yoxdur. Çətin olar. -Sən ata-anandan icazə al, qalan hər şey düzələr. Mən səni həzrət Məsumədən almışam, istəyirəm ki, gedib təşəkkür edək. Bir günə gedib-qayıtmaq üçün ata-anamdan icazə aldım. Martın iyirmisi günəş çıxmamış yola düşdük. Tıxac yaranmadan yolun bir hissəsini getmək istəyirdik. Ancaq yollarda çox sıxlıq var idi. Sanki hamı yeni ili hərəmdə qarşılamağı niyyət etmişdi. Min bir zəhmətlə özümüzü Quma çatdıra bildik. İlin girməsinə bir saat qalmış, günorta saat ikidə hərəmdə idik. Ziyarətə gedəndə ağlımıza gəlmədi ki, bir yer təyin edək və il girən anda bir-birimizin yanında olaq. Düşündük ki, telefon var, ziyarətdən sonra zəngləşib görüşə bilərik. Bir-birimizdən ayrılmağımızla itməyimiz bir oldu. Telefonda şəbəkə yox idi. Çarəsiz qalıb o qədər insan arasında onu axtarmağa başladım. Onun da məni axtardığını bilirdim. Sanki həyatımızın ilk yeni ilini bir yerdə qarşılamaq qismətimizdə yox imiş. Bir-birimizdən 88 ayrılanda gözümə günəş eynəyi taxmışdım. Həmid bütün bu müddət ərzində gözündə eynək olan çadralı xanım axtarırmış, mənsə eynəyimi çıxarmışdım. Mən də o qədər insan içində o tərəf-bu tərəfə boylanıb Həmidi o qədər axtardım ki, tamam əldən düşdüm. Quma qədər gəldiyimiz yolun çətinliyi bir tərəfdən, bir neçə saatlıq axtarışın yorğunluğu da digər tərəfdən məni əldən saldı. Hovuzun yanında oturdum. Bu zaman telefonun şəbəkə problemi düzəldi və biz yeni ilin girişindən bir saat yarım sonra nəhayət, bir-birimizi tapa bildik. Həmidi görən kimi dedim: -Səni o qədər axtardım ki, yeni ilin nə vaxt girdiyini bilmədim. -Mən də səni axtarırdım. Yeni il girəndə ikimiz üçün çoxlu dua etdim. Əlini bərk-bərk tutmuşdum. Aramızda bir an belə ayrılıq düşməsini istəmirdim. O qədər sıxlıq var idi ki, irəli gedə bilmədik. Elə oradaca üzünü zərihə tutub dedi: “Bibi can, xanımımı gətirmişəm. Məni eşqimə qovuşdurduğun üçün minnətdaram”. Təxminən qürub çağı idi. O vaxt nə restoran açıq idi, nə də yemək tapmaq olardı. O qədər yorğun idik ki, yeməkxana axtarmağa halımız da yox idi. Bir neçə peçenye alıb qayıtmaq üçün 72 Şəhid meydanına getdik. Sıxlığa düşdüyümüzə və bir-birimizi itirdiyimizə görə məndən dəfələrlə üzr istədi. Qəzvinə avtobus yox idi. Əlacsız qalıb Zəncana gedən avtobusa mindik ki, yolun yarısında, Qəzvində düşək. Həddən artıq yorulmuşdum. O halda yediyimiz peçenyelər bizimçün dünyanın ən ləzzətli qidası idi. Həmid gülərək dedi: “Xərcin yaman azdır. Səhərdən bəri sənə nə səhər yeməyi almışam, nə də nahar; şam yeməyinə də Qəzvinə çatarıq. Əgər xərcin həmişə bu 89 qədər az olsa, səni tez-tez səfərə aparacam”. Belə birgünlük səfərlər həyatımızda doğrudan da çox oldu. Qumdan qayıdan kimi bayram ziyarətləri başladı. Həmid mənə palto və şalvar almışdı. Həmişəki kimi, yenə də ən gözəl paltarları seçmişdi. Adətən, mənə hədiyyə olaraq, ya paltar alardı, ya da bir dəstə təbii gül. Mən də ona ətir almışdım. O, hər cür ətirdən istifadə edirdi; yasəmən gülü, qızılgül kimi ətirlərdən tutmuş Franc, Holiday və Law ətirlərinə kimi. Həmin il bayramda əməlli-başlı bəzənmişdi. Əynində kostyum, gözündə gün eynəyi vardı. Nikah günü ona aldığım saatı da taxmışdı. Bayramdan iki gün sonra cümə axşamı həmin geyimdə də əza məclisinə getmişdi. Gecə yarısı mənə zəng vurdu. Məclisdəki dostlarının reaksiyasından danışırdı. Onlar Həmidi adətən, hərbçi, ya da xidmətçi paltarında görərdilər, kostyumda görməmişdilər. Dedi: “Dostlarıma maraqlı gəldi. Pencəyimi geyinib zarafatlaşırdılar”. Həmidin sevincini görüb mən də sevinirdim. Sağollaşanda dedim: “Sabah Buin-Zəhraya, Firiştə xalagilə gedək?” Həmid dedi: “Yaxşı fikirdir, gedək. Biz bütün qohum-əqrəbanı ziyarət etmişik. Sənin ən balaca xalangilə də gedərik. Əminəm ki, çox sevinəcək”. Səhər tezdən qapının zəngi çalan kimi tez hamıyla sağollaşıb ayaqqabılarımı geyindim və qapıya qaçdım. Həmid dedi: -Min, gedək! -Həmid can, zarafat edirsən? Buin-Zəhraya gedirik ha! Qırx kilometr yol var. Motosikleti qoy evə, maşınla gedək. Nə qədər desəm də, razılaşmadı. -Motosikletlə daha maraqlı olar. Motosikletə minən kimi danışan GPS-ə döndüm: “Həmid, diqqətli ol! Sağa get! İndi sola dön! Dairəyə 90 yaxınlaşırıq! Sürəti azalt! O adama fikir ver! Diqqətli ol, pişiyi əzmə!..” Keçirdiyim həyəcan üzündən bu sözləri deyirdim. Bir hadisə olacağından qorxurdum. Həmid dedi: -Axı sən niyə belə edirsən? Bir sürücü hər yerə diqqət edir. Öyünmək olmasın, mən özüm Şumaxerəm. -Mən bu vaxta qədər maşınların belə sıx olduğu magistral yollarda motosikletə minməmişəm. İnan, əlimdə deyil, qorxuram. Yanımızdan ağır yük maşını keçəndə özümü var gücümlə Həmidə sıxır və sağ-salamat çatmağımız üçün dodaqaltı dua edirdim. Yolboyu Həmidin dəcəlliyi tutmuşdu. Qəsdən elə yerlərdən keçirdi ki, ya çuxuru vardı, ya da tramplini. Sonra da deyirdi: “Görürsən də, necə ləzzət edir! Növbəti çuxura hazırlaş”. Sonra da gedib təkəri başqa bir çuxura salırdı. Həmin vaxtlar mən motosikletin özündən qorxurdum, o ki qala belə yolda çuxurlara düşə-düşə getməyə. Gözlərimi yumub bərk-bərk belindən yapışmışdım. İş o yerə çatdı ki, dözə bilməyib dedim: -Həmid, saxla, düşürəm. Ayaqla gəlsəydim, daha xoş olardı. Sonra da özümü küsülü göstərmək üçüm üzümü döndərim. Həmid dedi: -Barış mənimlə, əzizim. Ər-arvadın on saniyədən çox küsülü qalmasını Allah sevmir. -Bu, evə aiddir. Motosiklet məsələsi başqadır. Zarafata küsdüyümü anlayıb sürəti artırdı. Qorxumdan dedim: -Yaxşı, əzizim, səhv elədim, səni çox sevirəm. Bax, barışdım! Yolun yarısına çatmamış motosikletin təkəri partladı. Həqiqətən də Allah rəhm elədi, az qalmışdı hər ikimiz 91 maşının altına girək. Yolun ortasında qaldıq, qapı-qapı gəzib kömək axtarırdıq. Mən motosikletin yanında dayanmışdım, Həmid də bir az irəlidə əlini qaldırmışdı ki, bəlkə kimsə kömək etdi. Min bir müsibətlə bir vanet yük maşını tapa bildik. Həmid sürücünün köməyi ilə motosikleti vanetin arxasına qoydu. Qabağımıza çıxan ilk təmir yerində təkəri düzəltdikdən sonra yolumuza davam etdik. Firiştə xala bizi nahara saxlayıb, gözəl bir süfrə açdı. Motosikletə minəndə artıq günbatan çağı idi. Hər ikimiz soyuqdan donurduq. Əl-ayağım qurumuşdu. Motosikletdən düşəndə addım ata bilmirdim. Gözlərimin içi qan dolu kasa kimi qıpqırmızı qızarmışdı. Məni görən bütün günü ağladığımı düşünərdi. O günə qədər motosikletlə bu qədər yol getməmişdim. Bütün çətinliklərinə rəğmən, bu hadisəni çox sevdim. Bütün bu çətinliklərin mənə xüsusi gözəlliyi vardı. Bayram tətilləri bitən kimi Həmidin bacı-qardaşlarıyla İmamzadə Fəlların ziyarətinə getdik. Çox gözəl bir gün keçdi. Bulağın yanında tonqal qalayıb çoxlu şəkil çəkdirdik. Həmid qardaşlarıyla voleybol oynayırdı. On dəqiqədən sonra hamı istirahət üçün otursa da, Həmid hələ də ayaq üstə idi. Yavaş-yavaş inanmağa başlayırdım ki, həyatımızda ayrılıq və çətinlik olmayacaqdır. *** Hələ bayram ab-havasından çıxmamış Həmid dedi: -Bu il cənuba getmək qismət olmadı. Çox istəyirəm ki, bir neçə günlüyə şəhidlərə xidmətçilik etməyə gedək. -Əgər alınsa, mən də gələrəm. Hələ dərslərim başlamayıb. Elə o andaca telefonu götürüb, “Nur yolçuları” ekskursiya mərkəzinin müavini Hacı Məhəmməd 92 Səbbağiana zəng elədi. O, Həmidi tanıyırdı. Onunla çox səmimi hal-əhval tutdu. Həmid nişanlandığını və mənimlə birgə cənubda xidmət etmək istədiyini deyəndə çox sevindi. Hacı Səbbağianla danışdığımız kimi, aprelin yeddisində cənuba yollandıq. Karvanla birgə gedən ambulansda tibb bacısına ehtiyac var idi. Bunu biləndə tez qəbul etdim. Əlimdən gələn işlərlə şəhidlərə və “Nur yolçuları” zəvvarlarına xidmət etmək istəyirdim. Həmid də Dehlaviyədə, Şəhid Mustafa Çəmranın şəhid olduğu ərazidə xidmətçi kimi fəaliyyət göstərirdi. Hər gün səhər tezdən təcili yardım maşınına minib karvanlarla birgə bölgələri gəzirdik. O bir neçə gündə Həmidi görmək qismət olmadı. Hava şəraitinə görə tibbi yardıma ehtiyacı olanların sayı çox idi. O qədər xəstəyə yardım etməkdən də çətini ambulansın kələ-kötür yollarla getməsi idi. Gün boyunca təxminən on altı saat yolda olur, bir bölgədən o birinə gedirdik. Gecələr bütün sümüklərimin bir-birindən ayrıldığını hiss edirdim. Sonuncu gün Şəhid Gülhər düşərgəsinə getdik. Düşərgə təxminən Əndimeşk şəhərinin girəcəyindəki iki dağla üzbəüz yerləşirdi. Həmidlə vədələşmişdik ki, orada bir- birimizi görək. Gecənin yarısına kimi xəstələrimiz var idi, onlara yardım etməklə məşğul idik. İş azalanda yorğunluqdan başımı ambulansın qapısına qoydum. Ayaqlarım sallanırdı. O qədər yorğun idim ki, oradaca yuxuya getdim. Sübh azanına yaxın düşərgədə yayımlanan gözəl münacat səsinə oyandım. Gözlərimi açanda Həmidi gördüm. Mənimlə üzbəüz səkinin yanında oturmuşdu. Ay işığı düşmüş yorğun üzü xidmətçi paltarında və başına 93 qoyduğu yaşıl papaqda olduqca maraqlı görünürdü. Soruşdum: -Həmid can, nə vaxtdan burdasan? Bəs, niyə məni oyatmırsan? -Təxminən üç saat olar çatmışam. Yatdığını görəndə oyatmağa ürəyim gəlmədi. Burda oturdum ki, həm sənə nəzarət edim, həm də rahat istirahət edəsən. Təbəssüm edib dedim: -Bütün bədənim yorğundur, bu bir neçə gündə iki-üç min kilometr yol getmişik, ancaq səni görüncə bütün yorğunluğum çıxdı. İstəsən, səninlə Əhvaza qədər piyada gedərəm. Səhərin mehində düşərgənin hüseyniyyəsinə yollandıq. Şəhidlərlə qonşuluğun şəhərdə çox az hallarda qismət olan gözəlliklərindən biri də sübh namazını cəm halda qılmaq idi; eynilə mücahidlərin müharibə zamanı sübh namazının birinci sırasında dayanmaq üçün bir-birilə yarışdıqları kimi. Həmid sübh namazından sonra yarımçıq qalmış işlərini tamamlamaq üçün Dehlaviyəyə qayıtdı. Oradan da Qəzvinə gedəcəkdi. Ancaq mənim dərslərim olduğuna görə həmin gün qatara minib Tehrana, oradan da avtobusla Qəzvinə yola düşdüm. Cənubdan qayıtdığım andan Həmidin ad günü barədə düşünürdüm. İstəyirdim ki, birlikdə olduğum ilk ad gününü öz aramızda gözəl keçirək. Aprelin 24-ü, Həmidin doğum günündə səhər saat beşdə yuxudan dik atıldım. Alnımı soyuq tər basmış, dodaqlarım qupquru qurumuşdu. Qəribə bir yuxu görmüşdüm. Bir kişi xüsusi bir nur içində -görünür, şəhid imiş -mənə nəsə demək istəyirdi. Fikrini izah etməyə çalışırdı. İstədiyini söyləmək istəyəndə yuxudan oyandım. Şəhidin üzü dəqiq yadımdaydı. Bütün beynim məşğul idi 94 ki, görəsən, şəhidin demək istəyib, ancaq deyə bilmədiyi nə idi? Doğum günü münasibətilə Həmidlə şəhidlər xiyabanına getməyi planlaşdırmışdıq. Şəhidlərlə baş-başaydıq. Ona tort almışdım. Şəhidlər xiyabanına çatanda həmişə olduğu kimi, birinci Şəhid Hüseynpurun məzarı başına getdi. Bilirdim ki, dostu ilə tək qalmaq istəyir. Həmin cərgədə gəzişməyə başladım. Əlimdə tort şəhidlərin şəkillərinə baxırdım. Hamısının özünəməxsus yaşı, görkəmi olsa da, hər biri eyni rahatlığa, hüzura sahib idilər. Hamısı ümid dolu baxışlarla baxırdı. Öz aləmimdə ikən birdən yerimdə donub qaldım. Gözlərim dörd oldu. Şəklini gördüyüm şəhidlərin biri gecə yuxuda gördüyüm adam idi. Eynilə həmin baxışlarla baxırdı. Şəhid Ərdəşir İbrahimpur idi. Özünəxas cazibəsi vardı. Həmişə fikirləşirdim ki, bu şəhid mənə nəsə demək istəyir. Baxışları sözlə dolu idi. O gündən sonra nə zaman şəhidlər xiyabanına gedirdiksə, Həmid Şəhid Hüseynpurun, mən də bu şəhidin məzarı başına yollanırdım. Onun nə demək istədiyini bilməsəm də, məzarı başında qeyri-adi hüzur tapırdım. Fatihə və ziyarətnamə oxuduqdan sonra şəhidlər xiyabanının yanındakı yaşıl meydana gedib çəmən üzərində oturduq. Tortu ortaya qoyub şəkil çəkdim. Həmid tortu kəsəndə başını qaldırdı, gözlərini gözümə dikərək dedi: “Fərzanə, çəkdiyin zəhmətə görə minnətdaram. Düzü, bir söz demək istəyirəm, amma narahat olacağından qorxuram”. Ürəyim yerindən qopdu. Ağzıma qoyduğum tortu uda bilmədim. Ağlıma min cür fikir gəldi. Əlimlə işarə verdim ki, narahat olmasın. Çox ciddi şəkildə dedi: -Fərzanə, sən mənim fikirləşdiyim kimi deyilsən. 95 Bu sözü eşidəndə sanki dünya başıma uçdu. Nə edəcəyimi, ne deyəcəyimi bilmirdim. Dedim ki, yəqin, məhrəm olduğumuz ilk anlardakı rəftarım onu incidib. Zarafata mənə “buz dağı” demişdi, amma indi çox ciddi idi. -Necə yəni, Həmid? Mən yaxşı həyat yoldaşı olmaq üçün əlimdən gələni edirəm. Öz aləmimdə bir neçə dəqiqəlik fikrə daldım. Qətiyyən danışmırdı. Torta dilini belə vurmadı. Mənim bir quş kimi çırpındığımı görəndən sonra görkəmi dəyişdi, ucadan gülüb dedi: -Təbii ki, mən fikirləşdiyim kimi deyilsən, ondan da üstünsən. Sən möhtəşəmsən. Yaxşı ki şəhidlərin yanındaydıq, yoxsa ona nə deyəcəyimi yaxşı bilirdim. Ürəyimi partlatmağı çox yaxşı bacarırdı. Günbəgün ona daha çox bağlanırdım, yoxluğu məni incidirdi. Hətta bir neçə saatlığa işə gedəndə də yoxluğunu hiss etməyim deyə, başımı dərslə qatırdım. Mayın əvvəlləri idi. Həmid tibbi təlimlərdə iştirak etmək üçün üç aylıq Məşhədə getməli idi. Heç vaxt onun inkişafına mane olmaq istəmirdim. Keçdiyi hər mərhələdə onu həvəsləndirirdim. Ancaq üçaylıq ayrılıq mənim üçün də, Həmid üçün də, həqiqətən, çətin idi. Mayın altısı Həmidin qardaşı qızı Reyhanənin ad gününə getmişdik. Ertəsi gün gec olsa da, bizə gəldi. Quranın altından keçdikdən sonra sağollaşıb getdi. Həmidin arxasınca su tökəndən və içəri girib qapını örtəndən darıxmağa başladım. Mən “Nur yolçuları” səfərinə gedəndə Həmid mənə bu halı yaşadığını deyirdi. Sanki özüylə bərabər ürəyimi də aparmışdı. Yol boyunca iki-üç dəfə zəng etdim. Avtobusda olduğu üçün rahat 96 danışa bilmirdi. Ertəsi gün hələ sübh namazının səccadəsindən qalxmamış zəng elədi. -Burda, təlim düşərgəsində gözəl yasəmən gülləri yetişib. İndi onların yanından danışıram. Bu güllərdən sənin səccadənin ətri gəlir. Səccadəmin arasına qoyduğum qurumuş yasəmən gülünü iyləyib dedim: -Nə gözəl! Onda hər axşam danışacağımız yer o yasəmən güllərinin yanı olsun. Demək olar ki, hər axşam danışırdıq. Səhər tezdən ayaqqabımı geyinib universitetə gedəndən evə qayıdana qədər baş vermiş hər şeyi danışırdım. Həmid də keçdiyi təlimlərdən danışırdı. İkinci həftədən başlayaraq mənim üçün və ata-anası üçün çox darıxmağa başlamışdı. Hər dəfə zəng edəndə məndən soruşurdu: “Ata-anamı görməyə getmisən?” Bibim və atası barədə danışanda necə darıxdığını telefondan hiss edirdim. Nəhayət, bir ay yarımlıq müddət, bütün çətinliklərinə rəğmən, geridə qaldı. Təlim arası bir neçə günlük istirahət vermişdilər. Onu görməyə səbirsizlənirdim. Hər ikimizin səbri tükənmişdi. Məşhəddən avtobusa minən andan durmadan zəng edirdi. Mən də harada olduğu, nə etdiyi, nə zaman çatacağı barədə soruşurdum. Avtobusun hərəkət etmədiyini hiss edirdim. Sanki zaman durmuşdu. Bütün səbrimi itirmişdim. Hər danışanda soruşurdum: “Hələ çatmamısan, Həmid?” Deyirdi: “Təəssüf ki, yox”. Belə vaxtlarda düşünürdüm ki, kaş aşiqlərə Süleymanın uçan xalçasını verə biləydim, gözləri bu qədər yolda qalmazdı! Birdən yadıma düşdü ki, yarımçıq qalmış işlərim var və Həmid çatmazdan qabaq həll etməliyəm. Səhər saat 8-də tələsik evdən çıxdım. O qədər tələsirdim ki, nişan 97 üzüyümü taxmağı unutdum. Axırıncı dəfə zəng edəndə Qəzvinin yaxınlığındaydı. Səbzə meydana görüş təyin etdik. Bir-birimizi görəndə sadəcə əlimizdən tuta bildik. İstədiyim tək şey ona doyunca baxmaq idi. Əlimi tutanda barmağımda üzüyün olmadığını görüb soruşdu: “Yəni mən olmayanda üzük taxmırdın?” Hər şeyə fikir verirdi. Hər bir halda yalnız ona aid olmağımı istəyirdi. Barmağımdakı üzüyün ifadə etdiyi məna onun üçün çox önəmli idi. Min bir əziyyətlə anlada bildim ki, üzüyü onu görməyə tələsdiyimdən evdə unutmuşam. Ürəyim hər şey üçün darıxırdı; piyada yol getməyimiz, dondurma yeməyimiz, onun zarafatları, bir sözlə hər şey üçün. Qəzvində qalacağı bir neçə gündə bir an da ondan ayrılmaq istəmirdim. Bibim Həmidə zəng vurub nahar üçün hazırlıq gördüyünü və bizi gözlədiyini bildirdi. Həmid yeməkdən sonra çamadanını açdı. Bizə çoxlu hədiyyə gətirmişdi. Mənə bir neçə dəst paltar almışdı. Paltarları çamadanında səliqə ilə qatlamış, hər birinin arasına gül qoymuş, hamısına ətir vurmuşdu. Bibim Həmidin bu səliqəsini görüb zarafata dedi: “İnanmağım gəlmir ki, sən alış-verişdən qaçan Həmidsən. Axı əlini ağdan-qaraya vurmazdın, ay Həmid! Qız gərək bütün paltarlarını özü ər evinə aparsın, ancaq sən hər şeyi almısan”. Bibim bunu deyən kimi hamımız gülməyə başladıq. Görünür, təlim keçilməyən saatlarda məni necə sevindirəcəyini düşünürmüş. Havanın çox isti olmasına baxmayaraq, Qəzvində olduğu bir həftənin bütün günlərini birlikdə keçirdik. Müxtəlif yerlərdə görüş təyin edirdik. Hətta insanların kölgə axtardığı vaxtlarda belə hər anımızı birlikdə keçirməyə çalışırdıq. 98 Təlimdə günlərinin əksinə olaraq, bu bir həftə çox tez keçdi, təlimləri davam etdirmək üçün yenidən Məşhədə qayıtmalı oldu. İkinci ayrılıq birincidən də çətin oldu. Sağollaşanda çalışdım ki, narahatlığımı büruzə verməyim. Bilirdim ki, onun işi bu təlimlərə, ezamiyyətlərə bağlıdır. Hər sağollaşanda giley-güzar etsəydim, ruhiyyəsinə mənfi təsir göstərərdi. Öncəki səfərində yoluna hazırladığımız yemək onu incitdiyinə görə bu dəfə evdə hazırlanmış sendviç qoydum. Yola salandan sonra elə oradaca hovuzun yanında oturub durmadan ağladım, öz-özümə dedim: “Bizim bəxtimiz yoxdur, nişanlı günlərimizin əvvəli payıza, qışa düşdü, gün qısa olduğuna görə bir-birimizlə çox vaxt keçirə bilmədik. İndi günlər uzanıb, amma Həmid yoxdur”. Onsuz günlərim əzab-əziyyət içində keçirdi. Beynimdə xəyallar qururdum, təsəvvür edirdim ki, Həmid yanımda olsaydı, gedərdik Çaharsütuna, ya da Nuruş-şühədaya. Ürəyim Həmidin şirin dilindən və mehriban davranışlarından ötrü alışıb-yanırdı. Xüsusən də 23 iyunda, nişanlandığımızdan sonra keçirdiyim ilk ad günümdə yanımda deyildi. Zəng edib təbrik etdi, xeyli zarafatlaşdı. Onun yoxluğuna görə çox narahat idim. Bu, mənə əzab verirdi. Məncə, Həmid mənim narahat olduğumu anlamışdı. Telefonda danışandan sonra mesaj yazdı. Şeir göndərmiş, məni “qürrətül-eyn”, yəni gözümün işığı adlandırmışdı. Bir neçə duyğulu cümlə də yazmışdı. Əgər istəsəydi, yaxşı şair olardı. Həm yaxşı duyğusal cümlələr yazırdı, həm də poetik istedadı vardı. Yazdığı hər bir sözündən necə darıxdığını hiss etmək olurdu. Bütün cümlə və şeirləri özünün yazdığını bilsəm də, halını dəyişmək üçün yazdım: 99 “Həqiqətən, gözəl cümlələrdir. Hansı kitabdan seçmisən?” Məsumcasına yazdı: “Məni ələ salmısan, ay qız? Bunların hamısı öz əl işimdir”. Yazdım: “Zarafat edirəm, əzizim! Yazdığın hər kəlmə mənə əzizdir. Hamısını dəftərə yazıb yadigar saxlayıram”. Ertəsi gün zəng edəndə dünən yazdığı şeiri ona oxumaq istədim. Şeirlərinin özünəməxsus rəvanlığı və ritmi var idi. Özümdən bir ritm uydurub oxumağa başladım. Hamısını səhv deyir, oxuyarkən əllərimi oynadırdım. Ancaq nə etsəm də, şeirin ritmini lazımınca tuta bilmədim. Həmid dedi: -Bu cür şeir oxumağınla mənim bütün hisslərimi korladın. İkimiz də güldük. -Yaxşı, Həmid! Mən bacarmadım, özün oxu. Özü hər şeyi düz oxudu. Vəzn, qafiyə, ritm -hər şey qaydasındaydı. Şeirin ortasında dayandı, sonra dedi: -Əzizim, mən oxuyuram, maraqlı gəlmir. Sən oxu, bir az gülək. Məşhəd təlimləri iyul ayının onunda sona çatdı. Həmid əla qiymətlərlə qəbul olmuşdu, iyirmidən on doqquz, ya da iyirmi almışdı. Mən də imtahanlarımı çox yaxşı vermişdim. Yenə qayıdanda çoxlu hədiyyə almışdı. Xüsusən də çox gözəl bir ətir almışdı, onu işlətməyə ürəyim gəlmirdi, qurtaracağından qorxub çox az-az vururdum. Mənə verdiyi ən kiçik şeydən də ikiəlli yapışmaq istəyirdim. Əvvəllər deyirdim ki, mən hara, eşq hara; mən hara, aşiq olmaq hara; mən hara, vurulmaq hara?! Ancaq indi Həmid mənim hər şeyim olmuşdu. Bütün vücudumla aşiq olduğumu hiss edirdim. 100 Məşhəddən qayıdandan bir neçə gün sonra xəstələndi. Düşündüm ki, yəqin təlim şəraitinə görə belə olub. Birlikdə Heydəri küçəsində yerləşən Pakrəvan klinikasına getdik. Həkim serum yazdı. Tibb bacısı damarını tapana qədər iki-üç dəfə qoluna iynə saldı. İlk dəfə idi ki, başqasına iynə vururdular, ancaq ağrısını mən hiss edirdim; ilk dəfə idi ki, başqası xəstələnirdi, ancaq mənim halım pisləşirdi. Serum qurtarana qədər yanında qalmağa icazə aldım. Çantamdan Quran çıxardım. Mənim halım ondan pis olmuşdu. Onun acı çəkməsinə dözə bilmirdim. Quranı açıb oxumağa başladım. Həmid dedi: “Xanım, ucadan oxu. Tərcüməsini də oxu. Bu dərmanların hamısı bəhanədir. Əsl şəfa Allahın əlindədir”. |