Yusupova manzuraxon umarjonovna

2.2 So`roq gaplarning grammatik xususiyatlari
O`zbek tilshunosligida gapning lison-nutq farqlanishi asosidagi tahlili gap qurilishiga doir muhim nazariy asoslarni belgilash, gapning lisoniy sintaktik mohiyatini ifodalovchi lisoniy sintaktik qolip va uning variantlarini aniqlashtirish uchun zarurdir. Negaki, til tizimida gapning mohiyati nafaqat lisoniy sintaktik qurilish qolipi, balki bu qolipning voqelanishlari orqali ochiladi. Gap lisoniy sintaktik qurilish qolipi va variantlari nutqda cheksiz voqelanish imkoniyatiga ega. Buni yuqorida ta’kidlab o`tgan edik. Ammo [WPm]=SGning nutqiy hosilalarida kuzatiladigan nosintaktik hodisalarga aloqador jihatlarning tahlilida bu fikrni takrorlashga ehtiyoj seziladi. Chunki ishning tadqiq manbai sifatida belgilangan so`roq gaplar gapning ifoda maqsadiga ko`ra bir turidir. Ana shu xususiyati tufayli so`roq gaplar [WPm]=SGning nutqiy voqelanishlarida kuzatiladigan nosintaktik hodisalar bilan aloqadordir.
Nutqda voqelashgan gaplar qurilish xususiyatlaridan tashqari yana o`nlab nutqiy xususiyatlarga va nutqiy ma’nolarga ega bo`lishi mumkin. Bulardan biri–ohang va u bilan uzviy bog`liq bo`lgan gapning ifoda maqsadiga ko`ra, darak, so`roq, buyruq, undov, his-hayajon, so`roq-undov (ritorik) va boshqa ma’nolarga ega bo`lishidir. Bundan tashqari, gap nutqda, albatta, ma’lum bir modal ma’nosiga ko`ra neytral, gumon, ishonch, taxmin, taajjub kabi ma’nolarga ega bo`lishi mumkin. Bunday ma’nolar gapning lisoniy qurilishiga, umuman, aloqador emas.
Gapning ifoda maqsadi nosintaktik hodisalardan biri bo`lib, gaplarning darak, so`roq, buyruq, undov, his-hayajon kabi ma’nolar kasb etishiga sabab bo`ladi. Maqsadimiz nosintaktik hodisalar va turlarini tavsiflash emas, balki o`zbek tilida gapning nutqiy ko`rinishlari sirasida alohida o`rin tutgan so`roq gaplarning grammatik xususiyatlarini aniqlashdan iborat.
Fikrni shakllantirish va bayon qilish gap orqali amalga oshadi. Shu bois gap kishilarning bir-biriga axborot uzatish uchun ishlatadigan asosiy birlik bo`lib, fikr ifodalashning eng oddiy va tipik ko`rinishidir. Gap so`zlovchi uchun fikr ifodalash va axborot uzatish, tinglovchi uchun axborot qabul qilish vositasi sanaladi. Tilning asosiy vazifasi odamlarning bir-birlarini tushunishlari va gaplashishlarida vosita bo`lib xizmat qilishdir. Axborot uzatish va qabul qilish vositasi bo`lish tilning kommunikativ mohiyatidir. Kommunikatsiya jarayoni jamoani taqozo qiladi. Aniqrog`i, muayyan tilda axborot uzatish va qabul qilish shu tilda so`zlashish malakasiga ega kishilarni taqozo qiladi. Bu esa kommunikatsiya jarayonining ijtimoiy tabiatliligidan dalolat beradi.
Gap sintaktik yaxlitlik bo`lib, bu uning grammatik shakllanganligi tarkibiy uzvlari bir butunlik holiga kelganligi bilan izohlanadi. Demak, gapda bir necha jihat birlashgan bo`ladi. Birinchi jihat gapning moddiy qobig`i bo`lib, bu uni tashkil etuvchi so`z va grammatik shakllardir. Har qanday gapda kesimlik ko`rsatkichlari bilan shakllangan atov birligi(kesim)ning bo`lishi shart. Ikkinchi jihat ana shu moddiy qobiqqa singdirilgan aqliy mahsul – fikr – axborotdir. Uchinchi jihat esa so`zlovchining voqelikka munosabati – hissiy holatidir. Bu uch jihat tildagi triada(uchlik)ni –sintaktika, semantika va pragmatika birligini tashkil etadi .
Ma’lumki, gap kommunikativ birlik sifatida o`zida fikriy (semantik) va hissiy (pragmatik) kommunikatsiyani tashiydi. Bu “barcha gaplar mutlaq ham fikriy, ham hissiy kommunikatsiyaning birligidan iboratdir” degan xulosaga olib kelmasligi lozim. Chunki ayrim gaplarda hissiy munosabat sezilarsiz bo`lsa, ayrimlarida sof hissiy kommunikatsiyagina mavjud bo`ladi (Oh! Voy!). His-tuyg`ularni ifodalashda tildan boshqa vositalar (musiqa, raqs, imo-ishora) mavjudligi ham hissiy kommunikatsiyaning nisbiy mustaqilligini ko`rsatadi .
Gap, avvalo, sintaktik tugallangan qurilma ekanligi bilan xarakterlanadi. Bu ifodalanayotgan fikrning nisbatan tugallanganligi bilan belgilanadi. Sintaktik tugallanganlik gapning kesimlik ko`rsatkichlari bilan shakllanganligi va tugal ohangga egaligidir. Gap kesimga ega bo`lmasdan tugal fikr ifoda eta olmaydi. Masalan, yaxshi odam birikuvida so`zlovchi nazarda tutgan axborot yuzaga chiqmagan, chunki uning kitob haqida nima demoqchiligi ham aytilmagan. Shu bois mazkur qurilma fikrni ifodalaydigan qurilmaning asosiy shakli – kesimlikdan xoli. Yaxshi odam birikmasida odamning xususiyati haqida axborot bordek tuyuladi. Ammo bu so`zlovchining asosiy maqsadi belgilangan axborot emas. Bu ikkinchi darajali axborotdir.Chunki gapning yakunidan anglashiladigan shunday odamning mavjudligi yoki faoliyati haqidagi axborot asosiy planda yotadi. Demak, gapdan anglashilgan fikr deyilganda, undagi asosiy axborot tushuniladi. Yordamchi va asosiy bo`lmagan axborotlar uning yuzaga chiqishida vosita bo`lib xizmat qiladi . Agar gap to`liqsiz gap bo`lib, unda sintaktik tugallik bo`lmasa ham, fikr anglashilaveradi. Bunday gaplardagi sintaktik tugallik kontekstdan yoki nutq vaziyatidan ma’lum bo`lib turadi. Sintaktik tugallik sintaktik o`rin bilan ajralmas holdadir, ya’ni lug`aviy birlik kesimlik shaklida bo`lishining o`zi uni gap sifatida qarashga asos bo`la olmaydi. Chunonchi, Aytdim deganing nimasi? gapidagi aytdim so`z shakli kesimlik ko`rsatkichlari bilan shakllangan atov birligidir. Lekin u kesimlik o`rni bilan ta’minlanmaganligi bois ushbu qurshovda gap maqomiga ega emas. Kesimlik shaklidagi so`z gap bo`lishi uchun kesimlik maqomiga ega bo`lishi kerak. Sintaktik tugallanganlik kesimlik shakli va o`rni bilan belgilanar ekan, bunda tilning yaxlit vujudligi yana bir karra yaqqol namoyon bo`ladi .
Gapning sintaktik tugalligi uchun, dastavval, ma’lum bir mustaqil so`z va kesimlik shakli talab etiladi. O`qidim birligi o`qi leksemasi va -dim kesimlik shakli birikuvidan iborat. Demak, bunda tilning tarkibiy uzvlari – leksik va morfologik sathlarining birlikdagi harakati ko`zga tashlanadi. Gap, avvalo, leksik va morfrlogik sathlar birligidir. Aytilganidek, gap uchun bu ikki − lug`aviy va morfologik omil hamkorligi yetarli emas. Uning uchun sintaksisning o`ziga xos omili– sintaktik o`rin zarur bo`ladi. Sintaktik o`rin esa qurilmaning o`ziga xos tugal ohang bilan namoyon bo`lishini taqozo qiladi. Ko`rinadiki, fonetik omil sintaktik tugallikka yakun yasaydi. Demak, gapda tilning barcha sathlari – leksik, morfologik, sintaktik va fonetik sathlar yaxlit butunlik sifatida namoyon bo`ladi.
Nutqiy gapning muhim belgilaridan biri uning tugallangan ohangga ega bo`lishidir. Gapning fikriy va sintaktik tugalligi ohang jihatidan ham tugallik va yaxlitlikni taqozo qiladi: tugallangan ohang fikrning va sintaktik qurilishning tugalligini bildirib turadi. Zero, gap va gap bo`lmagan nutqiy hodisalarning muhim farqlaridan biri ham tugal bo`lmagan ohangga ega bo`lishidir [14]. Demak, so`z yoki birikma fikriy, sintaktik va ohang jihatidan tugallikka ega bo`lib, gap tusiga kiradi.
Ohang nafaqat gapning tugallanganligini, balki gapning turli tiplarini belgilashda ham muhim ahamiyat kasb etadi. Qiyoslang: