Yusupova manzuraxon umarjonovna

Bahor... Bahor. Bahor! Bahor? Bahor!?
Bu so`zning atov birligimi yoki gap, gap bo`lsa, qanday tabiatga ega ekanligini nutqda faqat ohang ko`rsatmoqda. So`z yoki so`z birikmasi atov birligi sifatida nutqda gapdan ohang bilan ham farqlanganidek, gap tiplarini farqlashda ham boshqa omillar bilan birgalikda ohangga tayaniladi. Masalan, Jonim! Bu gapning his-hayajon gap ekanligini faqat ohang ko`rsatmoqda. “Voy, jonim!” gapida esa leksik (voy) va fonetik (ohang) omil hamkorlik qilmoqda. Gapning ifoda maqsadiga ko`ra tiplari (darak, so`roq, buyruq), his-hayajon ifodalanishiga ko`ra turlarini belgilashda, leksik, morfologik omillar ishtirok etishi ham, ishtirok etmasligi ham mumkin, lekin fonetik omilning bo`lishi shart .
Gaplar mundarijasi, shakli va vazifasi jihatidan farqlanadi: Men shaharga boraman. Men shaharga boramanmi? Men shaharga boray. Bu gaplarda so`zlovchining maqsadi turlicha bo`lganligi bois ular turlicha shakllangan va gapning darak, so`roq va buyruq-istak turlari vujudga kelgan. Bu esa gapning turlicha ohangga ega bo`lishini taqozo etadi. Gaplarning grammatik shakllari bir xil bo`lganda ham ularni ohang farqlab turadi [14]. Demak, gapning grammatik shakli turlicha bo`lsa-da, so`zlovchining maqsadi va ohangi har doim muvofiq bo`ladi. Bir gapda turli xil maqsad ifodalangan bo`lishi mumkin. Masalan, “Shaharga boraman!” gapida darak bilan so`zlovchining shodlanishi ham ifodalangan va ular ohang orqali ”tasdiqlangan”.
Ma’lumki, gap ifoda maqsadiga ko`ra uch turga bo`linadi:

1. 
   darak gap;
   
2. 
   so`roq gap;
   
3. 
   buyruq gap .
   

Ba’zi lingvistik manbalarda to`rt turga ajratilib, istak gap ham kiritilgan.
Darak gap orqali narsa-hodisa haqida xabar beriladi. Masalan: Bugun havo juda issiq bo`ldi. Darak gapdagi xabar keng ma’noda bo`lib, darak-xabar, orzu-umid, ta’kid, ishonch, maslahat, tashviq, sevinch, taajjub kabilarni ham qamrab oladi.
Ishimizda so`roq gaplar tadqiq obyekti bo`lganligi uchun mazkur gapning grammatik xususiyatlari diqqat markazini egallaydi. Ayonki, so`roq gaplar nutqda so`zlovchiga noma’lum narsa, hodisa, voqea, predmet, shaxs, harakat, holat, makon, zamon yoki jarayon (va h-zo) haqida ma’lumot olish ehtiyoji tufayli vujudga keladi. Masalan: Sinfda kim navbatchi? (dars jarayonida); Qachon hisobot berasiz? (ish jarayonida); Ertaga nima bilan shug`ullanasiz? (suhbat davomida); Sog`liging yaxshimi? (so`rashish vaziyatida); Menga muzqaymoq olib berasiz-a? (bolaning onasi(otasi yoki yaqin qarindoshi)ga murojaatida); Sen boshqalardan yashirgan haqiqat-chi? (do`stlar suhbatida)... Aytish joizki, til egasi turli nutqiy jarayonda so`roq gaplar yordamida suhbatdoshidan javob olishga urinadi. Bu gaplar aksariyat dialogik nutqda, nutqiy muloqotda uchraydi. Shuning uchun barcha tillarda bo`lganidek, o`zbek tilida ham so`roq gaplarni shakllantiruvchi vositalar mavjud. So`roq gaplar

1. 
   so`roq olmoshlari (kim? nima? qaysi? qancha? necha? qachon?..);
   
2. 
   so`roq yuklamalari (-mi, -chi, -a, -ya);
   
3. 
   so`roq ohangi yordamida shakllanadi va gap oxiriga so`roq belgisi (?) qo`yiladi .
   

So`roq olmoshlari bilan shakllangan turi so`roqqa javob bo`luvchi so`zni talab qiladi. Masalan: −O`zbekiston Respublikasi madhiyasiga kim kuy bastalagan? −Mutavakkil Burhonov.
− O`zbek tiliga davlat tili maqomi qachon berilgan? − 1989-yilning 21-oktabrida berilgan.
So`roq yuklamalari bilan shakllangan so`roq gaplar esa “Ha” yoki “Yo`q” javobini talab qiladi. Masalan: − Buvimni ko`rgani boramizmi? − Ha. Albatta, boramiz.−Charos opam-chi? − Yo`q. Hozir borolmaydi. Kasallarga qarashi kerak.
Ohang gapning ifoda mazmuniga ta’sir qilishi, jumladan, so`roq gaplarni shakllantirishi haqida mulohaza bildirgan edik. Chunonchi: Yaqinda farzandli bo`ladi. − Yaqinda farzandli bo`ladi? (Yaqinda farzandli bo`ladimi?)
Nutqiy voqelikda so`roq gapda so`roq ma’nosiga boshqa ma’no ham qorishgan holda bo`lishi mumkin:
1) so`roqning o`zi: Halim keldimi?; 2) so`roq-hayrat: Xabar keldimi?;
3) so`roq-taajjub: May oyida ham qor yog`adimi?; 4) so`roq-mamnunlik: Halim o`qishni tugatdimi?; 5) so`roq-gumon: Javob berarmikin?; 6) so`roq-taxmin: Sen Olim emasmisan?; 7) so`roq-darak: Tugatdimi? (Kordingmi, tugatdi ma’nosida.); 8) so`roq-buyruq: Tezroq jonamaysizmi?
O`z navbatida, so`roq gaplar kutilayotgan javobga munosabatiga ko`ra uch turga bo`linadi:

1. 
   Sof so`roq gap. Bunday so`roq gap, odatda, javob talab qiladi:
   

− Suv qani? Nega suv yo`q?
2. Ritorik so`roq gap. So`roq gapning bu turida javob talab qilinmaydi. Chunki javob gapning o`zida yashiringan va barcha uchun ma’lum bo`ladi, mohiyatan darak, shaklan so`roq gap hisoblanadi: Kim biladi erkak zotining ko`nglini? Yurtin sevmas odam inson bo`lgaymi?! (I.Mirzo)
Ritorik so`roq gaplar mazmunan rang-baranglikka ega:
− tasdiqni ifodalaydi: Kim ona yurtini sevmaydi?!
− inkorni anglatadi: Vaqtni ortga qaytarib bo`larmidi?!
− taajjubni aks ettiradi: Po`pisa qilgani qiziq bo`ldi-ku?
− g`azabni ifodalaydi: Farzandlik oqibating shumi, ko`rnamak?
− shubhani anglatadi: ”Hovli-joy ham meniki” dersiz?!
− hayajonni ifodalaydi: Nechun kerak bo`ldi senga ko`z yoshim,
Nechun kerak, rubob, senga shuncha g`am!(A.Oripov)
3. So`roq-buyruq gap. So`roq gapning bu turi ”Hozirgi o`zbek adabiy tili” (T., 2009) darsligida shunday ta’riflanadi: ”So`roq-buyruq gap so`roq yo`li bilan buyurish ma’nosini ifodalaydi: Tezroq kelmaysizmi?”.
Aytilganlar asosida so`roq gapning asosiy belgilari haqida quyidagilarni ko`rsatish mumkin:
1.So`roq gap gapning ifoda maqsadiga ko`ra bir turidir.
2.So`roq gap grammatik shakllangan bo`ladi.So`roq gapni shakllantiruvchi vositalar uch xil: so`roq olmoshlari, so`roq yuklamalari va ohang (intonatsiya). Lisoniy tabiatiga ko`ra ular morfologik va fonetik vositalar hisoblanadi.
3. So`roq gap mazmuniga muvofiq ohangga ega bo`ladi. Nutqiy vaziyat va kommunikativ maqsad, shuningdek, mazkur gapni shakllantiruvchi vositalar so`roq ohangini belgilaydi.
4. So`roq gap nutqda, umuman, axborot olish, uning noma’lum qirralarini aniqlashtirishga xizmat qiluvchi sintaktik birlik sanaladi.