’zbekiston respublikasi oliy va o’rta maxsus ta’lim vazirligi namangan davlat univerteti

Ijtimoiy ong va ma’naviy ong nisbati
Ongning gorizontal kesimi
I zoh: Ma’naviyat ong ijtimoiy ongga nisbatan ancha tor tushuncha. Unga faqat ijtimoiy ongdagi sobit, barqaror va ijobiy mazmundagi insoniy tuyg‘ular, goyalar, tushunchalar va ideallar kiradi. Salbiy mazmundagilari ma’naviyatni emas, balki ma’naviyatsizlikni ifodalaydi. Masalan, uyat, hayo, go‘zallikdan zavqlanish, minnatdorlik, shukronalik, vijdon amri, vijdon azobi, mas’uliyat tuygusi va shu kabilar inson ma’naviyatiga oid tuygulardir. Ular hayvonot olamida uchramaydi. Uyatsizlik, behayolik, ochko‘zlik, surbetlik, yolgonchilik va h.k. ham ijtimoiy ong unsurlaridir, ammo manaviy ongga kirmaydi.


Ma’naviy ongning tuzilmaviy shakllari
(gorizontal kesim)


Izoh: E’tiqod ma’naviyat ongning negizini tashkil qiladi. Unga asotirlar, din va falsafa kiradi. Ularning har uchalasini ijtimoiy ongning alohida shakllari sifatida qabul qilish mumkin. Asotir ibtidoiy sinkretik e’tiqoddir. Nafosatga go‘zallik tuyg‘usi va u haqdagi qarashlar hamda adabiyot va san’at (badiiy qarashlar) mansub. Axloq tarkibiga odob-axloq tuygulari ea me’yorlari, qarashlaridan tashqari urf-odatlar.

Ongning, jumladan, ma’naviy ongning vertikal kesimi

Tafakkur olami, aql	Ideallar
	Ta’limotlar
	Nazariyalar
	Tizimlashgan qarashlar
	Fikr, mulohaza
	Tushuncha, g‘oya
Hissiy-emotsional olam, qalb	Did
	Zavq-shavq yoki qaxr-g‘azab
	Hissiy qoniqish yoki qoniqmaslik
	Hissiy kechinmalar
	His-tuyg‘ular

Mumtoz adabiyotda va O‘rta Sharq falsafasida ko‘ngil va aqlga biroz tor yondashilgan. Lekin ular bir-biriga deyarli qarama-qarshi qo‘yilmagan. Alisher Navoiy asarlarini o‘qib shunday xulosaga kelish mumkinki, ko‘ngil (qalb) o‘zida tuyg‘u va aqlni birlashtiradi: «Ko‘ngul badan mulkining podshohidir... Bas ulkim ko‘ngil mulkining sohib shohi bo‘lg‘ay - shohlar shohi bo‘lg‘ay». Ayniqsa, «ruhoniyat» tushunchasini Navoiy ma’naviyat, ya’ni insonning hissiyot va tafakkur dunyosining mushtarak voqeligi sifatida talqin qiladi:

Chun riyozat raf’ etib ruhoniyat,
Salb bo‘lgoch kimsadin nafsoniyat,
Qolmagay ruhoniyatdan o‘zga hech,
Sen taxallufdin bu ma’ni ichra kech.
o‘qiymiz «Lison ut-tayr»da. Ammo ba’zi hollarda, masalan, tasavvufda, ustunlik ko‘ngilga berilgan. Faqat Ollohga muhabbat (ishq) tan olingan. Majnunning Layliga, Farhodning Shiringa, Shayx San’onning xristian qiziga, qushlarning Simurg‘ga, bulbulning gulga, shoirning mayga, sharobga ko‘ngil qo‘yishi va oliy muhabbatning boshqa har qanday ko‘rinishlari majoziy ma’noda Olloxga intilishni, Ollohni sevishni ifodalagan. Muhabbatdan zavq-shavq, ishqdan mastlik, o‘zlikdan kechib yor (Olloh) vasliga etishish oshiqning birdan-bir muddaosidir. Bunday holda xayolparastlikdan tashvishlarga to‘la real dunyoga qaytaradigan, bu bilan ko‘ngilning sarxush orzularini chilparchin qiladigan aql shoirga, sufiyga kerak emas... SHunday bir tomonlama yondashuvlarni nafaqat tasavvuf olimlarida, shuningdek, ayrim boshqa ta’limotlar allomalarida ham uchratamiz.
Sho‘rolar fanida ko‘proq aqlga ustunlik berilgan. Sovet dohiylari ko‘ngil haqidagi gaplarni ziyolicha «oh-vohlar», ular xalqni sinfiy kurash va sotsializm qurishdan chalg‘itadi, deb hisoblagan. Ammo ongli ravishda kommunistik g‘oyalarga sadoqat ko‘rsatilganda ham masalaga bir tomonlama, jangovar va vulgar ateizm, murosasiz sinfiylik va partiyaviylikdan kelib chiqib mulohaza yuritilgan.
Ko‘ngil va aqlni muvozanatga keltirish zarurligi ko‘pchilik yondashuvlarda hisobga olinmas edi. Buning natijasi o‘laroq, hozirgacha kundalik ongda (nazariy ongda emas) ko‘ngil va aqlni qarama-qarshi qo‘yish, yoshlar o‘rtasida «qalbiga quloq tutib sevgini tanlash kerakmi yoki oilaviy burchingga, ota-onang, yaqinlaringga, agar uylangan bo‘lsang, farzandlaring va xotinga sodiq qolib, sevgidan voz kechish kerakmi» kabi mavzularda, ya’ni ko‘ngilgami yoki aqlga - qaysi biriga muvofiq yashash lozim qabilidagi bahslar bo‘lib turadi. Har xil yondashuvlarni ko‘p tanqid qilish mumkin. Lekin masala faqat tanqid yordamida hal bo‘lib qolmaydi.
O‘zbekistonning kelajak taraqqiyoti tashkiliy, bunyodkorlik ishlari qatorida ma’naviy yuksalishga bog‘liq. Rivojlanish esa «inkor qilish kayfiyatidan bunyodkorlik kayfiyatiga o‘tish»ni, jamiyat hayotining ma’naviy asoslarini mustahkamlashni talab qiladi.
«Ma’naviy asoslar» tushunchasi axloqiy, huquqiy, estetik, diniy va boshqa mafkuraviy munosabatlarni, ma’naviy-mafkuraviy vazifalarni bajaruvchi ijtimoiy muassasalarni, keng ma’nodagi ma’naviy hayotni qamrab oladi. Mustaqil taraqqiyotning ma’naviy asoslari deganda, xalqimiz hayotining yuksalishiga ta’sir ko‘rsatuvchi moddiy ishlab chiqarishga oid bo‘lmagan barcha asosiy omillar nazarda tutiladi. Davlatning ta’lim-tarbiya, ilm-fan, adabiyot va san’at sohasida olib borayotgan siyosati, estetik me’yorlarga, badiiy uslublar rang-barangligiga, madaniy merosga, dinga, siyosiy va axloqiy qarashlar xilma-xilligiga, ularning o‘zaro kurashiga munosabati ham jamiyat taraqqiyotining ma’naviy-mafkuraviy asoslari hisoblanadi.
Ma’naviy asos - voqelikka faol munosabat va ma’lum maqsadga, idealga intilish, shu ideallarga o‘z faoliyatini moslashtirishdir.
Ma’naviy asoslar tizimida uchta katta guruhni hamda ikkita maxsus omilni ajratish mumkin: birinchi guruh - ijtimoiy ongga oid hodisalar: tuyg‘ular, tushunchalar, g‘oyalar, baholar, me’yorlar, ideallar, ya’ni «sof ma’naviyat». Ikkinchi guruh - «predmetlashgan» ma’naviy qadriyatlar, madaniy meros. Uchinchi guruh-ma’naviy funksiyalarni bajaruvchi ijtimoiy muassasalar.
Ikki maxsus omil, bu - optimistik ma’naviy muhit va ma’naviy ehtiyojlarning yuksalishidir.
Har bir guruh, o‘z navbatida, tarkibiy qismlarga va nisbatan mustaqil shakllarga bo‘linadi. Birinchi guruh doirasida falsafiy ong, axloq, estetik ong, huquqiy ong, diniy ong, ilmiy dunyoqarash va uning alohida tarkibiy qismi sifatida milliy g‘oya ajralib turadi. Ongning ikki darajasi - ijtimoiy psixologiya va mafkura ham bir-biridan farqlanadi.
Ikkinchi guruxda esa siyosiy madaniyat, axloqiy madaniyat, huquqiy madaniyat va hokazo hamda san’atning muayyan turlari: badiiy adabiyot, teatr, haykaltaroshlik, rassomlik, naqqoshlik, dizayn, musiqa, kinochilik va shu kabilar alohida ko‘rsatilishi mumkin.
Uchinchi guruhga xalq ta’limi tizimi - maktabgacha tarbiya, umumta’lim, o‘rta maxsus va kasb-hunar, oliy ta’lim, ilmiy tadqiqot tizimi - ilmiy ishlab chiqarish birlashmalari, ilmiy tekshirish institutlari, Fanlar akademiyasi va shu kabilar, ijodiy uyushmalar - yozuvchilar uyushmasi, rassomlar, kompozitorlar, kinochilar, teatr arboblari va boshqa ijodiy soha xodimlarining turli uyushmalari, matbaa va ommaviy axborot tizimi - gazeta va jurnallar, radio va televidenie, kitob noshirligi, internet, ijtimoiy tarmoqlar va shu kabilar; mafkuraviy tarbiya tashkilotlari, maskanlar (jumladan, diniy tashkilotlar), urf-odatlar, an’analar hamda oilaning tarbiya va ma’naviyatga tegishli jihatlari kiradi. Ulardan har qaysisining inson va jamiyat, mustaqil O‘zbekistonni rivojlantirishdagi ahamiyati, salohiyati bir xil emas, ammo juda muhim. Har qaysining imkoniyatlaridan maksimal foydalanish uchun ularni alohida atroflicha va chuqur tadqiq etish lozim.
Ma’naviyatga munosabat ko‘p jihatdan milliy taraqqiyot muvaffaqiyatlarini belgilaydi. Ayniqsa, madaniy merosga to‘g‘ri munosabat nihoyatda muhimdir. Chunki milliy qadriyatlarni tiklash va rivojlantirish masalasi murakkabligi tufayli ayrim kishilar uni kelajakka emas, o‘tmishga qaratmoqchi bo‘layotganini sezmayaptilar. Islom xalifaligini tiklash yoki O‘zbekistonni islom respublikasiga aylantirish, shariat me’yorlarini joriy qilish to‘g‘risidagi fikrlarda ana shu narsa ko‘zga chalinmoqda.
Madaniy meros xalqning bebaho boyligidir. Ammo madaniy merosimizda umumbashariy, umuminsoniy qadriyatlarga aylangan bebaho durdonalar bilan bir qatorda tarixan eskirgan, yuksak taraqqiy etgan, ma’rifatli kelajakni yaratish zaruratiga mos kelmaydigan hodisalar, me’yorlar va tamoyillar ham oz emas. Masalan, paranji yopinish, evropacha kiyim-kechakdan voz kechish yoki teatr, rang-tasvir va haykaltaroshlik kabi san’at turlarini inkor qilish, maktablarni o‘kuvchilar jinsiga qarab bo‘lish, ko‘pxotinlikni yoqlash kabilar shular jumlasidandir. Ular bugungi kunda biz uchun haqiqiy milliy qadriyat emas, balki qadrini yo‘qotgan anaxronizmlardir.
Ayni paytda biz madaniy merosga o‘ta ehtiyotkorlik va e’tibor bilan, o‘ta g‘amxo‘rlik bilan yondashmog‘imiz, uni avaylab-asramog‘imiz, undan milliy ma’naviyatimizni rivojlantirishda samarali foydalanmog‘imiz lozim. Chunki madaniy merosda xalqimizning tarixi, hayotiy tajribasi, ming yillar davomida qo‘lga kiritgan yutuqlari yig‘ilgan. Madaniy meros avlodlar o‘rtasida vorisiylikni ta’minlaydi. Madaniy meros tufayli avlodlar qadim o‘tmishdagi ajdodlari bilan muloqot qiladi. Inson o‘z imkoniyatlarini yuzaga chiqarish uchun madaniy meros qatorida zamonaviy ilm-fan, texnika, adabiyot va san’at, chet tillari, AT va muloqot shakllarini yaxshi o‘zlashtirishi zarur. Zamonaviy taraqqiyot kishidan juda katta hajmdagi murakkab bilimlarni, ko‘nikmalarni egallashni talab qiladi. Ammo hech bir kishi faqat ilm olish, yangi yutuqlarni o‘zlashtirish yoki ishlab chiqarish, biznes bilan kechayu kunduz band bo‘lolmaydi. U jismoniy va ruhiy tiklanishi uchun dam olishi, bo‘sh vaqtni mazmunli tashkil etishi lozim. Zamonaviy sivilizatsiya bu borada unga katta imkoniyatlar qatorida katta xavf-xatar ham tug‘dirmoqda. Insonning kompyuter, smartfon, planshetlar, aniqrog‘i, elektron o‘yinlar, virtual dunyo bandisiga aylanish xavfi juda baland. Ommaviy madaniyatning aksariyat mahsulotlari, ayniqsa, uning kitch qismiga mansublari yana boshqa xavf tugdirmoqda. Ayonki, ularga qarshi tura olish uchun kishida mafkuraviy immunitet shakllangan bo‘lishi lozim. Mafkuraviy immunitet, mazmuniga ko‘ra, siyosiy-mafkuraviy, axloqiy, badiiy-estetik, diniy-e’tiqodiy, umuman, madaniy immunitet kabi konkret shakllarda namoyon bo‘ladi.