3 I. Bob. Landshaft tushunchasiga umumiy tavsif

2-rasm. Landshaftlarni tasniflagan olimlar
Bu tasnifning yaratilishi asosida landshaftshunos olim N. A. Nikolayev ko‘p yillar davomida Qozog‘iston dashtlarida landshaftlarni xaritaga tushirish borasida olib borgan izlanishlari yotadi. Quyida keltiriladigan fikrlarning ko‘pchiligi V.A.Nikolayev ilgari surgan g‘oyalar ta'sirida yuzaga keldi. Bu fikrlardan eng asosiysi landshaft haqidagi tushunchaning o‘ziga xos talqini bo‘ldi.
V.A.Nikolayevning fikricha, landshaftni faqat regional birlik (A.G.Isachenko, 1961) yoki faqat tipologik birlik (N.A.Gvozdetskiy, 1961) sifatida qabul qilish birday bir tomonlamalikka olib keladi. Agar biz landshaftni tipologik birlik deb qabul qilar ekanmiz, uning asosida har bir muayyan o‘ziga xos landshaftning tahlili yotishini esdan chiqarmasligimiz kerak. Har bir muayyan landshaft - o‘ziga xos geografik individdir. Lekin bir vaqtning o‘zida u qaysidir tipologik landshaftlar majmuasining bir qismidir. Haqiqatan ham, yer yuzida ikkita har tomonlama bir xil bo‘lgan landshaftni topib bo‘lmaydi. Ammo qaysidir xususiyatlari bilan bir-biriga o‘xshashlik tomonlari bo‘lgan landshaftlarni uchratish va tasnif qilish mumkin. Landshaftlar tasnifini ishlab chiqishda turlicha tamoyillarga amal qilingan bo‘lishi mumkin. Masalan, tarixiy-evolyutsion tamoyil, genetik tamoyil, morfologik tamoyil va h.k (3-чизма). Shu tamoyillardan birvarakayiga bir nechtasiga amal qilgan ma’qul. Shulardan faqat bittasigagina amal qilib tuzilgan tasnif doimo ham aniq va puxta bo‘lavermaydi. Shu bilan birga landshaftlarning o‘zini ma'lum bir tamoyilga asoslanmay, birma-bir sanab o‘tishning o‘zi ham ilmiy tasnifdan uzoqdir. Hozirgacha qo‘llanib kelinayotgan tamoyillarning eng asosiylaridan biri tarixiy-evolyutsion tamoyildir.



3-расм. Landshaftlarni tasniflash tamoyillari
Bunda landshaftni invariant tushunchasi nuqtai nazaridan qarashga to‘g‘ri keladi. Ushbu tamoyilga amal qilinganda bir tasnif jadvalining o‘zida geografik tizimlardagi juda ko‘p va turli-tuman moddiy borliqni qamrab olishi mumkin bo‘ladi. Qo‘l ostimizda ma'lum miqdorda paleogeografik ma'lumotlar mavjud bo‘lgan taqdirda bu tamoyildan foydalanish juda yaxshi natijalar berish mumkin, ya'ni landshaftlarning tashkil topishi va rivojlanishidagi ichki va tashqi aloqadorliklarni tasnif jadvalida aks ettirish mumkin bo‘ladi.
Landshaftlar tasnifida tarixiy yondashish albatta landshaftlarning kelib chiqishi (genezisi)ni tahlil qilish bilan bog‘liqdir. Landshaftlarning kelib chiqish va rivojlanish tarixi ularning ichki strukturasining o‘ziga xosligini keltirib chiqaradi. Shuning uchun, landshaftlarni tasniflashda foydalanilayotgan tarixiy, genetik tamoyil landshaftlarning ichki tuzilishini tahlil qilish bilan bevosita bog‘liq bo‘lib qoladi.
Landshaftlar tasnifida landshaftlar ichki tuzilishini tahlil qilish qoidasi asosida bir butunni uning qismlari bilan hamda qismlari orasidagi o‘zaro ta'sir va aloqadorliklarni tahlili yotadi. Biz landshaftlarni ko‘p yaruslik geotizimlar deb qabul qilgan edik. Bu bilan biz har bir landshaft ma'lum komponentlar majmuasidan iboratgina bo‘lib qolmasdan, balki o‘zidan kichikroq bo‘lgan komplekslardan tuzilganligini ham e'tirof etgan bo‘lamiz. Shunday ekan, landshaftlarning ichki tuzilishi haqida gap borganda faqat komponentlar orasidagi emas, balki kichik yoki oddiy komplekslar orasidagi o‘zaro aloqadorliklar ham tushuniladi. M. A. Glazovskaya (1961) tomonidan tavsiya etilgan geokimyoviy landshaftlar tasnifi ham ana shu tamoyil asosida tuzilgandir.
Landshaftlar ochiq geotizimlar bo‘lganligi sababli, ular o‘z yon-atroflaridagi landshaftlar bilan ham modda va energiya almashinishi ko‘rinishida aloqador bo‘lib turadi. Agar biz tasnif tuzishda landshaftlarni o‘z ichki tuzilishiga ega ma'lum bir tizimdir degan qoidaga amal qiladigan bo‘lsak, landshaftlarning ichki aloqadorligidan tashqari ularning atrof-muhit bilan va qo‘shni landshaftlar bilan bo‘ladigan aloqadorliklarini ham hisobga olish kerak bo‘ladi.
Odatda landshaftlarning ichki tuzilishining tahlili asosida tasnifning kichik taksonomik birliklarini aniqlab olish mumkin bo‘ladi. Katta taksonomik birliklarni aniqlayotganda esa ko‘proq landshaftlarning o‘zaro aloqadorliklariga va yondashib kelish xususiyatlariga ko‘proq asoslanishga to‘g‘ri keladi.
Landshaftlar tasnifini tuzganda, u puxta va "tabiiy" bo‘lishi uchun tarixiy-genetik tuzilish tamoyillariga amal qilgan ma’qul ko‘rinadi.
Har qanday ilmiy tasniflash avvalo tasnif qilinayotgan obyektga yoki hodisaga tegishli bo‘lgan ma'lum belgilarni tanlab olishni taqozo qiladi. Landshaftlarning ayrim guruhlarga tipologik birlashtirilishi yoki aksincha tabaqalanishi turli-tuman shart-sharoitlarga bog‘liq. Masalan, landshaftlarning ichki xususiyatlariga, qo‘shni landshaftlarga yondashib kelishiga, landshaft tashkil qiluvchi omillar va hodisalarning majmuiga, ularning rivojlanish xususiyatlari va hokazolarga bog‘liqdir.
Shuning uchun har qanday tasnifdagi birliklarning mavqeini aniqlashda faqat birgina belgini asos qilib olish qiyin bo‘lib, hatto bunday belgini izlab o‘tirishning o‘zi ham mantiqan noto‘g‘ri bo‘lar edi. Buning sababi shundaki, aniqlanadigan va tasniflanadigan turli-tuman birliklarni o‘z kuchi va qiymati turlicha bo‘lgan omillar asosidagina umumlashtirish mumkin bo‘ladi. Umuman olganda, asosiy belgilarni tanlab olish, tasniflash jarayonini eng muhim va mas'uliyatli bosqichlaridan biri hisoblanadi. Landshaftlar tasnifining asosiy birliklari. Landshaftlar tasnifida ham boshqa ko‘pgina tabiiy fanlar tasnifidagidek sinf, tur, turkum, xil kabi tushunchalar ishlatiladi. Bunday tushunchalarni birma-bir izohlab berishdan oldin bir-ikki taniqli geograf olimlar ishlab chiqqan tasnif ko‘rinishlarini misol tariqasida keltirib o‘tmoqchimiz. Dastlabki, ana shunday ishlardan biri N. A. Gvozdetskiy (1961) ga tegishlidir. U tavsiya etgan landshaftlar tasnifi: sinf-tur-kichik tur-guruh-xil ko‘rinishda bo‘lib, anchagina ixcham tarxlardan biridir. A. G. Isachenko (1961) tavsiya etgan landshaftlar tasnifi: tur-kichik tur-sinf-kichik sinf-xil-kichik xil-variant ko‘rinishiga ega.
Bu ikki tasnif bir-biridan ozmi-ko‘pmi farq qiladi. Jumladan, eng katta birlik sifatida N. A. Gvozdetskiy sinfni qabul qilar ekan, u eng avval tog‘lar va tekisliklar landshaftlarini ikki sinfga bo‘lib tashlashni tavsiya etsa, A. G. Isachenko esa dastavval landshaft turlarini aniqlab olishni, so‘ngra sinflarga bo‘lishni ma’qul ko‘radi. Landshaft turlarini aniqlab olishda eng asosiy mezon sifatida landshaftlarning gidrotermik rejimi, ya'ni namlik va issiqlik taqsimlanishidagi dunyo miqyosidagi farqlarni olishni tavsiya etadi.
A. G. Isachenko fikricha, landshaftlarning bir-biriga o‘xshashligi yoki bir-biridan farqi juda ko‘p sabablar bilan belgilanadi va ularning ichidan eng asosiysini aniqlab ola bilish tasnif tarxidagi eng katta birlikni tanlashga asos bo‘ladi.
Hozirgi vaqtda eng mukammal ishlangan landshaftlar tasnifining muallifi V. A. Nikolayev (1973, 1979) ekanligi ko‘pchilik geograflar tomonidan e'tirof etilmoqda. U tavsiya etgan ko‘p pog‘onali tasnif tarxi: bo‘lim-qism-kichik qism-sinf-kichik sinf-guruh-tur-kichik tur-toifa-kichik toifa-xil-variant ko‘rinishida bo‘lib, yer yuzasidagi barcha landshaftlarni ma'lum bir tartib bilan o‘rganishga yaxshi ilmiy asos bo‘la oladi.
Quyida biz V. A. Nikolayev tavsiya etgan ana shu landshaftlar tasnifidagi birliklarni izohi bilan chegaralanamiz. Chunki bu izohlar boshqa tasnif tarxlaridagi birliklar izohiga ko‘p jihatdan mos keladi.
Shunday qilib, landshaftlar tasnifida ishlatiladigan eng yirik birlik landshaftlar bo‘limi hisoblanadi. Bo‘lim darajasiga kiruvchi landshaftlar asosan Yerning geografik qobig‘ini tashkil qiluvchi turli geosferalarning bir-biri bilan tutashib turishi va o‘zaro ta'sir turiga qarab aniqlanadi. Bu haqda taniqli tabiiy geograf F. N. Milkov (1970) "Landshaftlar bo‘limi landshaftshunoslikdagi eng yuksak tipologik birlikdir" degan fikrni bildiradi. Bu birlik F. N. Milkov aytganidek litosfera, atmosfera, gidrosferalarning o‘zaro ta'sir xususiyatiga va shunga bog‘liq holda o‘zaro modda va energiya almashinish shakli hamda jadalligi o‘xshash bo‘lgan landshaftlarni birlashtiradi. Landshaftlar bo‘limiga misol sifatida quruqlik landshaftlari, suv landshaftlari, suv osti landshaftlarini kiritish mumkin. Quyida biz faqat quruqlik landshaftlariga tegishli bo‘lgan masalalar haqidagina so‘z yuritamiz.
Landshaftlar bo‘limi ichida dastavval landshaftlar qismini ajratamiz. Landshaftlar qismi birligi landshaftlarning eng asosiy energetika bazasi bo‘lmish namlik va issiqlik balansidagi farqlar va o‘xshashliklarga qarab birlashtirishga imkoniyat beradi. Bunday o‘xshashlik yoki farqlar joylarning makroiqlimiy xususiyatlari bilan belgilanadi. Bu xususiyatlar bilan o‘z navbatida joyning gidrologik rejimi, hukmron bo‘lgan o‘simlik turi va biologik modda aylanish turi kabilar chambarchas bog‘liqdir. Bu yerda gap ko‘proq iqlim mintaqalari haqida borayapti, ya'ni bitta iqlim mintaqasida rivojlangan landshaftlarning hammasi xoh u tog‘ landshafti, xoh tekislik landshaftlari bo‘lsin bitta qismga taalluqli hisoblanadi. Masalan, Kara dengizi bo‘ylaridan Turkmanistonning janubigacha bo‘lgan makonda: arktik, subarktik, boreal, subboreal, subtropik landshaftlar qismini ajratish mumkin.
Bizga ma'lumki, yuqorida sanab o‘tilgan mintaqalar tabiati g‘arbdan sharqqa tomon, ya'ni Atlantika okeanidan uzoqlashgan sari, kontinentallik ortib borgan sari o‘zgarib boradi. Shuni e'tiborga olsak, landshaftlar qismi o‘z navbatida landshaftlarning kichik qismiga bo‘linib ketishi mumkinligini ko‘ramiz.
Landshaftlar tasnifidagi navbatdagi birlik-landshaftlar sinfidir. Bu birlik yuqorida misol keltirilgan barcha tasnif tarixlarida (N. A. Gvozdetskiy, A. G. Isachenko) ishtirok etadi. Bu tasniflash tajribalarining deyarli hammasida ham sinflarni aniqlashda birgina xususiyat, ya'ni landshaftlarning morfotektonik xususiyati asos qilib olinadi va asosan ikkita landshaftlar sinfi ajratiladi: tog‘lar landshaftlari sinfi va tekisliklar landshaftlari sinfi. Bu ikki sinf orasidagi eng asosiy farq ularda tabiiy zonalarning ikki xil ko‘rinishda (tekislikda kengliklar bo‘ylab, tog‘larda esa pastdan yuqoriga) bo‘lishidir.
Tog‘ landshaftlarining ham, tekislik landshaftlarining ham tabaqalanishida yana bir gipsometrik omil, ya'ni landshaftlarning pog‘onalar hosil qilib joylashish xususiyati borligini e'tiborga olsak, unda landshaft sinflarining ichida landshaft kichik sinflarini ajratish mumkin bo‘ladi. Masalan, tekislik landshaftlari pastqam, past va baland tekislik landshaftlari kichik sinflariga, tog‘ landshaftlari esa past tog‘lar, o‘rtacha balandlikdagi tog‘lar, baland tog‘lar landshaftlari kichik sinflariga bo‘linib ketadi.
Navbatdagi tasnif birligi-landshaftlar guruhidir. Bu birlikni aniqlab olishda asosiy belgi sifatida landshaftlarning suv va geokimyoviy tartibi, ya'ni landshaftlarning atmosfera yog‘inlari hisobiga, grunt suvlari hisobiga yoki yana bir boshqa suvlar hisobiga namlanish nisbati asos qilinib olinadi. Ana shu belgilarga qarab tekislik landshaftlari ichida elyuvial, elyuvial-gidromorf (yarim gidromorf), gidromorf landshaftlar guruhlarini ajratish mumkin.
Landshaftlar guruhi birligini ajratishning (ayniqsa, tekislik landshaftlari uchun) ahamiyati e'tiborga loyiqdir. Buning sababi o‘tmishda va hozirgi vaqtda landshaftlarning ichki tuzilishi hamda ularning rivojlanish yo‘nalishi qay tarzda bo‘lganligi ko‘p jihatdan ularning suv-geokimyoviy tartibining o‘ziga xos xususiyatlari bilan bog‘liqligidadir. Shuning uchun, landshaftlar taraqqiyoti kelajakda qanday bo‘lishini bashorat (prognoz) qilish uchun ham landshaftlar guruhini aniqlab olish katta amaliy ahamiyat kasb etadi.
Landshaftlarning elyuvial, gidromorf yoki yarim gidromorf bo‘lishi, ular taraqqiyotining ma'lum davrdagi holatini aks ettiradi. Namlanish xarakteri o‘zgarishi bilan landshaftlar bir holatdan ikkinchi holatga o‘tishi mumkin, ya'ni bir guruhga mansub landshaftlar ikkinchi guruhga o‘tib qolishi mumkin. Landshaftlarning suv-geokimyoviy tartibini o‘rganishning ahamiyati katta bo‘lib, unga dastavval B. B. Polinov (1956), A. I. Perelman (1975), M. A. Glazovskaya (1964), keyinchalik V. A. Nikolayev (1973), A. A. Makunina va N. S. Selezneva (1974) kabilar o‘z ilmiy izlanishlarida alohida e'tibor berishgan. Yana bir narsa haqida to‘xtalib o‘tmoq lozimki, ba'zi bir tasnif tarxlarida landshaftlarning ana shu xususiyatlariga e'tibor berilgan-u, faqat birlikning nomi boshqacha, ya'ni guruh emas, balki qator deb atalgan.
Landshaftlar guruhi o‘z navbatida landshaft turlariga bo‘linib ketadi. Bu tasnif birligi deyarli barcha tasnif tarxlarida uchraydi. Uning izohi ham mazmun jihatidan deyarli bir-biriga yaqin. Faqat A. G. Isachenko tuzgan tasnif tarxidagi tur birligi o‘zining hajmi va mazmuni jihatidan V. A. Nikolayev tarxidagi landshaft qismlariga mos keladi.
Landshaft turlarini aniqlashda tuproq va bioiqlim belgilariga asoslanishga to‘g‘ri keladi. Jumladan, tuproq turlari, o‘simlik formatsiyalari sinfi va h.k. N. A. Gvozdetskiy, V. A. Nikolayevlarning tasnif tarxlarida landshaft turlari haqida gap borganda asosan landshaftlarning zonal turlari nazarda tutiladi. Masalan, tundra landshaftlari bir turga kirsa, dasht landshaftlari boshqa turga, cho‘l landshaftlari esa yana bir boshqa turga kiradi.
Landshaftlarning bunday zonal turlarga bo‘linib ketishi asosan elyuvial landshaftlar guruhiga xosdir. Lekin tabiatda obyektiv mavjud bo‘lgan botqoqlik landshaftlari, o‘tloq landshaftlar, sho‘rxok landshaftlar kabi boshqa guruhga kiruvchi intrazonal landshaftlarni alohida tur sifatida ajratish lozim bo‘ladi. Bunday bo‘lishi mumkinligini N. A. Gvozdetskiy (1961), M. A. Glazovskaya (1964), F. I. Milkov (1967) lar ham e'tirof etadilar.
Landshaftlar tasnifining keyingi birligi kichik tur bo‘lib, kichik zonalarga xos belgilarga asoslanib aniqlanadi. Masalan, (O‘rta Osiyo) tekisliklaridagi cho‘l landshaftlari ikkita kichik turga, ya'ni shimoliy cho‘l landshaftlari va janubiy cho‘l landshaftlariga bo‘linib ketadi.
Landshaft turlari yoki kichik turlari o‘z navbatida landshaft toifalariga bo‘linadi. Qaysi landshaft qaysi toifaga mansub ekanligini aniqlashda ayrim landshaftshunoslar (N. A. Gvozdetskiy, V. A. Nikolayev) geomorfologik belgilarga asoslanishsa, ayrimlari (Yurenkov, 1982) esa ma'lum landshaft turlari ichidagi provinsial xususiyatlarga ko‘proq e'tibor berishadi. Geomorfologik omil asos qilib olingan sharoitda esa e'tiborni ko‘proq relyefning genetik turlarini o‘rganishga qaratish kerak bo‘ladi.
Landshaft toifalari ichida kichik toifa birligini ajratishga to‘g‘ri kelib qolgan hollarda asosiy belgi sifatida landshaft tashkil qiluvchi jinslarning litologik tuzilishiga ko‘proq e'tibor beriladi.
Eng kichik tasnif birligi landshaft xillaridir. Bu birlik genezisi va ichki tuzilishi bir xil bo‘lgan individual landshaftlarning majmuini aks ettiruvchi birlikdir. Landshaft xillarining bir-biridan farqlantiruvchi asosiy belgisi landshaftdagi hukmron urochishelarning o‘xshashligidir. A. G. Isachenko (1991) ham landshaft xillarini aniqlashda landshaftlarning morfologik tuzilishi eng asosiy belgi ekanligini e'tirof etadi.
Bitta xilga mansub bo‘lgan landshaftlarni albatta aynan yoki har tomonlama bir-biriga o‘xshash deb bo‘lmaydi. Ko‘pincha bir xilga mansub landshaftlarda hukmron urochishelar umumiyligi bo‘lgan taqdirda ham hukmron bo‘lmagan urochishelar va fatsiyalar tarkibi yoki egallagan maydoni jihatidan turlicha bo‘lishi mumkin. Ana shunday hollarda landshaft xillari ichida yana bir tasnif birligi landshaftlarning kichik xili yoki morfologik variantini ajratishga to‘g‘ri keladi. Keyinchalik V. A. Nikolayev (1999) kichik qism va birliklari oralig‘ida yana bir tasnif birligini, ya'ni landshaftlar oilasini ajratishni lozim topdi. Bir qism yoki kichik qismga taalluqli landshaftlar turli tabiiy geografik o‘lkalarda uchrashi mumkinligini inobatga olgan muallif muayyan tabiiy geografik o‘lkaga oid bo‘lgan landshaftlarning kichik qismlarini bir oilaga birlashtirish maqsadga muvofiq bo‘ladi, deb hisoblaydi. Bunda landshaftlarning regional xususiyatlari ham e'tiborga olingan bo‘lar ekan.
Shunday qilib, V. A. Nikolayev ishlab chiqqan tasnif jadvali ko‘p pog‘onali bo‘lib, har bir pog‘onani aniqlashda asos bo‘la oladigan ko‘plab tasnif belgilari keltirilgan. Ushbu tasnif jadvaliga asoslanib, Qarshi dashti (I. Hasanov), Janubiy Orolbo‘yi (A. Rafiqov, I. Hasanov), Turon tekisliklari (N. A. Kogay, Sh. S. Zokirov), Amudaryo va Sirdaryo oralig‘i (Sh. S. Zokirov) landshaftlarini o‘rganish yaxshi natijalar berdi. Quyida biz misol tariqasida ikki daryo oralig‘i landshaftlari tasnifini keltiramiz.
Amudaryo va Sirdaryo oralig‘ida joylashgan yerlar tabiiy sharoiti jihatidan o‘ziga xosdir. Bu yerlarda biz qumliklarni hozirgi va qadimgi allyuvial-delta tekisliklarini, Sharqiy Orolbo‘yidagi hozirgi dengiz ostidan chiqqan tekisliklarni, Markaziy Qizilqum past tog‘lari va ularga tutashib ketgan prolyuvial tekisliklarni uchratamiz. Ularning har biri o‘ziga xos tabiatga ega bo‘lib, kelib chiqishi, yoshi turlichadir va turli ekzogen jarayonlar hamda ular bilan bog‘liq bo‘lgan turli relyef bilan ta'riflanadi. Bu, o‘z navbatida, bu yerlarda turli landshaftlarning shakllanishiga olib kelgan.
Bu hudud tabiatiga xos bo‘lgan eng asosiy xususiyat hududning shimoldan janubga ancha masofaga cho‘zilganligi va tabiiy sharoitning kengliklar bo‘ylab zonalar hosil qilishidir. Bu yerda ikki iqlim zonasini, ya'ni mo‘tadil va subtropik zonalarni ajratish mumkin. Ular orasidagi chegara janubi-g‘arbdan shimoli-sharqqa tomon taxminan Janadaryo quruq o‘zani yo‘nalishida o‘tib, ikkita landshaft qismini ajratib olishni taqazo etadi. Chegaradan shimolda qurg‘oqchil hududlar subboreal landshaftlar qismi va janubda juda qurg‘oqchil hududlar subtropik landshaftlar qismi joylashgandir. Ikkala landshaftlar qismidagi asosiy iqlimiy farqlar L. N. Babushkin (1964) tomonidan yetarli darajada izohlab berilgan. Bundagi eng asosiy farqlar atmosfera sirkulyatsiyasida, yog‘in-sochinning fasllar bo‘ylab turlicha nisbatda tushishida va termik resurslarning turlicha taqsimlanishidadir.
Janubdagi landshaftlar qismi ikkita landshaft sinfiga bo‘linadi, ya'ni tekislik landshaftlari va tog‘ landshaftlari sinfiga. Maydon jihatidan tekislik landshaftlari hukmrondir. Tog‘ landshaftlari esa kenglik zonasi ichida orol tariqasida uchraydi. Tekislik landshaftlari o‘z navbatida akkumulyativ tekislik landshaftlari, denudatsion baland tekislik landshaftlari kabi kichik sinflarga bo‘linadi.
Keyingi tasnif birligi - landshaft guruhi landshaftlarning namlanish xususiyatiga qarab, yer osti suvlarining harakatchanligiga va harakatchan kimyoviy unsurlarning chiqib ketishi yoki to‘yinishi ustunligiga qarab (avtomorf landshaftlar, yarimgidromorf landshaftlar va gidromorf landshaftlar guruhlari) ajratilgan. Landshaftlarning bunday xususiyatlarini aniqlab olish qurg‘oqchil va juda qurg‘oqchil hududlarda landshaftlar rivojlanishining umumiy yo‘nalishlarini bilib olish uchun juda muhimdir. Landshaftning avtomorf yoki gidromorf bo‘lishi uning ma'lum vaqt davomidagi holatini aks ettiradi va landshaft taraqqiyotini bashorat qilishda ahamiyatlidir.
Avtomorf landshaftlar boshqa guruh landshaftlariga nisbatan ko‘proq tarqalgan bo‘lib, ular o‘z navbatida landshaft turlariga bo‘linadi. Bular shimoliy cho‘llar landshaftlari va janubiy cho‘llar landshaftlaridir. Bu turlar orasidagi chegara biz yuqorida aytib o‘tgan landshaft qismlari orasidagi chegaraga mos keladi. Landshaft turlarini aniqlashda asosan tuproq va bioiqlimiy xususiyatlarga ko‘proq e'tibor beriladi. Turlar orasidagi iqlimiy farqlar nurash va tuproq hosil bo‘lish jarayonida, asosiy o‘simlik turlarining shakllanishida, ularning tarkibi, o‘zgarishi va hatto hosildorligida ham o‘z aksini topgan. Gidromorf landshaftlarda esa qo‘shimcha grunt suvlari hisobiga to‘yinish holati yuz berganligi uchun zonal farqlar anchagina o‘z izini yo‘qotgan va ular botqoq landshaftlari, o‘tloq landshaftlar, sho‘rxok landshaftlar, to‘qay landshaftlari va voha landshaftlari ko‘rinishida alohida turlarni hosil qiladi.
Landshaftlar toifasi landshaft turlari ichida aniqlanib, asosan geologik-geomorfologik shart-sharoitlarga qarab, ya'ni landshaftni hosil qiluvchi relyefning genetik turiga va geologik tuzilishiga asoslanib ajratiladi. Masalan, ushbu hududda allyuvial tekisliklar landshaftlari, dengiz tekisliklari landshaftlari, prolyuvial tekisliklar landshaftlari va h.k.
Landshaft toifalari o‘z navbatida landshaft xillariga bo‘linadi. Ular individual landshaftlarning tipologik umumiyligi asosida aniqlanadi. Landshaft xillariga misol tariqasida qumli cho‘l tuproqli oq saksovulzor landshafti, qumli cho‘l tuproqli efemerlar aralashgan psammofit butazorlar landshaftini aytib o‘tsa bo‘ladi. Biz qisqacha ta'riflab ko‘rmoqchi bo‘lgan landshaftlar tasnifi (O‘rta Osiyo), jumladan O‘zbekiston Respublikasi landshaftlar xaritasini tuzishda aniq va puxta asos bo‘lib xizmat qilishi mumkin.