partlayan mərmilər isə itkilərə səbəb olmadı. Hələ qarşıda 60 km-dən çox
qarlı Murovdağ aşırımı dururdu. Ac, yorğun, yuxusuz, şaxtada qarla
tamamilə örtülü dağa qalxmaq demək olar ki, mümkün deyildi. Mən
yeddi əsgərlə-Allahverdiyev Vidadi, Şükürov Nemət və digərləri ilə-
yaylaq damlarına çatanda artıq taborun bölmələri ayrı-ayrı
istiqamətlərdən pərakəndə şəkildə Murovdağ silsiləsinə qalxırdı. Bir az
yuxarı qalxdıqdan sonra qarın üstündə oturub dincimizi aldıq və
əsgərlərdən çantalarında çörək olub-olmamasını soruşdum. Çörək
olmadığını dedilər və üç ədəd konserv çıxardılar. Mən isə arxa çantamda
ehtiyat saxladığım yarım buxanka çörəyi çıxarıb 8 yerə bərabər böldüm
və axırıncı çörək tikələrini əsgərlərlə yeyib Murovdağa doğru hərəkətə
başladıq. Gecə Murova qalxırdıq. Hər tərəfdən külək qarı sovurur,
dərələrə doldururdu. Biz qarı yara-yara bir-birinin izi ilə hərəkət edirdik.
Bəzən qayaların yarıqlarına, çökək yerlərə yıxılır, dərələrə sürüşüb
düşürdük. Oradan çıxana kimi taqətimiz tamam kəsilirdi. Bir-birimizə
kömək edirdik. Dincimizi alarkən iki-üç dəqiqədən artıq dayandıqda isə
qurşaqdan aşağı su olan ayaqlarımız donmağa başlayırdı.
Gecənin qaranlığında dağlarda yolu itirmiş əsgər və zabitlərə də
rast gəlir, onları da çağırıb toplayır, öz dəstəmizə qoşurduq. Mən onlara
yolu tanıdığımı və gəldiyimiz yerlə onları sağ-salamat qaytaracağımı
deyirdim. Ancaq qar işığında uzaqda qaralan dağların zirvəsini səmt tutub
irəliləyir, digər əsgər və zabitləri öz arxamca aparırdım. Bir az getdikdən
sonra mən də yolu itirdim. Bəzən qayaların yarıqlarına düşür, tamamilə
qara batırdım. Əsgərlər köməkləşib məni çıxarır, təzədən başqa
istiqamətdə irəliləyirdik. Dağa qalxdıqca yerimək daha da çətinləşirdi.
Bəzən əsgərlər daha çox dayanmaqla dinclərini almaq və bəzən də
yatmaq istəyirdi. Amma mən onlara yatmağa imkan vermirdim. Çünki
çox dayanmaq və ya yatmaq ölüm demək idi. Yeridikcə ayaqqabılarımız
qarla dolur və qar əriyərək ayaqlarımız su içərisində qalırdı. Hərəkətsiz
qaldıqda isə şaxta vurarkən ayaqlarımız donurdu. Taqətimiz də yox idi ki,
bir-birimizə kömək edək. Mən xeyli müddət iz açaraq qabaqda
getdiyimdən artıq yorulub hamıdan geriyə qalmışdım. Könüllü döyüşçü
olan İlqar Əliyev cibinə doldurduğu şəkər tozundan bir ovuc mənə
vermişdi. Şəkər tozunu yalayaraq gedir, arxadan onlara çatmağa
çalışırdım. Məndən təqribən 200 metr qabaqda irəliləyən əsgərlərin izi ilə
gedir, izi itirməməyə çalışırdım. Külək qarı sovurduğundan izlər də
görünməz olurdu. Artıq taqətim tam tükənmişdi, addım ata bilmirdim.
Çantamda ehtiyat üçün saxladığım bir şokaladı çıxarıb yedim ki, gücümü
bərpa edəm. Yenə də yeriyə bilmədiyimi hiss edərək zabit yoldaşları:
205
Ulu tanrım, xalqımın döyüĢ ruhunu özünə qaytar!
Adili, Nizamini və İlqarı çağırdım. Bir neçə dəfə çağırdıqdan sonra onlar
səsimi eşitdilər və mənə hay verdilər. Dedim ki, “Yorulmuşam, məni
gözləyin”. Qaranlıqda-ayın və qarın işığında çətinliklə addımlayaraq
onların yanına çatdım. Hamısı dayanıb məni gözləyirdilər. Onların yanına
çatanda isə dayanmamağı bildirdim. əsgərlər dona bilərdilər. Çünki artıq
dayanmaq-donmaq demək idi. Gücümüz qalmasa da hərəkət etmək lazım
idi. Ayağa duranda əsgərlərdən bir neçəsinin qarın içərisində yatdığını
gördüm. Mən onları-Vidadini, Mirzəlini və iki başqa əsgəri qaldırmaq
istədim, qalxmadılar. Bu əsgərlər donmaq təhlükəsi ilə üzləşmişdilər.
Aclıq və yuxusuzluq onları taqətdən salmışdı. Mirzəli isə silahını
aparmağı və onu tərpətməməyi məndən xahiş etdi. Vəziyyət olduqca
çətinləşmişdi. Onları heç vaxt burada qoymaq olmazdı. Dəstə isə yenidən
xeyli bizdən uzaqlaşmışdı. Mən yenidən arxa çantamı açıb orada qalmış,
axırıncı beş ədəd şokaladı çıxarıb əsgərlərə payladım və onları bir-bir
ayağa qaldırdım, bizdən xeyli aralanmış dəstənin arxasınca irəliləməyə
başladıq. Səhər açılanda Murovun zirvəsinə çatmışdıq. Oradan daş körpü
adlanan yerə doğru dərə ilə ac və taqətsiz səkkiz saat yol getdik...
Bu əməliyyatda 24 nəfər əsgər və polis acından, yorğunluqdan
gələ bilməmiş, dağlarda donub həlak olmuş, 40 nəfərədək əsgər və zabit
donvurmadan hərbi hospitala müalicəyə göndərilmiş, onlardan bir
neçəsinin ayağı kəsilmişdi...
* * *
F.Alışovun rəhbərlik etdiyi ikinci bölük isə qəfildən Bozdu kəndi
yaxınlığında ermənilərlə qarşılaşmış, kəşfiyyata göndərilmiş bölük
komandiri leytenant Hüseynov Sahib və bölüyün baş çavuşu əsir düşmüş,
gizir Kamal Hacıyev isə ermənilərin 10-15 metrliyindən onlara qəfil atəş
açaraq qaçıb xilas olmuşdu. Bununla da bölüyün mühasirəyə düşməməsi
üçün geriyə çəkilmək əmri verilir.
Gizir Kamal Hacıyevin dediklərindən: “Fehruz Alışovun
rəhbərliyi ilə bizim bölük Lev kəndinə hücum etməli idi. Taborla ratsiya
əlaqəsi kəsildiyinə görə biz Lev kəndinə deyil, özümüzünkülərlə
birləşmək üçün istiqaməti dəyişib Bozdu kəndinə tərəf hərəkət edirdik.
Qarlı dağlarla hərəkət etmək olduqca çətin idi. Ərzağımız tükənmiş,
yorğunluq və yuxusuzluq taqətimizi əlimizdən almışdı. Yanvar ayının 3-
də səhər-səhər Təkəqaya kəndinin yaylaq yerlərinə çatdıq. Qarın
üstündəki izlər və yaylaq damlarındakı közü qalmış ocaqlar bizimkilərin
bir-iki saat əvvəl burada olmasının əlamətləri idi. Bozdu kəndinin
üstündəki yüksəkliklərdə görünən hərbçilərin bizim döyüşçülər olmasını
tam yəqin etmişdik. Biz kəşfiyyatçı əsgərlərin-İbrahimov Natiqlə
206
Abdullayev Yaşarın gətirdikləri məlumatlara inanmayaraq Bozdu
kəndində bizim taborun olduğunu yəqin etmişdik. Biz bölüyü kəndin iki
kilometrliyində saxlayaraq Bölük komandiri, bölüyün baş çavuşu və mən
kəndə yaxınlaşdıq. Üç yüz metrədək bir məsafədən kəndin üst tərəfindəki
təpəlikdə görünən hərbçiləri çağırıb kim olmalarını soruşduq. Onlar: “Biz
Daşkəsən polisləriyik, sizinkilər o biri kənddədirlər”-dedilər. Onların
özümüzünkülər olduğuna tam inandıq və avtomatların qayışını
boynumuza keçirib onlara tərəf addımladıq. Onların yanına çatmağa 10-
12 addım qalmışdı ki, birdən onlar üstümüzə qışqıraraq silahları yerə
atmağı tələb etdilər. Yaman yerdə axşamladıq, biz aldanmışdıq, onlar
ermənilər imiş. Bir anlıq dünya başıma fırlandı, nə edəcəyimi bilmədim.
Hər şeyin sonu olduğunu yəqin etdim. Bölük komandiri və baş çavuş
məndən bir-iki addım qabaqda idilər. Onların silahları yerə atdıqlarını
görən ermənilər bizə yaxınlaşmaq istədilər. Elə bu vaxt mənim də üstümə
qışqırdılar: ”Tı toje brosay orujye”. Mən avtomatın qayışını boynumdan
çıxardım və guya avtomatı yerə qoymaq istəyirəm. Bir az aşağı əyildim
və gizlicə baş barmağımla avtomatın qoruyucusunu aşağı basdım.
Ermənilər elə bildilər ki, mən də silahımı yerə qoyuram. Artıq iki yolum
qalırdı: ya düşmənə təslim olub min cür ağılasığmaz işgəncələrə məruz
qalmaq, ya da düşmənlə axıradək döyüşüb həlak olmaq. Döyüşməyə isə
heç bir imkan yox idi. Əlimi silaha aparsam məni vuracaqlar. Ya təslim
olmaq, ya ölüm. Bütün bu fikirlər avtomatın qayışını boynumdan
çıxararaq aşağı əyilərkən-ani olaraq ağlımdan keçirdi və mən ölümü
üstün tutaraq düşmənin gözləmədiyi bir məqamda onlara tərəf qəfil atəş
açaraq, yarğana tərəf qaçdım. Qabaqda gələrək beş-altı addımlığa qədər
bizə yaxınlaşan ermənilər yerə sərildilər. Qalan ermənilər isə özlərini bir
anlığa itirərək, nə edəcəklərini bilmədilər. Mənə də elə bu bir an lazım
idi. Qəfil atəşə məruz qalan düşmən özünə gələnədək xəndəyin kənarına
çatmışdım. Güllələr ətrafımda qarı sovuraraq vıyıltı ilə hər tərəfimdən
ötürdü. Bütün bunlar demək olar ki, bir neçə saniyədə baş verdi. Mən
qaçaraq özümü meşəyə çatdırmaq istəyirdim. Elə bu vaxt əlimdəki
avtomata dəyən güllə onun qundağını parçaladı və silahı əlimdən yerə
saldı. Avtomatı götürməyə macal vermədilər. Mən xəndəkdən aşağı
tullanaraq özümü uçuruma atdım və qarlı dərə ilə aşağı yumalandım.
Uçurumun aşağısına çatanda bir an dönüb geriyə baxdım. Ağacların
arasından heç nə görünməsə də düşmən hələ yaxında idi və arxamca
atılan saysız-hesabsız güllələr ətrafıma tökülür, vahiməli şəkildə
vızıldayırdı. Meşəli uçurumla gah yumalanır, gah da durub qaçırdım.
Lakin ayağımdakı rezindən olan kimyəvi mühafizə geyimi mane olurdu.
Botinkalarımı yolda ocaqda yandırdığımdan kimyəvi mühafizə
|