AZƏrbaycan respublikasi təHSİl naziRLİYİ GƏNCƏ DÖVLƏt universiteti

Axıska variantı (Əhliman Axundov variantı)

Hamam hamam içində, xəlbir saman içində, dəvə dəlləklik elər köhnə hamam içində. Qarışqa şıllaq atdı, dəvənin budu batdı. Hamamçının tası yox, baltaçının baltası yox, orda bir tazı gördüm, onun da xaltası yox. Qarışqa mindik, çayı keçdik, yabaynan dovğa içdik.

Günlərin bir günündə, Məmmədnəsir tinində, göy yalan belində, biri var idi, biri yox idi, iki qardaş tacir var idi. Bu qardaşların heç birinin övladı yox idi... Bunlar rəhm əllərini açdılar, yetim, yesirə pul verdilər. Ehtiyacı olanlara əl tutdular. El duası müstəcəb olar. Ay ötdü, il dolandı, tacirlərin arvadları hamilə qaldı. Tacirlərdən birinin adı Qadir, birinin adı da Nadir idi. Aylar gəlib keçdi, xoş gün, xoş saatda arvadlar bari-həmlələrini yerə qoydular. Qadirin bir oğlu oldu, Nadirin bir qızı. Böyük şadlıq keçirdilər. Ağ saqqal, qara saqqal, ağ birçək toplandı. Oğlanın adını Qəmbər qoydular, qızın da adını Arzı. Hər iki qardaş and-aman, əhdi-peyman elədilər, öbəkkəsmə Arzını Qəmbərə nişan taxdılar. Uşaqları dayələrə tapşırdılar. Arzıynan Qəmbər bir yerdə oynayırdılar, bir yerdə gəzirdilər, bir yerdə yeyib-içirdilər. Elə idi ki, bir-birindən ayrı dura bilmirdilər. Nağıllarda illər tez gələr. Uşaqlar yeddi yaşa doldular. Elə bu vaxt Qəmbərin dədəsi Qadir naxoşlayıb rəhmətə getdi. Qardaşı Nadir onu dəfn-kəfn eləyəndən sonra arvadına dedi:

-Arvad, Qəmbərə elə baxarsan ki, o özünü dədəsiz hesab eləməsin. Onun dədəsi indi mənəm. Arzını bir istəyəndə onu iki istəməlisən.

Arvad dedi:

-Kişi, arxayın ol, mən onu Arzıdan ayırmaram.

Bəli, Nadir Qəmbərlə Arzını mollaxanaya oxumağa qoydu. Arzıynan Qəmbər oxumağa fikri vermirdilər. Onların fikirləri sevişməkdə, söyləşməkdə idi. Qol-boyun mollaxanaya gedirdilər, qol-boyun evə qayıdırdılar. Bir gün molla Arzıya dedi:

-Qızım, iki məhəbbət bir yerə sığışmaz. Gərək birini tutasan, o birini buraxasan. Ya dərs oxu, ya əmin oğlu Qəmbərə ərə get. Bir də ki, nə bilirsən, bəlkə sən onu sevirsən, o səni sevmir, elə belə gəzmək istəyir. İndi mən səni öyrədim, sən onu sına, gör səni ürəkdən sevir, ya yox. Qızım, dərsdən çıxanda apar bilərziyini qoy bulaq başında. Gözlə Qəmbər gəlsin. Əgər Qəmbər bilərziyini götürüb, öpüb gözünün üstünə qoysa, bil ki, o da səni sevir. Yox öpmədi, götürüb kənara atdı, bil ki, səni sevmir.

Mollanın sözü qızın ağlına batdı. Molla dediyi kimi elədi. Bilərziyini aparıb qoydu bulaq başına. Qəmbər onun dalınca bulağa gəldi. Arzı gizlənmişdi. Qəmbər Arzının bilərziyini gördü, götürüb öpdü, gözünün üstünə qoydu. Arzı bunu görən kimi, Qəmbərin gözlərinə görünmədi, başqa yolla evlərinə getdi.

Arzıynan Qəmbərin mollaxanaya oxumağa qoyulmasından bir neçə il keçmişdi. Amma onların nə cür oxumasından bir səda gəlmirdi. Bir gün Nadir getdi mollanın yanına. Salam-kalamdan sonra soruşdu molladan:

-Uşaqlardan bir səs-səda gəlmir. Necə oxuyurlar?

Molla gülümsünüb dedi:

-Tacir, uşaqlar oxumağı o qədər yox, sevişməyi yaxşı bilirlər.

Tacir bərk tərlədi, hirsindən burnundan tüstü qalxdı. Tərini silib dedi:

-Aha, belə imiş. İndi mən nə cürə eləyim, molla?

Molla dedi:

-Çarəsi budur ki, sən bunları götür, apar evə. Bunlardan oxuyan çıxmaz. Bunlar bir-birinə aşiqdirlər, toylarını elə.

Nadir tacir bərkdən Arzıynan Qəmbərə dedi:

-Durun yığışdırın şey-şüylərinizi, gedək evə. Evdə başınıza oyun gətirəcəyəm.

Nadir tacir bunları mollaxanadan çıxardıb gətirdi evə. Evdə Qəmbərə dedi:

-Quzuları aparıb axşama kimi hər gün otararsan. Sənin işin bu.

Arzıya da dedi:

-Sənin də işin ev, çöl, bulaqdan su gətirmək, xırda, böyük işlər olacaq.

Bəli, hər gün səhər tezdən Qəmbər quzuları qabağına qatıb otarmağa aparırdı. Arzı da qab, paltar yuyardı, ev süpürərdi. Su gətirərdi. Daha çox necə deyərlər, başlarını qaşımağa vaxtları qalmazdı. Onlar bir-birini tez-tez görə bilmirdilər, lap yanıb qovrulurdular. Bir gün Arzı qəsdən tuluğun içində olan suyu yerə tökdü. Nənəsi gəlib su götürmək istəyəndə, gördü tuluxda su yoxdu, dedi:

-Arzı, qızım, tuluxda su yoxdu, qurtarıb.

Arzı dedi:

-Nənə, tuluğu ver, gedim su gətirim.

Nənəsi dedi:

-Ax, necə getməyə hazırsan? Gedib Qəmbərə rast gələcəksən, başın qarışacaq, gec gələcəksən. Get, ancaq gec gəlsən, öldürərəm səni. Qəmbəri görsən məhəl qoyma.

Arzı dedi:

-Vallah, nənə, bu anda, bu imana tez gələcəyəm.

Arzı tuluğu götürüb bulağa su gətirməyə getdi. Qəmbər dağdan onu gördü. Dağdan enib bulaq başına gəldi. Arzıya görək nə dedi:

Arzım yendi bulağa,

Səsi gəldi qulağa.

Arzıya peşkəş olsun,

Şirvan, Təbriz, Marağa.

Qız Qəmbərə cavab vermədi. Bulağın başına getdi, tuluğunu doldurdu. Əl-üzünü yudu. Tələsik tuluğu atdı çiyninə, evə getdi. Nənəsi ona şillə çəkib dedi:

-Gedib gördünmü Qəmbəri? Onunçün gec gəldin?

Arzı ağlaya-ağlaya dedi:

-Nənə, bu anda, bu Qurana Qəmbəri görmədim. Tələsdiyimdən bilərziyim də su başında qalıb, bulaqda.

Nənəsi qışqıra-qışqıra dedi:

-Bilərziyi qəsdən qoymusan su başında, bir də gedib Qəmbərlə görüşəsən? Ay feldar, tez get bilərziyi gətir. Yoxsa səni tikə-tikə doğraram.

Arzı tez getdi bulaq başına. Gördü Qəmbər bulağın yaxınlığında quzu otarır. Aldı görək ona nə dedi:
Tuluğumu doldurdum,

Dolu deyin qaldırdım.

Dinim, imanım Qəmbər,

Bilərziyim saldırdım.

Aldı Qəmbər cavabında:

Hə, gülşənim, gülşənim,

Güllər yerə döşəni.

Bilərziyin üstündə,

Nə var idi nişanı?

Aldı Arzı:

Hə, gülşəni, gülşəni,

Güllər yerə döşəni.

Bilərziyim üstündə,

Arzı-Qəmbər nişanı.

Aldı Qəmbər:

Ərəb atlı tazılı,

Ceyran körpə quzulu.

Bilərziyin üstündə

Nə var idi yazılı?

Aldı Arzı:

Ərəb atlı tazılı,

Ceyran körpə quzulu.

Bilərziyim üstündə

Arzı-Qəmbər yazılı.

Aldı Qəmbər:

Bu sular uluq-uluq,

Qızlar dolduru tuluq.

Bilərziyin tapana,

Nə verirsən muştuluq?

Aldı Arzı:

Bu sular uluq-uluq,

Qızlar dolduru tuluq.

Bilərziyim tapana,

Şirin canım muştuluq.

Qəmbər Arzıya ləng cavab verdiyindən Arzı kədərləndi, gözləri yaşla doldu, aldı görək dübarə nə dedi:

Bağçamızda gül bitdi,

Ətri məni məst etdi.

Sana deyirəm Qəmbər,

Ləl bilərziyim itdi.

Aldı Qəmbər:

Arılar çəməndədi,

Mənim gözüm səndədi.

Gəl, gəl, ver muştuluğum,

Bilərziyin məndədi.

Qucaqlaşıb doyunca öpüşdülər. Qəm­bər bilərziyi Arzının qoluna bağlayıb dedi:

-Arzı can, tez get evə, nənən səni döyər.

Arzı tuluğu çiyninə aşırdı. Qəmbərdən ayrıldı, tez getdi evə. Nənəsi bir yarmaça götürdü, onu canı qaralınca döydü, dedi:

-Bilərziyi qəsdən bulaq başında onun üçün qoymuşdun ki, qayıdıb Qəmbərlə doyunca görüşəsən.

Axşam oldu Nadir evə gəldi. Arvadı bütün əhvalatı, beş-onunu da üstə qoyub, ona danışdı. Nadir tacir hirsli dedi:

-Mən əhdi pozdum. Arzını Qəmbərə verməyəcəm.

Arvad dedi:

-Axı başı batmış qız da onu sevir.

Nadir tacir dedi:

-Bəs nə çarə?

Arvad dedi:

-A kişi, küp qarısının əfsunu, cadusu daşdan keçir. Onu çağırarıq, pul basarıq ovcuna, ya aralarını vurdurar, ya da başını batırar.

Nadir dedi:

-Atan rəhmətlik, çarəsi elə budu. Tez küp qarısını çağır.

Arvad gedib küp qarısını evinə gətirdi. Qarı da bir qarı idi. Sən görən qarılardan deyildi. Min fənd bilirdi, min fel. Ağıllını dəli eliyirdi, dəlini ağıllı. Xalis at maralı idi. Arvad küp qarısına dedi:

-Arzıynan Qəmbərin arasını elə vurarsan ki, itnən pişik kimi olsunlar. Bunu eləyə bilərsənmi?

Qarıya bir çəngə pul verdilər. Qarı arvada dedi:

-Südünnən sağ, qat xörəyə. Ver yesinlər, olsunlar bacı-qardaş.

Qarının dedikləri Arzıya əyan oldu. Arvad qarı dediyi kimi südünü sağıb xörəyə qatdı, gətirib qoydu Arzıynan Qəmbərin qabağına. Qəmbər istədi xörəkdən yesin. Arzı onun biləyindən tutub dedi:
Yemə, Qəmbərim, yemə,

Sirr söz nənəmə demə.

Bir nimçə xörək indi

Şəkərə dönsə yemə.

Aldı Qəmbər:

Dan yerləri atıbdı,

Xoruzları yatıbdı.

Bəlkə də bu xörəyə

Nənən ağı qatıbdı?

Aldı Arzı:

Dan yerləri atıbdı,

Xoruzları yatıbdı.

Nimçədəki xörəyə

Nənəm südün qatıbdı.

Aldı Qəmbər:

Çək tellərini dara,

Ağ üstdən örtmə qara.

Qardaş bacısın almaz,

Alsa düşər azara.

Aldı Arzı:

Hey hatıbdı, hatıbdı,

Qoyun, quzu yatıbdı.

Qənbər, xörəyi yemə,

Nənəm südün qatıbdı.

Aldı Qəmbər:

Tərəcəmiz dolu daş,

Bir yastığa qoyaq baş.

Bir nənədən olmadıq,

Necə olduq bacı-qardaş.
Bəli, Arzıynan Qəmbər xörəyi yemədilər. Hərəsi bir loxma yavan çörək yeyib işlərinə getdilər. Arvad bir ağac götürüb düşdü Arzının üstünə, qolu yorulunca döydü, dedi:

-Yəqin Qəmbəri sən qoymadın xörək yesin, onu bil ki, qoymayacağam Qəmbərə nəsib olasan. Ondan əlini üz.

Arzı o biri evə keçən kimi küp qarısı içəri girdi, dedi:

-Xörəyi yedilərmi?

Arvad dedi:

-Yox, yemədilər.

Qarı dedi:

-Quzu kəsdir, ətindən qızartma bişir. Qəmbərin payına ağı qat, zəhərlənib ölsün, canınız da qurtarsın.

Arvad qarını yola salandan sonra, Qəmbəri çağırıb dedi:

-Qəmbər, get bir quzu gətir kəsək. Yadıma quzu ətinin qovurması düşüb.

Qəmbər gedib bir quzu gətirdi verdi əmisi atvadına. Əmisi arvadı quzunu kəsdirdi, soydurdu, ətindən bir qazan qovurma bişirdi. Qəmbərin payına ağı qatdı. Qəmbər günorta üstü gəlib əmisi arvadından yemək istədi. Əmisi arvadı ona dedi:

-Sənə bir nimçə qovurma saxlamışam, götür ye, ləzzətlidir.

Qovurmaya ağı qatıldığı Arzıya əyan olmuşdu. Qəmbər qovurmanı yemək istəyəndə, Arzı onun biləyindən tutdu. Aldı görək nə dedi:

Yemə, Qəmbərim, yemə,

İnanma ağlı kəmə.

Quzu qovurmasına

Ağı qatıbdı, yemə.

Qəmbər yemədi, dedi:

Bu gün çərşənbədi,

Könlünə düşən nədi.

Od yanar tüstü çıxmaz,

Qazanda bişən nədi?

Qəmbər bir baş soğan, bir parça çörək qoydu qoynuna, çıxıb getdi quzuya. Nadirin qonuşuluğunda bir zor tacir də var idi. Bu tacirin on beş ərgən oğlu var idi. Böyük oğlu Arzıya aşiq idi. Ancaq Arzı ona dil vermirdi. Bir gün qarı gəldi arvadın yanına, dedi:

-Niyə dağa, daşa düşürsünüz. Qonşunuzun oğlu Arzıdan ötrü dəli-divanadı. Arzını verin ona qurtarıb getsin. Qəmbər də qılıncsız, zəhərsiz ölsün. Razısınızsa gedim, deyim elçi gəlsinlər.

Dedilər:

-Get de, elçi göndərsinlər, razıyıq.

Qarı gedib oğlan evinə dedi:

-Qızın dədəsini, nənəsini razı salmışam. Tez elçiliyə gedin, toya başlayın.

Tacir elə həmin gün Arzıya elçiliyə getdi. Söhbət gödək oldu. Atası qızı Arzını verdi tacirin böyük oğluna. Elçi gedəndən sonra Qəmbər gəldi evə. Arzı ağlayırdı, gözlərinin yaşını silə-silə Qəmbərə dedi:

-Qəmbər, bilirsən nə var?

Qəmbər dedi:

-Arzı can, bilmirəm.

Arzı dedi:

-Atamın yanına elçiliyə gəlmişdilər. Atam məni tacir Qulu xanın böyük oğluna ərə verdi. Bir çarə.

Elə bil bu xəbər Qəmbərə ox kimi dəyib ürəyindən keçdi. Handan-hana özünə gəlib dedi:

-Arzı can, bunun çarəsi yoxdu. Qulu xan padşah tacirdi. Mən ona nə edə bilərəm? Ürəyimdən başqa köməyim yoxdu.

Arzı dedi:

-Get şaha şikayət elə, bəlkə allah könlünə rəhm saldı, sənə kömək elədi.

Qəmbər əmisi arvadının yanına gedib dedi:

-Əmicanı, ta mən burada qala bilmərəm. Çörəkdən-zaddan ver, baş alım, bu ölkədən gedim.

Əmisi arvadı bunu allahdan istəyirdi. Şad olub dedi:

-Nə istəyirsən götür, təki rədd ol get.

Bəli, Qəmbər çörəkdən-zaddan götürdü. Arzıynan görüşdü, yola düşdü. Az getdi, üz getdi, dərə, təpə, düz getdi, ta ki, gəlib çatdı Əcəm vilayətinə. Əcəm şahın yanına. Şah ondan soruşdu:

-Nə istəyirsən, diləyin nədi?

Aldı Qəmbər görək nə dedi:
Şah oğlu şahizada,

Gəlmişəm sana dada.

Gücüm yoxdu alayım,

Xan, Arzım getdi bada.

Şahın Qəmbərə rəhmi gəlib dedi:
Durun-durun görəlim,

Aşıq halın soralım.

Çağırın xəzinədarı,

Aşığa mal verəlim.

Aldı Qəmbər:
Aşıq malı neyləyir,

Dünyaları neyləyir?

Aşıq dada gəlibdi,

Səndən imdad diləyir.

Şah rəhmə gəlib dedi:

-Qoşun göndərin, bu aşiqin sevgilisini alıb versinlər özünə.

Vəzir dedi:

-Şahım, bu saz aşığıdı, haqq aşığı deyil.

Padşah dedi:

-Haqq aşığı olmasını nədən bilmək olar?

Vəzir dedi:

-Haqq aşığınınkı vergidi. Əgər bağçanızda hansı meyvələr var, onu bilsə haqq aşığıdı.

Padşah dedi:

-Aşıq, bizim bağçamızda hansı meyvə ağacları var?

Aldı Qəmbər görək nə dedi:
Alma, ərik, halicə,

Qovun, qarpız, bu necə.

Heyva yedim saraldım,

Nargilə, həm narincə.

Baxdılar ki, Qəmbər həqiqətən haqq aşığıdı. Şah Qəmbərə çoxlu qoşun verdi. Qoşun böyüyünə tapşırdı:

-Aşığın sevgilisini zorla alıb özünə verərsiniz.

Qəmbər qoşunla getməkdə olsun. Gəl sənə xəbəri verim Arzının nənəsindən.

Arzının nənəsinə qarı xəbər verdi ki, Qəmbər şaha şikayətə gedib. Şah da ona çoxlu qoşun verib. Qoşun gəlib zorla Arzını alıb Qəmbərə verəcək. Arvad qarıya çoxlu xələt verib dedi:

-Qarı nənə, bu xələt sənin olsun, bir fəndlə qoşunu geri qaytar.

Qarı dedi:

-Bax mənim gözüm üstə. Dayanma, bir qazan halva çal. Bir təndir də çörək bişir. Mənə ver. Sonrasıynan işin yoxdu.

Arvad qarı dediklərini hazırladı, verdi qarıya. Qarı hər yuxa çörəyin arasına bir az halva qoydu. Özü də qara paltar geyib, başına qara çarşab örtdü. Gedib yol kənarında oturdu. Gəlib-gedənə halva paylamağa başladı. Bir neçə gün keçdi. Bir gün qarı gördü, bir toz qopdu, bir qiyamət oldu, gəl görəsən. Qoşunun ağzı açıldı. Qarı bərkdən ağlayırdı, başına döyürdü, üzünü cırırdı. Qəmbər təəccübləndi. Onun yanında qoşunu dayandırdı. Görək qarıdan nə soruşdu:

Altımız buradandı,

Üstümüz yaradandı.

Qarı, sual edirəm,

Gəlişin haradandı?

Qarı cavabında dedi:

Altımız buradandı,

Üstümüz yaradandı.

Əgər sual edirsən,

Gəlişim obadandı.

Aldı Qəmbər:

O yanımız dağmıdır?

Bu yanımız dağmıdır?

Qarı, səndən soruram,

Arzım ölüb, sağmıdır?

Qarı yalandan ağlaya-ağlaya dedi:

-Kaş dədəsi, nənəsi öləydi. Arzı ölməyəydi. Dilim qurusun, dilim gəlmir deməyə, Arzı, “Qəmbər”- deyə-deyə öldü. Getdi haqq evinə. Mən göz yaşı tökə-tökə onun ağız acısını-halvasını paylayıram.

Qəmbər başına, gözünə döydü. Gözlərindən yaş yerinə qan tökdü, qoşunu geri qaytarıb dedi:

-Mən sizi Arzım üçün aparırdım. Arzım ki, ölüb, siz geri qayıdın.

Qəmbər istədi baş götürüb getsin, ya da özünü öldürsün, ya da çaylara atsın. Yenə də öz-özünə dedi ki, mən Arzımın qəbri üstündə ölməliyəm.

Bəli, gəlib əmisi evinə çıxdı. Nə gördü, nə görsə yaxşıdı? Arzı həyətdə paltar yuyur. Sevindiyindən gözlərindən qanlı yaş töküldü. Arzı da Qəmbəri gördü. Aldı görək nə dedi:

Qapıda duran adam,

Boynunu buran adam.

Getmişdin şaha dada,

Hanı şahdan bir adam?

Aldı Qəmbər:

Nə oldu, qarıdan oldu,

Zülfi sarıdan oldu.

Qoşunum geri döndü,

Bu iş yarıdan oldu.

Aldı Arzı:

Alasan, ha alasan,

Meylin bəri salasan.

Məni ərə verdilər.

Sən sağlıqnan qalasan.

Aldı Qəmbər:

Almışdım, ha almışdım,

Meylim sənə salmışdım.

Beman qarı qoymadı,

Mən ki, səni almışdım.

Aldı Arzı:

Qəmbər, Qəmbər, xas Qəmbər,

Nə tutubsan yas Qəmbər?

Arzın səfərə gedir,

Ürəyini bas Qəmbər.

Aldı Qəmbər:

Alasan, ha alasan,

Meylin bəri salasan.

Qarqaram, ərin ölsün,

Sən də mənə qalasan.
Qəmbər içəri girən kimi qəşş eyləyib yerə yıxıldı. O biri tərəfdən tacir Qulu xanın adamları gəldilər. Qızı xına otağına apardılar. Gəldilər qızı bəzəməyə. Qızın gözlərindən qan-yaş gəlirdi. Qəmbər də ayılıb qapıda durmuşdu, heç yerə getmirdi. Bir nəfər məşşatə gəldi ki, qızın başını bəzəsin. Bunu Qəmbər görəndə dözə bilməyib aldı görək nə dedi:

Hey hökülsün, hökülsün,

Qarlı dağlar sökülsün.

Arzını bəzəyənin

On barmağı tökülsün.
Qəmbərin ağzından söz qurtaran kimi, məşşatənin barmaqları dibindən qopub yerə düşdü. Başqa bir məşşatə gəldi, gəlinin başını bəzəmək istəyəndə Qəmbər ona baxdı dedi:
Mən Qəmbərəm dağ kimin,

Titrəyən yarpaq kimin.

Arzını bəzəyəni

Qara geysin zağ kimin.

Bu məşşatə hələ gəlinin başını bəzəmək istəyirdi. İşə təzə başlayanda ona xəbər gəldi ki, evin uçub, ailən, uşaqların hamısı evin altında qalıb. Məşşatə bu xəbəri eşidəndə durub başına döyə-döyə qaçdı evinə tərəf. Belə-belə hər kəs gəlinin başını bəzəməyə gəldisə, hamısını Qəmbərin qarğışı tutdu.

Qəmbər qapıda dayanmışdı. Arvadlar bir-birinə baxıb dedilər:

-Qoyun Qəmbər özü gəlinin başını bəzəsin. O qapıda dayanıb. Bəd duası özünə kar eləməz.

Qəmbər dedi:

-Əmicanı, Arzının mən başını bəzəyərəm.

Arvadlar dedilər:

-Qoy bəzəsin, əmisi qızıdı, eybi yoxdur. Hər kəs qızın başını bəzəsə, Qəmbərin bəd duası onu tutacaq. Əlac yoxdur, qoyun özü bəzəsin.

Qəmbər dedi:

-Mən qızın başını bir şərtlə bəzəyərəm. Hər paltarını geydirəndə qızdan bir öpüş alaram.

Dedilər:

-Eybi yoxdur, qoy alsın, əmisi oğludu.

Qəmbər elə də elədi. Hər paltarını geydirəndə qızdan bir öpüş aldı.

Bəli, tacir oğlanları gəldilər ki, gəlini aparsınlar. Gəlinin qolundan tutub qapıdan çıxartdılar. Qəmbər də qapıya çıxdı, dedi:
Ata vurdum qantarma,

Qan elərsən qurtarma.

Arzım minən atları,

Görüm olsun bel sarma.

Hansı atı gətirdilər ki, Arzını mindir­sinlər, hamısının beli sındı. Qəmbərdən çarə istədilər. Qəmbər dedi:

-Qoyun, öz atımı gətirim gəlin minsin.

Qəmbər öz atını tövlədən çəkib gəlini mindirdi. Atın cilovunu özü çəkirdi. At onun dabanını ataqladı. Qəmbərin dabanından qan axmağa başladı. Qəmbər dedi:
Hannan, Arzı can, hannan,

Məhəbbətin çıxmaz candan.

Cilavın çəkirəm mən,

Dabanım doldu qannan.

Qız atın belində Qəmbərin sözünü eşitdi. Dedi:

Hannan, Qəmbərim, hannan,

Məhəbbətin çıxmaz cannan.

Dabanından gələn qan

Gəlsin mənim didəmdən.
Qəmbər gəlib gəlinin duvağını qaldırdı. Baxdı ki, gəlinin gözlərindən çay kimi qan axır. Qulu xan bunu görəndə bir qamçı götürüb:

-Bütün işlər bundadı-deyə döyməyə başladı.

Aldı Qəmbər:

Bəy oğlu güləcə boy,

Etdi xan Arzıma toy.

Kərəsin mən almışam,

Ayranın başıva qoy.
Bu söz qızın acığına getdi. Atın üstün­də dedi:

-Əmim oğlu, əvvəllər məni çox sevərdi. İndi mənə böhtan atır. Mən aydan arı, sudan duruyam.

Aldı Arzı:

Ha elədi, elədi,

Altundan pul elədi.

O mana dəyməyibdi,

Neçin böhtan elədi?

Aldı Qəmbər:

Ha elədim, elədim,

Altunu pul elədim.

Ha məni ağac zorıynan,

Sana böhtan elədim.

Arzı məsələni bildi ki, Qəmbər bu sözü elə-belə demişdi, ürəyi sakit oldu. Bəli, gəlini bəyin qapısına gətirdilər, içəri evə apardılar. Qəmbər qapıda bir avsun, bəddua söylədi.
Aldı Qəmbər:

Mənnən olan geriyə,

Getməsin irəliyə.

Arzım girən evləri,

Gecə afat bürüyə.
Qəmbərin saçının biri qızıl, biri də gümüş idi. Qəmbər bir ah çəkdi. Evin ortasında böyük bir çay əmələ gəldi. Gəlin bir yanda, yeznə bir yanda qaldı. Gəlinin yanına getmək istəyən suya düşüb ölürdü.

Qəmbər çayın qırağına düşdü. Ac-susuz, gözü yaşlı burada qaldı. Axşam oldu. Qulu xanın böyük oğlu gəldi. Gəlinin yanına getdi. Ha gözlədilər, səsi çıxmadı. Gəlib içəri girdilər, gördülər ki, oğlan çoxdan suda boğulub ölmüşdür. Tacirə xəbər getdi. Tacir dad-fəqan eləyib dedi:

-Bu Qəmbərin işidi.

Tacir Qulu xan oğlunun meyidini başqa evə apardı. Tacir bir molla çağırdı. Arzının kəbinini ölən oğlundan kiçiyinə, on dördüncü oğluna kəsdirdi.

Bu oğlu da getdi içəri, geri qayıtmadı. Baxdılar ki, o da suda batıb ölmüşdür. Belə-belə tacir oğlanlarının hamısına bir-bir Arzının kəbinini kəsdirdi. Amma, çifayda onlar hamısı Arzının yanına gedəndə öldülər. Tacir oğulsuz qaldı. Ağlaya-ağlaya dedi:

-On beş oğlumu verdim badi-fənayə, indi növbə özümündü qızın kəbinini özümə kəsdirəcəm. Qoymayacam Qəmbərə çata.

Tacir Qulu xan qırx gün yas saxladı. Sonra bir molla çağırdı, Arzının kəbinini özünə kəsdirdi.

İndi sizə nədən xəbər verim. Arzı gəlin otağında tək qalmışdı, darıxırdı. O bir gün dama çıxdı ki, baxıb görsün Qəmbəri görə bilirmi? Çayın qırağında Qəmbəri gördü, Qəmbər də onu gördü. Arzı qaça-qaça damdan yendi aşağı, Qəmbərin yanına getdi. Gördü Qəmbər ac-susuzluqdan ölüm ayağına çatmışdır. Qucaqlayıb üz-gözündən öpdü. Göz yaşlarını bir-birinə qatdılar. Qız oturdu Qəmbərin yanında. Qəmbərin başını dizinin üstünə aldı. Qəmbər həsrətlə onun üzünə baxırdı. Davam gətirə bilmir, elə hey ağlayır, qan-yaş axıdırdılar. Qəmbər ağlaya-ağlaya sevgilisinə dedi:

Mən getdim, anam qaldı,

Oduma yanan qaldı.

Nə dünyadan xeyir gördüm,

Nə bir nişanam qaldı.

Dübarə dedi:

-Ya Rəbba, al əmanətini, daha cəbrə taqətim yoxdur.

Söz ağzından çıxan kimi bir neçə dəfə ah çəkib canını sevgilisi Arzıya tapşırdı. Başı qızın dizinin üstündə öldü.

Arzı qışqırdı, dad-fəryad elədi. O əvvəl-əvvəl elə bildi ki, Qəmbər sağdı, onu bir neçə dəfə tərpədib, çağırdı. Qəmbərdən səs gəlmədi. Baxdı ki, elə bil Qəmbər min ildi ölüb, dedi:

-Vay, vay, vay yarım getdi, mən necə eləyim. Aman-aman onsuz yaşaya bilmərəm.

Bərkdən:

-Qəmbər, Qəmbərim-deyə qışqırdı. Yaş yerinə onun gözlərindən qan axırdı. O birdən Qəmbərin meyidinin üstünə yıxıldı. O da bir neçə dəfə “ah” çəkib öldü.

İndi sizə xəbər verim küp qarısından. Küp qarısı tacir Qulu xanın evinə gəldi ki, Arzıya baş çəksin. Tacir Qulu xandan soruşdu:

-Hanı Arzı?

Tacir dedi:

-Odu, gəlin otağında.

Qarı içəri girib ha axtardı, Arzını tapa bilmədi. Çıxdı dama, baxdı ki, Qəmbərnən Arzı qucaqlaşıb yatıblar. Qışqırıb tacirə dedi:

-Tacir, Arzı Qəmbərin yanındadı, özləri də yatıblar. Bəs niyə durmusan? Axı o sənin arvadındı.

Tacir Qulu xan dama çıxıb baxdı, gördü ki, Qəmbər də, Arzı da qucaqlaşıb, ölüblər. Tacirin papağı başından yuxarı qalxdı. Xəncərini sivirib qarının üstünə cumdu.

-Bu qanların hamısını sən eləmisən, məlun-deyib onun təpəsinə bir qılınc vurdu, beyni kül kimi dağılıb cəhənnəmə vasil oldu. Tacir Qulu xanın özü də partlayıb öldü. Adamlar yığışıb hər tərəfdən gəldilər. Qarı ilə tacirə lənət oxudular. Arzı ilə Qəmbərə bir sərdabə tikdilər. Arzı ilə Qəmbərin meyidini sərdabənin qırağına apardılar. Meyitləri dəfn eləmək istəyəndə Xızır gəlib çıxdı. Bərkdən dedi:

-Kənarlaşın, bu aşıq-məşuq nə günahın sahibidi ki, bunları diri-diri dəfn edirsiniz.

Dedilər:

-Ay canım, nə danışırsan, bunlar üç gündür ki, ölüblər.

Xızır Arzı ilə Qəmbərin meyitlərinin lap yanlarına gəldi, dedi:

-Ey aşiq, məşuq, yuxuya qalmışsınız. Daha yatdığınız bəsdi, qalxın ayağa.

Söz ağzından qurtaran kimi Arzı ilə Qəmbər asqırıb ayağa qalxdılar. Xızır da qeybə çəkildi.

Həqiqi sevgililəri bir-birindən ayırmağın günah olduğunu hamı anladı. Tacirə və qarıya lənət oxudular. Meyitlərini itlərə atdılar. Arzının dədəsi-nənəsi də tutduğu işlərdən peşman oldular. Arzı ilə Qəmbərə qırx gün, qırx gecə toy elədilər. O gündən Arzı ilə Qəmbər xoş günlər keçirməyə başladılar. Murad hasil elədilər. O gün olsun ki, biz də muradımıza yetişək.

7. 
   Cengiz Ketenenin İmam Zeynel Abidin kənd sakini, 1937-ci il təvəllüdlü Semin Bayatlıdan topladığı variant.
   

Biri vardı, biri yoxdu, iki qardaş vardı. Arvadları iki cannıydı. Bunlar ikisi bir gün bir şərt kəsdilər. Dedilər, hansımızın qızı olsa o birimizin oğluna verəcək. Dedilər, eyidi bu şərt.

Ay aydan, gün günnən birisinin bir oğlı oldu, birizinin də bir qızı oldı. Arzı ilə Qəmbər yavaş-yavaş böyük oldılar. Qəmbərin atası öldü. Bunları Arzının babası mollaya göndərdi. Uşaqdılar, gidəllər mollaya, dönəllər barabar gəzəllər. Qız böyük oldı. Qızın nənəsi anladı ki, qızı Qəmbəri çox sevir. Dedi:

-Bəsdi daha Arzıyı qoyma mollaya getsin, böyük olıbdı, Qəmbər də getsin bizimçin qoyun yaymağa.

Qızın atası deyir:

-Eyyidi.

Qəmbər gedər qoyun yayar. Arzı evdə heç iş görmür, hey dolanır. Nənə bunu qəbul etməz. Qız da Qəmbəri sevir. Qızın nənəsi daha qızı buraxmır. Qəmbər qoyun yaymağa gedər. Evdə də su qalmıyıptı. Qızın nənəsi deyər:

-Arzı, qalx, get su gətir. Bəs gec qalmıyasan.

Dedi:

-Eyyidi, nənə.

Arzı getdi su başına. Qəmbər Arzıyı gördü bualağa eniri. Dedi:
Arzı əndi bulağa,

Səsi gəldi qulağa.

Arzının qurbanı olsun,

Təbriz, Məşhəd, Marağa.

Arzu xan:

Matarayı doldırdım,

Doldır ikən qaldırdım.

Biləzigim neçin çaldırdın.

Ağa Qəmbər:

Bağıya girməmişəm,

Gülünü dərməmişəm.

Kitab gətir and içim,

Biləzigin görməmişəm.

Arzu xan:

Ağa Qəmbər andadır,

Məhəbbəti candadır.

Gəl mənə doğru söylə,

Biləzigim səndədir.

Ağa Qəmbər:

Ay çıxdı alişannan,

Gün çıxdı bərişannan.

Biləzigin nə nişannan.

Arzu xan:

Ərəb gəldi tazılı,

Qoyun gəldi körpə quzulu.

Biləzigim üstündə

Arzı-Qəmbər yazılı.

Ağa Qəmbər:

O sular uluğ-uluğ,

Qızlar doldurur tuluğ.

Biləzigi tapana,

Nə verirsən muştuluq?

Arzu han:

O sular uluğ-uluğ,

Qızlar doldurur tuluğ.

Biləzigi tapana,

Şirin canım muştuluq.

Ağa Qəmbər:

Belə demə duyallar,

Bizim cana qıyallar.

İkimiz qolu bağlı

Bir zindana qoyallar.

Arzu xan:

Ağa Qəmbər, innəttir,

Sözün cana minnəttir.

İkimiz qolu bağlı,

Zindan bizə cənnətdir.

:

Damıvız üstündə bir daş,

Gəl bir yasdığa qoyaq baş.

Bir anadan-babadan deyilik,

Anan eyliyəcək bizi bacı-qardaş.

Ağa Qəmbər:

Damıvız üstündə bir daş,

Nasıl bir yastığa qoyaq baş.

Bir anadan, bir atadan deyilik,

Anan nasıl eylər

bizi bacı-qardaş?

Arzu xan:

Həmə, Qəmbərim, həmə,

Anamın əqli kəmə.

Önündə quzu bir yan,

Şəkər qatıbsa yemə.

Ağa Qəmbər:

Qaşı qara çataldır,

Dəvəy mənə yetərdir.

Önümdə quzu bir yan,

Ağıdan beş-betərdir.

Orda başladı Arzının nənəsi özünü vurmağa. Hətta, dedi:

-Mən bu şeyi etdim.

Südünnən sağırdı ki, versin özünə, yesinlər bacı-qardaş olsunlar. Başladı vurmağa özünü. Vurdu özünü. Qəmbər gəldi baxdı Arzı ağlayır. Dedi:

-Nənəsi döyüb bunu.

Ağa Qəmbər:

Dağlar üstündə dağlar,

Bülbül gül üçün ağlar.

Ey qarı, Arzıma nə deyibsən

Yükə dayanıb ağlar?

Bir baxdı bir şey çıxmır. Dedi qızın nənəsi:

- Get özünə əsgər, ləşkər gətir, gəl Arzını özünə al.

Ay çıxdı bədir olsın,

Can dosta nadir olsın,

Get əsgər gətir, Arzını apar,

Duz-əkmək qadir olsın.

Bu da sazın aldı əlinə, getdi əsgər gətirməyə. Gəldi bir patşahın qapısında başladı saz çalmağa. Dedi:
Qəmbərin əlində sazı,

Çağırın xəznədarı,

Etsin Qəmbəri razı.
Ordan patşah dedi:

-Gedin baxın bu nə istərsə, bir şey verin bu fəqirə getsin.

Gəldilər sordular:

-Atam, nə istəsən verək sənə.

Dedi:

-Ey patşahım,

Mal sənin, əmlak sənin,

Əsgər ver mən gedəlim.

Arzı mənim payımdı.
Deyirlər ki, patşaha dedilər:

-Bu bir aşıqdı, amma heç nə istəmir.

Patşah da xəstə idi. Dedilər:

-Əgər sağ aşiqdisə, bu padşahın dərdini bilər.

Qəmbərdən soruşdular:

-Bu patşahın dərdi nədir?

Qəmbər dedi:
Ərik, alma, haluça,

Qavun, qarpız, bu neçə?

Heyva yedi tutuldi,

Nar yesev medev aça.

Getdilər bir nar gətirdilər patşahçın. Yedi özünü, qaxdı oturdu. Dedilər:

-Bəli, bu tamam sağ aşıqdı. Bu nə istəsə verin.

Patşah əmr verdi ona bir dəstə əsgər verdilər. Arzının da bu dəm toyu idi. Baxdılar ki, Qəmbər bir dəstə əsgrələ gəlir. Dedilər:

-Nə edək?

Arzının anası bildi ki, əsgər toyu müşkül edəcək. Bu vaxt bir qarı ordan atlandı, dedi:

-Nə verirsiz, mən bu qoşunu qaytarım?

Dedilər:

-Nə istəsən verərik.

-Tumanım dolusu külçə verin, gedərəm əsgəri döndərməyə.

Arzının atası dedi:

-Get döndər, dörd tumanın dolusu külçə verrəm.

-Onda bir qazan halva çalın.

Bir qazan halva çaldılar. Aldı başına gəldi yol qırağına. Baxdı qoşun gəlir, Qəmbər də qabaqda. Qəmbər soruşdu:

-Qarı nənə nolub?

-Qarı nənən ölsün.

-Nolub?

-Vallah, iştə Arzı keçindi, bu da halvasından gətirmişəm, alın yeyin.

-Qarı, necə?

-Vallah, iştə öldi.

Əsgərlərə dedi:

-Atam, siz dönün daha siz hara gəlisiz? Madəm Arzı ölipdi.

Əsgərlər dedi:

-Biz də gedək bir fatihə verək madəm ölipdisə.

-Yox, dönün gəlməyin daha mən gedirəm.

Əsgərlər döndü getdi. Qəmbər də kəndə gəldi ki, bəs Arzı damdan baxır. Arzı da gördü ki, Qəmbər tək gəlir, dedi:
Ağa Qəmbər boş həldi,

Dolu getdi, boş gəldi.

Yahu aviy boş gəldi.

Ağa Qəmbər:

Havada uçaq quşlar,

Arzı damda nakışlar,

Qarı verdi xəbəri,

Geri döndi çavuşlar.

Arzının toyu başlamışdı. Gəldilər gəlin aparmağa. Girdilər bəzəməyə. Bu da ki, haqq aşiqidi. Nə desə sözünnən eyni çıxar. Girdi bəzək otağına dedi:
Hey tökilsin, tökilsin,

Dağlara qar tökilsin.

Arzımı bəzəyənin

On barmağı tökilsin.

O adamın 10 barmağı töküldü. Başqası gəldi:

-Çəkil, çəkil, mən bəzərəm-dedi.

Qəmbər dedi:

Dağdan endi dağ kimin,

Kolları butağ kimin.

Arzımı bəzəyəni

Qara girsin zağ kimin.
Xəbər gəldi, bir dənə qız dedi:

-Yeri, oğlu damnan düşdü, odı öldü.

Çıxdı o da getdi. Bir dənə dedi:

-Çəkilin-dedi-mən bəzəyərəm, hər kəs yalandan girir, bəzəmir.

Qəmbər dedi:

Ay işığı süd kimin,

Hırhız gəzər it kimin.

Arzımı bəzəyəni,

Gözü çıxsın çiyit kimin.
Onun da gözü kor oldı. Əlini sürtdü ora-bura, görmədi. Dedilər:

-Atam, bunu kimsə bəzəyə bilməz. Qəmbər özü bəzəsin.

Qəmbər qızı bəzədikcə öpürdü. Bəzədi, axırda Arzı dedi:

-Gəl çıxaq, ata minək, hərəmiz bir yandan göyərçin kimi uçaq gedək.

Arzı eşiyə çıxdı hansı ata mindisə atın beli qırıldı. Dedilər:

-Bu Qəmbərin atı olmasa heç bir at bunu qaldırmaz. Gedin Qəmbərin atını gətirin.

Qəmbər dedi:

-Mən atımı o şərtlə verrəm ki, özüm də yedəyini çəkim.

Dedilər:

-Özün çək.

Atı gətirdilər Qəmbər üzəngini basdı. Amma, elə bil fikri başqa yerdəydi. Arzı dedi:

Qəmbərim, xas Qəmbər

Nə tutubsan yas, Qəmbər?

Arzı ata miniri

Üzəngisin bas, Qəmbər.

Bundan sonra Qəmbər dişlədi. Arzı mindi ata yedəyin çəkirdi. At yeyin getdi, oğlanın dabanını basdı. Qəmbər dedi:

Giribsən əsdiribsən,

Qaralım kəsdiribsən.

Dizgini çəkərək tut,

Dabanım basdırıbsan.

Arzı dedi:

Ağa Qəmbər nolaydı,

Quru göllər su dolaydı.

Dabanıydan axan qan,

Gözlərimə dolaydı.

Dabandan axan qan qızın gözlərinə doldu. Dedilər:

-Bah, nə deyir köpək oğlu, olur o saat.

Arzı dedi:

Ağa Qəmbər neylədi,

Altını tunc eylədi.

Sən məni kıncmamıştın,

Neçin buhtan söylədi?

Qəmbər dedi:

Arzı xan, neylədim,

Altını tunc eylədim.

Mən səni kıncmamıştım,

Canım yandı, söylədim.

Hamı bildi ki, oğlan canı yandığından yalan demiş.

Gəldilər bir yerə çatdılar. Qəmbər dua etdi:

-Allahdan bir toz-fırtına olaydı. Mənnən Arzını bir yerə ataydı, bu qədər adamı başqa yerə.

Toz qopdu. Arzıynan Qəmbər ikisi bir dərəyə düşdü. Onlar orda əyləndilər. Toz-duman çəkiləndə qalxıb getdilər. Araz çayına çatdılar. Qəmbər burdan keçmək istəyirdi. Arzını geri göndərəcəkdi.

Arzı Xan:

Gedirsən uğur olsun,

Ağrımaz başın olsun.

Araz çayı keçənnən

Tanrın yoldaşın olsun.

***

Gedirsən uğur olsun,

Ağrımaz başın olsun.

Əmin qızı alırsan

Üç gün yoldaşın olsun.
O getdi, Allah tərəfindən iki gün qaldı, üç gündə bir ölüm düşdü içərisinə. Gəldi əmmisi qızını aldı, üç gün, üç gecədən sonra əmisi qızı da öldü.

Arzı bir gün Araz çayı boyunca gəzirdi. Oğlan da çayın o üzündəymiş. Bir-birini tanımırlar. Oğlan dedi:

Ey qarı, qüdrət qələmin çəkilib qaşın,

Ya baban ölmüş, ya qardaşın.

Nə gəzirsən bu məzarı?

Dedi:

Qüdrət, qələmin çəkilmiş qaşım,

Nə babam ölmüş, nə də qardaşım.

Yar aşkınnan gəzirəm bu məzarı.
Qəmbər döndü bir də dedi:

Bu dərə bir dərədi,

Çəkilməz bir bəladı.

Sənnən sual edirəm,

Yüzündə o yara nə yaradı.

Toz qopan vaxtı Qəmbər onun üzündən öpmüşdü.

Dedi:

Bu dərə bir dərədi,

Çəkilməz bir bəladı.

Utanıram söyləyim,

Üzümdə o yara

Qəmbərin dişlədiyi yaradı.

Onda Qəmbər özünü attı çaya. Az qaldı ki, boğulsun, batsın. Arzı dedi:
Ey Araz,

Qəvil olasan Araz.

Qəmbəri au apardı,

Yetiş, ya Xıdır İlyas.

Orda Xıdır İlyas Qəmbəri sudan çıxartdı. Gəldi Qəmbər yorğundur. Oğlan dedi:

-Arzı, çoxdan yatmadım dizin qoy başım altda yatım.

Qəmbər başını qoydı qızın dizi üstə, Allahın əmrini bitirdi. Arzı ona baxdı ki, ölüb gəldi bir kəndə çıxdı. Dedi:

-Bir qardaşım vardı öldü. Gəlin onu basırın.

Qalxdılar beş-altı adam gəldilər. Arzunun gözəlliyini görüb dalaşdılar ki, mən alım, o alsın-falan. Arzı dedi:

-Qardaşımı basırın, birinizə gedərəm.

Oğlanı kəfənlədilər, türbəyə gətirdilər. Arzı israr etdi ki, özüm sallayacam qəbrə. Endi qəbrə, qoynundan bir qələmtaraş çıxartdı, qarnını yırtdı, özünü öldürdü. Bir qarı da bu yannan özünü qəbrə atdı. İndi də iki aşiqin qəbrinin üstündəki güldən ziyadə bir qara tikan imkan vermir onlar qovuşsunlar.

7.