Bahorni qarshilab

LAYLAK QIZIQ QUSH EKAN
Laylakka maza ekan,
Odati qiziq ekan.
Yoz bo‘lsa uchib kelar,
Qish bo‘lsa ko‘chib ketar.
Chinor shoxida ini,
Qolaverar huvillab.
Qishda shamol guvillab,
Qorga ko‘madi uni.
Bo‘lsa agar qanotim
Va yoki uchqur otim.
Zumda kezsam olamni,
Lekin uyim, dalamni
Sira tashlab ketmasdim,
Bevafolik etmasdim.
Yalang‘och kurtaklarni
Uyg‘otgunicha quyosh,
Tinglab qish ertaklarin
Berardim chidam, bardosh.
Yurtimning to‘rt fasli soz,
Biridan biri go‘zal.
Begona el yozidan
O‘zimizning qish afzal.
Garchi laylakka maza,
Odati ko‘p bemaza.
Hech elda yo‘q qo‘nimi,
Yo‘q umrining unumi.
Men odamman, qushmasman,
Hech unga o‘xshamasman.
1970
www.ziyouz.com kutubxonasi

---

Saida ZUNNUNOVA
110
* * *
(Shoira singillarimga)
Kuni kechagina she’r yozmoq uchun,
Oftobni quvganday tunni kutardim.
Oqshom ko‘rsatolmay hokimlik kuchin,
Mening ko‘zlarimdan bedor o‘tardi.
Kichrayib singirdi qorachig‘imga,
Qog‘ozga tushguncha chekib ming zahmat.
Yo qo‘nib qalamning olmos uchiga,
She’r bo‘lib qalbimdan tinglardi rahmat.
Bugun u keladi g‘olibona, shod,
Kiprigimni silar yumshoq qo‘llari.
Yo‘q, tegma ko‘zimga, tegmagil, hayhot,
Koshki sochlarimdan o‘tsa yo‘llaring...
U endi bo‘ysunmas, chekinmas nari,
Qalam uchiga ham qurmaydi tilsim.
So‘zsiz qichqiradi mudroq nazarim:
Yo‘q, sira bo‘lmasman, bo‘lmasman taslim.
Gulchehralar bo‘lib quvgum g‘aflatni,
Oydin bo‘lib tunlar to‘karman ilhom.
Dunyodek bedorman, bedorman har vaqt,
Birinchi sevgidek sof va navqiron.
Yo‘q, sira bo‘lmasman, bo‘lmasman taslim.
1970 
www.ziyouz.com kutubxonasi

---

BAHORNI QARSHILAB
111
* * *
(Singlim Zamiraga)
Olam gulga to‘ldi yana bu fasl,
Kunlar mana shunday, shu tarzda oqar.
Suvsiz yerlarda ham bir mijja qoqar,
Kapalak umridek o‘tlar muttasil.
Qabrlar uzra ham sokin yashillik,
Bu yerga kelgani berolmasdim tob.
Bunda ko‘z yoshlarga aytilmas javob,
Na diydor ko‘rishga bor biron eshik.
Xotirjam edim­ku, men axir sendan,
Guldek so‘lishingni qaydan bilayin.
Ko‘rgim kelsa endi nima qilayin,
Xursand qilganmidim, shodmiding mendan?!
Bugun satrlarim mahzun, bag‘ri xun,
Iztirob, qiynoqda tug‘ilgan o‘ylar.
Ayolsiz huvillab qolganda uylar,
So‘z bormi go‘dagin ovutmoq uchun.
Muhabbat yoritgan uyda ham shuncha –
Bemavrid, bemahal o‘charmi chiroq.
Yaqin yo‘llar birdan tusharmi yiroq,
Nogahon ochilmay so‘larmi g‘uncha?!
Kelinlik libosing kir bo‘lgan emas,
Qay qo‘lda ushlayin, qay ko‘zda boqay.
Armon, armon o‘ti bag‘rimni yoqar,
Hamdard bo‘lolmayin qoldim bir nafas.
Yigirmanchi asr, doktor bor, debman,
Gʻaflatda qo‘ymasa edi e’tiqod.
www.ziyouz.com kutubxonasi

---

Saida ZUNNUNOVA
112
Uchib bormasmidim chiqarib qanot,
Boshingda parvona bo‘lmasmidim men!
Hamon qulog‘imda onam yig‘isi,
O‘lguncha chiqarmi bu jondan o‘ting.
Subhidam yelidek hilpirab o‘tding,
Qaysi gulzorlarda qoldiykan ising?
Bilmayman, shabnamdek qaylarga uchding,
Xayr­ma’zur qani, dog‘da qoldim men.
Taqdirdan bir umr yulib oldim men,
Sen uchun she’rimning umriga o‘lchab.
1970
* * *
Insofli bo‘l, deydi keksalar,
Haddan oshib ketsa agarda birov.
Avval tushunmasdim shunday desalar,
Endi ezgulikning buyukligiga,
Yomondan yaxshining suyukligiga,
Nazarimda, mana shu bitta so‘z garov.
Shu so‘zsiz yetarmidi dunyo shu yoshga,
Odamzod shunchalik ulg‘ayarmidi?!
Muhabbat yo g‘azab to‘lib otashga,
Vijdon degan narsa to‘lg‘anarmidi?!
Kimdan eshitmayin bu qutlug‘ so‘zni,
Qalbidan qalbimga oqqan kabi nur.
Osmonga bir ustun qo‘yilganidek,
Olam kengaygandek qilaman huzur.
1970
www.ziyouz.com kutubxonasi

---

BAHORNI QARSHILAB
113