Bolalarda raxit, spazmofiliya, gipotrofiya, ekssudativ diatez, allergiya kasalliklari

Raxitning oldini olishdagi maxsus tadbirlar:
1.Bolaga bir oylikdan (chala tug‘ilganlarga ikki haftalikdan) vitamin “D” ning moyli eritmasi kuniga 500 TB (1 tomchi) dan 1 yoshga to‘lguncha berib boriladi;
2.Kuz va qish faslida 10-15 seans ultrabinafsha nurlar bilan nurlantirish tavsiya etiladi.
Spazmofiliya-(shaytonlash). Bola organizmida kalsiy-fosfor tuzlari almashuvining buzilishi va qonda kalsiy miqdorining kamayib ketishi natijasida yuzaga keladi.
Sababi: 1. Sun’iy ovqatlantirish.
2. Raxit bilan kasallanishi.
Belgilari: Spazmofiliya yashirin va oshkora turlarda namoyon bo‘ladi. Yashirin turida bola salgina shovqindan uchib tushadi, qotib-qotib yig‘laydi va yig‘lagan paytda, nafasi qisqa muddatga to‘xtab qolishi mumkin.
Spazmofiliyaning oshkora turida bolada tirishish yuzaga keladi. Tirishish xuruji paytida bola boshini orqaga tashlab, ko‘zlari olayadi, rangi ko‘karadi, nafas olishi qiyinlashadi, og‘zidan ko‘pikli so‘lak oqadi, qo‘l-oyoqlari tarashadek qotadi, hushini yo‘qotadi. Tirishish bir necha minut davom etadi, so‘ng bolaning hushi joyiga kelib, nafas olishi tiklanadi, tirishish belgilari yo‘qoladi.
Kasallik og‘ir kechganda tirishish holati nafas a’zolari va yurak muskullariga tarqalishi, bir necha soatgacha davom etishi va bir necha kun davomida tez-tez takrorlanib turishi mumkin.
Tirishish paytida shoshilinch yordam ko‘rsatilmasa bolaning tili orqaga tortilib, nafas yo‘llariga so`lak tiqilib qolishi, nafas olish qiyinlashuvi tufayli, yoki yurak muskullari tirishishi natijasida bola halok bo‘lishi mumkin.
Tibbiy yordam: Spazmofiliyaning yaqqol turi belgilarining yuzaga kelishi favqulotda holat bo‘lib, shoshilinch tibbiy yordam ko‘rsatishni talab etadi.
Tirishish holatida: 1. Bolaning yoqa tugmalari yechilib, boshi baland qilib yotqiziladi, og‘zi, burni rezina balloncha yordamida ko‘pikdan tozalanadi.
2.Boshi yonbosh qilinib, jag‘lari orasiga doka o‘ralgan temir qoshiq dastasi qo‘yiladi va u bilan tili bosib turiladi.
3. Iloji bo‘lsa, magniy sulfatning 25% li eritmasidan (bolaning har kg vazniga 0,2 ml dan), 0,5 % li 1-2 ml novokain qo‘shib, dumbaning tashqi yuqori sohasiga muskul orasiga yuboriladi.
4. Xloralgidratning 1-2 % li eritmasidan 10-20 ml rezina ballonchaga olinib, klizma qilinadi.
Tirishish to‘xtagandan so‘ng, uni yana takrorlanishining oldini olish uchun:
1.Tinchlantiruvchi dorilar-natriy bromidning 1% eritmasi bir choy qoshiq kuniga 2-3 marta, fenobarbitol (lyu-minal 0,001-0,005-0,01) kuniga 2 mahal uxlatish oldidan peshin va kechda ichirish.
2.Kalsiy xloridning 5 % li eritmasidan 1 choy qoshiqdan kuniga 3 mahal ichiriladi yoki 10 % li eritmasidan 2-3 ml vena tomiriga yuboriladi (5 kun davomida).
3.Bolada raxitning belgilari bo‘lsa raxit mavzusida ko‘rsatilgan tartibda davolanadi.
4.Bolaning ovqati tarkibida yetarli miqdorda meva sharbatlari, sabzavotlar bo‘lishi lozim.