Tayanch so’zlar: Ekologiya, autekologiya, populyatsiyalar ekologiyasi,
sinekologiya, biosfera, inson ekologiyasi, ijtimoiy ekologiyasi, ekologik
muammolar, modellashtirish, biologik resurs, atrof-muhit.
“Ekologiya va tabiatni muhofaza qilish” fanining predmeti vazifalari va
uslublari. Organizmlarning yashash sharoiti va ularning tashqi muhit bilan o’zaro
munosabati, turlar, populyatsiyalar, biotsenozlar, ekotizmlar, biosfera va boshqa
tushunchalar ekologiya fanining manbaini tashkil etadi. Shu bois, umumiy
ekologiya, asosan, to’rt bo’limga bo’lib o’rganiladi. Bular: autoekologiya,
populyatsiyalar ekologiyasi, sinekologiya va biosfera haqidagi ta’limot Bugungi
kunda ekologiya nafaqat mustaqil fan sifatida shakllandi, balki u mazmunan juda
kengaydi. Ekologiya o’rganadigan yangi sohalar ko’paydi, boshqacha aytganda,
ekologiyaning yangi-yangi yo’nalishlari paydo bo’ldi.
«Ekologiya» tushunchasi fanga birinchi bo’lib nemis olimi E.Gekkel
tomonidan 1866-yili (“Organizmlarning umumiy morfologiyasi” asari) kiritilgan.
Hozirda ommalashib ketgan bu atama yunoncha so’zdan olingan bo’lib,
«oykos» - uy-joy; «logos» - fan degan ma’noni beradi. Ekologiya biologik fan bo’lib,
u organizmlarning bir-biri va tashqi muhit sharoiti bilan o’zaro munosabat
qonuniyatlarini o’rganadigan fan hisoblanadi. Organizmlarning moslashuvi
(adaptatsiya)ni o’rganish sifatida bundan 100-yil avval shakllangan hozirgi zamon
ekologiyasi - tabiatdan oqilona foydalanish va tabiatni muhofaza qilishning nazariy
asosi hisoblanadi. U o’ziga xos predmetga, vazifalarga hamda izlanish usullariga
egadir. Ekologiya antropogen va har xil omillar ta’sirida tabiatdagi
bog’lanishlarning buzilishi to’g’risida ma’lumot beradi. Ekologiya tabiat
resurslaridan oqilona foydalanishda va tabiatni muhofaza qilishda ilmiy asos bo’lib
xizmat qiladi. Masalan; har-yili o’rmon xo’jaliklari tabiatda o’suvchi dorivor
o’simliklarni yig’ib olib dori tayyorlash uchun topshiradi. Bunda agar yigib
olinayotgan o’simliklar miqdori qayta o’sib chiqayotgan o’simliklar miqdoridan
oshsa unda o’simliklar sekin-asta yo’qola boshlaydi. Shuning uchun dorivor
o’simliklarni yig’ish faqatgina ilmiy asoslangan meyorlar asosida terib topshirilishi
kerak. Bu meyorlar va yig’ish mudadtlari o’simliklar jamoasida qayta tiklanish
uchun asos bo’lishi kerak. Ekologiyaning predmeti - organizmlar guruhi va tashqi
muhit orasidagi bog’lanishlarning tuzilishini, unga bog’liq bo’lgan jonlanish,
taraqqiy etish, tarqalish va konkurentlik xususiyatlarini; tirik tabiat qanday tuzilgan,
qaysi qonunlar asosida mavjud va rivojlanadi, inson ta’siriga qanday javob beradi, -
bularning hammasi Ekologiyaning predmeti hisoblanadi.
Hozirgi paytda Ekologiyaning asosiy vazifalarini quyidagicha tariflash
mumkin:
- Hayotning tashkil topish qonuniyatlarini inson ta’sirini hisobga olgan holda
o’rganish;
- Insonning xo’jalik faoliyati ta’sirida tabiatda ro’y beradigan o’zgarishlarni
oldindan bilish;
- Biosferadagi kechayotgan jarayonlarni o’rganish, boshqarish, bashorat
qilish, inson yashaydigan muhitni saqlab qolish;
- Buzilgan tabiiy tizimlarni tiklash; shu jumladan foydalanishdan chiqarilgan
qishloq xo’jaligi ekin maydonlarini yana ishga solish (rekultivatsiya), yaylovlarning
tuproq hosildorligini, suv havzalari va boshqa ekotizimlarning mahsuldorligini
tiklash;
- Biologik resurslardan oqilona foydalanishning ilmiy asoslarini yaratish va
boshqalar.
Ekologik muammolarni kelib chiqishining asosiy sabablari. Bizning ona
sayyoramiz nisbatan yoshsamoviy jism hisoblanadi. Uning yoshi taxminan 4,6
million-yilga teng. Olimlarning fikricha, moddiyatning tadrijiy takomili qonuniyati
natijasida bundan uch milliard-yil ilgari Erda hayot vujudga kelgan va biologik
qatlam rivojlana boshlagan. Turli populyatsiyalar hamda turlardan tashkil topgan
flora va faunalar paydo bo’lgan, o’simlik va hayvonat olami turlari hamda
populyatsiyalari o’rtasida ma’lum munosabatlar shakllangan. Erdagi hayot tadrijiy
takomili (evolyutsiyasi)ning dastlabki bosqichi yakunida o’simliklar va hayvonlar
o’rtasida dinamik muvozanat yuzaga kelgan. Uning mohiyati shundan iboratki,
o’txo’r hayvonlar o’simliklarni, o’txo’r hayvonlarni esa yirtqich hayvonlar eyishi va
ularga boshqalarining kushanda bo’lishi flora va faunalar mazkur turlarining
butunlay yo’qolib ketishiga olib kelmagan. Nobud bo’lgan o’simliklar va hayvonlar
o’rniga evolyutsiya va ko’payishning tabiiy jarayoni natijasi sifatida yangilari paydo
bo’lib turgan.
Hatto katta geologik kataklizmalar (o’simlik va hayvonlarning yalpi qirilib
ketishiga olib kelgan halokatlar) davrida ham tabiat o’zning dinamik muvozanatini
saqlab qola olgan. Lekin bu yangi bosqichdagi muvozanat bo’lgan, yani o’simlik va
hayvonlarning yangi turlari hamda eski (qolgan)lari o’rtasida muvofiqlik
o’rnatilgan. Boshqacha aytganda, tabiiy tanlanish jarayoni kechgan - yashashga
qobil bo’lmagan o’simlik va hayvonlar qirilib ketgan va o’lgan. Ularning o’rniga
yashashga ancha qobil bo’lgan yangilari paydo bo’lgan. Bu qonuniyat flora va
faunalarning xilma-xilligi ortishiga olib kelgan. Lekin, bunda o’simlik va hayvonlar
turkumi (jamoasi) ichidagi, shuningdek, ular jamoasi o’rtasidagi dinamik muvozanat
saqlanib qolgan.
Odamsimon jonzotlar bundan qariyb, 3 million-yil ilgari biologik tizimga
qo’shilgan. Ularning biologik muvozanatiga ko’rsatgan ta’siri juda kichik bo’lgan.
Ibtidoiy inson faoliyati ov qilish, baliq tutish, o’simliklarning ildiz va butalarini,
meva va hosilini yig’ish va boshqalar bilan cheklangan. Bu esa mavjud biologik
muvozanatning juda oz darajada buzilishiga olib kelgan, xolos.
Tadrijiy takomilning ma’lum bosqichida mehnat qurollari yaratilishi
natijasida inson o’zining tevarak-atrofidagi tabiiy muhitga faol ta’sir ko’rsata
boshlagan. Endi u ko’chmanchi tarzda emas, balki tabiiy shartsharoitlar yaxshi
bo’lgan joylarda o’troq holda hayot kechirgan va qishloq xo’jaligi faoliyati bilan
shug’ullangan. Natijada inson hali qo’l tegmagan erlarni qishloq xo’jaligi maydoni
yoki tomorqa sifatida o’zlashtirgan va ayrim yovvoyi hayvon turlarini
xonakilashtirgan. Insonning bunday ongli faoliyati tufayli biologik (ekologik)
tizimning yangi turi-qishloq xo’jaligi shakillangan.
Atrof-muhitni o’zlashtirishning bu boshlang’ich shakli, o’z navbatida, mavjud
ekolgik muvozanatning o’zgarishiga olib kelgan. Tabiatning biologik qiymati
o’zgargan. Oxir-oqibatda dastlabkidan farq qiluvchi yangi shakldagi ekologik
muvozanat vujudga kelgan.
Insoniyat taraqqiyoti sanoatning rivojlanishiga olib kelgan. Shaharlarning
qurilishi va o’sishi, shahar aholisining ko’payishi qonuniy holda tabiat va insonning
yangi turdagi o’zaro munosabatini shakllantirgan. Natijada bizning zamonamizda
inson qadami etib bormagan tabiiy muhitlar faqat tropik junglilar va tog’larning
baland-baland etaklarida, qisman tundrada, himoya qilinadigan qo’riqxonalardagina
saqlanib qolgan. U erlarda inson yashamaydi va faoliyatining salbiy natijalari ham
kuzatilmaydi. Dunyodagi butun tabiiy muhitining taxminan o’n foiz hududiga hali
butunlay tegilmagan, xolos.
Inson sivivlizatsiyasining rivojlanishi va uning tabiat bag’riga tobora
chuqurroq kirib borishi oqibatida ahvol tubdan o’zgardi. Odamlar o’simlik va
hayvonot olamiga bostirib kirib, ko’pincha, o’z faoliyatining salbiy oqibatlari
tabiatni o’zgartirib yuborishi mumkinligi haqida hatto o’ylab ham ko’rishmaydi.
Bugungi kunda ibtidoiy sof tabiat haqida gapirmasa ham bo’ladi. Yer yuzida
o’rmonlar kesildi, katta-katta hududlar dehqonchilik qilish maqsadida o’zlashtirildi,
dorilar bilan o’g’itlandi, har xil chiqindi hamda gazlar bilan toza havo va tabiat
ifloslandi. Bundan tashqari, tabiatda toshqinlar, o’rmon yong’inlari, chang
bo’ronlari ham yuz beradi. Bularning barchasi tabiatning tabiiy muvozanatiga putur
etkazadi.
Shveytsariyalik ekolog V.Tsisvilerning etirof etishicha, keyingi 300-yil
davomida 150 xildan ortiq hayvonlar turi yer yuzidan butunlay qirilib, yo’qolib
ketgan. Afsuski, endi ularni qayta yaratib bo’lmaydi. Hozirgi sharoitda yo’qolib
ketish arafasida turgan 240 turdagi hayvonni qanday saqlab qolish masalasi
muammo bo’lib turibdi. Nafaqat hayvonlar, balki o’simliklar ham yo’qolib ketadi.
Bularning barchasi biologik muozanatning buzilishi oqibatlaridir. Ha, insonning
noaxloqiy, noinsonparvar va ilmiy nuqtai nazardan asoslanmagan, oqibatlari
o’ylanmagan faoliyati natijasida ko’plab o’simlik va hayvonlar, mikroorganizmlar
butunlay yo’qoldi.
Ekologik muvozanatning buzilishi inson faoliyati oqibatida yuzaga keladi.
Agar bu buzilish ma’lum kritik (keskinlik) holatidan yuqori bo’lmasa, muvozanat
qaytadan tiklanadi. Bu hol atrof-muhit zahiralari tugamaguncha davom etaveradi.
Agar buzilish darajasi keskinlik (kritik) holatidan o’tib ketgan bo’lsa, u holda
ekologik tizim ishdan chiqadi, undagi hayot so’nadi yoki eng qashshoq va sodda
ko’rinishda saqlanib qoladi. Er sharining bir vaqtlar gullab yashnagan hududlari
(regionlari), masalan, Afrika va Amerikaning cho’l tumanlari, Shimoliy Italiyaning
tog’ etaklari, Amerika harbiylarining gerbidtsitlar va defoliantlarni qo’llashlari
natijasida Vetnam xududining bir qismi, O’zbekistonning Orol atrofi mintaqalari va
boshqa ko’plab joylar insonning nooqilona faoliyati tufayli juda achinarli holatga
kelib qolgan. Shuni takidlash joizki, ekologik muvozanat buzilganidan keyin
ma’lum vaqt o’tib, yangi dinamik muvozanat yuzaga keladi. Bu holatni aniq
misollarda ko’rib o’tish mumkin.
XX asrning 60-yillarida bog’larni eb qo’yadigan olma kuyasiga qarshi DDT
preparatidan ko’p foydalana boshlagan edi. Olma kuyasi bartaraf etilgandan so’ng,
qizil qurtlarning o’rnashib olishi muammosi keskin bo’lib qoldi. Hali shu paytgacha
bog’bonlarni qizil qurt muammosi tashvishga solmagan edi. Gap shundaki, mevali
bog’larda qizil qurtlarning qirq beshta tabiiy dushmani mavjud. Shuning uchun ham,
u bog’larga kam zarar etkazgan, chunki uning rivojlanib, ko’payib ketishiga tabiiy
dushmanlari imkon bermagan. Bog’larga DDT bilan ishlov berilganda olma kuyalari
bilan birgalikda qizil qurtlarning dushmanlari ham qirilib ketgan. Qizil qurtlar esa
o’lmay qolishgan va oqibatda bog’larga katta zarar etkazilgan. Boshqacha aytganda,
ayni ekologik tizimdagi o’zgarishlar oldindan ko’ra bilinmagan noqulay oqibatlarga
olib kelgan, yani zararkunandaqizil qurt yoppasiga tarqalib ketgan.
Hali inson mustaqil tur sifatida shakllanmagan vaqtlarda ekologik muvozanat
ta’minlangan va tabiiy o’zo’zini "sozlash, tozalash" mexanizmi (tartibi) hukm
surgan. Biror populyatsiyaning haddan ortiq ko’payishi ayni muhitda oziqlanish
imkoniyatidan ortib ketib, tabiiy muvozanat buzilgan hollarda tabiatning o’z-o’zini
"to’g’rilash" mexanizimi ishga tushgan va natijada muvozanatning yangi holati
yuzaga kelgan.
Bugungi kun sharoitlarida tabiiy muvozanatning buzilishiga ayrim
shaharlarda ba’zan qarg’alarning birdan ko’payib ketishi misol bo’la oladi. Ular
shahardagi oziq-ovqat chiqindilari va axlatlarni titib yurishadi. Qarg’alar galasining
ko’payishi natijasida boshqa qushlar shaharda kamayib qoladi. Holbuki ular
hasharat-zararkunandalarni eb, istirohat bog’lari va daraxtzorlarga katta foyda
keltiradi. Shaharda ancha-muncha ko’payib qolgan qarg’alar "surbetlashib" vaxshiy
qushga aylanadi va kamayib qolgan boshqa paranda-qushlarga hujum qila
boshlaydi. Xuddi ana shunday holat axlatxonalarga to’planib olgan daryo, ko’l va
dengiz chag’alaylari bilan ham kuzatiladi.
Bundan tashqari, 2000-yilning bahor-yozida Qozog’iston va Rossiyaning
ayrim hududlarida chigirtkaning ko’payib ketishi va ularning maydondagi ekin-
o’simliklarni eb qo’yishi va boshqalar tabiiy muvozanatning buzilishiga misol
bo’ladi. Bunday hollarda, ma’lum vaqt o’tib, yangi ekologik muvozanat qaror
topadi.
Tabiatdagi ayrim turlarning ekologik muvozanati buzilish qisqa muddatli,
masalan, bevosita toksik (zaharlovchi) ta’sir va bilvosita uzoq ta’sir tufayli kelib
chiqqan bo’lishi mumkin. Bu holni bir necha misollarda ko’rib chiqaylik. Agar
begona (yovvoyi) o’tlar gerbitsidlar bilan yo’qotilsa yoki o’simliklarning yuqumli
kasalliklar bilan kurashishda ularni eltuvchilarni bo’g’imoyoqlilarni - ularni
eltuvchilarni qirish uchun insektitsidlar qo’llanilsa u bevosita ta’sir hisoblanadi.
Ammo maskur kimyoviy vositalar yordamida begona o’tlar va hasharotlarni alohida
tanlab yo’qotish bilan bir qatorda foydali o’simlik va hasharotlar va hatto hayvonlar
ham zarar ko’rishi mumkin. Bunday holarda ham nomaqbul bevosita ta’sir yoki
uzoq ta’sir ko’rinishlari namoyon bo’ladi.
Bundan tashqari, zararkunandalar bilan kurashishda inson tomonidan
foydalaniladigan zaharli moddalar uzoq vaqt davomida er-tuproqda, havo va suvda
saqlanib qoladi. Chunki tabiatning o’zida ularni zararsizlantiradigan bakteriyalar
(mexanizmlar) deyarli yo’q. Bu zaharli moddalarning parchalanib ketishi yoki
zararsizlanishi uchun ko’p hollarda juda uzoq vaqt talab etiladi.
Hatto, ko’pincha, ularning emirilishi jarayonida yanada zaharliroq mahsullar
paydo bo’lib qoladi. Holbuki ularning xususiyatlarini biz hali bilmaymiz,
o’rganishimizga to’g’ri keladi. Yangi paydo bo’lgan zaharli mahsullar flora va
faunalarning na’munalariga juda uzoq vaqt ta’sir ko’rsatishi mumkin. Bu bilvosita
uzoq muddatli ta’sirlar hisoblanadi. Boshqacha aytganda, bir zararkunandaga ta’sir
etib, hech kutilmagan yoki o’ylab ko’rilmagan natijaga duch kelinadi. Daryo va
ko’llarda baliqlar, o’rmon va maydonlardagi foydali hasharotlar va qushlar, mazkur
tuman xududlarida yashaydigan yovvoyi hayvonlarning qirilib ketishi yoki ko’plab
o’lishiga sabab bo’lnadi. O’simliklar, hashorotlar, qush va hayvonlarning zaharlanib
o’lishi esa qishloq xo’jaligi uchun juda katta zarar keltiradi.
Xo’sh, ekologiya faqat bugungi kunning dolzarb muammosimi? Inson bilan
tabiat o’rtasidagi munosabat faqat hozirgi davrdagina murakkablashdimi? Inson va
tabiat munosabatlarini murakkablashib borishining sabablari nimadan iborat?
Ekologiya muammosi insoniyatning tarixiy taraqiyoti bilan bog’liqdir. Tabiatning
ekologik vazifasi shundan iboratki, inson faqat undagina biologik mavjudot sifatida
yashay oladi. Odamlar tabiiy boyliklar etishmagan joylardan ko’chishib, suv va
oziq-ovqat ko’proq bo’lgan va ob-havosi yaxshiroq joylarga to’planishadi. Bu
joylarda ham aholi soni va ularning moddiy va manaviy ehtiyoji tobora ortib boradi.
Inson mehnat qurollarini qo’llay boshlaydi. Bu ov qilishni, hosilni yig’ishtirishni va
yirik vahshiy hayvonlardan o’zini himoya qilishni osonlashtiradi. Tabiatning
beshafqat sovuqlari insonni turli kiyimlar tayyorlashga, uylar qurishga majbur etadi.
Hayotiy ehtiyojlar uchun mehnat qurollarini qo’llanish zaruratga aylanadi va bu o’z
navbatida insonni faollashtiradi. Bu bilan insonning iqtisodiy faoliyati shakllana
boshlaydi. Ayni paytda tabiatning iqtisodiy vazifasini yuzaga keltiradi. Endi tabiat
Inson uchun faqat yashash maydonigina emas, balki qurilish uskunalari, qurilish va
mehnat maydoniga aylanadi. Endi inson uchun tabiatni tashkil etuvchilar uning
tabiiy boyliklari bo’ladi. Insonning ishlab chiqarish faoliyatida tabiiy boyliklar soni
borgan sari ko’payib boradi va oxir-oqibatda butun tabiat boylikka aylanadi. Ammo
bu ham insonga oz tuyuladi va u tabiatning ichiga chuqurroq kiradi hamda koinot
kengliklariga chiqadi. Tabiatdan olingan har bir ulush, unda erishilgan yutuq inson
ongining rivojlanishiga, uning kuchlanishiga sabab bo’ladi. Inson faqat tabiat
qonunlarini bilibgina olg’a siljish mumkinligini anglab etadi. Hayotda ottirlgan
tajriba-aql inson mehnatini engilashtiradi, mehnat esa yangi ehtiyojlar tug’diradi va
inson fikrini rivojlantiradi. Olamni bilishga bo’lgan qiziqish ana shunday vujudga
keladi. Bilimni tartiblashtirishdan maqsadga yo’naltirilgan ilmiy faoliyatga o’tiladi.
Bunda tabiatning o’zi ustoz, birinchi darslik, birinchi imtihon oluvchi bo’ladi. Endi
dehqonchiliq bilan shug’ullangan insonning ishlab chiqarish faoliyati boshlanadi va
ekologik muammolar vujudga keladi.
Dostları ilə paylaş: |