Tarix/vaxt tipli sahələrdən tarix və vaxtın daxil edilməsi üçün istifadə
olunur.
Xüsusi tip sahələrə
pul sahəsini göstərmək mümkündür. Adından
məlumdur ki, bu sahədə pulun məbləği saxlanılır. Pulun məbləğini ədədi sahədə
də saxlamaq olar, lakin pul sahəsində onlarla işləmək daha münasibdir. Bu halda
kompüter ədədi onun pul vahidləri ilə birlikdə əks etdirə bilir. O, manat və qəpiyi,
funt və pensi, dollar və senti bir-birindən ayırd edə bilir.
Müasir verilənlər bazasında təkcə ədəd və hərfləri deyil, həm də şəkil və
musiqi kliplərini, videoyazıları da saxlamaq olur. Belə obyektlər üçün nəzərdə
tutulan sahə
OLE obyekt sahəsi
adlanır.
Əgər sahəyə böyük həcmə malik mətn yerləşdirmək lazımdırsa, bu halda
MEMO sahəsindən istifadə olunur. Bu sahənin əsas cəhəti odur ki, real olaraq
verilənlər bu sahədə deyil, başqa yerdə saxlanılır, sahədə isə həmin mətnin
yerləşdiyi yerə göstərici qoyulur.
Ən maraqlı sahə
sayğac sahəsidir . İlk növbədə o adi ədədi sahə kimi
görünə bilər, ancaq o avtomatik artmaq xüsusiyyətinə malikdir. Bu sahə sadəcə
sayğac rolunu oynayır. Bura verilənlər bazasındakı yazıların sayı avtomatik olaraq
yazılır.
Sadə verilənlər bazası . Sadə verilənlər bazasını xüsusi proqram
vasitələrindən istifadə etmədən də yaratmaq olar.
Əlaqəli cədvəllər . Əslində sadə verilənlər bazası baza yox, sadəcə
cədvəldir. Əgər informasiya belə sadə strukturda saxlanılsaydı, onunla işləmək
üçün xüsusi verilənlər bazasının idarə sistemləri (VBİS) lazım olmazdı, çünki
praktikada daha mürəkkəb strukturlu informasiyaları saxlamaq lazım gəlir ki,
onlar da çoxlu sayda cədvəllərdən ibarət olurlar.
Verilənlər bazasının yaradılması onun cədvəllərinin yaradılmasından başlayır.
Struktur elə olmalıdır ki, baza ilə işləyərkən imkan daxilində az verilən daxil
edilsin. Əgər hər hansı veriləni bir neçə dəfə daxil etmək lazım gəlirsə, bazanı
əlaqəli cədvəllərdən təşkil edirlər. Hər bir cədvəlin strukturunu ayrı-ayrı işləyirlər.
