7-MODUL. MÁMLEKETLIK TILDE IS QAǴAZLARÍN JÚRGIZIW
Is qaǵazları adam ómirinde hám pútkil jámiyetimizde áhmiyetli orın iyeleydi. Házirgi zamanda jámiyetimiz ómirin is qaǵazlarısız kóz aldımızǵa keltiriw oǵada qıyın.
Biz úyde, mektepte, joqarǵı oqıw ornında, kóshede, jumısta, yaǵnıy hámme jerde is qaǵazları menen is alıp baramız.
Adam hám mákeme, mákemeler hám shólkemler, olardıń mámleket penen sonday-aq, mámleketler arasındaǵı jumısların alıp barıw hám qarım-qatnas jasaw is qaǵazları arqalı alıp barılatuǵını hámmege málim.
Qaraqalpaqstan Respublikasınıń mekteplerinde, licey hám texnikumlarında, joqarı oqıw orınlarında júrgizilgen kóp jıllıq baqlawlar hám tájiriybeler kópshilik oqıwshılardıń hám talabalardıń is qaǵazların jazıwda qıynalatuǵınlıǵın kórsetedi. Olar ápiwayı arza, túsinik xat, málimleme, isenim xatların durıs jaza almaydı, al hújjetlerdi durıs jazıw júdá zárúr. Talabalar ómirbayan, protokol, isenim xat, tilxat, arza, dápterdiń sırtın toltırıw, túsinik xat, daǵaza, maǵlıwmatnama, málimleme, minezleme, usınısnama, belgili bar jumısqa pikir, islegen jumıs boyınsha esabat, joba dúziwi, tezisler, konspekt, referat, kurs hám pitkeriw qánigelik jumısların, maqala jazıp biliwi kerek.
Is qaǵazların durıs jaza biliw kónlikpesi turmısta oǵada zárúr. Sebebi hár bir mákeme, shólkem, mektep , joqarı oqıw ornı hújjetlerdi qabıllaw hám olardı alıp barıw hámme ushın qabıl etilgen tártip boyınsha iske asadı.
Rus hám qaraqalpaq tilleri boyınsha ótkeriletuǵın ámeliy sabaqlarında, biziń pikirimizshe, tek teoriyalıq materialdı úyretip qoymastan sawatlı jazıw kónlikpelerin rawajlandırıwǵa da dıqqat awdarıw kerek.
Is qaǵazların durıs jazıw ushın rásmiy is qaǵazları stilin jaqsı biliw kerek. Is qaǵazları jazılıwına qoyılatuǵın talaplar - bul anıqlılıq, túsiniklilik, bir mánilik, qısqalıq, ápiwayılılıq hám bayanlawdıń tiyisli formasın, qurılısın hám izbe-izligin saqlaw.
Álbette, jaǵdayǵa hám mazmunǵa baylanıslı hár bir hújjette ayırım ózgerisler kirgiziliwi tábiyiy hal. Biraq usı waqıtqa deyin qáliplesken hám dástúrge aylanǵan hújjetlerge qoyılǵan standartlardı, yaǵnıy talaplardı, qabıl etilgen bayanlaw formaların, materiallardıń jaylasıw tártibin saqlaw shárt.
Dostları ilə paylaş: |
