Tramvay – ingliz tilidan “tram” – vagon va “way” – yo‘l so‘zlaridan olingan. Tramvay shahar jamoat transportining eng qadimgi turlaridan biri bo'lib, dastlab ot qo‘shib tortiladigan arava shaklida XIX asrning birinchi yarmida paydo bo'lgan (1.1.4-rasm). F.A.Pirotskiy tomonidan ixtiro qilingan va sinovdan o‘tkazilgan eksperimental elektr tramvay birinchi marta 1880-yilda Rossiyaning Sankt-Peterburg shahrida paydo bo‘lgan (1.1.5-rasm). Birinchi muntazam tramvay qatnovi esa, 1881-yilning may oyida Germaniyaning Berlin shahri atrofida Siemens&Halske kompaniyasi tomonidan yo‘lga qo‘yilgan.
Elektr tramvaylaridan tashqari, kanatli va dizel dvigatelli tramvaylari ham mavjud. Shuningdek, oʻtmishda ot qo‘shib tortiladigan, pnevmatik, bugʻli va benzin dvigatelli tramvaylar ham boʻlgan.
Foydalanish maqsadiga ko‘ra tramvay vagonlari yo'lovchi, yuk, xizmat va maxsus (kran-vagon, compressor-vagon, texnik ko‘chma zalli, ko'chma elektr stansiyali va boshqalar) vagonlarga bo‘linadi.
Trolleybus – ingliz tilidan “trolley” – aloqa simi, rolikli tok qabul qiluvchi “bus” – avtobus so‘zlaridan olingan bo‘lib, tashqi quvvat manbaidan (markaziy elektr stantsiyalaridan) shtanga tok qabul qiluvchi yordamida, ikki simli aloqa tarmog'i orqali elektr tokini oladigan va elektr toki bilan ishlaydigan kontaktli rel’ssiz mexanik transport vositasidir.
Zamonaviy trolleybuslarning ajdodlari taxminan bir vaqtning o'zida Germaniyaning ikki hududida paydo bo'lgan. 1882 yilda nemis muhandisi Verner fon Simens Berlin shahri va uning atrofi (Spandau) o'rtasida trolleybus qatnovini yo‘lga qo‘ydi. Shu bilan birga, Königshteynda (Sakson Shveytsariyasi) Maks Shimmann loyihasi bo'yicha qurilgan 4 km uzunlikdagi trolleybus liniyasi paydo bo'ldi. 1.1.6-rasmda ilk trolleybuslar ko‘rinishi keltirilgan.
