Mantiq ilmining predmeti, asosiy qonunlari. Tushuncha tafakkur shakli sifatida

Demokrit (er. av. 460-370) mantiqiy ta’limotida fikrning chinligi masalasi muhim o‘rin tutadi. U ko‘proq induksiya va analogiyani o‘rganishga e’tibor beradi, haqiqatni bilish uchun yakka buyumlarni kuzatish, his qilish orqali umumlashtirish zarur, deb ta’kidlaydi. Hukmni sub’ekt va predikatning o‘zaro aloqasidan iborat, deb ta’riflaydi. U etarli asos qonunini ontologik asosda tushuntiradi. Demokritning mantiqiy ta’limoti keyinchalik Aristotel va F. Bekon ta’limotlariga sezilarli ta’sir ko‘rsatgan.
Sokrat (er. av. 469-399) ta’limotiga ko‘ra buyumlarning mohiyatini bilib bo‘lmaydi. Inson, avvalo, o‘z-o‘zini bilishi kerak. Bilim umumiylik to‘g‘risidagi tushunchadir. Haqiqatni aniqlash uchun o‘ziga xos usul darkor. Bu usul vositasida o‘rganilayotgan buyum haqida umumiy tushuncha hosil qilinadi va shu tushunchaga asoslanib buyum haqida fikr yuritiladi. Haqiqatni aniqlash uchun muxolif fikridagi ziddiyatlar o‘rganiladi. Predmet haqidagi tushunchalar ziddiyatli bo‘lsa, demak bilim yuzaki bo‘ladi. Sokrat haqiqatni aniqlashda induksiya va definitsiyadan foydalanishni tavsiya etadi.
Induksiya - kundalik hayotdagi yakka misollar asosida umumiy tushunchalarni hosil qilish usulidir. Definitsiya - bahs jarayonida tushunchalarni ta’riflashdan iborat. Bu usulni Sokrat «mayevtika» deb ataydi.
Platon (er. av. 427-347) ustozi Sokratning, umumiy tushunchalar buyumlarning mohiyatini ifodalaydi, degan fikrini davom ettiradi. U umumiy tushunchalarni buyumlardan va insonlardan ajralgan mutlaq g‘oyalar sifatida talqin qiladi, ularni birlamchi deb biladi. U hukmni tafakkurning asosiy elementi deb hisoblaydi. Hukm ega va kesimning birligidan iborat bo‘lib, tasdiq yoki inkor ma’noni bildiradi. Agar hukmda birlashishi mumkin bo‘lmagan tushunchalar birlashtirilsa, u xato bo‘ladi.
Mantiq ilmining alohida fan sifatida shakllanishi Aristotelning nomi bilan bog‘liqdir. U birinchi bo‘lib, mantiq ilmi o‘rganadigan masalalar doirasini aniqlab berdi. Aristotelning «Kategoriyalar», «Talqin haqida», «Birinchi Analitika», «Ikkinchi analitika», «Sofistik raddiyalar haqida», «Topika» nomli asarlari bevosita mantiq masalalariga bag‘ishlangandir. Uning «Ritorika», «Poetika» asarlari ham mantiqiy ta’limotining muhim tarkibiy qismlari hisoblanadi. «Metafizika», «Ruh haqida» asarlarida esa mantiq masalalari ma’lum darajada bayon qilingan.
Aristotel mantiqni «ma’lum bilimlardan noma’lum bilimlarni aniqlovchi», «chin fikrni xato fikrdan ajratuvchi» fan sifatida ta’riflaydi. Mantiqning vazifasi chin fikrni, haqiqatni aniqlashdir, deb ta’kidlaydi.
Mutafakkir haqiqatning mavjudligini, ob’ektiv xarakterini e’tirof etgan holda, «bilimlarimizning voqelikka mos kelishi - haqiqatdir», deb ko‘rsatadi. U haqiqatni aniqlashda nozidlik va uchinchisi istisno qonunlariga amal qilish zarurligini ta’kidlaydi. Aristotel bu qonunlarni ham ontologik, ham gnoseologik nuqtai nazardan ta’riflaydi. Bir vaqtda, bir xil munosabatda aynan bir predmetga nisbatan o‘zaro bir-birini istisno fikrlarni bildirish mumkin emasligini, chunki bu fikrlardan biri chin, boshqasi xato bo‘lishi yoki har ikkisi xato bo‘lishi mumkinligini asoslab beradi, o‘zaro ikki zid fikrning biri chin, boshqasi xato bo‘lganda, uchinchi fikrga o‘rin yo‘q, ekanligini ta’kidlaydi.
Aristotelning mantiqiy ta’limotida xulosa chiqarish etakchi o‘rinni egallaydi. U tafakkur shakllari bo‘lgan tushuncha va hukmni xulosa chiqarishning tarkibiy qismlari sifatida tahlil qiladi.
Stoya maktabi vakillari birinchi bo‘lib, «logika» terminini tafakkur haqidagi maxsus fanni ifodalash uchun qo‘llashgan. Ular mantiqni falsafaning tarkibiy qismi, mantiqning maqsadi inson aqlini xatolardan asrash va haqiqatga erishishdir, deb bilishgan. Stoiklar mantig‘i ikki qismdan iborat bo‘lgan: dialektika va ritorika; dialektika o‘z navbatida grammatika va bilish nazariyasiga bo‘lingan. Stoiklar ham Aristotel kabi nozidlik qonunini to‘g‘ri tafakkurning asosiy prinsipi, deb bilganlar.
Epikur (er. av. 341-270) falsafada birinchi o‘ringa bilish nazariyasi va mantiqni qo‘ygan, ikkinchi o‘rinda – fizika, uchinchi o‘rinda – axloq bo‘lgan. U tug‘ma g‘oyalar yo‘q, bilimlarimizning manbai – sezgilardir, sezgilarimiz yolg‘on ma’lumot bermaydi, faqat xulosa chiqarishdagina inson xatoga yo‘l qo‘yishi mumkin, deb ta’kidlaydi. Epikur xulosa chiqarishda ko‘proq analogiya va induksiyaga ahamiyat bergan.