Mavzu: O‘quvchilar nutqini o‘stirishda yozma ish shakillaridan foydalanish. Kirish

Yozma ishlarni tashkil etish mazmuni.

Yozma ishlarga qoʻyiladigan umumiy talablar O‘zbekiston mustaqilligi tufayli yuzaga kelgan imkoniyatlarni qadrlash va ulardan amalda vatan ravnaqi, xalq farovonligi yo‘lida foydalanish davr talabiga aylandi. “Tabiiyki, bu bizdan barcha soha va tarmoqlarda amalga oshirayotgan keng ko‘lamli islohotlarimizni atroflicha tahlil etib, kelgusi rejalarimizni aniq-ravshan belgilab olishni talab etadi”.

Darhaqiqat, mustaqillikning shonli yo‘li barcha jabhalarda bo‘lgani kabi, kadrlar tayyorlash jarayonida erishilgan natijalar, yutuqlarni sarhisob qilishni, amalga oshirilishi lozim bo‘lgan reja-tadbirlar ishlab chiqishni taqozo etadi.
Davlatimiz rahbari Sh.M.Mirziyoyevning ma’naviy-ma’rifiy masalalarga doir har bir chiqishlarida ajdodlar merosini qadrlash, ularning tafakkur mahsulidan unumli foydalanish, kitob mutolaasiga alohida e’tibor qaratish ta’kidlanadi, o‘tmish an’analar, axloqiy-ma’rifiy qarashlar bugunni yorituvchi mash’al sifatida e’tirof etiladi. “Yoshlarimizning mustaqil fikrlaydigan, yuksak intellektual va ma’naviy salohiyatga ega bo‘lib, dunyo miqyosida o‘z tengdoshlariga hech qaysi sohada bo‘sh kelmaydigan insonlar bo‘lib kamol topishi, baxtli bo‘lishi uchun davlatimiz va jamiyatimizning bor kuch imkoniyatlarini safarbar etamiz,” – degan so‘zlari biz uchun dasturulamal vazifasini o‘tamoqda.
Mumtoz manbalar sahifasini varaqlar ekanmiz, kadrlar tayyorlash muammosiga jiddiy e’tibor qaratilganini kuzatamiz. Buyuk mutafakkirlarimiz: Abu Nasr Farobiy, Yusuf Xos Hojib, Alisher Navoiy va boshqa allomalar, jumladan, jadid pedagoglari muayyan sohani mukammal egallashga, shuning barobarida, boshqa sohalarni ham bilishga da’vat qilishgan.
XX asr boshlariga kelib, kadrlar tayyorlash masalasiga davr muammosi sifatida qaraldi. Chunonchi Behbudiy: “Turkistonda muallim oz bo‘lib, muallimlarga ehtiyojimiz shadiddir... Endi ushbu mushkul hollarni nazari e’tiborga olub, Turkiston yoshlari muallim yetushturmoqning chorasini topmoqlari lozimdur” deb yozgan edi. Demak, kadrlar tayyorlash, soha mutaxassislarini yetishtirish o‘zbek xalqi ijtimoiy-iqtisodiy, ma’naviy-madaniy hayotida belgilovchi omillardan bo‘lib kelgan va mustaqillik davrida yangi bosqichga ko‘tarilgan dolzarb masaladir.
2016-yil 13-mayda Respublika Birinchi Prezidenti tomonidan e’lon qilingan “Alisher Navoiy nomidagi Toshkent davlat o‘zbek tili va adabiyoti universitetini tashkil etish to‘g‘risida”gi farmonda ham o‘zbek tili ravnaqini ta’minlaydigan, takomiliga xizmat qiladigan, dunyo miqyosidagi nufuzini oshiradigan, tilshunoslik sohasini rivojlantiradigan, til ta’limini takomillashtiradigan mutaxassis-kadrlar tayyorlash masalasi alohida tilga olingan: “O‘zbek tili va adabiyoti bo‘yicha mutaxassislar, ilmiy-pedagog kadrlar tayyorlash, mazkur yo‘nalishda faoliyat olib borayotgan xodimlarni qayta tayyorlash va malakasini oshirish masalalariga katta e’tibor berilmoqda”.
Barkamol shaxs va malakali mutaxassislarni tarbiyalab voyaga yetkazish jarayonining mazmun-mohiyati O‘zbekiston Respublikasi “Ta’lim to‘g‘risidagi Qonun”i hamda “Kadrlar tayyorlash Мilliy dasturi”da batafsil yoritilgan. Bugungi kunda “Kadrlar tayyorlash Мilliy dasturi”da ko‘zda tutilgan maqsadga erishish uchun ta’lim jarayoni sifatiga alohida e’tibor berilmoqda. Yangi texnik vositalardan foydalanish, zamonaviy pedtexnologiyani qo‘llash keng yoyilmoqda.
Shu o‘rinda, bir jihatni alohida ta’kidlash o‘rinlidir: ta’lim jarayonida yangi, zamonaviy usullar, pedagogik vositalarni qo‘llash barobarida an’anaviy ilg‘or pedagogik tajribalarni ham e’tibordan chetda qoldirmaslik lozim.
Yetuk mutaxassis-kadrlar tayyorlash maqsadiga qaratilgan ta’lim sifatini oshirishda zamonning eng yangi vositalari, usullari, taraqqiy etgan mamlakatlar tajribasini ommalashtirish bilan bir qatorda milliy pedagogikaning davrga mos, ta’lim maqsadlariga muvofiq keluvchi tajribalaridan ham foydalanish maqsadga muvofiq. Negaki “milliy o‘zlikni anglashning o‘sib borishi, vatanparvarlik, o‘z vatani bilan faxrlanish tuyg‘usining shakllanayotganligi, boy milliy madaniy-tarixiy an’analarga va xalqimizning intellektual merosiga hurmat” “Kadrlar tayyorlash Мilliy dasturi”da mutaxassislar tayyorlash tizimini tubdan isloh qilishning muhim omillaridan biri sifatida qayd etilgan.
Milliy pedagogikadagi asosiy tamoyillardan biri yozma nutqni shakllantirish masalasi edi. Jumladan, jadid pedagoglari yozma nutqning inson tafakkurini o‘stirishga xizmat qilishini yaxshi anglashgan. Shuning uchun maqolalari hamda darsliklarida yozma nutq ko‘nikmalarini shakllantirishga ahamiyat berishgan. O‘quvchilarga beriladigan matnlar, insholarning mazmuni, sodda-murakkabligiga alohida e’tibor qaratishgan. Matnlarni o‘quvchi yoshiga qarab saralashni, bu borada boshqa mamlakatlardagi ilg‘or pedagogik tajribalarga tayanish lozimligini ta’kidlashgan.
Ayrim mamalakatlarda insho yozish mezonlari ishlab chiqilgani xususidagi ma’lumotlarni qayd etishgan: “… mushkul iboratlik uzun insholar, albatta, bola zehnini ochmay, balki fikrini(ng) yo‘q bo‘lishig‘a sabab bo‘lur. Biljumla mamoliki islomiyaning maktablarindagi bolalar uchun yengil suratda insho tayyorlanubdurki, ibtidoiyya, rushdiyya, e’tidodiyya maktab talabalarini(ng) har birig‘a muvofiq suratda insho ta’lim beriladur”.
Darhaqiqat, insho yozma nutqni, fikrni o‘stirish, tafakkurni rivojlantirish vositasi hisoblanadi. Inson qaysi kasb egasi bo‘lmasin, yuksak tafakkur sohibi bo‘lsagina, yangilik yaratadi. Yozma nutq malakalarini shakllantirish, og‘zaki nutqni takomillashtirish faqat soha doirasidagi muammo emas, balki umumta’lim jarayonidagi zururatdir. Negaki yozma va og‘zaki nutqning me’yoriy darajada shakllanishi fikrlash tezligini oshirishga, o‘quvchi tafakkur doirasini kengaytirishga yordam beradi. Yozuv bevosita qo‘l bilan amalga oshiriladigan jarayon bo‘lib, qo‘l harakatining miya yarim sharlariga aloqadorligi psixologik tahlillarda qayd etilgan.
Yozma nutq ko‘nikmalarini shakllantirish maktab davridan boshlanadi. Shuning uchun har tomonlama malakali, ma’naviy barkamol, axloqan yetuk mutaxassis-kadrlarni tayyorlashga, yozma nutq me’yorlarini o‘rgatishga maktab davridanoq e’tibor qaratish lozim. Respublika Birinchi Prezidenti Islom Abdug‘aniyevich Karimov maktab ta’limiga alohida e’tibor berish lozimligini ta’kidlaganlar. Boshlang‘ich ta’limga ahamiyat berilmaganligini eng katta kamchiliklardan biri sifatida baholaganlar: “Eski ta’lim tizimining yomon qusuri boshlang‘ich ta’limga ikkinchi darajali ish deb qarayotganimizdadir”.
Ta’limning uzluksizligini ta’minlash lozim bo‘lganidek, kadrlar tayyorlash jarayonini, yozma nutq ko‘nikmalarini shakllantirishni ham uzluksiz ravishda olib borish kerak bo‘ladi. Ya’ni dunyoqarashi, fikrlash qobiliyati muayyan qolipga kirgan talabani qisqa davrda har tomonlama yetuk, bilimli, tafakkur darajasi keng, yozma nutq me’yorlarini to‘liq egallagan mutaxassis sifatida shakllantirish ancha mushkul. Shu sabab adabiy til me’yorlarini to‘liq o‘zlashtirgan, fikrini to‘g‘ri, xatosiz, izchil va ravon ifodalay oladigan mutaxassis-kadrlar tayyorlashni maktab o‘quvchisini har tomonlama maqsadga muvofiq tarbiyalashdan boshlash kerak.
Buning uchun yoshlarning ta’lim olishi, bilim darajasi, yozma topshiriqlarni bajarish tartibiga alohida e’tibor qaratish lozim. Yoshlarga texnik vositalarning ahamiyati, axborot yetkazishdagi o‘rnini ta’kidlash shart emas. Bugunning ziyrak, zukko farzandi voqelikdan o‘zi xulosa chiqarib olmoqda. Bugungi ta’lim jarayonida yoshlarga kitob o‘qish, badiiy asarlarni mutolaa qilish, yozma nutq ko‘nikmalarini egallash fikr o‘stirishning asosiy vositalaridan ekanligini, tafakkurni rivojlantirishga xizmat qilishini, bu omillarsiz har tomonlama yetuk mutaxassis bo‘lish mumkin emasligini ham uqtirish lozim. Bu borada faqat nasihat bilan ish bitmaydi.
Yozma nutqni shakllantirishga qaratilgan topshiriqlar, ilmiy va badiiy adabiyotni mutolaa qilishga yo‘naltirilgan tadbirlarni bevosita ta’lim jarayonida qo‘llash kerak bo‘ladi. Ajdodlarimiz ta’lim-tarbiya berish davomida boshqalar hayotini, faoliyatini ibrat qilib ko‘rsatish usulini qo‘llashgan. Yoshlar turli mazmundagi kitob, badiiy asar, gazeta, jurnallarni mutolaa qilish jarayonida ko‘p xulosalarni o‘zlari chiqarib oladilar. Bu esa malakali kadrlar tayyorlashdagi ta’lim jarayoni maqsadiga erishishni yanada osonlashtiradi. Kitob mutolaasi borliq, voqea-hodisa, insoniyat, shaxs ma’naviyati, ruhiyati haqida bilim berish bilan bir qatorda yosh avlod qalbida ezgu fazilatlarni namoyon etadi, yaqinlariga, Vataniga, ona zaminga muhabbat tuyg‘ularini uyg‘otadi, yozma ish ko‘nikmalarini hosil qiladi.
Mumtoz madaniy merosni tahliliy o‘rganish jarayonida ularda aks etgan asosiy qarashlarning hozirda ham o‘z qiymatini yo‘qotmaganligi ma’lum bo‘ladi. Deyarli, barcha fikr-mulohazalar – o‘tmishda aytilgan bugunning gaplari. Faqat ularni anglay bilish kerak. Yoshlar kelajakka olib boruvchi yo‘lning ajdodlarimiz tafakkur ziyosi bilan yo‘g‘rilgan sarhadlardan o‘tishini aslo unutmasliklari lozim. Ajdodlar merosini, o‘tmishini, ma’naviyatini, milliy qadriyatini, o‘zlikni qadrlamasdan, tarix haqidagi xotirani shakllantirmasdan turib, har tomonlama yetuk, barkamol mutaxassis kadr sifatida kamol topish mushkul. Zotan, “Tarixiy xotirasiz – kelajak yo‘q!”
Yozma ish va topshiriqlarning har qanday ko‘rinishi mumtoz asarlar mohiyatini o‘zlashtirishda, milliy qadriyatlarni anglashda muhimdir. Ayniqsa, adabiy mavzudagi insholarning asosiy maqsadi o‘tmish va bugunning manfaatlarini umumlashtirishga qaratilgan.
Yozma ishlarga e’tibor faqatgina milliy pedagogik tajribada emas, xorij ta’limi va baholash tizimida ham kuzatiladi. Masalan, keng yoyilgan til o‘qitish dasturlari hisoblangan IELTS, TOEFL tizimlarida 60 daqiqalik umumiy mavzuda esse yoki insho yozish, 50 daqiqa mobaynida o‘qiganlari hamda eshitganlari bo‘yicha savollarga javob tarzida yoki o‘zi bilgan mavzuni dalillar, ma’lumotlarga tayangan holda yozma tarzda asoslab berish talablari keltirilgan.
Kadrlar tayyorlash – mamlakat taraqqiyotidagi muhim masala. O‘zbekiston buyuk kelajak sari intilayotgan ekan, shu kelajak egalarini – yetuk mutaxassis-kadrlarni tayyorlash masalasi ijtimoiy-siyosiy ahamiyat kasb etadi. Har tomonlama bilimli, malakali, muayyan tajribaga ega bo‘lgan, nutq madaniyati talablarini to‘liq o‘zlashtirgan, og‘zaki va yozma nutqi ravon mutaxassis-kadrlarni tayyorlashda an’anaviy milliy pedagogika hamda rivojlangan davlatlarning ilg‘or tajribasidan, eng so‘nggi zamonaviy yutuqlaridan umumlashtirgan holda foydalanish maqsadga muvofiq. Ona tili ta’limi oldiga qo‘yilgan ijtimoiy buyurtma o‘quvchi shaxsini fikrlashga, o‘zgalar fikrini anglashga va shu fikr mahsulini og‘zaki va yozma shaklda savodli bayon qila olishga, kommunikativ savodxonlikka o‘rgatishdan iborat. Shundan kelib chiqqan holda ona tili ta’limi oldiga mukammal shakllangan, mustaqil fikrlay oladigan, nutq va muloqot madaniyati rivojlangan savodxon shaxsni kamol toptirish maqsadi qo‘yiladi.
DTS talabiga ko‘ra ona tili ta’limining mazmuni:
- o‘quvchining fikrlash salohiyatini, aqliy rivojlanishini, mantiqiy tafakkurini o‘stirish;
- moddiy borliqni tilning ifoda vositalari yordamida anglashga hamda fikr-o‘ylari va his-tuyg‘ularini ona tili imkoniyatlari doirasida bayon eta olishga o‘rgatishni o‘z ichiga oladi.
“Ona tili” o‘quv fani:
- o‘zbek tilining fonetikasi, leksikasi va grammatikasi bo‘yicha nutqning og‘zaki, yozma shakllaridan keng va to‘g‘ri foydalanish uchun zarur bo‘lgan ilmiy-amaliy ma’lumotlar berishni;
- o‘zbek tilining to‘g‘ri talaffuz, imlo va punktuatsiya qoidalarini o‘zlashtirishni;
- o‘zbek tilining lug‘aviy imkoniyatlari aks etgan turli lug‘atlardan foydalanishni;
- o‘z fikrini nutq sharoitiga mos ravishda turli shakllarda yetkaza olish ko‘nikmalarini hosil qilishni;
-muayyan bir xabarni yoki ma’lumotni turli shakllarda ifoda etish yo‘llarini;
-yosh va malaka darajasiga mos bo‘lgan badiiy, ilmiy-siyosiy asarlarni o‘rganib, ular haqidagi fikr-mulohazasini, shaxsiy munosabatini og‘zaki, yozma shakllarda to‘g‘ri bayon eta olish ko‘nikmasini hosil qilishni;
-moddiy borliqni o‘rganish va uni tafakkur birliklarida ifodalashda, jamiyat a’zolari orasida muloqot o‘rnatishda ona tili va boshqa tillarning o‘ziga xos ahamiyatini his etish uchun zarur bo‘lgan nazariy ma’lumot hamda amaliy ko‘nikmalar berishni asosiy vazifa qilib qo‘yadi.
Yosh avlodda ijodiy tafakkur va mustaqil fikrlash ko‘nikmalarini shakllantirish muhimdir. O‘quvchining o‘quv materialini o‘zlashtirishi murakkab jarayon bo‘lib, til hodisalarini kuzata olish, izlanish, qiyoslash, umumiylik va alohidalikni aniqlash, farqlarni topish, tasnif etish, hukm chiqarish, qo‘llash bilan bog‘liq:
kuzatish – berilgan topshiriq asosida til hodisalarini tahlil qilish;
izlanish – o‘ylash, xotirada tiklash, so‘rash, lug‘at, qomus, internet manbalaridan foydalanish asosida bilimlarni boyitish;
narsa-hodisa mohiyatini qismlar sharhi orqali yoritish – har bir hodisani alohida-alohida sharhlay olish;
qiyoslash – tizimdagi hodisalarni o‘zaro taqqoslay bilish;
umumiylikni aniqlash – hodisalarning o‘xshash va umumiy tomonlarini aniqlash;
farqlarni topish – hodisalarning bir-biridan farqli tomonlarini ajrata bilish;
tasnif etish – tizimdagi hodisalarni o‘xshashlik va farqlari asosida guruhlarga ajratish;
hukm chiqarish – hodisalar tizimi haqida umumlashma hukm, xulosa, qoida chiqara olish;
alohidalikni aniqlash – o‘rganilgan hodisalarning yondosh voqelik bilan munosabatlarini aniqlash;
qo‘llash – hodisalarni mustaqil ravishda yozma va og‘zaki ko‘rinishda sharhlab, ijodiy matn tuza olish.
Ijodiy tafakkur va mustaqil fikrlashning oliy ko‘rinishi matn yaratishdir

1.