Birinci qrupa daxil olanlar ustad sənətkarlardır. Onlar geniş yaradıcılıq və ifaçılıq imkanlarına
malikdirlər. Aşıq sənətinin sirlərinə dərindən bələd olub, bədahətən söz deyən, saz havalarını məharətlə ifa edən,
aşıq və dastan repertuarlarını dərindən mənimsəyən, şəyird yetişdirən sənətkarlardır. Bu aşıqlar da iki tipə
ayrılır. Birinci tipə məxsus olanlar sənətə ənənəvi yollarla yiyələnənlərdir. Onlar öz həvəs, zəhmət və
istedadlarının gücü ilə aşıq sənətinin sirlərinə yiyələnib kamil mərhələyə çatır, ustad yanında dərs alır, ölkələr
gəzir, məclislər aparır, dünyəvi, xüsusilə islami dəyərləri dərindən öyrənir, elin-obanın yol göstərəni, baş biləni,
məsləhətçisi olurlar. Bu tip aşıqlar aşıq sənətinin sirlərini öz ustadlarından öyrənir, sonralar öz şəyirdlərinə də
sənəti bütöv şəkildə mənimsətməyə böyük həvəs, diqqət və qayğı göstərirlər.
