Əmin Rəsulzadə Məhəmməd Əmin Rəsulzadə Dərviş Məstəli şahın fala baxdığı, Şeyx Nəsrrullahın ölü diriltdiyi məmləkətdən bir millət formalaşdırmış, dövlət yaratmış unikal şəxsdir.
Azərbaycan milli qurtuluş hərəkatının böyük ideoloqudur. İlk Demokratik Azərbaycan Dövlətinin banisidir. İstiqlal məfkurəmizin (azadlıq idealogiyasının) yaradıcısıdır.
İranın İngiltərə və Fransada səfiri, İran senatının sədri, vaxtilə “Məşrutə” hərəkatında Məhəmməd Əminlə birgə çalışan Seyid Həsən Tağızadə xatirələrində yazır: “Rəsulzadə, bütün ömrüm boyunca Şərq dünyasında rastlaşmadığım, fövqəladə, nadir insanlardan biridir. Məhəmməd Əmin bəy tərbiyəli, güclü və sağlam məntiq sahibi, öz yoluna dərin inam bəsləyən bir mücahid, örnək olan insan idi. Belələrinə bizim zamanımızda həmən-həmən rastlaşmaq imkansız olduğu kimi, bütün dünyada da axtarsan rastlanmaz...”.
