Murodova D

b) Diniy e’tiqod

Yuqorida ta‟kidlab o‟tilgandek eftaliylar o‟zining madaniyati va diniy dunyoqarashi nuqtai nazaridan turlicha bo‟lgan xalqlarni birlashtirgan. Natijada bu davrda turli diniy e‟tiqodlar va diniy tizimlar vujudga kelgan. O‟rta Osiyoda Erondagidan o‟zgacha shaklda mavjud bo‟lgan zardushtiylik bilan bir qatorda, moniylik diniy oqimi ham mavjud bo‟lgan.
Markaziy Osiyoda zardushtiylik mahalliy boshqa dinlar bilan uyg‟unlashgan holda mavjud edi. Jumladan, Siyovush va Anahita e‟tiqodi zardushtiylik diniy marosimlari bilan birikib ketgan. Shu bilan birga eramizning IV asrida zardushtiylar Navro‟z kuni erta tongda Buxoroda Siyovush qabri ustida xo‟rozni qurbonlikka keltirganlar. Arxeologik tadqiqotlar orqali qo‟lga kiritilgan terrakota topilmalari hamda tangalardagi tasvirlar bu davrda hali ham Vaxsh, Mitra, Anahita e‟tiqodi hukm surganligidan guvohlik beradi. Dunyoviy dinlardan biri sanalgan buddaviylik e‟tiqodi ham eftaliylar davrida mavjud bo‟lgan. Bir guruh mutaxassislar eftaliy hukmdorlarning buddizmni qo‟llab quvvatlagan desalar, yana bir guruh olimlar eftaliylar aksincha istilochilik yurishlari davrida buddaviylik ibodatxonalarini vayron etganliklari ta‟kidlanadi.
Olimlarning tadqiqotlaridan shu narsa ma‟lum bo‟ladiki, eftaliylarning Shimoliy Hindistonni zabt etishlari ularni buddizm bilan yaqinroq tanishishlariga zamin yaratadi. Bu esa eftaliy tangalarida buddaviylikdagi hosildorlik ramzining “purna-ghata”ning, aks ettirilishida ko‟zga tashlanadi.
Eftaliylar hattoki buddaviylik ibodatxonalari qurilishida ham faol tashabbus ko‟rsatganliklari Marvda olib borilgan arxeologik tadqiqotlar orqali ochib o‟rganilgan “sangharama”dan ma‟lum.
Olimlarning bir guruhi eftaliylarning xristianlikning Nestorian
oqimi tarafdorlari bo‟lganliklarini ta‟kidlaydilar. Bu ma‟lumotlar olimlar tomonidan arxeologik tadqiqotlar va manbalarga asoslangan holda keltiriladi. Jumladan, V asrda Marvda eftaliylar davrida yepiskoplik mitropoliyaga aylantirilgan. Marv esa Markaziy Osiyodagi nestorianlik markaziga aylangan. VII asr boshlarida esa Toharistonda moniheylarning bosh qarorgohi mavjud bo‟lgan. Markaziy Osiyoda diniy marosimlarni xristianlar-suriy, maniheylar-parfiy, buddistlar esa – sanskrit tilida olib borganlar. Bu dinlardan tashqari eftaliylar davlatida hinduizm, xamda tabiat kuchlariga sig‟inish mavjud bo‟lgan. Umuman olganda eftaliylar davrida yagona hukmron bo‟lgan va davlatning rasmiy dini darajasiga ko‟tarilgan din haqida yagona xulosa mavjud emas. Bundan ko‟rish mumkinki diniy bag’rikenglik bu davlatning muhim ko‟rinishlaridan biri bo‟lgan.